Yesu ˗bha bɔmɛn ˗nu këwɔn ˗nu

27 ˈDhɛ ˈö ˗an ˗wo ˗yö to do kö ˈyi ˗da ˈˈyitagɔ ˈgü ˈyi ˈdho Itali, ˈyö ˈwo Pɔdhö waa ˗kasogümɛn ˈbhaa ˗nu ˈˈklɔɔn bho ˈˈsɔdha ˗gɔmɛn ˈö ˈwo˗ ˗dhɛ Zudhiusö ˈö ˗kë Ogisö ˗bha ˈˈsɔdha kpö ˗gɔmɛn do ˈka ˗a ˗bha. 2 ˈˈYitagɔ do ˈö kun ˈgo ˗ni ˈgü Adramitiɔmö, ˈö dho bɔ ˈˈyitagɔ ˈduaannudhɛ ˗nu ˈwo Azi ˗sɛ ˗nu ˈgü ˗an ˈgü bhë, yi ˗da ˗a ˈgü ˈö ˈyi dho. Adhitakö ˈö ˗kë Maseduanö mi ˈka ˈö go Tesalonikö, ˗yö ˗kun yi ꞊kee˗. 3 ˈDhɛ ˈö˗ ˗ta ˗dhɛ ˗yö ꞊kpɔɔ, ˈyö ˈyi ˗lo Sidɔn. Zudhiusö ˗yö zuʋ̈ˈˈ ˗së ˗kë Pɔdhö ˈka, ˈö ˗we ˗a ˗bha kö ˗yö ˈdho ö ˈˈtɔŋdë ˗nu ˈˈpiʋ̈ kö ˗wo wo ˗zo kë ˗a ˈˈpiʋ̈.

4 Yi ˗da ˈˈyitagɔ ˈgü ˗dhɛ ˈö bhë ˗a ˈgü ˈö ˈyi ˗wa Shiplë ˗dhɛ ˈˈsuee ˈdɔɔndhö, ˗a ˗gɛn ˗mü ꞊dhɛ ˈˈtee ˗kun ˈgo ˗ni ˈgü yi ˈdho ˗ʒian ˈka. 5 ˈDhɛ ˈö ˗kë ˈˈdhʋ̈, ˈyö ˈyi dho ˈyi bɔ ꞊weeyi ˗gblü ˗ta ˈö ˈyi ˗wa ˗a ˈka Silisi ˗sɛ waa Panfili ˗sɛ ˗an ˈˈsuee ˈyi dho yi ˗lo Miidhö, Lisi ˗sɛ ˈgü. 6 ˈDhɛ ˈö bhë ˗a ˈgü, ˈˈsɔdha ˗gɔmɛn ˗yö ˗kpan ˈˈyitagɔ do ˈö go Alɛzandri ˈö kun ˈdho ˗ni ˈgü Itali ˗a ˗bha, ˈyö yi ˗da ˗a ˈgü. 7 ˈDhɛ ˈyi yi ꞊zlɔɔ ˈö ˈyi ˗dhɛkpaɔyi ˈnën ˈbha ˗kë ʒiaan ˗ta, ˈyö ˈyi ˗lo Kinidö kö yi ꞊sëë ˗ya bho. ˈDhɛ ˗kë ꞊dhɛ ˈˈtee ˈyaa kun ˈˈwɩ ˗ni ˈgü ˗a ˗bha kö ˈyi ˈdho yi ˈˈdhiʋ̈, ˈyö ˈyi ˗wa Salümɔne ꞊ʒiaan, Klɛtö ˗dhɛ ˈˈsuee. 8 ˈDhɛ ˈyi ˗wa ˈˈyi ˈˈkpɔnŋ ˈˈpiʋ̈ ˈdɔɔndhö ꞊sëëbhodhe ˈka ˈzü, ˈyö ˈyi dho yi ˗lo ˗dhɛ do ˈwo˗ ˗dhɛ ˈˈYitagɔ dɔdhɛ ˗së ˗a ˗bha, ˈˈkwipö ˈwo˗ ˗dhɛ Laze bhë ˗a ˈˈsuee.

