ˈö Matiö ˗ya ˗bɛnzë

7 «˗Ka ˈˈkan za ˗dɔ mɛn ˈˈwɛɛ ˗nu ˗bha ˗sü ˗bha, kö za ˈya ˗dho dɔ ka ˗bha. 2 ˗A ˗gɛn ˗mü ꞊dhɛ ˗kɔ ˈö ˈka za dɔ ˗a ˈka mɛn ˗nu ˗bha ˈyö za dho dɔ ˗a ˈka ka ˗bha ˈpö. ˗Ya ˈgo mü, pë ˈö ˈka pë dan ˗a ˈgü ˈka˗ nu mɛn ˈˈwɛɛ ˗nu ˗dhɛ, ˈyö ˈwo ˗dho ka ˗bha dan ˗a ˈgü ˈpö. 3 ˈMën ˗kë ˈö ˈˈdhü ˗bi ˈnën ˈö ü ꞊dhegblü ˈˈɲan ˈgü bhë ˈyö ˈü ˗kpan ˗a ˗bha, ˈˈkɛɛ ˈö ˈˈdhü ˈˈbeŋ ˈö ˗ʒiö bhi ˗zë ü ˈˈɲan ˈgü bhë ˈbhaa˗ yö? 4 Ɛɛnˈˈ ü ꞊mɔɔn˗ ˗bha ˈü˗ pö ü ꞊dhegblü ˗dhɛ: ‹Dɔ kö ˈˈdhü ˗bi ˈnën ˈö ü ˈˈɲan ˈgü bhë ˈa˗ bho mü,› ˈˈkɛɛ kö bhi ˗zë ˈˈdhü ˈˈbeŋ ˗yö ʒiö ˗sü ˈka ü ˈˈɲan ˈgü ˗ee? 5 ˈˈKpënŋ˗ ˗kë mɛn ˗gɔ ˗mɛn! ˗Bhö ˈˈdhü ˈˈbeŋ ˈö ü ˈˈɲan ˈgü bhë ˗a bho mü ꞊köŋ kö ˈü ˗dhɛ yö ˗së ˈka, kö ˈü ꞊kun ˗mɔn ˈˈdhü ˗bi ˈnën ˈö ü ꞊dhegblü ˈˈɲan ˈgü bhë ˗a ˗bho mü ˗sü ˗bha.

6 «ˈKa ˗dho pë ˈö ˈˈslʋ̈ʋ̈slʋ̈* ˗a nu ˈgbɛn˗ ˗nu ˗dhɛ, ɛɛnˈˈ ˈka ˗dho ˗zlɔɔ ꞊bhlëësü ˗nu ˗zuö ˗bhɔ ˗nu ˗dhɛ kö ˈwa ˗dho taaˈˈ ˗a ˗ta ˈö ˈwo nu ka ˗gɔ ˈzü ˈwo pë ˈˈdhiʋ̈˗ ˗kë ka ˈka.

7 «˗Ka pë ˗gba ˗dhɛ ˗kplawo, ˗wo ˗dho ˗a nu ka ˗dhɛ. ˗Ka pë mɛɛnˈˈ ˗kplawo, ka ˗dho ˗a ꞊slɔɔ. ˗Ka ˈˈkwee ˗ta ˗man ˗kplawo, ˗wo ˗dho ˗a ˈˈpʋ ka ˗gɔ. 8 ˗A ˗gɛn ˗mü ꞊dhɛ mɛn ˈö pë ˗gba ˗dhɛ ˈyö ˈwo˗ nu ˗a ˗dhɛ. Mɛn ˈö pë ꞊mɛɛn ˈyö˗ ꞊slɔɔ. Mɛn ˈö ˈˈkwee ˗ta ˗man, ˗wo ˗dho ˗a ˈˈpʋ ˗a ˗gɔ. 9 Mɛn ˈö ˈka ˗lo bhë, de ˈö˗ ˗bha ˈnën ˗ya ˈbluu˗ ˗dhɛ ˗a ˗gɔ ˈö dho ˗gwö kpö ˈsü kö ˗ya nu ˗a ˗dhɛ? 10 Ɛɛnˈˈ ˈzü ˗a ˗bha ˈnën ˗ya ˈyuö˗ ˗dhɛ ˗a ˗gɔ, ˗yö ˗dho ꞊mlɛɛn ˈsü kö ˗ya nu ˗a ˗dhɛ ˗ee? 11 ˗Ya kë ꞊dhɛ ka ˈö ka ˈˈgblü ˈdhö ˈya˗ ˈka dɔ pë ˈö ˗së ˗a nu ˗dhɛ ˈka ka ˗bha ˈnën ˗nu ˗dhɛ, ˈyö ka Dë ˈö ˗ya ˗sü ˈka dhaŋ˗ ˈgü bhë ꞊wɛ? Yö ˈti dho pë ˗së ˗nu nu mɛn ˗nu ˈwo˗ ˗gba ˗dhɛ ˗a ˗gɔ ˗an ˗dhɛ ˗ee?

