ˈSëëdhɛ ˈö Pɔdhö ˗ya bɔ Wlɔmö ˗mɛn ˗nu ˗dhɛ

8 ˗Ya kë ˈˈdhʋ̈ kö za ˈyaa mɛn ˗nu ˈö waa Yesu Klito* ˗an ˗kɔ ˈdhö wo ˈkoo bhë ˗an ˗bha. 2 ˗A ˗gɛn ˗mü ꞊dhɛ ˗zuu ˈˈslʋ̈ʋ̈slʋ̈ ˗bha ˈtɔŋ˗ ˈö ˗tosɛta nu mɛn ˗nu ˈö waa Klito ˗an ˗kɔ ˈdhö ö ˈkoo ˗an ˗dhɛ bhë, ˗ya ü bho ꞊sɔŋ yaa waa ga ˗an ˗bha ˈtɔŋ˗ ˗gɔ ꞊dhuëŋdhɛ ˈgü. 3 Moizö ˗bha ˈTɔŋ˗ ˗kɔ yö ˈti ꞊mɔɔn˗ ˗bha kö ˗yö ka bho ˈˈgan ˈgü mɛnbhɩɩdhe ˗bha ˗kë ˈˈtëëtë ˗sü ˈö ꞊sɔŋ yaa ˈdhö˗ ˈgü bhë ˗a ˗wɔn ˈgü. ˈˈKɛɛ ˗Zlan ˗yö ö ˗de Gbö ˗bɔ, ˈö bun ˈö bhɔ mɛnbhɩɩdhe ˗bun ˈö kwa ˗gɔ ˈö ꞊sɔŋ yaa ˈdhö˗ ˈgü ˗a ˗bha bhë ˗a nu ˗a ˗dhɛ, kö ˗yö ꞊sɔŋ yaa bho ˈˈshia˗, kö ˈkwa ˈgo ˈˈgan ˈgü. ˗A ˗kë ˈˈdhʋ̈ ˗sü ˈgü, ˈwɔn yaa ˈö mɛnbhɩɩdhe ˈgü bhë ˗Zlan ˗bha za ꞊yaa˗ ˈkun. 4 ˗Yö ˗kë ˈˈdhʋ̈ kö ˈwɔn ˈö kpɛnŋdhö ˈö ˈTɔŋ˗ ˗ya pö ˈkwa˗ kë bhë, ˈkwa ˗mɔn ˗a kë ˗sü ˗bha, kö ˈkwaa ˗dho ˈwɔn ˗nu kë ꞊dhɛ ˗kɔ ˈö ˈwɔn yaa ˗bun ˈö kwa ˗gɔ ˈö˗ ˈˈpiʋ̈ ˈkwa˗ kë ˗a ˈka ˗a ˈdhö, ˈˈkɛɛ kö ˈkwa˗ kë ꞊dhɛ ˗kɔ ˈö ˗Zlan ˗bha ˗zuu ˈdhö˗ ˈˈpiʋ̈ kö ˈkwa˗ kë ˗a ˈka bhë ˗a ˈdhö. 5 ˗A ˗gɛn ˗mü ꞊dhɛ mɛn ˗nu ˈwo ˗tosɛta ˗kë ꞊dhɛ ˗kɔ ˈö ˗an bun ˈdhö˗ ˈˈpiʋ̈ ˗wa kë ˗a ˈka ˗a ˈdhö bhë, ˈpë ˈwo wo ˗zota ˗a ˈgü ˈyö ˗tɔ ˗an ˗de bun dhɔɔbhaawɔn ˗nu. ˈˈKɛɛ mɛn ˗nu ˈö ˈwo ˗tosɛta ˗kë ꞊dhɛ ˗kɔ ˈö ˗zuu ˈˈslʋ̈ʋ̈slʋ̈ ˗ya pö ˗a ˈka ˗a ˈdhö, ˈpë ˈwo wo ˗zota ˗a ˈgü ˈyö ˗tɔ ˈwɔn ˗nu ˈö ˗zuu ˈˈslʋ̈ʋ̈slʋ̈ mɛn ˗blü ˗an kë ˗sü ˗bha. 6 ˗A ˗kë ˈˈdhʋ̈ ˗sü ˈgü, ö ˗zota ö ˗de bun dhɔɔbhaawɔn ˈgü ˗sü ˗yö ˗dho mɛn ˈka ga ˗ʒian ˗ta. ˈˈKɛɛ ö ˗zota pë ˈö ˗zuu ˈˈslʋ̈ʋ̈slʋ̈ ˗yö mɛn ˗blü ˗a kë ˗sü ˗bha ˗a ˈgü ˗sü ˈö bhë, ˗yö ˗dho mɛn ˈka ˗tosɛta waa ˗yadeflëëgüsü ˗ʒian ˗ta. 7 ˗A ˗gɛn ˗mü ꞊dhɛ mɛn ˗nu ˈö ˈwo wo ˗zota wo ˗de bun dhɔɔbhaawɔn ˗nu ˈgü, ˗wo ˗Zlan ˈyɔɔ˗ ˗nu ˈka, ˈyö sü ꞊dhɛ ˈwaa ˗Zlan ˗bha ˈtɔŋ˗ ˗nu ꞊bhlëë ˗ya, ˗an ˗kɔ ˈyaa ꞊mɔɔn˗ ˗bha ˗ʒiaanwo toŋtoŋdhö. 8 ˗A ˗kë ˈˈdhʋ̈ ˗sü ˈgü, mɛn ˗nu ˈö ˈwo ˗tosɛta ˗kë wo ˗de bun dhɔɔbhaawɔn kë ˗sü ˈka bhë, ˈwaa ꞊mɔɔn˗ ˗bha kö ˗wo kë ˗Zlan ˗dhɛ ˗së.

9 ˈDhɛ ˈö ˈˈdhʋ̈, ˗ya kë ꞊dhɛ ˗Zlan ˗bha ˗zuu ˗yö ka ˈgü ꞊dedewo, ka ˈti ˗dho ˗tosɛta kë ka bun dhɔɔbhaawɔn ˗nu kë ˗sü ˈka. Ka ˗dho ˗a kë ꞊ʒiaan ꞊dhɛ ˗kɔ ˈö ˗zuu ˈˈslʋ̈ʋ̈slʋ̈ ˗yö ka ˗blü ˗a kë ˗sü ˗bha ˗a ˈdhö. Mɛn ˈö Klito ˗bha ˈwɔn yö ˗kɔ* ˈyaa˗ ˗gɔ, kö ˗a ˗mɛn ˈyaa˗ ˗bha ˈka. 10 ˈˈKɛɛ kaa Klito ˗nu ka ˗kɔ ˗ya kë ˈkoo, ˈkö ˗kë ꞊dhɛ ka bun ˗yö ga ˗sü ˈka ꞊sɔŋ yaa ˗wɔn ˈgü, ˗zuu ˈˈslʋ̈ʋ̈slʋ̈ ˗dho ka kë ˈˈbhɩɩ˗ ˗Zlan ˗bha ka ˗yö kpɛnŋdhö ˗sü ˗wɔn ˈgü. 11 ˈDhɛ ˈö ˈˈdhʋ̈, ˗ya kë ꞊dhɛ ˗Zlan ˈö Yesu bho ga ˈgü bhë, ˗a ˗bha ˗zuu ˗yö ka ˈgü, yö ˈö Yesu Klito bho ga ˈgü bhë, ˗yö ˗dho ˗tosɛta nu ˈpö ka bun ˈö gapë ˈka bhë ˗a ˗dhɛ ˗a ˗bha ˗zuu ˈö ka ˈgü bhë ˗a ˈsaa˗ ˈgü.

