Yesu ˗bha bɔmɛn ˗nu këwɔn ˗nu

13 ˗Zlan ˗wodhiʋ̈lomɛn ˗nu waa mɛn ꞊klaŋkëmɛn ˗nu ˗wo ˗kë ˗zlanwokɔdhi ˈö kun Antiɔshö ˗a ˈgü. ˗A mɛn ˗nu ˈwo ˈˈdhʋ̈ ˈyö ˈwo ˗tɔ: Baanabasö, Simeɔn ˈö ˈwo˗ ˗dhɛ ˈpö mɛn tii,* Lusiusö ˈö go Silɛnö, Manaɛnö ˈö waa Edhɔdö ˈö kun ˈˈsɛ ˈˈpian ˈö bhë ˗a ꞊kɔɔnmɛn ˈka ˈwo ꞊klaŋ ˗kë wo ˈkwëë˗ waa Sɔdhö. 2 ˈDhɛ ˈwo kun yö kë ˗ni ˈgü Zoova ˈˈdhiʋ̈, kö ˗wo ˈsunŋ˗ ˈmën ˗ni ˈgü, ˈyö ˗zuu ˈˈslʋ̈ʋ̈slʋ̈ ˗ya pö: «˗Ka Baanabasö waa Sɔdhö ˗an ˗ya ˗de ˗ta kö yö ˈa ˗an ˗dhɛ ˗a ˗wɔn ˈgü bhë ˗wa kë.» 3 ˈDhɛ ˈwo wo bo ˈsunŋ˗ ˈmën ˗sü waa bhɛɛˈˈ ˗sü ˈka, ˈyö ˈwo wo ˗kɔ ˗ya ˗an ˗ta ˈö ˈwo wo ꞊kwaa ˗an ˗zü ˈwo dho.

4 ˈDhɛ ˈö ˗kë ˈˈdhʋ̈, ˈyö mɛn ꞊plɛ ˈö ˗zuu ˈˈslʋ̈ʋ̈slʋ̈ ˗yö ˗an bɔ bhë, ˈwo dho* Selösi, ˈwo ˗ya ˈˈyitagɔ ˈgü mü ˈwo dho Shiplë. 5 ˈDhɛ ˈwo ˗lo Salaminö, ˈyö ˈwo ˗ya ˗zlanwopö ˗sü ˗bha Zuifö ˗nu ˗bha ˗yakwëë ˗kë ˗a ˈgü ˗kɔ ˗nu ˈgü. Zan ˗yö ˗kë ˗an ˈˈpiʋ̈ mü ˈpö, ˈö kun ˗an ˗takun ˗ni ˈgü.

6 ˈDhɛ ˈwo bɔ ˈˈsɛ ˈö ˈˈyi ꞊zinŋgü bhë ˗a ˈgü, ˈö ˈwo dho ˈwo ˗lo Pafɔsö, ˈyö ˈwo ˗kpan Zuifö mi do ˈö ˈwo˗ ˗dhɛ Baa Yesu ˗a ˗bha. ˗A gɔndënën ˈö bhë ˗yö ˗kun ˈˈzʋʋmi ˈka, ˈö kun ˈpö ˗zlan ˗wodhiʋ̈lomɛn ꞊suasü ˈka. 7 ˗Yö ˗kë ˈˈsɛ ˈˈpian ˈö bhë ˗a ꞊kɔɔnmɛn ˈö ˈwo˗ ˗dhɛ Sɛɛziusö Podhusö ˈö kun ˈwɔndɔmɛn ˈka bhë ˗a ꞊kee˗. Ö ˈˈtʋ ˗to ˗Zlan ˗wo ˗bha ˗sü ˗dhɔ ꞊dede ˗yö ˗kun ˈˈsɛ ꞊kɔɔnmɛn ˈö bhë ˗a ˗bha. ˗A ˗wɔn ˈgü ˗yö Baanabasö waa Sɔdhö ˗an ˗dhɛ. 8 ˈˈKɛɛ ˗a ˈˈzʋʋmi ˈö ˈˈdhʋ̈ ˈö ˈwo˗ ˗dhɛ ˈpö Edhimasö (ˈö˗ ˈtɔ ˈö bhë ˗a ˗gɛn ˗yö ˗kë «dümɛn» ˈka) bhë, ˗yö ˗gban ˗an ˗gɔ ˈö kun ˗a ˈˈslö mɛɛnˈˈ ˗ni ˈgü kö ˈˈsɛ ꞊kɔɔnmɛn bhë ˈyaa ˗dho ˈˈwɩ ˗Zlan ˗wo ˗bha. 9 ˈDhɛ ˈö ˗kë ˈˈdhʋ̈, ˈyö ˗zuu ˈˈslʋ̈ʋ̈slʋ̈ ˗yö Sɔdhö ˈö ˈwo˗ ˗dhɛ ˈpö Pɔdhö bhë ˗a pa, ˈyö ö ˈˈɲan ˗gban gɔndënën ˈö bhë ˗a ˈgü 10 ˈö˗ pö ˗a ˗dhɛ: «Bhi ˈö ˈˈkpënŋ˗ ˗kë mɛn ˗gɔ ˗sü waa ˈwɔn yaa ꞊suu ˈˈpɛpɛ ˈwo pa ˗sü ˈka ü ˈgü, ˈö ˈü ˗kë Dügɔmɛn ˗bha ˈnën ˈka, ˈö ˈwɔn ˈö kpɛnŋdhö ˗a ˗dhɔ ˈyaa ü kë bhë, ˈmën ˗kë ˈö ˈü˗ ˈˈslö ꞊mɛɛn ˗kplawo kö Zoova ˗bha ʒiaan ˈö pö ˈyaa˗ ˗bha bhë ˈü ꞊sua ˗ya ˗a ˗bha? 11 ˗Dhɛ ˗ga! Zoova ˗dho ˈwɔn bho ü ˈgü ˈö ü ˈˈɲɛɛn ˗yö ˗tröö, ˈö ü ˈti ˗dho ˗kpan ˈɲaan˗ ˈbhü ˗bha ˈˈtʋ̈ŋ ˈnën ˈbhaa ˈˈpiʋ̈.» ˈˈZʋʋmi ˈö bhë ˗yö ˗to ˈˈshia˗ mü ˈö ˈˈdhuu ˗yö yö ˗a ˈˈɲan ˗ta, ˈö pë ꞊gban ˗yö ˗tröö ˗a ˈˈɲan ˈgü, ˈö ˗ya ö ˗kɔ ˗taataaˈˈ ˗sü ˗bha ö ˗züzü, ˈö mɛn ˈbhaa ꞊mɛɛn kö ˗yö ˗ya ö ˗kɔ ˗bha ˗yö ʒiaan bho ö ˈka. 12 ˈDhɛ ˈö ˈwɔn ˈö ˗kë bhë ˈö ˈˈsɛ ꞊kɔɔnmɛn ˗ya yö, ˈyö ˗we ˗Zlan ˗wo ˗bha, ˗a ˗gɛn ˗mü ꞊dhɛ ˈwɔn ˗nu ˈwo ˗gban Zoova ˗bha ˈö ˗an man bhë, ˗a ˈwɔn ˗ya ˗kun ꞊dedewo.

