Nɔɔn˗ ˗së ˈsëëdhɛ ˈö Makö ˗ya ˗bɛnzë
6 ˗Yö ˗go ˗dhɛ ˈö bhë ˗a ˈgü ˈö dho ˈpödhɛ ˈö ˗gla ˗a ˈgü bhë ˗a ˈgü, ˈyö˗ ˗bha gwëëˈˈ ˗nu ˗wo ˗ʒiö ˗a ꞊kee˗. 2 ˈDhɛ ˈö ꞊Glooyi ˗yö ˗wo, ˈyö ˗ya mɛn ˗nu ꞊klaŋ kë ˗sü ˗bha ˗yakwëë ˗kë ˗a ˈgü ˗kɔ ˈgü. ˈYö mɛn ˗nu ˈö ˈwo kun wo ˈˈtʋ ˈto ˗ni ˈgü ˗a ˗bha, ˗a ˗bha mɛn ꞊klaŋ kë ˗kɔ ˈwɔn ˗yö ˗an ꞊vadhɛ kun ꞊dedewo, ˈö ˈwo˗ pö: «Gɔndënën ˈö yö, ˈwɔn ˗nu ˈö ˗an pö ˗ni ˈgü yö, ˗yö ˗an ˗draan ˈˈmɛn? ˗Yö ˗go ꞊kpɔɔdhɛ waa ˗kɔmɔnwɔnbhasü ˈö ˗dhidha ˗nu ˗kë ˗a ˈka bhë ˗an ˈka ˈˈmɛn? 3 Madhi gbö ˈö ˈˈdhüɲënmɛn ˈka bhë ˈyaa ˈnën ˈö yö ˗ee? ˈYaa ˈnën ˈö˗ ꞊dhegblü gɔɔn˗ ˗nu ˗kë Zakö, Zozɛfö,* Zuda waa Simɔn ˗an ˈka ˗ee? ˗A ꞊dhegblü dhoo ˗nu ˈwaa kwa ˈˈpiʋ̈ yö ˗ee?» ˗A ˗wɔn ˈgü wo ˈti ˈdhaŋ˗ bho ˗a ˈˈdhiʋ̈. 4 ˈYö Yesu ˗ya pö ˗an ˗dhɛ: «˗Wo ˗Zlan ˗wodhiʋ̈lomɛn ꞊bhlëë ˗ya ˗dhɛ ꞊gban ˈˈpɛpɛ ˈgü, ˈˈkɛɛ ˗a ˗de ˗gɔ ˈpömɛn ˗nu waa˗ ˗gɔ ˈkɔɔmɛn ˗nu ˈwaa˗ ꞊bhlëë ˗ya.» 5 ˈDhɛ ˈö ˗kë ˈˈdhʋ̈, Yesu yö ˈti ˗dhidha ꞊va kë mü. Mɛn ga ˈdɔɔni ˈnën ˈö ö ˗kɔ pa ˗an ˈka ˈö ˗an ˗bha ˈˈyua bo. 6 ˗Zo ˗yö ˗a ˗dhɛ ˗sü ˈö ˈyaa kun mɛn ˗nu ˗gɔ mü bhë, ˗a ˈwɔn ˗yö ˗a ˗kun ꞊dedewo. ˈDhɛ ˈö go mü, ˈyö bɔ ˈpödhɛ ˗nu ˈö ˈwo ˗dhɛ ˈö bhë ˗a ˗züzü ˗an ˈgü, ˈö mɛn ˗nu ꞊klaŋ ˗kë.