12 ˗A ˗kë ˈˈdhʋ̈ ˗sü ˈgü n ꞊dhegblü ˗nu, ˈwɔn ˈbhaa kë ˗sü ˈˈpɔ ˗yö kwa ˗bha. ˈˈKɛɛ ˗a ˈˈpɔ ˈö ˈˈdhʋ̈, ˈyaa ˈnën ˈö ˗tɔ ˗to kwa bun dhɔɔbhaawɔn ˗nu ˈˈpiʋ̈ ˗sü kö ˈkwa ˗tosɛta kë ꞊dhɛ ˗kɔ ˈö˗ ˈˈpiʋ̈ ˗a ˈdhö. 13 ˗A ˗gɛn ˗mü ꞊dhɛ kö ˈka ˗tosɛta kë ka bun dhɔɔbhaawɔn ˗nu kë ˗sü ˈka, ˈyaa za ˈgü ꞊dhɛ ka ˗dho ga. ˈˈKɛɛ kö ˗zuu ˈˈslʋ̈ʋ̈slʋ̈ ˈsaa˗ ˈgü, ˈka ka ꞊kwaa ka bun dhɔɔbhaawɔn kë ˗sü ˗zü ˈpapadhö,* ka ˗dho ˗këdhösü ꞊slɔɔ˗. 14 ˗A ˗gɛn ˗mü ꞊dhɛ mɛn ˈˈpɛpɛ ˈö ˗Zlan ˗bha ˗zuu ˗yö ˈˈdhiʋ̈sü ˗an ˈka, kö ˗Zlan ˗bha ˈnën ˗nu ˗mü ˗an ˈka ꞊dedewo. 15 ˈYö sü ꞊dhɛ ˗Zlan ˗bha ˗zuu ˈö ˈka˗ ꞊slɔɔ bhë, ˗zuu ˈö ka ˗kë ꞊dhuëŋ ˈka kö ˈˈsuʋ̈ ˗yö ka kë ˈzü ˈyaa ˗mü, ˈˈkɛɛ ˗zuu ˈö˗ ˗zɔn ꞊dhɛ ˗Zlan ˗ya ka kë ö ˗bha ˈnën ˗nu ˈka ˈyö˗ nu ka ˗dhɛ. ˗A ˗zuu ˈö ˈˈdhʋ̈, yö ˈnën ˈkwa ꞊mɔɔn˗ ˗bha ˈkwa bɔ ˗a ˗ta ˈkwa ˈˈgbla ˈkwa˗ pö: «Aba* n Dë!» 16 ˗Zlan ˗bha ˗zuu ˗ya ˗kë* ˈö ˈkwa˗ ˈwɔn dɔ kwa zuʋ̈ˈˈ ˈˈpiʋ̈ ˈkpakpadhö ꞊dhɛ ˗Zlan ˗bha ˈnën ˗nu ˗mü kwa ˈka. 17 ˈKwa kë ˗Zlan ˗bha ˈnën ˗nu ˈka ꞊dhɛ ˗kɔ ˈö bhë ˗a ˈdhö, kö ˈkɛnŋpë ˈö ˗Zlan ˗ya ˗ya ö ˗bha ˈnën ˗nu ˗gɔ bhë, ˗yö kwa ˗bha ˈka ˈpö, kö kwaa Klito ˗nu ˈkwa˗ ꞊slɔɔ. Kwaa˗ ˗nu ˈkwa saanˈˈ ˈsü kwa ˈkwëë˗, ˈtɔbhɔdhe ˈö ˗dho ˗a ꞊slɔɔ˗ bhë kwa ˗dho ˗a ꞊slɔɔ ˈpö.