13 ˈDhɛ ˈö bo ˗kë ˈˈdhʋ̈ ˗sü ˈka, ˈyö Pɔdhö waa ö ˈˈtayɔɔ ˗nu ˈwo ˗da ˈˈyitagɔ ˈgü Pafɔsö mü ˈö ˈwo bɔ ꞊weeyi ˗ta ˈwo dho ˈwo ˗lo Pɛɛʒe, Panfili ˗sɛ ˈgü. ˈˈKɛɛ ˈyö Zan ˗yö ˗an to mü ˈö ö ꞊yɛɛ ˗kë ˈö dho Zedhizadhɛmö. 14 Wo ˗zë ˗wo ˗dho ˗wo ˗bha ˈˈta ˈka ˈˈdhiʋ̈ ˈö ˈwo go Pɛɛʒe ˈwo dho ˈwo ˗lo Antiɔshö ˗pö ˈö Pisidi ˗sɛ ˈgü bhë ˗a ˈgü. ˈDhɛ ˈö ꞊Glooyi ˗yö ˗wo, ˈyö ˈwo dho ˗yakwëë ˗kë ˗a ˈgü ˗kɔ ˈgü ˈö ˈwo ˈɲaannu. 15 ˈDhɛ ˈö mɛn ˗nu ˗wo wo bo ˈTɔŋ˗ ˈsëëdhɛ waa ˗Zlan ˗wodhiʋ̈lomɛn ˗nu ˗bha ˈsëëdhɛ ˗wo pö ˗sü ˈka wo ˗wo ˗ta, ˈyö ˗yakwëë ˗kë ˗a ˈgü ˗kɔ ˈwɔnyëë˗ ˗nu ˗wa pö Pɔdhö waa Banabasö ˗an ˗dhɛ: «Yi ꞊dhegblü ˗nu, ˗ya kë ꞊dhɛ mɛn ꞊faanmën ˗wo ˈbhaa ˗yö ka ˗gɔ ˈö ˈka˗ ˈˈpiʋ̈ ˈka˗ pö yi ˗dhɛ, kö yi ˈˈtʋ ˗yö ka ˗bha.» 16 ˈDhɛ ˈwo˗ pö ˈˈdhʋ̈, ˈyö Pɔdhö ˗yö ꞊luu ˈö ˈwɔn ꞊blɛɛ ˗an ˗dhɛ ö ˗kɔ ˈgü kö ˗dhɛ ˗ta ˗yö ga ˗an ˗ta, ˈyö go mü ˈö˗ pö:

«Izraɛdhö ˗mɛn ˗nu waa mɛn ˈˈwɛɛ ˈˈpɛpɛ ˈö ˈka ˗suʋ̈ ˗Zlan ˗gɔ, ˗ka ka ˈˈtʋ ˈto. 17 Izraɛdhö ˗mɛn ˗nu ˗bha ˗Zlan ˗yö ö ˗kɔ ˗yɛ kwa ˈˈbhɛman ˗nu ˗bha ˈö ˗an ˗kë ˈˈsɛgɔ ˈˈgbɩɩ˗* ˈka kö ˗wo ꞊kun ˗dhɛŋ ˈka Ezitö ˗sɛ ˈgü. ˗Yö ˗an ˗bho ˈˈsɛ ˈö bhë ˗a ˈgü ö ˗bha ˈˈpiigbɩɩdhɛ* ˈka. 18 ˗Yö ˗an ˗bun ˈˈtʋ̈ŋ ˈö ˗mɔn ˗kwɛ ˗kɔŋ ˗yiishiö (40) ˗bha ˗a ˈka ˈˈyɛta. 19 ˈDhɛ ˈö ö bo ˈˈsɛgɔ ˈˈsɔɔplɛ ˈgü shiʋ̈ˈˈ ˗sü ˈka Kanaan ˗sɛ ˈgü, ˈyö ˗an ˗bha ˈˈsɛ nu kwa ˈˈbhɛman ˗nu ˗dhɛ ˈkɛnŋpë ˈka. 20 ˈWɔn ˗nu ˈwo bhë ˗an ꞊gban ˈˈpɛpɛ ˗wo ˗kë ˗kwɛ këŋ ˗yiishiö ö ˗kɔ ˈˈsoodhu (450) ˈˈpiʋ̈.