9 Yi ˗dhɛkpaɔyi ꞊va ˗kë ˗dhɛ ˈö bhë ˗a ˈgü, ˈö ꞊ɲɔɔn mü kö ˗da ˈˈyi ˗ta ˗sü ˗ya kë ˈya˗. ˗A ˗gɛn ˗mü ꞊dhɛ ˗a ˈˈtʋ̈ŋ ˈö bhë ˗a ˈgü kö ˈwɔn yaa ˗bhawɔn ˈto ˈˈsaa˗ ˈsunŋ˗ ˗dhɛkpaɔyi ˗ya ʒiö ˈsaadhö. ˗A ˗wɔn ˈgü, Pɔdhö ˗yö ˗dhioo do ˈbhaa ˗dɔ 10 ˈö˗ pö: «N ˈˈtɔŋdë ˗nu, ˗a ˗ga ˈa˗ wo ˗ni bhë, ˈˈta ˈö yö kö ˈkwa ˈdho ˗a ˈka ˈˈdhiʋ̈ kwa ˗dho ˈwɔn ˈˈgbɩɩ˗ ꞊slɔɔ ˗a ˈgü, ˈö ꞊kwɛɛ˗ ˗nu waa ˈˈyitagɔ ˗wo ꞊shiʋ̈, ˈö˗ ˈbhaa ˗ya kë kwa ˗gɔ dho ˈto ˗a ˈgü.» 11 ˈˈKɛɛ ˈˈsɔdha ˗gɔmɛn yö ˈti ö ˈˈtʋ ˈto pë ˈö Pɔdhö ˗ya pö bhë ˗a ˗bha. Mɛn ˗nu ˈö ö ˈˈtʋ to ˗an ˗bha ꞊ʒiaan ˈyö ˈwo ˗tɔ ˈˈyitagɔ dëmɛn waa˗ ʒiömɛn. 12 ˈDhɛ ˈö ˗kë ꞊dhɛ ˈˈyitagɔ dɔdhɛ ˈö bhë ˗kë mü ˗sü ˈö ˈˈnɛnnɛn ˈˈtʋ̈ŋ ˈka ˈyaa ˗së, mɛn ꞊vadhɛ ˗kun ˗a ˈˈpiʋ̈ ꞊dhɛ ˈwo ˈgo ˗dhɛ ˈö bhë ˗a ˈgü, kö ˈwo pë ꞊gban kë ˈwo ˗lo ˈˈyitagɔ dɔdhɛ ˈdhɛ ˈwo˗ ˗dhɛ Fenisö ˈö Klɛtö ˗pö ˈgü bhë ˗a ˈgü, kö ˈwo ˈˈnɛnnɛn ˈˈtʋ̈ŋ kë mü. ˈˈYitagɔ dɔdhɛ ˈö ˈˈdhʋ̈, ˗da mü ˗dhɛ do ˗yö ˈɲaan˗ ˗wo ˗ʒian waa ˈˈdhuŋ ˗ʒian ˗an ꞊zinŋgü, ˈö˗ do ˈdhö ˈˈshiaŋ ˗ʒian waa ˈɲaan˗ ˗wo ˗ʒian ˗an ꞊zinŋgü.

13 ˈDhɛ ˈö ˈˈtee ˈˈplëëplë ˈö go ˈˈshiaŋ ˗ʒian ˈka ˈö ˗ya ʒiö ˗sü ˗bha, ˈyö ˗kë ˗an ˈgü ꞊dhɛ ˗dhɛ ˈwo˗ ˈˈpiʋ̈ ˈwo ˈdho ˗a ˗bha bhë wo ˗dho ˈdho ˈwo ˗lo mü ˗së ˈka. ˗A ˗wɔn ˈgü, ˗wo ˈˈyitagɔ ˈduaannu ˗a ˈka ˗pë ˈgbin˗ bhë ˗a ˗bho ˗a ˗gɔ, ˈö ˈwo ˗wa Klɛtö ˗dhɛ ˈˈsuee ˈwo dho. 14 ˈˈKɛɛ ˈdhɛ ˈö ˈˈtʋ̈ŋ ˈnën ˈbhaa ˗yö ˗ʒiö, ˈyö ˈˈtee ˈˈgbɩɩ˗ ˈwo˗ ˗dhɛ Edhakilɔn* bhë ˈö ˗ya ʒiö ˗sü ˗bha ˗dhɛ ˈö bhë ˗a ˈgü. 15 ˈDhɛ ˈö ˗kë ꞊dhɛ ˗a ˈˈtee ˗kun ˈˈgbɩɩ˗, ˈö