12 «ˈDhɛ ˈö ˈˈdhʋ̈, pë ˈˈpɛpɛ ˈö ˈka˗ ˈˈpiʋ̈ ꞊dhɛ mɛn ˗nu ˗wa kë ka ˗dhɛ, ka dua ˗mü kö ˈka˗ kë ˗an ˗dhɛ ˈpö. Pë ˈö ˈTɔŋ˗ waa ˗Zlan ˗wodhiʋ̈lomɛn* ˗nu ˈwo˗ pö ˈyö bhë.

13 «˗Ka bɔ ˈˈkwee ˈˈdhi ˈö ˈˈsɔɔsɔ bhë ˗a ˈka. ˗A ˗gɛn ˗mü ꞊dhɛ ʒiaanga ˈˈgbɛɛ ˈö˗ ˈˈkwee ˈdhö ˈkpii˗ bhë, ˗yö ˗dho mɛn ˈka ˈgüshiʋ̈dhɛ ˈgü. ˈYö mɛn ˗nu ˈwo bɔ ˗a ˈka ˈwo ꞊va. 14 ˈˈKɛɛ ʒiaanga ˈdhɛ ˈö ˈˈsɔɔsɔ, ˈö˗ ˈˈkwee ˈˈdhi ˈdhö ˈˈtɩtɩ bhë, yö ˈnën ˗tɔ ˗këdhösü ˗ʒian, ˈyö mɛn ˗nu ˈwo˗ yö ˈwo bɔ ˗a ˈka ˈwaa ꞊va.

15 «˗Ka ka ˗zokë ka ˗de ˈˈpiʋ̈ ˗Zlan ˗wodhiʋ̈lomɛn ꞊suasü ˗nu ˗gɔ. ˈˈBhlaa kwi ˈnën ˈwo˗ ˗da wo ˗bha ˈwo nu ˗a ˈka ka ˈˈpiʋ̈, ˈˈkɛɛ kö ˈˈblü ˗gbɛn ˈˈdhiʋ̈˗ ˗nu ˗mü ˗an ˈka. 16 Ka ˗dho ˗an dɔ ˗an këwɔn ˗nu ˗bha. ˗Drɔɔn ˗kpaa ˈyaa ꞊mɔɔn˗ ˗bha kö ˗yö bhɔ ˈˈglɛɛn ˗dhü ˗bha kö ˗wa bho. Ɛɛnˈˈ figö bhɛ ˈyaa ꞊mɔɔn˗ ˗bha kö ˗yö bhɔ dhetii ˗dhü ˗bha, ˈyaa ˈˈdhʋ̈ ˗ee? 17 ˗Kɔ do ˈö bhë ˗a ˈka, ˈˈdhü ˈö ˈˈdhü ꞊suu ˗së ˈka, ˗a bhɛ ˗yö ˗kë ˗së. ˈˈKɛɛ ˈˈdhü ˈö ˈyaa ˈˈdhü ꞊suu ˗së ˈka, ˗a bhɛ ˈyaa kë ˗së. 18 ˈˈDhü ꞊suu ˈö ˗së ˗a bhɛ ˈyaa kë ˈya˗. Ɛɛnˈˈ ˈˈdhü ꞊suu ˈö ˈya˗, ˗a bhɛ ˈyaa kë ˗së. 19 ˈˈDhü ˈˈpɛpɛ ˈö ˈyaa ö bhɛ ˗së ˗ya, ˗a ˈˈkan ˈnën ˈwo˗ wo ˈö ˈwo˗ ˗zuö ˈˈshiʋ̈ ˈgü. 20 ˗Dhɛ ˈö ˈˈdhʋ̈, ka ˗dho mɛn ˗nu ˈwo bhë ˗an dɔ ˗an këwɔn ˗nu ˗bha.

