Yesu ˗bha bɔmɛn ˗nu këwɔn ˗nu
28 ˈDhɛ ˈyi ˗lo ˈˈkpɔnŋ ˈˈdhiʋ̈ yi ˈflëëgü, ˈyö ˈyi˗ man ꞊dhɛ ˈˈsɛ ˈö ˈˈyi ꞊zinŋgü ˈö ˈyi˗ ˗ta bhë ˗wa ˗dhɛ Malütö. 2 Mɛn ˗nu ˈwo ˗dhɛ ˈö bhë ˗a ˈgü ˗wo ˈˈgblüsë ˈˈmlünmlünsü ˗kë yi ˈka. ˗Wo ˈˈshiʋ̈ ˗yö ˈkwëë˗, ˈö ˈwo wo ˗kɔ ˗ya mɛn ꞊gban ˈˈpɛpɛ yi ˗gɔ ˗së ˈka, ˗a ˗gɛn ˗mü ꞊dhɛ dha ˗kun ban ˗ni ˈgü, ˈö ˈˈnɛnnɛn ˗yö kun ʒiö ˗ni ˈgü. 3 ˈˈKɛɛ ˈdhɛ ˈö Pɔdhö ˗yö ˈˈwo ˈˈkpɛɛ do sü ˈö˗ ˗wɔ ˈˈshiʋ̈ ˈgü, ˈyö ꞊bhöö do ˗yö go ˗a ˈgü, ˈˈshiʋ̈ ˈö kun ˗man ˗ni ˈgü ˗a ˗bha bhë ˗a ˗wɔn ˈgü, ˈyö ˗ya Pɔdhö ˗kɔ ˗bha ˈö dun ˗a ˈka. 4 ˈDhɛ ˈö mɛn ˗nu ˈwo ˈˈsɛ ˈö bhë ˗a ˈgü ˈwo ˗kpan ꞊mlɛɛn ˈˈdhiʋ̈˗ ˈö bhë ˗a ˗bha kö ˗yö dun ˗sü ˈka ˗a ˗kɔ ˗bha ˈˈdhʋ̈, ˈyö ˈwo ˗ya ˗a pö ˗sü ˗bha wo ˈko ˗nu ˗dhɛ: «Gɔndënën ˈö yö, ˈö ˈkwa dho, mɛnzëmɛn ˗mü. ˈKö ˗kë ꞊dhɛ ˗ya dha ꞊weeyi ˗gɔ, Kpɛnŋdhödhɛ* ˈti ˈˈwɩ ˗a ˗bha kö ˗yö kë dhamɛn ˈka.» 5 ˈˈKɛɛ ˈyö Pɔdhö ˗yö ö ˗kɔ ꞊kpënŋ, ˈyö˗ ꞊mlɛɛn ˗yö ˗puö ˈˈshiʋ̈ ˈgü ˈö˗ ˈˈyi yö ˈti ˗da ˗a ˈka. 6 ˗An ˗bha ˈgü ˗be Pɔdhö ˗dho ˗bhla ɛɛnˈˈ ˗yö ˗dho ˈto mü ˈö ˗puö ˈˈshia˗ ˈö ga. ˈˈKɛɛ ˈdhɛ ˈwo ˗dhɛ ˈˈdhiʋ̈ ˗gan pinŋdhö, ˈö ˈwo˗ yö ꞊dhɛ pë ˈbhaa ˈyaa kë ˗ni ˈgü ˗a ˈka, ˈyö ˈwo wo ˗wo ꞊slëë ˈzü ˈö ˈwo ˗ya ˗a pö ˗sü ˗bha ꞊dhɛ ˗zlan do ˗mü ˗a ˈka.
