ˈö Matiö ˗ya ˗bɛnzë
28 ˈDhɛ ˈö ꞊glooyi ˗yö ˗ʒiö, ˗a ˗dhɛkpaɔyi ˈö dɔ ˗a ˈˈpiʋ̈* ˗a dhiapiʋ̈ ˈka, kö ˗dhɛ ˗yö ˈˈpʋ ˗ni ˈgü, ˈyö Madhi ˈö go Madala waa Madhi do ˗sü bhë, ˈwo dho kpɔɔˈˈ Yesu blɔɔndhɛ ˗bha.
2 ˈDhɛ ˈwo ˗lo mü ˈö ˈwo ˗dhɛ ˗ga, kö ˈˈsɛ ˗ya ꞊zii ˗ziisü ˈka, ˗a ˗gɛn ˗mü ꞊dhɛ kö Zoova ˗bha ˈˈkiö do ˗ya ˈgo dhaŋ˗ ˈgü ˗ya nu ˗ya ˗gwö ˈö kun blɔɔndhɛ ˈö bhë ˗a ˈˈdhiʋ̈ ˗a bho mü, kö ˗yö ˈɲaannu ˗sü ˈka ˗a ˗ta. 3 ˗A kwibhadhɛ ˈbhü ˗kun bhɔ ˗ni ˈgü ꞊dhɛ dha ˗bha ö ˈˈɲan bɔ ˗sü ˈdhö, ˈö˗ ˗bha sɔ ˗nu ˗wo ˗flʋ̈ ˈpapadhö ꞊dhɛ mënŋga ˈdhö. 4 ˗Yö ˈˈsuʋ̈ ˗da ˈˈsɔdha ˗nu ˈö ˈwo kun ˈˈglaadhiʋ̈sü ˗ni ˈgü bhë ˗an ˈgü ꞊dedewo ˈö ˈwo ꞊zii, ˈö ˈwo ˗kë ꞊dhɛ mɛn ˗nu ˈö ˗wa ga ˗an ˈdhö.
5 ˈYö ˗Zlan ˗bha ˈˈkiö ˗ya pö dhebɔ ˗nu ˈwo bhë ˗an ˗dhɛ: «ˈˈSuʋ̈ ˈya ˗dho ka kë, a˗ ˈwɔn ˗dɔ ꞊dhɛ Yesu ˈö ˈwo˗ zë ˈˈdhü ˗bha bhë yö ˈnën ˈö ˈka˗ mɛɛnˈˈ ˗ni ˈgü. 6 ˈYaa ˗dhɛ ˈö yö ˗a ˈgü ˈzüdho, ˗a ˗gɛn ˗mü ꞊dhɛ ˗ya ˈgo ga ˈgü ꞊dhɛ ˗kɔ ˈö˗ pö ˗a ˈka ka ˗dhɛ bhë ˗a ˈdhö. ˗Ka nu kö ˗dhɛ ˈö kun wɔ ˗sü ˈka ˗a ˗bha bhë ˈka˗ ˗ga, 7 kö ˈka ˈdho ˈˈvaandhö ˈka˗ pö ˗a ˗bha gwëëˈˈ ˗nu ˗dhɛ: ‹˗Ya ˈgo ga ˈgü, ˗ya dɔ ka ˈˈdhiʋ̈ ˗ya ˈdho Galile. Ka ˗dho ˗kpan ˗a ˗bha ˈmü.› ˈWɔn ˈö ˗kë n ˗gɔ kö ˈa˗ blɛɛˈˈ ka ˗dhɛ ˈyö bhë.»
8 ˈDhɛ ˈö ˗kë ˈˈdhʋ̈, ˈyö ˈwo go blɔɔndhɛ ˈö bhë ˗a ˈgü ˈzozodhö kö ˈˈsuʋ̈ ˗yö ˗an kë ˗ni ˈgü, ˈˈkɛɛ kö ˗an zuʋ̈ˈˈ ꞊nii ˗yö ˗da ˗sü ˈka ꞊dedewo. ˈYö ˈwo ˗bia ˗lö kö ˈwo ˈdho nɔɔn˗ ˈö bhë ˗a pö ˗a ˗bha gwëëˈˈ ˗nu ˗dhɛ. 9 ˈWo ˗dho ˈˈkan wo ˗ta kö Yesu ˗ya nu ˗an ˗gɔ ʒiaan˗, ˈyö˗ pö ˗an ˗dhɛ: «ˈKa ꞊bo!» ˈYö dhebɔ ˗nu ˈwo bhë ˈwo ꞊ɲɔɔn ˗a ˈˈsuee ˈwo ˈˈgblëënnu ˗a ˈˈdhiʋ̈, ˈwo wo ˗kɔ ꞊plʋʋ ˗a ˗gɛn ˗nu ˈka. 10 ˈDhɛ ˈö ˗kë ˈˈdhʋ̈, ˈyö ˈYesu ˗ya pö ˗an ˗dhɛ: «ˈˈSuʋ̈ ˈya ˗dho ka kë! ˗Ka ˈdho ꞊ʒiaan ˈka˗ nɔɔn˗ pö n ꞊dhegblü ˗nu ˗dhɛ kö ˗wo ˈdho Galile ˗sɛ ˈgü. ˈDhɛ ˈö ˈmü ˈyö ˈwo ˗dho ˗kpan n ˗bha ˗a ˗bha.»