21 «Mɛn ˈˈpɛpɛ ˈwo˗ pö ˗ni ˈgü n ˗dhɛ: ‹N Dëmɛn, N Dëmɛn› bhë, ˗an ꞊gban ˈyaa ˈnën ˈwo ˗dho ˗da ˗Gblüdëdhɛ ˈö dhaŋ˗ ˈgü bhë ˗a ˈgü. Mɛn ˗nu ˈwo n Dë ˈö ˗ya ˗sü ˈka dhaŋ˗ ˈgü bhë ˗a dhɔɔbhawɔn ˗kë, woo dosɛnŋ ˈnën ˈwo dho ˗da mü. 22 Yi ˈö bhë ˗a ˈka, mɛn ꞊vadhɛ ˗dho ˗a pö n ˗dhɛ: ‹N Dëmɛn, N Dëmɛn, yi ˗Zlan ˗wo ˈˈdhiʋ̈ ˗lo ü ˈtɔ ˈgü, ˈyi ˗zuu yaa ˗nu ˗kë ü ˈtɔ ˈgü, ˈö ˈyi ˗dhidha ꞊va ˗kë ü ˈtɔ ˈgü.› 23 ˈˈKɛɛ a ˗dho ˗a pö ˗an ˗dhɛ: ‹ˈˈMaan ka dɔ toŋtoŋdhö, ˗ka bhɔ n ˗dhɛ ꞊taa, ˈwɔnyaakëmɛn ˗nu.›

24 «Mɛn ˈö ˗wo ˗nu ˈa ˗an pö ˗ni ˈgü ka ˗dhɛ yö ˗an man, ˈö ˗an ˗ya ꞊bhlëë ˈgü, kö ˗yö ꞊dhɛ mɛn ꞊kpɔɔsü do ˈö ö ˗bha ˈkɔ dɔ ˗gwö ˗ta ˗a ˈdhö. 25 Dha ˈkpii˗ ˗yö ˗ban ˈö ˈˈyi ˗yö pa, ˈö ˈˈtee ˈˈgbɩɩ˗ ˗nu ˗wo ˗man ˗a ˗bha, ˈˈkɛɛ ˗a ˈkɔ yö ˈti ˗puö ˈyö sü ꞊dhɛ ˗a ˗gɛn ˗kun ˗gban ˗sü ˈka ˗gwö ˗ta. 26 ˈˈKɛɛ mɛn ˈö ˗wo ˗nu ˈa ˗an pö ˗ni ˈgü ka ˗dhɛ yö ˗an man ˈö ˈyaa ˗an ˗ya ꞊bhlëë ˈgü, kö ˗yö ꞊dhɛ ˈˈblɔɔnmɛn ˈö ö ˗bha ˈkɔ dɔ ˈˈɲɛnŋ ˗ta ˗a ˈdhö. 27 ˗Dhɛ ˈö dha ˗yö ban ˈö ˈˈyi ˗yö pa, ˈö ˈˈtee ˈˈgbɩɩ˗ ˗yö ˗man ˈkɔ ˈö bhë ˗a ˗bha, ˗yö ˗lo ˈpapadhö.»

28 ˈDhɛ ˈö Yesu ˗yö ö bo ˗a ˗pö ˈˈdhʋ̈ ˗sü ˈka, ˈyö mɛn ˗nu ˈwo kun ˗a ˗züzü bhë ˗a ˗bha mɛn ꞊klaŋ kë ˗kɔ ˈwɔn ˗yö ˗an kun ꞊dedewo, 29 ˈyö sü ꞊dhɛ ˗yö ˗kun mɛn ˗nu ꞊klaŋ kë ˗ni ˈgü ˗wogbinŋdhɛ ˈka. ˈYaa kun ˗a kë ˗ni ˈgü ꞊dhɛ ˈtɔŋ˗ ˗gɔmɛn ˗nu ˈdhö.