ˈSëëdhɛ ꞊plɛ ˗naan ˈö Pɔdhö ˗ya bɔ Kolɛntö ˗mɛn ˗nu ˗dhɛ
10 Man Pɔdhö ˗mɛn ˈö mɛn ˈbhaa ˗nu ˗bha ˈgü ˈman kë ka ˈˈpiʋ̈ ˈmü ˈa ˗kë ˗bhaasü, ˈˈkɛɛ ˈö ˈmaan ˈmü ˈa ˗kë ˈˈdhiʋ̈˗ bhë, a ˗bhɛɛ ka ˗dhɛ Klito ˗bha ˗kë ꞊dhɔŋsü ˗sü waa˗ ˗bha zuʋ̈sëdhɛ bhë ˗a ˈka. 2 ˗Ka pë ꞊gban kë kö ˈˈtʋ̈ŋ ˈa ˗dho kë ˗a ˈka ka ˈˈpiʋ̈ ˈmü bhë ˈmaan ˗dho kë ˈˈdhiʋ̈˗, ˈö mɛn ˗nu ˈwo˗ pö ˗ni ˈgü ꞊dhɛ yi ˈwɔn ˗kë ꞊dhɛ mɛnbhɩɩdhe ˗nu ˗bha ˈwɔn kë ˗kɔ ˈdhö bhë, ˈwɔn ˗nu ˈa ˗an ˗ya n ˗zo ˈˈpiʋ̈ kö ˈa ˗an kë ˗an ˈka bhë ˈa ˗an ˗kë. 3 ˈKö ˗kë ꞊dhɛ yi ˗tosɛta ˗kë ꞊dhɛ mɛnbhɩɩdhe ˈˈwɛɛ ˗nu ˈwo to ˗an ˈdhö, ˗gblü ˈyi˗ gɔn ˗ni ˈgü bhë, ˈyaa˗ gɔn ꞊dhɛ ˗kɔ ˈö mɛnbhɩɩdhe ˗nu ˗wo ˗gblü gɔn ˗a ˈka ˗a ˈdhö. 4 ˗A ˗gɛn ˗mü ꞊dhɛ yi ˗bha ˗gblü ˗gɔn ˗a ˈka ˗kwɛɛ ˗nu ˈwaa ꞊dhɛ mɛnbhɩɩdhe ˗nu ˗bha ˈdhö. ˗Gblü ˗gɔn ˗a ˈka ˗kwɛɛ ˈˈpiigbɩɩsü ˗nu ˈö ˗Zlan ˗yö ˗an nu yi ˗dhɛ kö ˈyi pë ˈˈgbɩɩ˗ ˗nu ˈwo ˗kë ꞊dhɛ ˈˈkplʋʋ ˗nu ˈdhö ˗an wüüˈˈ ˗an ˈka, wo ˗mü. 5 Wo ˈnën ˈyi ˗an sü ˈö ˈyi ˈwɔn ˗yö ˈko ˈˈdhiʋ̈ ˗kɔ waa pë ˈˈoo ˗pë ˈö ˗gban ˗Zlan dɔ ˗sü ˗gɔ ˗an ꞊wüü ˗a ˈka, ˈö ˈyi ˗zotadhe ˈdhɛ ˈö ˈdhö ˗a kun ˈˈgan ˈka ˈyi dho ˗a ˈka ˈwɔn ˗man Klito ˗ta ˗sü ˗ʒian ˗ta. 6 Ka ˗bha ˗a ˗zɔn ˗sü ˈö ˈkpakpadhö ꞊dhɛ ˗gɔ ˗dho ˈˈshiaa ˗sü ˗yö ka ˗gɔ, yö ˈnën ˈö yi ˈˈɲan ˈdhö˗ ˗gɔ kö ˈyi ˈwɔn bho mɛn ˈˈoo ˗mɛn ˈö ˗gɔ ˗dho ˈˈshiaa ˗sü ˈyaa˗ ˗gɔ ˗a ˈgü.