11 ˈˈTʋ̈ŋ ˈö dhebɔ ˗nu bhë ˈwo kun ˈdho ˗ni ˈgü ˗a ˈka, kö ˈˈsɔdha ˗nu ˈö ˈwo kun Yesu blɔɔndhɛ ˗maan kë ˗ni ˈgü bhë ˗a mɛn ˈbhaa ˗nu ˗wa ˈdho ˈplöö, ˗wa ˈwɔn ˗nu ˈwo ˗kë ˗an ꞊gban ˗gɛn bho ˈˈsaabhomɛn ˗nu ˗gɔmɛn ˗nu ˗dhɛ. 12 ˈDhɛ ˈˈsaabhomɛn ˗nu ˗gɔmɛn ˗nu waa mɛn zii ˗nu ˈwo ˗yakwëë ˗kë, ˈyö ˈwo ˈwëëga ꞊va nu ˈˈsɔdha ˗nu ˈwo bhë ˗an ˗dhɛ, 13 ˈyö ˈwo˗ pö ˗an ˗dhɛ: «˗Kaa pö, ‹˗A ˗bha gwëëˈˈ ˗nu ˈnën ˈwo nu gbeŋ ˈö ˈwo˗ ꞊glöö ꞊kwaan kö yi yi zë ˗ni ˈgü.› 14 ˈˈSɛkɔɔnmɛn ˗ya ˈwɔn ˈö bhë ˗a man, yi ˈnën ˈyi ˗dho ˗a ˗ta ˈˈpʋ ˗a ˗dhɛ. ˈˈSuʋ̈ ˈya ˗dho ˈka kë.» 15 ˈYö ˈˈsɔdha ˗nu ˗wo ˈwëëga ˈö bhë ˗a sü, ˈö ˈwo˗ ˗kë ꞊dhɛ ˗kɔ ˈö ˈwo˗ pö ˗a ˈka ˗an ˗dhɛ bhë ˗a ˈdhö. ˈYö ˈwɔn ˈwo˗ ꞊blɛɛ bhë ˈö ˗pɛn ˗dhɛ ꞊gban ˈˈpɛpɛ ˈgü Zuifö ˗nu ꞊zinŋ ˈgü, ˈö dho ˈö yö ˗a ˈka ꞊dɛɛ ˗bha.
16 ˈˈKɛɛ Yesu ˗bha gwëëˈˈ ˗nu ˗kɔŋ do ö ga do (11) ˈwo to, wo ˗zë ˗wo ˗dho Galile ˗tɔn ˗ta, ˗dhɛ ˈö Yesu ˗ya pö waa˗ ˗nu wo ˗dho ˗kpan wo ˈkwëë˗ ˗a ˗bha bhë ˗a ˈgü. 17 ˈDhɛ ˈwo ˗kpan ˗a ˗bha, ˈyö ˈwo ˗gblü ˗a ˈˈdhiʋ̈. ˈˈKɛɛ ˗a mɛn ˈbhaa ˗nu ˈwaa kun ˗a ˈsü ˗ni ˈgü gagade ˈka ꞊dhɛ yö ˗mü. 18 ˈYö Yesu ˗yö ꞊ɲɔɔn ˗an ˗bha ˈö˗ pö ˗an ˗dhɛ: «Pë ˈˈpɛpɛ ˈö ˈwo dhaŋ˗ ˈgü ɛɛnˈˈ ˈwo ˈˈsɛ ˗ta, ˗Zlan ˗ya ˗kɔ ˗ʒiö ˗an ˗gɔ ˗sü ꞊faan nu n ˗dhɛ. 19 ˈDhɛ ˈö ˈˈdhʋ̈, ˗ka ˈdho ˈˈsɛ ꞊gban ˈˈpɛpɛ ˈgü, ˈka mɛn ˗nu kë n ˗man gwëëˈˈ ˗nu ˈka. ˗Ka ˗an ˗bɔ ˈˈyi ꞊bhaa n Dë, ˗a Gbö waa ˗zuu ˈˈslʋ̈ʋ̈slʋ̈ ˗an ˈtɔ ˈgü, 20 ˈka ˗an ꞊klaŋ kë ˈwɔn ˈˈpɛpɛ ˈa˗ pö ka ˗dhɛ bhë ˗an ˈka kö ˗wa ˗ya ꞊bhlëë ˈgü. ˗Yö kë ka ˈˈɲaan ꞊dhɛ a ˗dho kë ka ˈˈpiʋ̈ ˈö to ˗a ˈka ˈˈdhʋ̈ ˈö yö ˗a ˈka ˈˈkpɔnŋtaadhɛ ɲën ˈˈtʋ̈ŋ ˗bha.»