18 ˗A ˗gɛn ˗mü ꞊dhɛ n ˗bha ˈgü, saanˈˈ ˈö ˈkwa bɔ ˗ni ˗a ˈgü ˈˈtʋ̈ŋ ˈö yö ˗a ˈgü bhë, ˈwaa ꞊mɔɔn˗ ˗bha ˗wa ˗zɔn toŋtoŋdhö ˈtɔbhɔdhe ˈö ˗Zlan dho bɔ kwa ˗ta ˈö ˈˈdhɛ bho ˗a ˗ta bhë ˗a ˈka. 19 ˈˈTʋ̈ŋ ˈö ˗Zlan gbö ˗nu ˗bha ˈtɔbhɔdhe dho ˈgo ˗a ˈka ˈˈdhɛ ꞊löö bhë, ˗Zlan ˗dapë ˗nu ˈˈpɛpɛ ˈˈɲan ˗ya ˗gɔ ꞊dedewo. 20 ˗A ˗gɛn ˗mü ꞊dhɛ ˗Zlan ˗dapë ˗nu ˗bha ˗këdhösü ˗yö ˗kë pë ˈö˗ ˗yö ˗a ˗bha ˗pë ˈyaa ˈdhö ˗a ˈka. ˈˈKɛɛ kë ˈö˗ wo ˈˈdhʋ̈ bhë, yö ˈti kë ˗an ˗de ꞊kwɛɛ˗ ˗wɔn ˈka, ˗Zlan ˈnën ˈö ö ꞊kwaa ˗an ˗zü ˈö ˗kë ˈˈdhʋ̈, ˗dhɛkpaɔ dhiʋ̈ˈˈ ˗së ˈö˗ ˗ya ˗an ˗gɔ ˈö yö ˗a ˗wɔn ˈgü: 21 ˗Ya ˗pö ꞊dhɛ ö ˗dapë ˗nu ˗dho ˈgo bun ˈö shiʋ̈ˈˈ ˗pë ˈka bhë ˗a ˗gɔ ꞊dhuëŋdhɛ ˈgü, ˈö ˈwo ˗kë ˗Zlan ˗bha ˈnën ˗nu ˈö ˗potaadhe ˈˈmlünmlünsü ˈdhö ˗an ˗gɔ ˗an ˈka. 22 ˈYö ˗tɔ kwa˗ ˈwɔn ˗dɔ ꞊dhɛ ˈö sü ˈˈdhʋ̈ yi ˈö bhë ˗a ˗bha ˈö nu ˈö yö ˗a ˈka ꞊dɛɛ ˗bha, ˗Zlan ˗dapë ˗nu ˈˈpɛpɛ ˗wo ˈˈgbʋ ˗wëësü bɔ ˗ni ˈgü ˗kplawo, ˈö ˈwo saanˈˈ ˈsü ˗ni ˈgü. 23 ˈˈKɛɛ wo dosɛnŋ ˈwaa ˗mü. Kwa ˈö ˈkwa kwa ˗bha ˗dhɛkpaɔ dhiʋ̈ˈˈ ꞊saan ˈˈpian ˗blɛɛsü ˈö ˗kë ˗zuu ˈˈslʋ̈ʋ̈slʋ̈ ˈka ˗a ꞊slɔɔ bhë, kwa ˗de ˈpö kwa ˈˈgbʋ bɔ ˗ni ˈgü kwa zuʋ̈ˈˈ ˈˈpiʋ̈, ˈö ˈkwa kwa ˈˈɲan ˈto ˗ni ˈgü ˈˈtʋ̈ŋ ˈö ˗Zlan dho kwa kë ö gbö ˗nu ˈka kö ˈkwa ˈgo bun ˈö kwa ˗gɔ yö ˗a ˈgü ˗gɔtadhɔpë ˈsaa˗ ˈgü bhë ˗a ˗gɔ ꞊dedewo. 24 ˗A ˗gɛn ˗mü ꞊dhɛ ˗zo ˗yö ˈwɔn ˈö bhë ˗a ˗dhɛ ˗sü ˗yö ˗kë kwa ˗gɔ ˈö ˈkwa dha ˗a ˈka. ˈˈKɛɛ pë ˈö mɛn ˗zo ˈdhö˗ ˗dhɛ ˈö ö ˈˈɲan to ˗a ˗gɔ ˗ya ˗kpan ˗a ˗bha, kö ˗a ˗dhɛ ˈyaa ˗bha ˈzü kö ˗yö ö ˈˈɲan ˈto ˗a ˗gɔ, ˈyaa ˈˈdhʋ̈ ˗ee? 25 Kwa ˗zo ˗yö ˗a ˗dhɛ ˗wɔn ˗ya kë ꞊ʒiaan pë ˈö ˈkwaa˗ yö ˗a ˈka, kwa kwa zuʋ̈ˈˈ ˗kun kwa ˗bha ꞊dedewo ˈö ˈkwa kwa ˈˈɲan to ˗a ˗gɔ ˗kplawo.