kun yi ˗bha ˈˈyitagɔ bho ˗ni ˈgü ʒiaan˗, ˈö ˈyaa kun ˗mɔn ˗ni ˈgü ˗a ˗bha kö ˈyi ˈdho yi ˈˈdhiʋ̈, ˈyö ˈyi yi ꞊kwaa˗ ˗zü ˗a ˗gɔ ˈö dho yi ˈka. 16 ˗Yö ˗dho yi ˈka ꞊vɛɛdhö ˈö ˈyi ˗lo ˈˈsɛ ˈdɛdɛ ˈö ˈˈyi ꞊zinŋgü ˈwo˗ ˗dhɛ Koda bhë ˗a ˈˈsuee. Pë ˈˈgbɩɩ˗ ꞊dede ˈnën ˈyi˗ ˗kë ˈyö ˈyi ꞊kun ˗mɔn ˈˈyitagɔnën ˈdɛdɛ ˈö kun ˗klu ˗sü ˈka ˗a ˈkpiisü ꞊zlöö bhë ˗a ˗bho mü ˗sü ˗bha kö ˈyaa ˗dho shiʋ̈ˈˈ. 17 ˈDhɛ ˈwo˗ sü ˈwo˗ ˗wɔ ˈˈyitagɔ ˈkpiisü bhë ˗a ˗ta, ˈyö ˈwo bhuʋ̈ga ꞊plʋʋ ˈˈyitagɔ ˈkpiisü bhë ˗a ˈka ˈwo˗ ˗klu. ˈDhɛ ˈö ˗kë ꞊dhɛ ˈˈsuʋ̈ ˗kun ˗an kë ˗ni ˈgü, ˈö ˈyaa kun ˗an ˈˈpiʋ̈ ꞊dhɛ ˈˈyitagɔ ˗yö ˗gban ˈˈɲɛɛn ˗gɔn ˈö ꞊weeyi ꞊löö* bhë ˗a ˗bha, ˈyö ˈwo sɔ ˈö˗ ˗ta bhë ˗a ˗yɛ ˈkwlëë˗, ˈö ˈˈtee ˗yö dho yi ˈka ˗dhɛ ˈö ˗dhi ˗a ˗dhɛ ˗a ˈgü. 18 ˈDhɛ ˈö˗ ˗ta ˗dhɛ ˗yö ꞊kpɔɔ, ˈyö ˈwo ˗kwɛɛ ˈbhaa ˗nu bho ˈˈyitagɔ ˈgü kö ˗yö ˈto ˈˈfʋ̈ʋ̈fʋ̈, ˗a ˗gɛn ˗mü ꞊dhɛ ˈˈtee ˗yö ˗kun ˗a ˗bhaŋbhaŋˈˈ ˗ni ˈgü ˈˈgbɩɩ˗. 19 ˗A ˗dhɛkpaɔyi ˗yaaga ˗bha ˗naan ˈka, ˈyö wo ꞊dede ˈwo ˈˈyitagɔ ˗blü ˗a ˈka ˗kwɛɛ ˗nu ˗wɛnŋ ˈˈyi ꞊bhaa.

20 ˗Dhɛkpaɔyi ꞊va ꞊dede ˈˈpiʋ̈, yi ˈti yi ˈˈɲan ˗kpan ˈɲaan˗ ɛɛnˈˈ ˈˈsusënŋga ˗nu ˗bha. ˗Ya ˈgo mü ˈzü, ˈˈtee ˗kun ʒiö ˗ni ˈgü yi ˗ta ˈˈgbɩɩ˗ ꞊dedewo, ˗a ˗wɔn ˈgü ˈyaa kun yi ˈˈɲaan ꞊dhɛ yi ˗dho dha ˈzü. 21 ˈDhɛ ˈö ˗dhɛkpaɔyi ꞊va ˗yö ˗ʒiö kö mɛn ˈˈwɛɛ ˈbhaa yö ˈti ˗bhöpë ˗da ö ˈˈdhii, ˈyö Pɔdhö ˗yö dɔ ˗an ꞊zinŋgü ˈö˗ pö: «N ˈˈtɔŋdë ˗nu, ˗ya kë ꞊dhɛ ka ka ˈˈtʋ ˗to n ˗man ˗dhioo ˗bha ˈö ˈkwa to Klɛtö, ˈö kwa ˈti ˗da ˈˈyi ˗ta ˗be, ˈwɔn ˈˈgbɩɩ˗ ˈö yö yö ˈti ˗dho kwa ꞊slɔɔ ˈö pë ˗nu ˈgü ˗yö ꞊shiʋ̈ ꞊dhɛ ˗kɔ ˈö yö ˗a ˈdhö. 22 ˈˈKɛɛ a˗ ˈˈpiʋ̈ kö dɔ ˈö ˈkwa˗ wo yö ˈka ka ˗zo ˗gban, ˗a ˗gɛn ˗mü ꞊dhɛ mɛn ꞊gban ka ˗dho dha, pë dosɛnŋ ˈö ˗dho shiʋ̈ˈˈ ˈyö ˗tɔ ˈˈyitagɔ. 