7 ˈDhɛ ˈö ˗kë ˈˈdhʋ̈, ˈyö mɛn ˗kɔŋ do ö ga ꞊plɛ ˈwo bhë ˈö ˗an ˗dhɛ, ˈö ˗an dan ꞊plɛ ꞊plɛ ˈö ˗ya ˗an bɔ ˗sü ˗bha, ˈö ˗kɔmɔnwɔnbhasü nu ˗an ˗dhɛ kö ˗wo ˗zuu yaa bho mɛn ˗nu ˈgü. 8 ˈYö go mü ˈzü ˈö˗ pö ˗an ˗dhɛ ˈwa ˗dho pë ˈbhaa ˈsü wo ˗kɔ ˈˈpiʋ̈ kö ˗wo ˈdho ˗a ˈka ˈˈta ˈö bhë ˗a ˈgü, kö yö ˈti kë ˈˈdhünën ˈka. ˗Ya ˗pö ˗an ˗dhɛ ˈwa ˗dho ˈbluu˗, ˗bhöpë ˗da ˗a ˈgü ˈˈkpɔɔ ɛɛnˈˈ ˈwëëga ˈbhaa ˈsü wo ˗kɔ ˈˈpiʋ̈. 9 ˗Ya ˗pö ˗an ˗dhɛ ˈzü ˗wo ˗sabha ˗nu yö wo ˗gɛn ˗bha, ˈˈkɛɛ ˈwa ˗dho ˈˈbhee ꞊plɛ ˗bha ˗naan ˈkun wo ˗kɔ ˈˈpiʋ̈. 10 ˈYö go mü ˈzü ˈö˗ pö ˗an ˗dhɛ: «˗Dhɛ ˈˈpɛpɛ ˈö ˈka ˗dho ˈdho ˗a ˗bha, mɛn ˈbhaa ˗ya ö ˗kɔ ˗ya ka ˗gɔ ö ˗gɔ ˈkɔɔ, ˗ka ˈto ˗a ˗gɔ ˈkɔɔ ˗yö ˈdho ˗yö yö ˗a ˈka ka ˗go ˗dhɛ ˈö bhë ˗a ˈgü ˗yi ˗bha. 11 ˈKa ˈdho ˗dhɛ ˈbhaa ˈgü, mɛn ˗nu ˈwo mü wo ˈti wo ˗kɔ ˗ya ka ˗gɔ ɛɛnˈˈ wo ˈti wo ˈˈtʋ ˈto ka ˗bha, ˗ka ka ˗gɛn ˗man kö ˈˈsɛ ˈö˗ ˗bha ˈka˗ bho mü, kö ˗a ˈwɔn ˗yö kë ˗an ˈˈɲaan ꞊dhɛ ˗Zlan ˗ya wo ꞊kpɔɔ.» 12 ˈDhɛ ˈö ˗kë ˈˈdhʋ̈, ˈyö ˈwo dho ˗zlanwopö, ˈö ˈwo˗ pö mɛn ˗nu ˗dhɛ ˗wo ˈgo wo ˗bha ꞊sɔŋ yaa ˈgü kö ˗wo wo zuʋ̈ˈˈ slëëˈˈ ˗Zlan ˈˈpiʋ̈. 13 ˈYö ˈwo ˗zuu yaa ˗nu ꞊va ꞊dede bho mɛn ˗nu ˈgü, ˈö mɛn ꞊va ꞊dede ˈö ˈˈyua ˗yö kun ˗an ˗bha ˈwo ˈˈɲɔn ˗kë ˗an ˗bha, ˈö ˈwo ˗an ˗dhɛ bo.