«ˈDhɛ ˈö ö bo kë ˗sü ˈka ˈˈdhʋ̈, ˗yö zakanmɛn ˗nu ˗ya kö ˗wo ˈˈdhiʋ̈sü ˗an ˈka, ˈö dho ˈö yö ˗a ˈka ˗Zlan ˗wodhiʋ̈lomɛn Samiɛdhö ˗bha ˈˈtʋ̈ŋ ˗bha. 21 ˈˈKɛɛ ˈyö ˈwo˗ pö wo˗ ˈˈpiʋ̈ kö wo ˗bha ˗gblüdë ˗yö kë ˗dhö. ˈYö ˗Zlan ˗yö Saidhö ˈö ˗kë Kishö gbö ˈka, ˈö go Bɛnzamɛn ˗bha ˈkɔdhi ˈgü bhë ˗a ˗ya, kö ˗yö kë ˗an ˗bha ˗gblüdë ˈka. ˗Yö ˗gblüdëdhɛ ˗kë ˗an ˗ta ˗kwɛ ˗kɔŋ ˗yiishiö (40) ˈˈpiʋ̈. 22 ˈDhɛ ˈö ˗Zlan ˗ya bho mü, ˈyö Davi ˗ya ˗gblüdë ˈka ˗a ˈˈgblʋʋ ˈgü. ˗A Davi ˈö ˈˈdhʋ̈ ˗ya ˗wɔn ˗blɛɛ ˈö˗ pö: ‹Davi, Ʒese gbö ˈö bhë mɛn ˈö n ˗zokunwɔn ˗kë yö ˗mü. Pë ˈˈpɛpɛ ˈa˗ ˈˈpiʋ̈ ˗yö ˗dho ˗a kë.› 23 ˗Zlan ˗ya ˗kë ˈö Izraɛdhö dhamɛn ˗yö go gɔndënën ˈö bhë ˗a ꞊suu ˈgü ꞊dhɛ ˗kɔ ˈö˗ ˈˈplünŋ bho ˗a ˈka bhë ˗a ˈdhö. ˗A dhamɛn ˈö ˈˈdhʋ̈, ˈyö ˗tɔ Yesu. 24 Zan ˗yö mɛn ˈö bhë ˗a ˗bha nu ˗sü ˗to ˈˈdhiʋ̈ ˈö ˗zlanwopö Izraɛdhö ˗mɛn ˗nu ꞊gban ˈˈpɛpɛ ˈˈɲan ˈˈdhiʋ̈ ˈö˗ pö ˗wo bɔ ˈˈyi ꞊bhaa kö ˗wa ˗zɔn ꞊dhɛ ˈwa ˈgo wo ˗bha ꞊sɔŋ yaa ˈgü. 25 ˈˈKɛɛ ˈdhɛ Zan ˈdhö yö ˗ni ˈgü ö ˗bha yö ˈˈdhiʋ̈todhɛ ˗bha ˈyö˗ pö: ‹Mɛn ˈö ka ˗zo ˈˈpiʋ̈ ꞊dhɛ yö ˗mü n ˈka bhë, ˈyaa ˗mü n ˈka. ˈˈKɛɛ ˗ka ˗dhɛ ˗ga! Mɛn do ˈbhaa ˗yö nu ˗ni ˈgü n ꞊taabha, ˗sabha ˗de ˈö˗ ˗gɛn ˗bha, ˗a ˈˈse ˈyaa n ˗dhɛ kö ˈa˗ gën ˈˈpʋ.›

26 «N ꞊dhegblü ˗nu ˈö ˈka Ablaamö ꞊suugünën ˗nu ˈka waa mɛn ˈˈpɛpɛ ˈö ˈka ˗suʋ̈ ˗Zlan ˗gɔ, dhasü ˈö bhë kwa ˈnën ˈö ˗Zlan ˗ya nɔɔn˗ bɔ kwa ˗dhɛ. 27 ˈˈKɛɛ Zedhizadhɛmö ˗mɛn ˗nu waa wo ˗gɔmɛn ˗nu wo ˈti ˈˈwɩ ˗a ˗wɔn ˗bha. ˗Wo za ˗dɔ ˗a ˗bha ꞊ʒiaan, ˈö pë ˗nu ˈö ˗Zlan ˗wodhiʋ̈lomɛn ˗nu ˗wa pö, ˈö ˈwo˗ ˗wo pö wo ˗wo ˗ta ꞊Glooyi ˈˈpɛpɛ ˈka bhë ˈö yökodhiʋ̈ ˗an ˗bha. 28 ˈKö ˗kë ꞊dhɛ ˈwɔn ˈö ˗dho kë ˗a zë ˗gɛn ˈka wo ˈti˗ yö ˗a ˗bha, ˗wa ˗pö Pidhatö ˗dhɛ ˗ya zë. 29 ˈDhɛ ˗an këwɔn ˗nu ˗yö ˈwɔn ˈˈpɛpɛ ˈö kun ˗bɛnzë ˗sü ˈka ˗a ˗blü ˈgü bhë ˗an yökodhiʋ̈, ˈyö ˈwo˗ ꞊glöö bho ˈˈdhü ˗bha ˈö ˈwo dho ˈwo˗ ˗wɔ blɔɔndhɛ do ˈgü. 30 ˈˈKɛɛ ˗Zlan ˗ya ˗bho ga ˈgü, 31 ˈyö ö ˗de ˗zɔn mɛn ˗nu ˈö ˈwo ˗ʒiö ˗a ꞊kee˗ ˈwo go ˗a ˈka Galile ˈwo dho ˗a ˈka Zedhizadhɛmö bhë ˗an ˗dhɛ ˗dhɛkpaɔyi ꞊va ꞊dede ˈˈpiʋ̈. ˗A mɛn ˗nu ˈwo ˈˈdhʋ̈ ˗wo ˈwɔn ˈö ˗gban ˗a ˗bha ˗a ꞊gbɛkiödhɛ kë ˗ni ˈgü mɛn ˗nu ˗dhɛ.

