Yesu ˗bha bɔmɛn ˗nu këwɔn ˗nu
1 Teofidhö, ˗kwɛzlan ˗blɛɛsü ˈa˗ ˗bɛnzë bhë, ˗yö ˗gban pë ˈˈpɛpɛ ˈö Yesu ˗ya ˗kë waa ˗kɔ ˈö mɛn ˗nu ꞊klaŋ ˗kë ˗a ˈka, ˈö sü ˗a zübhodhɛ ˗bha 2 ˈö dho ˈö yö ˗a ˈka ˗dhɛkpaɔyi ˈwo˗ sü ˗a ˈka ˈwo dho ˗a ˈka dhaŋ˗ ˈgü ˗a ˗bha bhë ˗a ˗bha. ˈˈSanni ˗yö ˈdho, ˗yö ˗bɔ ˗zuu ˈˈslʋ̈ʋ̈slʋ̈ ˗ta ˈö ˗dhioo dɔ ö ˗bha bɔmɛn ˗nu ˈö ö ˗kɔ ˗yɛ ˗an ˗bha bhë ˗an ˗ta. 3 ˈDhɛ ˈö ö bo saanˈˈ ˈsü ˗sü ˈka, ˗yö ö ˗de ˗zɔn ˗an ˗dhɛ ˗gɛnɲaan ˈka ꞊va, kë ˈˈdhʋ̈ kö ˗yö ga ˗an ˈgü ˈkpakpadhö ꞊dhɛ ö ˈˈbhɩɩ˗. ˗Dhɛkpaɔyi ˗kɔŋ ˗yiishiö (40) ˈˈpiʋ̈, ˗yö ˗kun ö ˗de ˗zɔn ˗ni ˈgü ˗an ˗dhɛ ˈö ˗Zlan ˗bha ˗Gblüdëdhɛ ˗wɔn ꞊blɛɛ ˗an ˗dhɛ. 4 ˈˈTʋ̈ŋ ˈö waa˗ ˗nu ˈwo kun ˗a ˈka wo ˈko ˈˈpiʋ̈ bhë ˗a ˈka, ˗ya ˗pö ˗an ˗dhɛ: «ˈKaa ˗dho ˈgo Zedhizadhɛmö ˈö ˈka dho ˗dhɛ ˈˈwɛɛ ˈbhaa ˈgü. ˗Ka ka zuʋ̈ˈˈ kë ˗saa kö ˈka ka ˈˈɲan ˈto pë ˈö n Dë ˗ya ˈˈplünŋ bho ˈö ˈa˗ ˗wɔn ꞊blɛɛ ka ˗dhɛ bhë ˗a ˗gɔ. 5 ˗A ˗gɛn ˗mü ꞊dhɛ ˈˈyi ˈnën ˈö Zan ˗yö mɛn bɔ ˗a ꞊bhaa, ˈˈkɛɛ ka ˗zë ˗a yi ˈyaa ꞊gblɛɛn ˈzü kö ˈa ka bɔ ˈˈyi ꞊bhaa ˗zuu ˈˈslʋ̈ʋ̈slʋ̈ ˈka.»
6 ˈDhɛ ˈwo kun wo ˈkwëëdhö ˈzü, ˈyö ˈwo˗ dhɛɛˈˈ kpɔ ˈwo˗ pö: «Dëmɛn, ü ˗dho Izraɛdhömɛn ˗nu ˗bha ˗gblüdëdhɛ nu ˗an ˗dhɛ ˈzü ˈˈtʋ̈ŋ ˈö yö ˗a ˈgü ˗ee?» 7 ˈYö˗ pö ˗an ˗dhɛ: «ˈˈTʋ̈ŋ waa yi ˈö ˈwɔn ˗nu ˈwo ˈˈdhʋ̈ ˈwo ˗dho kë ˗a ˈka n Dë dosɛnŋ ˈnën ˈö˗ ˗gɔ. ˈKaa ˈnën ˈö ka dua ˈdhö ˗mü kö ˈka˗ dɔ. 8 ˈˈKɛɛ ˗zuu ˈˈslʋ̈ʋ̈slʋ̈ ˗ya nu ka ˗ta, ka ˗dho ꞊faan ꞊slɔɔ˗ ˈö ˈka ˗kë n ˗man ꞊gbɛkiö ˗nu ˈka Zedhizadhɛmö ˗dhɛ, Zude ˗dhɛ ˈˈpɛpɛ, Samadhi ˗dhɛ waa ˈˈsɛ ˗nu ˈwo mü ꞊gblɛɛn ꞊gblɛɛn ˗an ˈgü.» 9 ˈDhɛ ˈö ö bo ˗a ˗pö ˈˈdhʋ̈ ˗sü ˈka, ˗a ˗bha gwëëˈˈ ˗nu ˗to ˗dhɛ ˗ga ˗sü ˗bha, ˈö ˗ya ˈdho ˗sü ˗bha dhaŋ˗ ˈgü, ˈyö ˈˈdhuu kpö ˗yö nu ˈö sɔ ˗a ˗ta ˗an ˈˈɲan ˈˈdhiʋ̈ mü. 10 ˈDhɛ ˈwo kun ˗dhɛ ˗ga ˗ni ˈgü dhaŋ˗ ˈgü kö Yesu ˗yö ˈdho ˗ni ˈgü, ˈyö gɔndënën ꞊plɛ ˈö sɔ ˈˈpuu ˈdhö ˗an ˗bha ˗wo to mü ˈwo ˗wo ˗an ˈˈsuee mü, 11 ˈö ˈwo˗ pö: «Galile ˗mɛn ˗nu, ˈmën ˗kë ˈö ˈka ˈduaannu ˈka dhaŋgüdhɛ ˗ga ˈˈdhʋ̈? Yesu ˈö ˈwo˗ sü ka kpö ˈgü ˈwo dho ˗a ˈka dhaŋ˗ ˈgü bhë, ˗yö ˗dho nu ꞊dhɛ ˗kɔ do ˈö ˈka ˗kpan ˗a ˈka ˗a ˗bha kö ˗yö ˈdho ˗ni ˈgü dhaŋ˗ ˈgü bhë ˗a ˈdhö.»
12 ˈDhɛ ˈö ˗kë ˈˈdhʋ̈, ˈyö ˈwo go ˗tɔn ˈwo˗ ˗dhɛ Olivie ˗tɔn bhë ˗a ˗ta ˈö ˈwo wo ꞊yɛɛ ˗kë Zedhizadhɛmö. ˗A ˗tɔn ˈö ˈˈdhʋ̈ ˈyaa Zedhizadhɛmö ˗dhɛ ˈka ꞊gblɛɛn, ˗yö pë ˈö ˗mɔn ˈˈkɩdhʋŋ do ˗bha ˗a ˗naan ꞊taa.* 13 ˈDhɛ ˈwo ˗lo mü ˈyö ˈwo dho ˈkɔdhi do ˈö kun ˈkɔ ˗ta ˈˈdhuŋ ˗a ˈgü, ˈö ˈwo to mü. Mɛn ˈwo kun mü ˈyö ˈwo ˗tɔ: Piɛɛ waa Zan, Zakö waa Andre, Filipö waa Toma, Batedhemi waa Matiö, Zakö Alüfe gbö, Simɔn ˈö ˈwɔn ˗nu ˗kë ö ꞊faan ˈka waa Zuda Zakö gbö. 14 ˗An ꞊gban ˈˈpɛpɛ zuʋ̈piʋ̈wɔn ˗kun do, ˈö ˈwo kun bhɛɛˈˈ ˗ni ˈgü ˗kplawo. Dhebɔ ˈbhaa ˗nu waa Madhi Yesu dhe waa Yesu ꞊dhegblü ˗nu ˗wo ˗kun mü ˈpö.
15 ˈˈTʋ̈ŋ ˈwo kun ˗a ˈka wo ˈko ꞊bhaa ˈˈdhʋ̈ bhë ˗a ˗dhɛkpaɔyi do ˈka, Piɛɛ ˗yö ˗luu ˈö dɔ ö ˗gɛn ˗ta ö ꞊dhegblü ˗nu ꞊zinŋgü (mɛn ˈwo kun mü ˗wo ˗mɔn mɛn këŋ do ö ˗kɔ ꞊plɛ (120) ˗bha) ˈyö˗ pö: 16 «N ꞊dhegblü ˗nu, ˗a ˗dhɛ ˗yö ˗kun ˗a ˗bha kö pë ˈö ˗zuu ˈˈslʋ̈ʋ̈slʋ̈ ˗yö bɔ Davi ˗ta ˈö˗ to ˈˈdhiʋ̈ ˈö˗ pö ˗Zlan ˗Wo ˈsëëdhɛ ˈgü, ˈö ˗gban Zuda ˈö yö mɛn ˗nu ˈwo Yesu kun ˗an ˗dhɛ ˈˈdhiʋ̈ ˗a ˗bha bhë, ˗yö yökodhiʋ̈. 