23 ˗Zlan ˈa˗ ˗bha ˈka, ˈö ˈa˗ ˗bha yö kë ˗ni ˈgü bhë, ˗a ˗bha ˈˈkiö do ˗yö ˗nu gbeŋ ꞊dɛɛ ˈö dɔ n ˈˈsuee, 24 ˈyö˗ pö n ˗dhɛ: ‹ˈˈSuʋ̈ ˈyaa ˗dho ü kë, Pɔdhö. Ü dua ˗mü kö ˈü ˈdho ü ˗lo Sezaa ˗kuu ˈˈdhiʋ̈. ˗Dhɛ ˗ga, ˗Zlan ˗dho zë ü ˗wɔn ˗dhɛ ˈö mɛn ˈˈpɛpɛ ˈwo ü ˈˈpiʋ̈ ˈˈyitagɔ ˈgü bhë ˈwo dha.› 25 ˈDhɛ ˈö ˈˈdhʋ̈, n ˈˈtɔŋdë ˗nu, ˗ka ka ˗zo ˗gban, ˈyö ˗tɔ a n ˗zo ˗yö ˗Zlan ˗dhɛ ꞊dhɛ pë ˈö˗ pö bhë ˗yö ˗dho kë ˈkpakpadhö. 26 ˈˈKɛɛ kwa ˗bha ˈˈyitagɔ ˗dho ˈdho ˈö ˗puö ˈˈsɛ do ˈbhaa ˈö ˈˈyi ꞊zinŋgü ˗a ˈˈsuee.»

27 ˗Dhɛkpaɔyi ˗kɔŋ do ö ga ˗yiishiö (14) ˗naan ˈka gbeŋ, kö ˈˈtee ˗ya ˈdho yi ˈka Adria ꞊weeyi ˗ta, ˈyö mɛn ˗nu ˈwo yö ˗kë ˈˈyitagɔ ˈgü ˈwo˗ yö ꞊dhɛ yi yö ˗ni ˈgü ˈˈsɛ ˈbhaa ˈka ꞊klöö˗. ˗Yö ˗kë ˈˈdhʋ̈ gbeŋ ꞊zinŋgü. 28 ˈDhɛ ˈö ˗kë ˈˈdhʋ̈, ˈyö bhuʋ̈ga ˈö ˈwo ˈˈyi ꞊löödhɛ dan ˗a ˈka bhë ˈwo˗ ˗zuö ˈˈyi ꞊bhaa, ˈyö ˈˈyi ꞊löödhɛ ꞊duan ˗yö ˗mɔn ˈmɛntrö ˗kɔŋ ˗yaaga ö ga ˈˈsɔɔdo (36) ˗bha.* ˈDhɛ ˈwo ꞊ɲɔɔn ˈˈdhiʋ̈ ˈzü ˈdɛdɛ, ˈyö ˈwo˗ ˗zuö ˈˈyi ꞊bhaa, ˈyö˗ ꞊duan ˗yö ˗mɔn ˈmɛntrö ˗kɔŋ ꞊plɛ ˈö ga ˈˈsɔɔplɛ (27) ˗bha.* 29 ˈDhɛ ˈö ˗kë ꞊dhɛ ˈdho ˗sü kö ˈyi ˗gban ˗gwö ˗nu ˗bha ˗a ˈˈsuʋ̈ ˗kun ˗an kë ˗ni ˈgü, ˈyö ˈwo ˈˈyitagɔ ˈduaannu ˗a ˈka ˗pë ˈgbin˗ ˗yiishiö ꞊yɔɔ ˗a ꞊taabha. ˗Yö ˗kun ˗an ˈˈpiʋ̈ ꞊dhɛ ˗dhɛ ˗yö ꞊kpɔɔ ˈˈvaandhö. 