32 «Yö ˈnën ˈö˗ ˗wɔn ˈgü ˈö nɔɔn˗ ˗së ˈö ˗gban pë ˈö ˗Zlan ˗ya ˈˈplünŋ bho kwa ˈˈbhɛman ˗nu ˗dhɛ ˗a ˗bha bhë, ˈyi˗ pö ˗ni ˈgü ka ˗dhɛ. 33 ˈWɔn ˈö ˗Zlan ˗ya ˈˈplünŋ bho ˗an ˗dhɛ bhë, ˗ya ꞊gban ˈˈpɛpɛ ˗kë mɛn ˈö ˈkwa ˗an ˗bha ˈnën ˗nu ˈka kwa ˗dhɛ Yesu ˗bho ga ˈgü ˗sü ˈka, ꞊dhɛ ˗kɔ ˈö ˗bɛnzë ˗sü ˈka ˗a ˈka ˈˈtan ꞊plɛ ˗naan* ˈgü bhë ˗a ˈdhö. ˗Ya ˗pö: ‹N gbö ˗mü ü ˈka. ꞊Dɛɛ ˈman kë ü dë ˈka.› 34 ˗A bho ˈö˗ wo ga ˈgü ˈˈdhʋ̈ kö mɛnbhɩɩdhe kwi ˈö ˈˈbu ˗pë ˈka ˈyaa ˗dho kë ˗a ˗gɔ ˈzü toŋtoŋdhö bhë, ˗yö ˈwɔn ˈö ˗gban ˗a ˗bha ˗a ˗blɛɛ ˈö˗ pö: ‹˗Dhɔ ꞊dede ˈö˗ ˈˈyi ˈyaa bhʋ̈ʋ̈ˈˈ ˈa˗ ˈˈplünŋ bho Davi ˗dhɛ bhë, a ˗dho ˗a ˈgüwɔn kë ka ˗dhɛ. ˗Zo ˗yö ˗a ˗dhɛ ˗wɔn* ꞊dede ˗mü.› 35 Yö ˈnën ˈö˗ ˗wɔn ˈgü ˈö ˈˈtan do ˈˈwɛɛ ˈbhaa ˈgü ˈzü ˈö˗ pö: ‹Ü ˈti ˗dho ü ꞊kwaa ü ˗bha mɛn ˈö ˗klu ü ˗bha ˗a ˗zü kö ˗yö ˈˈbu.› 36 ˈDhɛ ˈö Davi ˗yö ˗Zlan ˗dhɔkë ö ˗bha ˗tosɛta ˈgü, ˗yö ˗dho ˈö ga, ˈö ˈwo˗ ˗wɔ ˗a ˈˈbhɛman ˗nu ˈˈpiʋ̈ ˈö ˗bu. 37 ˈˈKɛɛ mɛn ˈö ˗Zlan ˗ya bho ga ˈgü bhë, yö ˗zë yö ˈti ˈˈbu.