7 ˈDhɛ ˈyi kun ˗a ˗bha bhë, ˗dhɛ ˈbhaa ˗nu ˗wo ˗kun ˗a ˈˈsuee mü ˈö ˈwo kun ˈˈsɛ ˈö ˈˈyi ꞊zinŋgü bhë ˗a ꞊kɔɔnmɛn ˈwo˗ dhɛ Pibliusö ˗a ˗bha ˗dhɛ ˗nu ˈka. Gɔndënën ˈö bhë ˗yö ö ˗kɔ ˗ya yi ˗gɔ ˗së ˈka, ˈö yi ˗dhɛŋ bun ˗dhɛkpaɔyi ˗yaaga ˈˈpiʋ̈. 8 ˗A ˈˈtʋ̈ŋ ˈö bhë ˗a ˈgü, kö ꞊gɔɔnpë* ˗yö Pibliusö dë kë ˗ni ˈgü ˗yö ˈwaannu ˗sü ˈka, kö ˈˈnɛnnɛn ꞊yaa˗ ˈkun. ˈYö Pɔdhö ˗yö dho ˗a ˈˈpiʋ̈ ˈö ꞊bhɛɛ, ˈö ö ˗kɔ ˗ya ˗a ˗ta, ˈyö˗ ˗dhɛ ˗yö bo. 9 ˈDhɛ ˈö ˗kë ˈˈdhʋ̈, ˈyö mɛn ˗nu ˈwo kun ˈˈsɛ ˈö bhë ˗a ˈgü ˈö ˈwaa kun wo ˈflëëgü ˈwo ˗ya nu ˗sü ˗bha Pɔdhö ˈˈpiʋ̈, ˈyö ˗an ˗dhɛ ˗yö bo. 10 ˗Wo yi ꞊bhlëë ˗kpɔ ˈwo pë ꞊va ꞊dede gbɔɔ yi ˗gɔ, ˈö ˈdhɛ ˈyi ˗dho ʒiö kö ˈyi ˗da ꞊weeyi ˗ta ˈwo pë ˈˈpɛpɛ ˈö yi ˗bhawɔn ˗yö yö ˗a ˗bha ˗an nu yi ˗dhɛ.
11 ˈDhɛ ˈyi ˈˈsu ˗yaaga ˗kë mü, ˈyö ˈyi ˗ya ˈˈyitagɔ do ˈö «Zösö Gbö ˗nu» ˈˈbin ˈdhö˗ ˗gɔ ˈˈdhiʋ̈ ˗a ˈgü. ˗A ˈˈyitagɔ ˈö ˈˈdhʋ̈ ˗yö ˗go Alɛzandri ˈyö nu ˈˈsɛ ˈö bhë ˗a ˈgü ˈö ˈˈnɛnnɛn ˈˈtʋ̈ŋ ˈˈdhiʋ̈ ˗gan mü. 12 Yi ˗dho ˈyi ˗lo Sidhakuzö, ˈö ˈyi ˗dhɛkpaɔyi ˗yaaga ˗kë mü. 13 ˈDhɛ ˈyi go mü, ˈyö ˈyi dho ˈˈdhiʋ̈ ˈyi ˗lo Legiɔmö. ˈDhɛ ˈö˗ ˗ta ˗dhɛ ˗yö ꞊kpɔɔ, ˈyö ˈˈtee ˈö go ˈˈshiaŋ ꞊ʒiaan ˈö ˗ya ʒiö ˗sü ˗bha, ˈö ˈyi dho ˈyi ˗lo Puteoli ˗a ˗dhɛkpaɔyi ꞊plɛ ˗naan ˈka. 14 ˈDhɛ ˈö bhë ˗a ˈgü, yi ˗kpan yi ꞊dhegblü ˗nu ˗bha, ˈyö ˈwo ˗gban yi ˗bha ˈwo˗ pö ˈyi ˈto wo ˈˈpiʋ̈ mü kö ˈyi ˗dhɛkpaɔyi ˈˈsɔɔplɛ kë. ˈDhɛ ˈyi go mü, ˈyö ˈyi ʒiaan ˈö dho Wlɔmö ˗a sü. 15 ˈDhɛ ˈö kwa ꞊dhegblü ˗nu ˈwo ˈmü ˈwo˗ man ꞊dhɛ yi nu ˗ni ˈgü, ˈyö ˈwo dɔ yi ˗gɔ ʒiaan, ˈö ˈwo nu ˈˈdhʋ̈ ˈwo ˗lo ˗a ˈka Apiusö ˈˈdhookwëëdhɛ waa ˗dhɛ ˈwo˗ ˗dhɛ ˈKɔ ˗yaaga* bhë ˗a ˈgü. ˈDhɛ ˈö Pɔdhö ˗yö ˗kpan ˗an ˗bha, ˈyö ˗Zlan ˈˈnuɛ bho, ˈö ꞊faan ꞊slɔɔ. 16 ˈDhɛ ˈyi dho ˈyi ˗lo Wlɔmö, ˈyö ˈwo ˗we ˗a ˗bha kö Pɔdhö ˗yö ö ˗de ˗bha ˈkɔ ˈsü kö ˈˈsɔdha do ˗ya ˗maan kë.