30 ˈˈKɛɛ mɛn ˗nu ˈwo kun yö kë ˗ni ˈgü ˈˈyitagɔ ˈgü bhë, ˗wo ˗kun ˗a ˈˈslö mɛɛnˈˈ ˗ni ˈgü kö ˈwo ꞊duëë, ˈyö ˈwo ˗ya ˈˈyitagɔnën ˈö ˈˈyitagɔ ˈkpiisü ˈgü bhë ˗a ˈˈpʋ ˗sü ˗bha kö ˈwo yɔɔˈˈ ˈyi ꞊bhaa, ˈö ˈwo˗ kë ꞊dhɛ ˈpë ˈwo˗ ˈˈpiʋ̈ kö ˈˈyitagɔ ˈduaannu ˗a ˈka ˗pë ˈgbin˗ bhë ˈwo˗ ˈbhaa yɔɔˈˈ ˗a ˈkpiisü ˈˈdhiʋ̈ ꞊ʒiaan ˗a ˈdhö. 31 ˈDhɛ ˈö Pɔdhö ˗ya yö ˈˈdhʋ̈, ˈyö˗ pö ˈˈsɔdha ˗gɔmɛn waa ˈˈsɔdha ˗nu ˗an ˗dhɛ: «Mɛn ˗nu ˈwo yö wo ˈti ˈto ˈˈyitagɔ ˈgü, ka ˈti ˗dho ꞊mɔɔn˗ ˗bha kö ˈka dha.» 32 ˈDhɛ ˈö ˗kë ˈˈdhʋ̈, ˈyö ˈˈsɔdha ˗nu ˗wo bhuʋ̈ga ˗nu ˈö ˈwo kun ˈˈyitagɔnën ˈˈtɩɩ ˈö ˈˈdhʋ̈ ˗a ˗bha bhë ˗an ꞊kaan, ˈö ˈwo wo ꞊kwaa˗ ˗zü ˈö ˗puö ˈˈyi ꞊bhaa.

33 ˈDhɛ ˈkwa dɔ ˗dhɛ ˗kpɔɔ ˗ta, ˈyö Pɔdhö ˗yö ˗an ꞊gban ˈˈpɛpɛ ꞊faanmën kö ˗wo pë ˗bhö, ˈö˗ pö ˗an ˗dhɛ: «˗A ˗dhɛkpaɔyi ˗kɔŋ do ö ga ˗yiishiö (14) ˗naan ꞊nɛn ˈö ˈka ka ˈˈɲan ˈto ˗ni ˈgü, ˗ya ka ˗de ˗wɔn ꞊zɔnŋ ˗ta ˗sü ˈka, ˈö ka ˈti pë ˈˈwɛɛ ˈbhaa ˗bhö. 34 ˈDhɛ ˈö ˈˈdhʋ̈, ˗ka dɔ ˈˈgbɩɩ˗ ˈka pë ˈnën ˈbhaa ˗bhö, ˗yö ˗dho ˈwɔn ˗së kë ka ˗dhɛ, ˈyö sü ꞊dhɛ ka ˗bha wundhɛ ˗de ˈö ka ˗gɔ ˗bha ˗a dosɛnŋ yö ˈti ˗dho ꞊dhiɔŋ.» 35 ˈDhɛ ˈö ö bo ˗a ˗pö ˈˈdhʋ̈ ˗sü ˈka, ˈyö ˈbluu˗ sü ˈö ˗Zlan ˈˈnuɛ bho mɛn ꞊gban ˈˈpɛpɛ ˈˈɲan ˈˈdhiʋ̈ mü. ˈDhɛ ˈö ö bo, ˈyö˗ ˈˈklu bho ˈö ˗ya ˗a ˗bhö ˗sü ˗bha. 36 ˈDhɛ ˈö ˗kë ˈˈdhʋ̈, ˈyö mɛn ꞊gban ˈˈpɛpɛ ˗wo wo ꞊faan sü, ˈö ˈwo ˗ya pë ˗bhö ˗sü ˗bha ˈpö. 37 ˈMɛn ˈyi kun ˈˈyitagɔ ˈö bhë ˗a ˈgü, yi ˗kun mɛn* këŋ ꞊plɛ ö ˗kɔ ˈˈsɔɔplɛ waa mɛn ˈˈsɔɔdo (276). 38 ˈDhɛ ˈwo pë ˗bhö ˈö ˗an ˈgu ˗yö dɔ, ˈyö ˈwo ˈble˗ ꞊bhlɔɔ ˗nu ꞊wɛnŋ ˈˈyi ꞊bhaa kö ˈˈyitagɔ ˗yö ˈto ˈˈfʋ̈ʋ̈fʋ̈.