38 «ˈDhɛ ˈö ˈˈdhʋ̈, n ꞊dhegblü ˗nu, ˗kaa ˈwɔn dɔ ꞊dhɛ kwa ˗bha ˈwɔn yaa ˗nu ˈö ˗Zlan dho ˗a ˗bhawɔn ˈto mɛn ˈö bhë ˗a ˈsaa˗ ˈgü bhë, ˈyö ˈyi˗ ˗nɔɔn pö ˗ni ˈgü ka ˗dhɛ bhë. 39 Moizö ˗bha ˈTɔŋ˗ ˗kɔ yö ˈti ˗mɔn ˗a ˗bha kö ˗yö ka kë mɛn kpɛnŋdhö ˗nu ˈka, ˈˈkɛɛ mɛn ˈˈoo ˗mɛn ˈö ö ˗zo yö mɛn ˈö bhë ˗a ˗dhɛ, ˗yö ˗dho kë mɛn kpɛnŋdhö ˈka ˗Zlan ˈˈɲan ˈˈdhiʋ̈ ˗a ˈsaa˗ ˈgü. 40 ˈDhɛ ˈö ˈˈdhʋ̈, ˗kaa kë ˗së kö pë ˈö ˗bɛnzë ˗sü ˈka ˗Zlan ˗wodhiʋ̈lomɛn ˗nu ˗bha ˈsëëdhɛ ˈgü bhë, ˈyaa ˗dho kë ka ˈka. 41 ˗Ya ˗pö: ‹Mɛn ˈö n këyö ˗nu ˗san ˗yö ka ˗kë bhë ˗ka ˗dhɛ ˗ga, ˗a ˈwɔn ˗dho ka ˈkun, ˈö ka ˈgü dho shiʋ̈ˈˈ, ˗a ˗gɛn ˗mü ꞊dhɛ a yö ˈbhaa kë ˗ni ˈgü ˈˈtʋ̈ŋ ˈö yö ˗a ˈgü, ˈö yö ˈö ˈˈdhʋ̈ ˈkö ˗kë ꞊dhɛ mɛn ˈbhaa ˗ya ˈgü ˗pʋ ka ˗dhɛ ˈkpakpadhö, ka ˈti ˗dho ˈdhaŋ˗ bho ˗a ˈˈdhiʋ̈ toŋtoŋdhö.›»

42 ˈDhɛ ˈwo wo bo, ˈö ˈwo yö ˗ni ˈgü ˈˈkpɛnŋ, ˈyö ˈwo˗ pö Pɔdhö waa Baanabasö ˗an ˗dhɛ ˗wo nu ꞊Glooyi ˈdhɛ ˈö dɔ ˗a ˈˈpiʋ̈ ˗a ˈka kö ˈwɔn ˗nu ˈwo bhë ˗wa blɛɛˈˈ wo ˗dhɛ ˈzü. 43 ˈDhɛ ˗yakwëë ˈwo kun ˗a kë ˗ni ˈgü ˗yakwëë ˗kë ˗a ˈgü ˗kɔ ˈgü bhë ˈö ɲën, ˈyö Zuifö ꞊va ꞊dede waa mɛn ˗nu ˈwo ˗da Zuifö ˗nu ˗bha ˗zlanwo ˈgü ˈö ˈwo kun ˗Zlan ˗dhɔkë ˗ni ˈgü bhë, ˈwo ˗ʒiö Pɔdhö waa Baanabasö ˗an ꞊kee˗. ˈYö Pɔdhö waa Baanabasö ˗wo ˈwɔn ꞊blɛɛ ˗an ˗dhɛ ˈö ˈwo ˗an ꞊faanmën kö ˗wo ˈto ˗klu ˗sü ˈka ˗Zlan ˗bha ˗gasitɛ ˈö˗ ˗kë ˗an ˗dhɛ bhë ˗a ˗bha.