17 ˈDhɛ ˈö ˗dhɛkpaɔyi ˗yaaga ˗yö ˗ʒiö, ˈyö Pɔdhö ˗yö Zuifö ˗nu ˗bha ˈwɔnyëë˗ ˗nu ˈwo mü ˗an ˗dhɛ kö ˗wo nu wo ˈkwëëdhö. ˈDhɛ ˈwo nu, ˈyö˗ pö ˗an ˗dhɛ: «N ꞊dhegblü ˗nu, n ˈti pë yaa ˈbhaa kë kwa ˗bha ˈˈsɛgümɛn ˗nu ˈka ɛɛnˈˈ n ˈti kwa ˈˈbhɛman ˗nu ˗bha wɔkɔ ˗nu ꞊bhlëë ˗shiö. ˈˈKɛɛ ˗wo n ˗kun ˈwo n ˗da ˗kaso ˈgü Zedhizadhɛmö, ˈö ˈwo n ˗da Wlɔmö ˗mɛn ˗nu ꞊kwɛɛ˗. 18 ˈDhɛ ˈwo dhɛɛˈˈ ˗nu kpɔ n ˗gɔ, ˗wo ˗kun ˗a ˈˈpiʋ̈ ꞊dhɛ ˈwo wo ꞊kwaa n ˗zü, ˗a ˗gɛn ˗mü ꞊dhɛ pë ˈbhaa ˈkö ˗dho kë n zë ˗gɛn ˈka wo ˈti˗ yö n ˗bha. 19 ˈˈKɛɛ ˈdhɛ ˈö ˗kë ꞊dhɛ Zuifö ˗nu ˈwaa kun ˈˈwɩ ˗ni ˈgü ˗a ˗bha, ˈyö ˈa˗ pö a ˗dho nu Sezaa ˗kuu ˈˈdhiʋ̈. ˈˈKɛɛ n ˈti nu ˈˈdhʋ̈ kö ˈa ˈwɔn ˈˈoo ˗wɔn za ˗ya n ˗man ˈˈsɛgümɛn ˗nu ˗bha. 20 Yö ˈnën ˈö˗ ˗wɔn ˈgü, ˈa kun ˈa˗ ˈˈpiʋ̈ ꞊dhɛ ˈa ˗kpan ka ˗bha kö ˈa ˈwɔn blɛɛˈˈ ka ˗dhɛ. ˗A ˗gɛn ˗mü ꞊dhɛ ˈwɔn ˈö Izraɛdhö ˗mɛn ˗nu ˗wo wo ˗zo yö ˗a ˗dhɛ bhë, yö ˈnën ˈwo ꞊yɔɔ˗ yö ˗n ˗bha ˗a ˗wɔn ˈgü bhë.» 21 ˈYö ˈwo˗ pö ˗a ˗dhɛ: «ˈSëëdhɛ ˈbhaa ˈö ˗dho ˈgo Zude ˗sɛ ˈgü kö ˗wa bɔ yi ˗dhɛ ˈö ˗gban ü ˗bha ˈyaa ˈdhö. Mɛn ˈbhaa ˈö ˗dho ˈgo ˈmü ˈpö kö ˈwɔn ˈö ˗gban ü ˗bha ˗ya blɛɛˈˈ ɛɛnˈˈ kö ˗yö ü ˗wɔn yaa blɛɛˈˈ ˈyaa ˈdhö. 22 ˈˈKɛɛ yi ˗bha ˈgü ˗yö ˗dho kë ˗së kö ˈwɔn ˈö ü zuʋ̈ˈˈ ˈˈpiʋ̈ ˈü˗ blɛɛˈˈ yi ˗dhɛ, ˈyö ˗tɔ yi˗ ˈwɔn ˗dɔ ꞊dhɛ ˗dhɛ ꞊gban ˈˈpɛpɛ ˈgü, ˗zlanwo ꞊suu ˗dɛɛ ˈö bhë ˗wa ˗wɔn yaa ˗blɛɛ.»