14 ˗Gblüdë Edhɔdö ˗yö ˈwɔn ˗nu ˈwo bhë ˗an ꞊gban ˗man, ˗a ˗gɛn ˗mü ꞊dhɛ Yesu ˈtɔ ˗kun ˗pɛn ˗ni ˈgü ꞊dedewo ˈˈtʋ̈ŋ ˈö bhë ˗a ˈgü. Mɛn ˗nu ˗kun ˗a pö ˗ni ˈgü ˗a ˗bha ꞊dhɛ: «Zan mɛnbɔyibhaamɛn ˈnën ˈö go ga ˈgü bhë. Yö ˈnën ˈö˗ ˗wɔn ˈgü ˈö ˗mɔn ˗dhidha ˗nu ˈwo bhë ˗an kë ˗sü ˗bha.» 15 ˈˈKɛɛ mɛn ˈbhaa ˗nu ˗kun ˗a pö ˗ni ˈgü: «Edhi ˗mü.» ˈYö mɛn ˈbhaa ˗nu ˗de ˈpö ˈwo˗ pö: «˗Zlan ˗wodhiʋ̈lomɛn ˗mü ˗a ˈka ꞊dhɛ ˗a mɛn ˗nu ˈwo kun ˈkpa ˗an ˈdhö.» 16 ˈDhɛ Edhɔdö ˗ya man ˈˈdhʋ̈, ˈyö˗ pö: «Zan ˈö ˈa˗ ˗kë ˈö ˈwo˗ ˗gɔ ˈˈklu bho bhë, yö ˈnën ˈö go ga ˈgü bhë.» 17 ˗A ˈˈtʋ̈ŋ ˈö bhë ˗a ˈgü, Edhɔdö ˗yö ö ꞊dhegblü Filipö ˗bha dhebɔ Edhodiadö ˗sü dhe ˈka. Dhebɔnën ˈö bhë ˗a ˗wɔn ˈgü, Edhɔdö ˗yö mɛn ˗bɔ ˈö ˈwo Zan kun, ˈö ˈwo˗ ˗lö, ˈö ˈwo˗ ˗da ˗kaso ˈgü. 18 ˗A ˗gɛn ˗mü ꞊dhɛ Zan ˗yö ˗kun ˗a pö ˗ni ˈgü Edhɔdö ˗dhɛ: «Ü dua ˈyaa ˗mü kö ˈü ü ꞊dhegblü ˗bha dhebɔ ˈsü dhe ˈka.» 19 ˗A ˗wɔn ˈgü, ˈwɔn ˗kun ˗shiö ˗sü ˈka Edhodiadö ˗dhɛ Zan ˗bha, ˈö kun ˗a ˈˈslö mɛɛnˈˈ ˗ni ˈgü kö ˈö˗ zë. ˈˈKɛɛ ˈyaa kun ˗mɔn ˗ni ˈgü ˗a ˗bha. 20 ˗A ˗gɛn ˗mü ꞊dhɛ Edhɔdö ˗kun ˈˈsuʋ̈ ˗ni ˈgü Zan ˗gɔ, ˈyö ˗tɔ ˗ya ˈwɔn ˗dɔ ꞊dhɛ mɛn kpɛnŋdhö ˈö pö ˈyaa˗ ˗bha yö ˗mü ˗a ˈka. ˗Yö ˗kun ˗a ˗takpa ˗ni ˈgü. Ö ˈˈtʋ ˗to Zan ˗wo ˗bha ˗sü ˗kun ˗a ˗dhɛ ˗së ˗kplawo. ˗Ya ö ˈˈtʋ ˈto ˗a ˗wo ˗bha, pë ˈö ˗dho ˗a kë ˗a ˈka ˈyaa˗ dɔ.
21 ˈˈKɛɛ pë ˈö Edhodiadö kun ˗a ˈˈpiʋ̈ ˈö˗ kë bhë, ˗a ˈˈtʋ̈ŋ ˗së ˗yö ˗wo ˗a ˗gɔ. ˗Dhɛkpaɔyi do ˈka, Edhɔdö ˗yö ö bhɔ ˗yi ˈwlaan˗ ˗kë, ˈyö mɛn ˗nu ˈö ˗duɛɛ ˈkpii˗ ˈdhö ˗an ˗gɔ, ˈˈsɔdha ˗gɔmɛn ˗nu waa ˈtɔ ˗mɛn ˗nu ˈwo Galile ˗sɛ ˈgü ˗an ˗dhɛ kö ˈwo ˈwlaan˗ kë wo ˈkwëë˗. 