26 ˗Kɔ do ˈö bhë ˗a ˈka, ˗Zlan ˗bha ˗zuu ˈˈslʋ̈ʋ̈slʋ̈ ˗yö ˗nu kwa ˗dhɛ kwa ˗bha ˈˈtëëtëdhɛ ˈgü. ˗A ˗gɛn ˗mü ꞊dhɛ ˈwɔn ˈö mü ˈyö ˗tɔ, ˈpë kwa dua ˈdhö ˗mü kö ˈkwa˗ ˗dhɛ ˗Zlan ˗gɔ kwa ˗bha bhɛɛwo ˈgü, ˈkwaa˗ dɔ ˈˈtʋ̈ŋ ˈbhaa ˗nu ˈka. ˈˈKɛɛ ˈkö ˗kë ꞊dhɛ kwa ˈˈgbʋ ˗bɔ kwa zuʋ̈ˈˈ ˈgü ˈö ˈwɔn blɛɛˈˈ ˗kɔ ˈyaa ˈkwa ˗gɔ, ˗zuu ˈˈslʋ̈ʋ̈slʋ̈ ˗yö pë ˈö ˈkwa˗ ˈˈpiʋ̈ ˗a ˗dhɛ ˗Zlan ˗gɔ kwa ˗dhɛ. 27 ˈYö ˗Zlan ˈö ˗dhɛ yö mɛn zuʋ̈ˈˈ ˈgü bhë, pë ˈö ˗zuu ˈˈslʋ̈ʋ̈slʋ̈ ˈdhö˗ ˈˈpiʋ̈ ˈö˗ pö ˗ya ˗dɔ. ˗A ˗gɛn ˗mü ꞊dhɛ pë ˈö ˗zuu ˈˈslʋ̈ʋ̈slʋ̈ ˈdhö˗ ˗dhɛ ˗ni ˈgü mɛn ˗nu ˈwo ˈˈslʋ̈ʋ̈slʋ̈ ˗an ˗bha ˈka bhë, ˗yö ˗bɛ ˗Zlan dhɔɔbhaawɔn ˗bha.

28 Kwa˗ ˈwɔn ˗dɔ ꞊dhɛ pë ˈˈpɛpɛ ˈö ˗Zlan ˗ya ˗kë, ˗ya ˗kë ˈö ˈwo ˗bɛ wo ˈkwëë˗ ˗së ˈka, ˗yö kë ˈˈdhʋ̈ kö ˗yö ˈwɔn ˗së kë mɛn ˗nu ˈö yöö ˗Zlan ˗mɛn ö ˗dhɔ ˗yö ˗an ˗kë, ˗an ˗dhɛ. ˗A mɛn ˗nu ˈwo ˈˈdhʋ̈ yö ˈnën ˈö ˗an ˗dhɛ, ꞊dhɛ ˗kɔ ˈö˗ ˈˈpiʋ̈ ˗a ˈdhö. 29 ˈYö sü ꞊dhɛ, ˈö sü ˗a züdɔ ˗yi ˗bha, ˈwɔn ˈö ˗gban mɛn ˗nu ˈö ö ˗kɔ ˗yɛ ˗an ˗bha ˗a ˗bha ˗ya ˗dɔ, ˈö ˗we ˗a ˗bha kö ˗wo kë ꞊dhɛ ˗kɔ ˈö˗ Gbö ˈdhö˗ ˈka bhë ˗a ˈdhö. ˗Ya ˗kë ˈˈdhʋ̈ kö ö gbö ˗yö kë ˈnën ˗blɛɛsü ˈka ꞊dhegblüzë ˗nu ꞊va ˈwo bhë ˗an ꞊zinŋgü. 30 ˗Ya ˈgo mü ˈzü, mɛn ˗nu ˈö ö ˗kɔ ˗yɛ ˗an ˗bha* bhë, wo ˈnën ˈö ˗an ˗dhɛ. ˈYö mɛn ˗nu ˈö ˗an ˗dhɛ ˈˈdhʋ̈ bhë, ˈö ˗an sü ꞊dhɛ mɛn kpɛnŋdhö ˗nu ˈdhö. ˈYö mɛn ˗nu ˈö ˗an sü ꞊dhɛ mɛn kpɛnŋdhö ˗nu ˈdhö bhë, wo ˈnën ˈö ˈtɔbhɔdhe nu ˗an ˗dhɛ.