44 ꞊Glooyi ˈö dɔ ˗a ˈˈpiʋ̈, ˈˈkwipö ˈö bhë ˗a ˈgümɛn ˗nu ꞊vadhɛ ꞊dede ˗wo ˗dho wo ˈkwëëdhö kö ˈwo wo ˈˈtʋ ˈto Zoova ˗wo ˗bha. 45 ˈDhɛ ˈö Zuifö ˗nu ˗wo ˗kpan mɛn ꞊va ˈwo bhë ˗an ˗bha, ˈyö ꞊druɛɛ˗ ˗yö ˗da ˗an ˈgü ˈö ˈwo ˗ya Pɔdhö ˗wo ˗bho ˈˈpiʋ̈ ˗sü ˗bha ˈwɔn yaa ˗nu ˗blɛɛ ˗a ˗bha ˗sü ˈka. 46 ˈDhɛ ˈö ˗kë ˈˈdhʋ̈, ˈyö Pɔdhö waa Baanabasö ˗wo ˈwɔn ꞊blɛɛ ˗an ˗dhɛ ˗zogbandhe ˈka ˈö ˈwo˗ pö: «˗A ˗dhɛ ˗kun ˗a ˗bha kö ˗Zlan ˗wo ˗yö pö ka ˗dhɛ ꞊köŋ ˗blɛɛsü. ˈˈKɛɛ ˈdhɛ ˈö ˗kë ꞊dhɛ ˈka ˗kɔ ˗a ˈka, ˈö ˈka˗ ˗zɔn ꞊dhɛ ˗tosɛta ˈö ˈyaa ɲën ˗a ꞊slɔɔmɛn ˈyaa ˗mü ka ˈka bhë, yi ˈdho ˗ni ˈgü ˈˈsɛ ˈˈwɛɛ ˈgümɛn ˗nu ˈˈpiʋ̈. 47 ˗A ˗gɛn ˗mü ꞊dhɛ, pë ˈö Zoova ˗ya pö yi ˗dhɛ ˈyö ˗tɔ: ‹A ü ˗ya ˈˈsɛ ˈˈwɛɛ ˈgümɛn ˗nu ˗bha ˗dhɛpuudhɛ ˈka, ˈyö kë ˈˈdhʋ̈ kö ˈü ˈdho dhasü ˈö bhë ˗a nɔɔn˗ ˈka ˈˈsɛ ˈˈdhiʋ̈todhɛ ˗nu ˈgü.›»

48 ˈDhɛ ˈö ˈˈsɛ ˈˈwɛɛ ˈgümɛn ˗nu ˗wa man ˈˈdhʋ̈, ˈyö ˗an zuʋ̈ˈˈ ˈˈgblü ˗yö ˗ya dhi ˗sü ˗bha, ˈyö ˈwo ˗ya Zoova ˈˈdhiwo ˗bha ˗kë ˈˈdhiaasü ˗sü ˗wɔn blɛɛˈˈ ˗sü ˗bha. ˈYö mɛn ˈˈpɛpɛ ˈö ˗tosɛta ˈö ˈyaa ɲën ˗a ꞊slɔɔ ˗sü zuʋ̈ga ˗yö ˗kë ˗an ˗gɔ bhë, ˈwo ˗we ˗Zlan ˗wo ˗bha. 49 ˗Ya ˈgo mü ˈzü, Zoova ˈˈdhiwo ˗yö ˗ya ˗pɛn ˗sü ˗bha ˈˈsɛ ˈö bhë ˗a ˗dhɛ ꞊gban ˈˈpɛpɛ ˈgü. 50 ˈˈKɛɛ ˈyö Zuifö ˗nu ˗wo ˗da dhebɔ ꞊bhlëësü ˗nu ˈö ˈwo ˗suʋ̈ ˗Zlan ˗gɔ waa mɛn ˗nu ˈö ˗wogbinŋdhɛ ˈdhö ˗an ˗gɔ ˈˈkwipö ˈö bhë ˗a ˈgü ˗an ˈˈtʋʋ, ˈyö ˈwo ˗ya Pɔdhö waa Baanabasö ˗an ˈˈklʋʋ bhɔ ˗sü ˗bha, ˈwo ˗an ˗kë kö ˗wo ˈgo wo ˗gɔ ˈˈsɛ ˈgü. 51 ˈYö Pɔdhö waa Baanabasö ˗wo wo ˗gɛn ˗man kö ˈˈsɛ ˈö˗ ˗bha ˗yö ˈgo mü kö ˈwo˗ ˗zɔn ˗an ˗dhɛ ꞊dhɛ ˈwa ˗an ꞊kpɔɔ. ˈYö ˈwo ˗ʒiö ˈwo dho Ikoniɔmö. 52 Yesu ˗bha gwëëˈˈ ˗nu ˗bha zuʋ̈gblüdhi ˗yö ˗kun ˗da ˗ni ˈgü ˈˈdhiʋ̈ ˗kplawo, ˈö ˈwo kun pa ˗ni ˈgü ˈpö ˗kplawo ˗zuu ˈˈslʋ̈ʋ̈slʋ̈ ˈka.