22 ˈYö Edhodiadö ˈdhu ˗yö ˗da ˈkɔɔ ˈö ˈˈtan ˗kë, ˈyö˗ ˈˈdhiaa ˗yö mën Edhɔdö waa mɛn ˗nu ˈö waa˗ ˗nu ˈwo kun pë ˗bhö ˗ni ˈgü bhë ˗an ˈgü. ˈDhɛ ˈö ˗kë ˈˈdhʋ̈, ˈyö ˗gblüdë ˗ya pö ˈnëndhiëŋnën ˈö bhë ˗a ˗dhɛ: «Pë ˈˈpɛpɛ ˈü˗ ˈˈpiʋ̈ ˈbha˗ ˗dhɛ n ˗gɔ, a ˗dho ˗a nu ü ˗dhɛ.» 23 ˈYö ö ˗wo ˗bhö ˗a ˗dhɛ ˗ʒiaanwo ˈö˗ pö: «Pë ˈˈoo ˗pë ˈü dho ˗a ˗dhɛ n ˗gɔ, ˈkö ˗kë ˗ʒiaanwo n ˗man ˗gblüdëdhɛ ˗kɔ ˈˈpian do ˈka, a ˗dho ˗a nu ü ˗dhɛ.» 24 ˈDhɛ ˈö ˗kë ˈˈdhʋ̈ ˈyö yö ˈˈkpɛnŋ ˈö dho ˈö˗ pö ö dhe ˗dhɛ: «ˈA ˗mën ˗dhɛ ˗a ˗gɔ?» ˈYö˗ pö ˗a ˗dhɛ: «˗Bhö Zan mɛnbɔyibhaamɛn ˗gɔ ˗dhɛ ˗a ˗gɔ.» 25 ˈYö˗ ˈnëndhiëŋnën ˗yö to mü ˈö dho ˗gblüdë ˈˈpiʋ̈, ˈyö˗ pö ˗a ˗dhɛ: «A˗ ˈˈpiʋ̈ ˈü Zan mɛnbɔyibhaamɛn ˗gɔ ˗ya ˈˈsɛti ˈˈgbɛɛ do ˈgü kö ˈü nu ˗a ˈka n ꞊dhiaa ˗dhɛ ˈö yö ˗a ˈgü.» 26 ˈDhɛ ˈö˗ pö ˈˈdhʋ̈, ˗yö ˗kë ˗gblüdë ˗dhɛ ˈya˗ ꞊dedewo. ˈˈKɛɛ ˈdhɛ ˈö ˗kë ꞊dhɛ ˗yö ö ˗wo ˗bhö mɛn ˈˈpɛpɛ ˈwo kun ˈwlaan˗ ˗ta* ˗an ˈˈɲandhiʋ̈ bhë, ˈyaa kun ˗a ˈˈpiʋ̈ kö ˈö ˗kɔ ˗a ˗dhɛ. 27 ˈDhɛ ˈö ˗kë ˈˈdhʋ̈, ˈyö ˗gblüdë ˗yö to mü ˈö ö ˗bha ˈˈsɔdha do bɔ, ˈyö˗ pö ˗a ˗dhɛ ˗yö Zan ˗gɔ ˈˈdhiʋ̈ bho ˗yö nu ˗a ˈka. ˈYö˗ ˈˈsɔdha gɔn ˈö bhë ˈö dho ˈö Zan ˗gɔ ˈˈdhiʋ̈ bho ˗kaso ˈgü mü. 28 ˈYö˗ ˗ya ˈˈsɛti ˈˈgbɛɛ do ˈgü ˈö nu ˗a ˈka. ˈYö˗ nu ˈnëndhiëŋnën ˈö bhë ˗a ˗dhɛ, ˈyö˗ ˈnëndhiëŋnën ˗yö dho ˗a ˈka ö dhe ꞊dhiaa. 29 ˈDhɛ Zan ˗bha gwëëˈˈ ˗nu ˗wo ˈwɔn ˈö ˗kë bhë ˗a man, ˈyö ˈwo nu ˈwo˗ ꞊glöö sü ˈö ˈwo˗ ˗wɛɛ bho.