7 Pë bunbhadhɛ ˈnën ˈö ˈka˗ ˗ga ˈyö ˈka˗ ꞊bhlëë ˗ya ˗kɔ sü ˗a ˗bha. Mɛn ˈö˗ ˈwɔn dɔ ꞊dedewo ꞊dhɛ ö Klito ˗bha ˈka, ˗a dua ˗mü kö ˗yö ö ˗zota ˈzü ˈwɔn ˈö yö ˗a ˈgü: Yi Klito ˗bha ˈka ꞊dhɛ ˗kɔ ˈö yö ˗de ˈpö ˈö˗ ˗bha ˈka bhë ˗a ˈdhö. 8 ˈKö ˗kë ˗ʒiaanwo ꞊dhɛ ˗kɔmɔnwɔnbhasü ˈö Dëmɛn ˗ya nu yi ˗dhɛ kö ˈyi ka ꞊faanmën ˗a ˈka kö ˈyaa ˗dho ka ˈgü ga bhë, a n ˗de ˗sü ˈˈgɔɔgɔ ˈnën ˈbhaa wo ˗a ˗wɔn ˈgü, ˈlëë˗ ˈyii ˗dho dɔ n ˗bha. 9 N ˈti˗ pö ˈˈdhʋ̈ kö ˗yö kë ka ˈgü ꞊dhɛ ˈsëëdhɛ ˗nu ˈa ˗an bɔ ˗ni ka ˗dhɛ bhë a˗ ˗kë ˈˈdhʋ̈ kö ˈa ˈˈsuʋ̈ ˗da ka ˈgü. 10 ˈYö sü ꞊dhɛ mɛn ˈbhaa ˗nu ˗wa ˗pö: «˗A ˗bha ˈsëëdhɛ ˗nu ˈö ˗an bɔ ˗ni ˈgü bhë ꞊faan ˗yö ˗an ˗bha, ˈˈkɛɛ yö ꞊dede ˗ya kë ˈyö, ˗yö ˗bhaasü ˈö˗ ˗wo ˈyaa pë ˈbhaa ˈka.» 11 Mɛn ˗nu ˈwo˗ pö ˗ni ˈgü ˈˈdhʋ̈ bhë, ˗yö kë ˗an ˈˈɲaan ꞊dhɛ pë ˗nu ˈyi ˗an ˗bɛnzë yi ˗bha ˈsëëdhɛ ˈgü bhë, yi ꞊dede ˈya ˗lo ˈmü yi ˗dho ˗an kë. 12 ˈYaa yi ˈˈpiʋ̈ ˗ʒiaanwo ꞊dhɛ mɛn ˗nu ˈö ˈwo wo ˗de ˗wɔn blɛɛˈˈ ˗ni ˈgü bhë, ˈyi yi ˗de ˗da ˗an ˈˈpiʋ̈ ɛɛnˈˈ ˈyi yi ˗de ˗zɔn ˗an ˈka. ˗An ˗bha wo ˗de ˗zɔn wo ˗de ˈka ˗sü ɛɛnˈˈ wo ˗de ˗dan wo ˗de ˈka ˗sü ˗ya ˗zɔn ꞊dhɛ ˈwɔndɔdhe ˈyaa ˗an ˗gɔ.
13 Yi ˗zë yi ˈti ˗dho yi ˗de ˈsü ˈˈgɔɔgɔ kö ˈyi˗ ʒiö ꞊gɔɔ. ˗Dhɛ ˈö ˗Zlan ˗ya nu yi ˗dhɛ kö ˈyi yö kë ˗a ˈgü, ˈö ˗dhɛ ˈö ˈˈdhʋ̈ ˈka˗ ˈgü bhë, yö ˈyi˗ ˗kë mü yö dosɛnŋ ˈnën ˈyi ˈˈgɔɔgɔ ˗a ˗wɔn ˈgü. 14 Yö ˈti kë ꞊dhɛ ˈya nu ˈya ˗lo ka ˈˈpiʋ̈ ˈmü kö ˗dhɛ ˈö ˗Zlan ˗ya nu yi ˗dhɛ bhë ˈya ˗lö ˗a ˗naan ˗zü. ˗Dhɛ ˈö ˈka˗ ˗bha bhë yi ˗bha ˗dhɛ ˗mü ˈsaadhö, ˗a ˗gɛn ˗mü ꞊dhɛ yi ˈnën ˈyi ˗tɔ mɛn ˗blɛɛsü ˗nu ˈyi nɔɔn˗ ˗së ˈö ˗gban Klito ˗bha bhë ˗a pö ka ˗dhɛ. 15 ˈYaa ˗lö ˗dhɛ ˈwo˗ nu yi ˗dhɛ ˗a ˗naan ˗zü kö ˈyi yi ˗de kë ˈˈgɔɔgɔ mɛn ˈˈwɛɛ ˗bha yö ˈö˗ ˗kë ˗a ˗wɔn ˈgü. Pë ˈyi˗ ˈˈpiʋ̈ ꞊ʒiaan ˈyö ˗tɔ ka ˗bha ˗zoyödhe ˗gɛn ˗yö ˗gban ˗kplawo kö yö ˈö ˈyi˗ ˗kë ˗dhɛ ˈwo˗ nu yi ˗dhɛ ˗a ˈgü ˗yö ˗dadhiʋ̈. ˗Ya kë ˈˈdhʋ̈ yi ˗dho yö kë ˈzü ꞊va, 16 ˈö ˈyi dho ˈyi nɔɔn˗ ˗së pö ˈˈsɛ ˗nu ˈö ˈwo ka ꞊zlöö ˈmü ˗an ˈgü. ˗Ya kë ꞊dhɛ ˗kɔ ˈö bhë ˗a ˈdhö, yi ˈti ˗dho yi ˗de kë ˈˈgɔɔgɔ yö ˈö ꞊waa˗ kë ˈsaadhö mɛn ˈˈwɛɛ ˗bha ˗dhɛ ˈgü, ˗a ˗wɔn ˈgü. 17 «Mɛn ˈö ˗dho ö ˈtɔ ˈkun, ˗yö ö ˈtɔ ˈkun Zoova ˗wɔn ˈgü.» 18 ˗A ˗gɛn ˗mü ꞊dhɛ mɛn ˈö Zoova yö ꞊dede ˗yö ˗a ˗wɔn ˗së ꞊blɛɛ ˈyö˗ ˗dhɛ ˗së, mɛn ˈö ö ˗de ˗wɔn ˗së ꞊blɛɛ ˈyaa ˈnën ˈö˗ ˗dhɛ ˗së.