31 ˈDhɛ ˈö ˈˈdhʋ̈, ˈmën ˈkwa ˗dho ˗a pö ˈö ˗gban ˈwɔn ˗nu ˈwo bhë ˗an ˗bha? ˗Zlan ˗ya kë kwa ˈˈpiʋ̈, de ˈö˗ ˗kɔ dho ˗mɔn kwa ˗bha?* 32 ˗A zuʋ̈ˈˈ yö ˈti ˈto ˈzlöö ö Gbö nu ˗sü ˗bha. ˗Yö ˗we ˗a ˗bha kö ˗yö ga mɛn ꞊gban ˈˈpɛpɛ kwa ˗wɔn ˈgü. ˗Ya kë ˈˈdhʋ̈ kö pë ˈˈpɛpɛ ˈwo to, yö ˈti ˗dho ꞊mɔɔn˗ ˗bha kö ˗yö ˗an nu kwa ˗dhɛ ˈpö ˗ee? 33 ˗Zlan ˗bha mɛn ˗nu ˈö ö ˗kɔ ˗yɛ ˗an ˗bha bhë, de ˈö ˗dho za ˗ya ˗an ˗bha? ˗Zlan yö ꞊dede ˈnën ˗an yö ꞊dhɛ Mɛn kpɛnŋdhö ˗nu ˈdhö. 34 De ˈö˗ ˗bha za ꞊mɔɔn˗ ˗bha kö ˗yö ˗an ˈkun? Yesu Klito ˈnën ˈö ga ˗an ˗bha ˈka, ˈö go ga ˈgü. ˈˈTʋ̈ŋ ˈö yö ˗a ˈgü, ˗yö ˗ya ˗sü ˈka ˗Zlan ˗kɔ ˗së ˈgü, ˈö bhɛɛˈˈ ˗ni ˈgü kwa ˗bha ˈka.

35 ˗Mën ˈö ꞊mɔɔn˗ ˗bha ˗yö kwa ˈˈkan kwa ˗dhɔ ˈö Klito ˈgü bhë ˗a ˗bha? ˈWɔn ˈˈgbɩɩ˗ ˗ee, zuʋ̈dhiʋ̈tɛ ˗ee, ˈˈklʋʋbhɔdhe ˗ee, din˗ ˗ee, sɔ ˗wɔn ˗ee, ˗dɔ ga ˗yɛ ˈˈdhiʋ̈ ˗sü ˗ee ɛɛnˈˈ ˗blaan ˗dhaa ˗ee? 36 Pë ˈö ˗bɛnzë ˗sü ˈka ˗Zlan ˗Wo ˈsëëdhɛ ˈgü ˈyö ˗tɔ: «˗Wo yi ˗zë ˈˈtʋ̈ŋ ꞊gban ˈˈpɛpɛ ˈka ü ˗wɔn ˈgü. ˗Wo yi ˗yö ꞊dhɛ ˈˈbhlaa ˗nu ˈwo ˗dho ˗an zë ˗an ˈdhö.» 37 ˈˈKɛɛ kwa ˗kɔ ˗yö ˗ʒiö ˈwɔn ˗nu ˈwo bhë ˗an ꞊gban ˗gɔ ˈpapadhö mɛn ˈö kwa ˗dhɔ ˗ya ˗kë bhë ˗a ˈsaa˗ ˈgü. 38 ˗A ˗gɛn ˗mü ꞊dhɛ, ˗yö ga ˗sü ˈka n ˈgü ꞊dhɛ ˗yö ˗kë ga ɛɛnˈˈ ˗tosɛta kë ˗sü ˈka oo, ˗yö ˗kë ˈˈkiö ɛɛnˈˈ ˈˈsɛkɔɔnmɛn ˗nu ˈka oo, ˗yö ˗kë pë ˗nu ˈwo ꞊dɛɛ ɛɛnˈˈ ˈö ˈwo ˗dho kë ˗dhɛkpaɔ dhiʋ̈ˈˈ ˈgü ˗an ˈka oo, ˗yö ˗kë ˈˈpiigbɩɩpë ˗nu, 39 pë ˗nu ˈwo kwa ˗gɔ ˗ta ˈˈdhuŋ ꞊gblɛɛn ɛɛnˈˈ pë ˗nu ˈwo kwa ꞊löö ˈˈshiaa ꞊gblɛɛn ˗an ˈka oo, ɛɛnˈˈ ˗yö ˗kë ˗dapë ꞊suu ˈˈoo ˗su ˈka, ˗a ˈbhaa ˈyii ˗dho ꞊mɔɔn˗ ˗bha kö ˗yö kwa ˈˈkan kwa ˗dhɔ ˈö ˗Zlan ˈgü, ˈö kwa Dëmɛn Yesu Klito ˈgü ˈpö bhë ˗a ˗bha.