30 ˈDhɛ ˈö Yesu ˗bha bɔmɛn ˗nu ˗wo wo ꞊yɛɛ ˗kë ˈwo nu ˗a ˈˈpiʋ̈, ˈyö ˈwɔn ꞊gban ˈˈpɛpɛ ˈö ˈwo˗ ˗kë waa ˈwɔn ˗nu ˈwo mɛn ˗nu ꞊klaŋ ˗kë ˗an ˈka, ˈwo ˗an ꞊gban ꞊blɛɛ ˗a ˗dhɛ. 31 ˈYö Yesu ˗ya pö ˗an ˗dhɛ: «˗Ka nu ˈkwa ˈdho ˗dhɛ ˈbhaa ˈö mɛn ˈbhaa ˈyaa˗ ˗bha ˗a ˈgü kö ˈka ka ˈˈtee ˈnën ˈbhaa pa.» ˗A ˗gɛn ˗mü ꞊dhɛ mɛn ꞊va ꞊dede ˗kun nu ˗ni ˈgü ˗a ˈˈpiʋ̈. Mɛn ˈbhaa ˗nu ˗wo ˈdho ˗ni ˈgü, kö mɛn ˈbhaa ˗nu ˗wo nu ˗ni ˈgü. ˗A ˗wɔn ˈgü, ˈˈtʋ̈ŋ ˈyaa kun ˗an ˗gɔ ˗ʒiaanwo kö ˗wo ˗bhöpë ˗bhö. 32 ˈDhɛ ˈö ˗kë ˈˈdhʋ̈, ˈyö ˈwo ˗ya ˈˈyitagɔ ˈgü ˈö ˈwo dho ˗dhɛ ˈbhaa ˈö mɛn ˈbhaa ˈyaa˗ ˗bha ˗a ˈgü kö ˈwo kë mü wo dʋʋˈˈ ˈka. 33 ˈˈKɛɛ mɛn ˈbhaa ˗nu ˗wo ˗kpan ˗an ˗bha kö ˗wo ˈdho ˗ni ˈgü, ˈyö˗ ˗wɔn ˗yö ˗da mɛn ꞊vadhɛ ˈˈtʋʋdhö ˈpö. ˈYö mɛn ˗nu ˗wo go ˈpödhɛ ˈˈpɛpɛ ˈgü ˈö ˈwo ˗bialö wo ˗gɛn ˗ta ˈwo dho, ˈö ˈwo ˗lo ˗dhɛ ˈö bhë ˗a ˈgü Yesu waa ö ˗bha gwëëˈˈ ˗nu ˗an ˈˈdhiʋ̈. 34 ˈDhɛ ˈö Yesu ˗yö go ˈˈyitagɔ ˈgü, ˈö ˗kpan mɛn ꞊va ꞊dede ˈwo bhë ˗an ˗bha, ˈyö ˗an ˗wëë ˗yö ˗a ˗kë ꞊dedewo, ˈyö ˗tɔ ˗wo ˗kun ꞊dhɛ ˈˈbhlaa ˗nu ˈö ˗an ˗maankëmɛn ˈyaa ˈdhö ˗an ˈdhö. ˈDhɛ ˈö ˗kë ˈˈdhʋ̈, ˈyö ˗ya ˗an ꞊klaŋ kë ˗sü ˗bha ˈwɔn ꞊va ꞊dede ˈka.
35 ˈDhɛ ˈö ˈˈbin ˈdhö ˈmën ˗ni ˈgü, ˈyö Yesu ˗bha gwëëˈˈ ˗nu ˗wo ꞊ɲɔɔn ˗a ˈˈsuee ˈö ˈwo˗ pö ˗a ˗dhɛ: «ˈPödhɛ ˈbhaa ˈyaa ˗dhɛ ˈö yö ˗a ˈˈsuee, ˗ya ˈgo mü ˈzü ˈˈbin ˗ya ˈmën ˈsaadhö. 36 ˗Bhö ü ˗wo bho ˗an ˗ta kö ˗wo ˈdho ꞊gbɛɛgüdhɛ ˗nu waa ˈpödhɛ ˗nu ˈwo ˗dhɛ ˈö yö ˗a ˗züzü bhë ˗an ˈgü kö ˗wo pë ˈbhaa ˈdhɔ kö ˗wa ˗bhö.» 37 ˈYö Yesu ˗ya ˗yɔ bɔ ˗an ˗gɔ ˈö˗ pö: «Ka ꞊dede ˗ka ˗bhöpë nu ˗an ˗dhɛ.» ˈYö˗ ˗bha gwëëˈˈ ˗nu ˗wa pö ˗a ˗dhɛ: «Ü˗ ˈˈpiʋ̈ kö ˈyi ˈdho kö ˈyi ˈwëë˗ denie këŋ ꞊plɛ (200) ˈbluu˗ ˈdhɔ ˈyi nu ˗a ˈka ˗an ꞊dhiaa kö ˗wa ˗bhö ˗ee?» 38 ˈYö Yesu ˗ya pö ˗an ˗dhɛ: «˗Ka ˗wo ˈmü, ˈbluu˗ bhɛ ꞊dhɛ ˈö ˗ya ˈto ka ˗gɔ mü?» ˈDhɛ ˈwo dho ˈwo ˗wo mü, ˈyö ˈwo˗ pö ˗a ˗dhɛ: «ˈBluu˗ bhɛ ˈˈsoodhu waa ˈyuö˗ ga ꞊plɛ ˈnën ˗ya ˈto.» 39 ˈYö˗ pö mɛn ꞊gban ˈˈpɛpɛ ˗dhɛ ˗wo dan kpö kpö ˈka kö ˗wo ˈɲaannu ˈkpaa˗ ˗ta. 40 ˈYö ˈwo dan këŋ do (100), këŋ do (100) ɛɛnˈˈ ˗kɔŋ ˈˈsoodhu (50), ˗kɔŋ ˈˈsoodhu (50) ˈwo ˗ya wo kpö kpö ˈka. 41 ˈDhɛ ˈö ˗kë ˈˈdhʋ̈, ˈyö ˈbluu˗ bhɛ ˈˈsoodhu waa ˈyuö˗ ga ꞊plɛ ˈwo bhë ˗an sü, ˈyö ö ˈˈɲan ˈˈdhiʋ̈ ꞊luu dhaŋ˗ ˈgü ˈö ꞊bhɛɛ. ˈDhɛ ˈö go mü ˈyö ˈbluu˗ ˗nu bhë ˗an ˈˈkluklu bho ˈö˗ nu ö ˗bha gwëëˈˈ ˗nu ˗dhɛ kö ˗wa ˗gblü mɛn ˗nu ˈwo kun mü bhë ˗an ˗ta. ˗Yö ˈyuö˗ ga ꞊plɛ ˈwo bhë ˗an sü ˈpö ˈö ˗an ˗gblü mɛn ꞊gban ˈˈpɛpɛ ˗ta. 42 ˈYö mɛn ꞊gban ˈˈpɛpɛ ˗wo pë ˗bhö ˈö ˗an ˈgwü ˗yö dɔ. 43 ˈYö ˗a ˗dhɛ ˈö to ˈwo˗ ˗lo ˈko ˗ta ˈö ˗kë ꞊töö ˗ɲaan ˗kɔŋ do ö ga ꞊plɛ (12), ˈˈkɛɛ kö ˈyuö˗ ˈdhɛ ˈö to wo ˈti˗ dhʋŋˈˈ. 44 Gɔɔn˗ ˗nu ˈö ˈwo ˈbluu˗ ˈö bhë ˗a ˗bhö, ˗wo ˗kun ˈˈgblü ˈˈsoodhu (5.000).
45 ˈDhɛ ˈö ö bo ˗kë ˈˈdhʋ̈ ˗sü ˈka, ˈyö Yesu ˗yö to mü ˈö˗ pö ö ˗bha gwëëˈˈ ˗nu ˗dhɛ ˗wo ˗ya ˈˈyitagɔ ˈgü kö ˗wo ˈˈyi ˈˈkan ˗wo ˈdho Bɛtüsaidö ˗ʒian ˈka, kö yö ˗zë ˈö ö ˗wo bho mɛn ˗nu ˈwo bhë ˗an ˗ta kö ˗wo ˈdho. 46 ˈˈKɛɛ ˗dhɛ ˈö ö bo ö ˗wo ˗da ˗sü ˈka ˗an ˗dhɛ, ˈyö ˗da ˗tɔn do ˗ta kö ˈö bhɛɛˈˈ. 