17 Zuda ˈö bhë ˗yö ˗kë kwa ˈˈpiʋ̈ ˗be, ˈö kun ˈpö mɛn ˈwo wo ˗kɔ ˗yɛ ˗a ˗bha kö ˗yö ˗Zlan ˗bha yökë ˗a ˈka. 18 (Gɔndë ˈö bhë ˗yö ˈwɔn yaa ˈö˗ ˗kë ˗a ꞊saa ˗sü ˈö dho ˈö ˗dhɛ do dhɔ ˗a ˈka. ˈDhɛ ˈö ˗kë ˈˈdhʋ̈ ˈyö ˗puö ö ˗gɔ ˗ta, ˈyö˗ ˗böö ˗yö ˗pɛn, ˈö˗ ˈˈgblüüpë ꞊gban ˈˈpɛpɛ ˗wo yö ˈˈkpɛnŋ. 19 Zedhizadhɛmö ˗mɛn ˗nu ꞊gban ˈˈpɛpɛ ˗wo ˈwɔn ˈö bhë ˗a ˗tɔɔ ˗man. Yö ˈnën ˈö˗ ˗wɔn ˈgü ˈö ˗dhɛ ˈö˗ dhɔ ˈˈdhʋ̈ bhë ˈwo˗ ˗dhɛ ˗an ˗wo ˈgü Akɛlüdama, ˗a ˗gɛn ˈnën ˗tɔ, «ˈBhladhɛ ˈwo˗ dhɔ mɛn ꞊ɲɔɔn ꞊sɔnŋ ˈka.») 20 Pë ˈö ˗bɛnzë ˗sü ˈka ˈˈTan ˈsëëdhɛ ˈgü ˈyö ˗tɔ: ‹˗A ˗yɛɛbhaadhɛ ˗yö kë ˈˈkpaandhɛ ˈka, mɛn ˈˈwɛɛ ˈbhaa ˈyaa ˗dho ˗ya mü,› ˈö˗ ˗pö ˈzü ‹˗Duɛɛ* ˈdhɛ ˈö ˗kë ˗a ˗gɔ bhë mɛn ˈˈwɛɛ ˈbhaa ˗ya ˈsü.› 21 ˈDhɛ ˈö ˈˈdhʋ̈, gɔɔn˗ ˗nu ˈwo ˗ʒiö yi ꞊kee˗ ˈˈtʋ̈ŋ ˈˈpɛpɛ ˈö kwa Dëmɛn Yesu ˗yö ö ˗bha yökë ˗a ˈka kwa ˈˈpiʋ̈ yö bhë ˗a ˈka, 22 ˈö go ˗a ˈka ˈˈtʋ̈ŋ ˈö Zan ˗ya bɔ ˗a ˈka ˈˈyi ꞊bhaa bhë ˗a ˗bha ˈö dho ˈö yö ˗a ˈka ˈˈtʋ̈ŋ ˈö ˈwo˗ sü ˗a ˈka kwa ˈˈpiʋ̈ ˈö dho dhaŋ˗ ˈgü bhë ˗a ˗bha, ˗yö ˗dho kë ˗së kö ˈkwa kwa ˗kɔ ˈˈyɛ ˗a mɛn do ˗bha kö ˗yö kpa yi ˗bha kö ˈyi kë ˗a ˗bha ˗go ga ˈgü ˗sü ꞊gbɛkiödhɛkëmɛn ˗nu ˈka.»
23 ˈDhɛ ˈö ˗kë ˈˈdhʋ̈, ˈyö ˈwo mɛn ꞊plɛ ˈtɔ nu. ˗A mɛn do ˈnën ˗tɔ Zozɛfö ˈö ˈwo˗ ˗dhɛ Baasabasö ɛɛnˈˈ ˈö ˈwo˗ ˗dhɛ ˈzü Zutusö, ˈyö ˈwo˗ mɛn do ˗dhɛ Matiasö. 24 ˈDhɛ ˈwo wo bo, ˈyö ˈwo ꞊bhɛɛ ˈwo˗ pö: «Zoova, bhi ˈü mɛn ꞊gban ˈˈpɛpɛ zuʋ̈piʋ̈dhɛ dɔ, mɛn ꞊plɛ ˈö ˈwo yö, ˗a mɛn ˈdhɛ ˈü ü ˗kɔ ˗yɛ ˗a ˗bha 25 kö ˗yö kë bɔmɛn ˈka ˗yö ü ˗bha yökë Zuda ˈö ˗kan ü ˗bha yö ˗bha ˈö dho ˗dhɛ ˈö kun ˗a ˈˈpiʋ̈ ꞊dhɛ ˈö ˈdho ˗a ˗bha ˗a ˈgü bhë ˗a ꞊ʒiaan˗ ˈgü, ˗bhö ˗a ˗zɔn yi ˗dhɛ.» 26 ˈDhɛ ˈwo wo bo ˈö ˈwo ˗zë ˈˈkpʋ̈ü ˗kë, ˈyö ˗puö Matiasö ˗ta, ˈyö ˗da bɔmɛn ˗nu ˗kɔŋ do ö ga do (11) ˈwo bhë ˗an ˈˈpiʋ̈.