23 ˈDhɛ ˈö ˗kë ˈˈdhʋ̈, ˈyö ˗an ˗wo ˗yö ˗mɔn ˈö ˈwo ˗dhɛkpaɔyi do kpɔ wo ˈko ˗gɔ, ˈyö ˈwo nu ꞊va ꞊dedewo ˗dhɛkpaɔyi ˈö bhë ˗a ˈka ˈkɔ ˈö Pɔdhö kun ˗a ˈgü bhë ˗a ˈgü. ˈÖ sü dhiaapiʋ̈ ˗bha ˈö dho ˈö yö ˗a ˈka ˈˈdooka ˗bha, Pɔdhö ˗yö ˗gban Moizö ˗bha ˈTɔŋ˗ waa pë ˈö ˗Zlan ˗wodhiʋ̈lomɛn ˗nu ˗wa pö ˗an ˗ta ˈö ˈwɔn ˈö ˗gban ˗Zlan ˗bha ˗Gblüdëdhɛ ˗bha ˗a ꞊gbɛkiödhɛ ˗kë, ˈö˗ ˈgü ˗pʋ ˗an ˗dhɛ ˈkpakpadhö kö ˈö ˗an zuʋ̈ˈˈ ˈsü kö ˗wo ˈˈwɩ Yesu ˗wɔn ˗bha. 24 Mɛn ˈbhaa ˗nu ˗wo ˗ya wo ˗zo yö ˗sü ˗bha pë ˈö kun ˗a pö ˗ni ˈgü bhë ˗a ˗dhɛ, ˈö˗ mɛn ˈbhaa ˗nu ˈti wo ˗zo yö ˗a ˗dhɛ. 25 ˈDhɛ ˈö ˗kë ꞊dhɛ ˗an ˗wo ˈyaa kun do, ˈö ˈwo kun zɔɔdhe ˗man ˗ni ˈgü wo ˈˈkwöö, ˈyö ˈwo ˗ya ʒiö ˗sü ˗bha. ˈDhɛ ˈö ˗kë ˈˈdhʋ̈, ˈyö Pɔdhö ˗ya pö:
«ˈWɔn ˈö ˗zuu ˈˈslʋ̈ʋ̈slʋ̈ ˗yö bɔ ˗Zlan ˗wodhiʋ̈lomɛn Izai ˗ta ˈö˗ pö ka ˈˈbhɛman ˗nu ˗dhɛ bhë, ˗a ˗pö ˈˈdhʋ̈ ˗dhɛ ˗mü. 26 ˗Ya ˗pö: ‹˗Bhö ˈdho ˈˈsɛ ˈö yö ˗a ˈgümɛn ˗nu ˈˈpiʋ̈ kö ˈü˗ pö ˗an ˗dhɛ: «Ka ˗dho ˗a man, ˈˈkɛɛ ka ˈti ˗dho ˗a ˈklɔɔ˗ dɔ. Ka ˗dho ˗dhɛ ˗ga, ˈˈkɛɛ ka ˈti ˗dho pë ˈbhaa yö. 27 ˗A ˗gɛn ˗mü ꞊dhɛ ˈˈsɛgümɛn ˗nu ˈwo yö ˗an zuʋ̈ga ˗ya kë ꞊dhɛ ˗gwö kpö ˈdhö. ˗An ˈˈtʋ ˗yö ˈwɔn ˗man, ˈˈkɛɛ ˈwaa˗ ˈklɔɔ˗ dɔ. ˗Wa wo ˈˈɲan ta kë ˈˈdhʋ̈ kö ˈwaa ˗dho pë ˈbhaa yö ɛɛnˈˈ ˈwaa ˗dho pë ˈbhaa man. ˈWaa˗ ˈˈpiʋ̈ kö ˈwo ˈwɔn ˗nu ˈgüman ö ˗gɛn ˈka kö ˗yö ˈpa ˗an zuʋ̈ˈˈ ˈka, kö ˗wo wo ꞊yɛɛ kë n ˈˈpiʋ̈ kö ˈa ˗an ˗dhɛ bo.»› 28 ˈDhɛ ˈö ˈˈdhʋ̈, ˗a ˈwɔn ˗yö kë ka ˈˈɲaan ꞊dhɛ dhasü ˈö go ˗Zlan ˈˈpiʋ̈ bhë ˗a nɔɔn˗ ˗ya pö ˈˈsɛ ˈˈwɛɛ ˈgümɛn ˗nu ˗dhɛ. Wo ˗zë ˗wo ˗dho wo ˈˈtʋ ˈto ˗a ˗bha.» 29 ——
30 Pɔdhö ˗yö ˗to ˈkɔ ˈö˗ sü bhë ˗a ˈgü ˈö ˗kwɛ ꞊plɛ ˗kë mü. Mɛn ˈˈpɛpɛ ˈwo kun nu ˗ni ˈgü ˗wo ˗a ˗dhɛ, ˗yö ö ˗kɔ ˗ya ˗an ˗gɔ ˗së ˈka mü, 31 ˈö ˗Zlan ˗bha ˗Gblüdëdhɛ ˗wɔn ꞊blɛɛ ˗an ˗dhɛ, ˈö ˗an ꞊klaŋ ˗kë ˈwɔn ˈö ˗gban Dëmɛn Yesu Klito ˗bha ˗a ˈka ˗zogbandhe ˈka, ö ˈflëëgü.