47 ˈDhɛ ˈö ˈˈyitagɔ ˈö Yesu ˗bha gwëëˈˈ ˗nu ˗wo kun ˗a ˈgü bhë ˈö yö ꞊weeyi ꞊zinŋgü, kö ˈˈbin ˗ya ˈmën. ˈˈKɛɛ kö Yesu ˗zë ˗yö ö do ˈka ˗dhɛ ˈö kun ˗a ˗bha bhë ˗a ˈgü. 48 ˈDhɛ ˈkwa dɔ ˗dhɛkpaɔ ˗ta,* ˈö Yesu ˗ya yö ꞊dhɛ ˈˈyitagɔ ˗blü ˗sü ˗ya kë ö ˗bha gwëëˈˈ ˗nu ˗ta ˈˈgbɩɩ˗, ˈˈtee ˈˈgbɩɩ˗ ˈö go ˗an ˈdho ˗ʒian ˈka ˈö kun ʒiö ˗ni ˈgü bhë ˗a ˗wɔn ˈgü, ˈyö ˗ya ˈˈta ˈsü ˗sü ˗bha ꞊weeyi ˗ta ˈö dho ˗an ꞊kee˗. ˈˈKɛɛ ˈyö ˗kë ꞊dhɛ pë ˈö ˗dho ʒiö ˗an ˗ta ˗a ˈdhö. 49 ˈDhɛ ˈwo ˗kpan ˗a ˗bha kö ˗yö ˈˈta ˈsü ˗ni ˈgü ꞊weeyi ˗ta, ˈyö ˈwo˗ pö: «Mën ˗wɔn ꞊suu ˈö ꞊nɛn? Kwa ˈˈɲan ˈgü ˈnën ˗da ˗ee, ɛɛnˈˈ ˗mën ˗mü?» ˈYö ˈwo ˗ya ˈˈgbla ˗sü ˗bha. 50 ˗A ˗gɛn ˗mü ꞊dhɛ ˗an ꞊gban ˈˈpɛpɛ ˗wo ˗kpan ˗a ˗bha, ˈö ˈˈsuʋ̈ ˗yö ˗kan ˗an ˈˈgblü. ˈˈKɛɛ Yesu ˗yö ˗to mü ˈö dhiaŋ zë ˗an ˗dhɛ ˈö˗ pö: «ˈˈSuʋ̈ ˈya ˗dho ka kë, man ˗mü, ˗ka ka ˗zo ˗gban.» 51 ˈYö ˗da ˗an ˈˈpiʋ̈ ˈˈyitagɔ ˈgü, ˈyö ˈˈtee ˗yö ˈduaannu. ˈYö˗ ˈwɔn ˗yö ˗a ˗bha gwëëˈˈ ˗nu kun ꞊dedewo. 52 ˗A ˗gɛn ˗mü ꞊dhɛ ˗dhidha ˈö Yesu ˗ya ˗kë ˈbluu˗ ˈka bhë, wo ˈti ˗gleŋ ˈsü ˗a ˈgü. ˈWaa kun ˈwɔn ˈgüman ˗ni ˈgü ˈˈvaandhö.
53 ˈDhɛ ˈwo ˈˈyi ˗kan, ˈö ˈwo ˗lo Zenezadhɛtö, ˈyö ˈwo ˈˈyitagɔ ˈduaannu ˈˈyi ˈˈkpɔnŋ ˈˈdhiʋ̈ mü. 54 ˈˈKɛɛ ˈdhɛ ˈwo go ˈˈyitagɔ ˈgü, ˈyö mɛn ˗nu ˗wo to mü ˈwo˗ ˈwɔn dɔ ꞊dhɛ Yesu ˗mü. 55 ˈYö ˈwo dho ˗bia ˈka ˈwo˗ ꞊blɛɛ ˈˈsɛ ˈˈpian ˈö bhë ˗a ˗dhɛ ꞊gban ˈgü. ˈYö mɛn ˗nu ˈö ˈwaa wo ˈflëëgü, ˈwo ˗an sü mɛn ˗wɔ ˗a ˗ta ˗pë ˗ta ˈwo nu ˗an ˈka Yesu ˈˈpiʋ̈. 56 ˈPödhɛ ˗nu ,ˈˈkwipö ˗nu ɛɛnˈˈ ꞊gbɛɛgüdhɛ ˗nu ˈˈpɛpɛ ˈö ˈwo kun bɔ ˗ni ˈgü ˗a ˗bha, mɛn ˗nu ˗kun nu ˗ni ˈgü mɛn ˗nu ˈö ˈˈyua ˈdhö ˗an ˗bha ˗an ˈka ˈö ˈwo ˗an ˗wɔ ˈˈdhookwëëdhö, ˈö ˈwo ꞊bhɛɛ Yesu ˗dhɛ kö ˗yö ˈˈwɩ ˗a ˗bha kö ˗wo ˈpa ˗a ˗bha sɔ ˈˈtʋ ˈka. ˈYö mɛn ˈˈpɛpɛ ˈwo wo ˗kɔ pa ˗a ˈka, ˗an ˗dhɛ ˗yö bo.