39 ˈDhɛ ˈö˗ ˗ta ˗dhɛ ˗yö ꞊kpɔɔ, ˗wo ˗kpan ˈˈsɛ ˈbhaa ˗bha, ˈˈkɛɛ ˈˈsɛ ˈö ˈdhö ˗mü ˈwaa kun ˗a dɔ ˗ni ˈgü. ˈYö ˈwo ˗kpan ˈpö ꞊weeyi ˗gböŋbhodhɛ do ˈö ˈˈkpɔnŋ ˈˈdhiʋ̈ ˗dhɛ ˗së ˈdhö mü ˗a ˗bha, ˈyö ˈwo ˈˈslö ꞊mɛɛn kö ˗ya kë ꞊dhɛ wo ˗kɔ ˗dho ꞊mɔɔn˗ ˗bha ˈwo ˈdho ˈˈyitagɔ ˈö bhë ˗a ˈka mü. 40 ˈDhɛ ˈö ˗kë ˈˈdhʋ̈, ˈyö ˈˈyitagɔ ˈduaannu ˗a ˈka ˗pë ˈgbin˗ ˗nu bhë ˈwo˗ bhuʋ̈ga ˗nu ꞊kaan, ˈwo wo ꞊kwaa˗ ˗an ˗zü ˈö ˈwo ˗puö ˈˈyi ꞊bhaa. ˈYö ˈwo ˈˈdhü ˈˈpɛn ˗nu ˈö ˈwo ˈˈyitagɔ ˗gɔ ꞊dɔɔ ˗an ˈka bhë ˗an bhuʋ̈ga ˗nu ˗pʋ. ˈDhɛ ˈwo wo bo, ˈyö ˈwo sɔ ˈˈpɛn ˈˈtɩɩsü ˈö ˈˈyitagɔ ˈˈdhiʋ̈ ꞊ʒiaan bhë ˗a ˗pʋ ˈˈtee ˗dhɛ, ˈö ˈwo ˗ya ˈdho ˗sü ˗bha ˈˈkpɔnŋ ˈˈdhiʋ̈. 41 ˈDhɛ ˈwo ˗gban ˈˈɲɛɛn ˗gɔn do ˈö ꞊weeyi ˗ya dɔ ˈkwëë˗ ˈˈyi ꞊löö ˗a ˗bha ˈyö ˈwo ˈduaannu, kö ˗a ˗gɔ ˗ya ꞊nënŋ ˈˈɲɛɛn ˈgü, ˗a ʒiö ˗dhɛ ˈyaa ˈdhö. ˗A ˈˈpian ˈdhɛ ˈö˗ ꞊zlöö ˗yö ˗kun ˈgo ˗ni ˈgü ö ˈkwëë˗ ˈpö ꞊weeyi kpö ˗nu ˈö ˈwo kun ˗man ˗ni ˈgü ˗a ˗bha ˈˈgbɩɩ˗ bhë ˗an ˗wɔn ˈgü. 42 ˈDhɛ ˈö ˗kë ˈˈdhʋ̈, ˈyö ˈˈsɔdha ˗nu ˗wa pö ˈwo ˗kasogümɛn ˗nu zë kö ˈwaa ˗dho ˈˈyi kë ˈö ˈwo ꞊duëë. 43 ˈˈKɛɛ ˗yö ˗kun ˈˈsɔdha ˗gɔmɛn ˈˈpiʋ̈ ꞊dedewo ꞊dhɛ ˈö Pɔdhö dha. ˗A ˗wɔn ˈgü yö ˈti ˈˈwɩ ˗a ˗bha kö pë ˈwo˗ ˈˈpiʋ̈ ˈwo˗ kë bhë, ˗wa kë. ˈYö˗ pö mɛn ˈˈpɛpɛ ˈö ˈwo dɔ ˈˈyi kë ˗dhɛ ˈka ˗an ˗dhɛ ˗wo ˗puö ˈˈyi ꞊bhaa kö ˗wo ˈˈyi kë, kö ˗wo dɔ ˈˈdhiʋ̈ ˗wo ˗lo ˈˈkpɔnŋ ꞊taa, 44 kö ˗a mɛn ˗nu ˈwo to ˗wo ˗ya ˈˈdhü ˈˈpɛn ˗nu waa ˈˈyitagɔ ˈˈpɛn ˈˈpɛn ˗nu ˗ta ˗wo ʒiö ˗an ꞊kee˗. ˗Kɔ ˈö ˗kë ˗a ˈka ˈö mɛn ꞊gban ˈˈpɛpɛ ˗wo dha ˈwo ˗lo ˈˈkpɔnŋ ꞊taa, ˈyö bhë.