Yesu ˗bha bɔmɛn ˗nu këwɔn ˗nu
11 Bɔmɛn ˗nu waa Yesu ˗bha gwëëˈˈ ˗nu ˈwo kun Zude, ˗wa ˗man ꞊dhɛ mɛn ˗nu ˈwo ˈˈsɛ ˈˈwɛɛ ˈgümɛn ˗nu ˈka ˗wa ˈˈwɩ ˗Zlan ˗wo ˗bha. 2 ˗A ˗wɔn ˈgü, ˈdhɛ Piɛɛ ˗yö ö ꞊yɛɛ ˗kë Zedhizadhɛmö, ˗a mɛn ˗nu ˈö ˗dho ˈˈbɔnŋ ˗sü ˗wɔn ˈdhö ˗an ˗gɔ ˈˈgbɩɩ˗ bhë, ˗wo ˗ya ˈwɔn ˗blɛɛ ˗a ˈka ˗sü ˗bha, 3 ˈö ˈwo˗ pö: «ˈMën ˗kë ˈö ˈü dho ˈü ˗da mɛn ˗nu ˈö wo ˈti ˈgo ˈˈbɔnŋ ˗an ˗gɔ ˈkɔɔ, ˈö kaa˗ ˗nu ˈka pë ˗bhö ka ˈkwëë˗?» 4 ˈDhɛ ˈwo˗ pö ˈˈdhʋ̈, ˈyö Piɛɛ ˗yö ˈwɔn ˈö ˗kë mü ˗a ˈgü ˗pʋ ˗an ˗dhɛ ˗së ˈka, ˈö˗ pö ˗an ˗dhɛ:
5 «A ˗kë Ʒope ˗pö ˈgü, ˈö ˈa kun bhɛɛˈˈ ˗ni ˈgü, ˈyö n ˈˈɲan ˈgü ˗yö ˗da ˈa ˗kpan pë ˈbhaa ˈö bhɔ yɩɩga sɔ ˈˈgbɛɛ do ˗bha ˗a ˗bha kö ꞊waa˗ ˈkun ˗a ˈˈtʋ ˗yiishiö ˈka ˗yö ˈgo ˗ni ˈgü dhaŋ˗ ˈgü ˗yö yɔɔˈˈ ˗ni ˈgü. ˈYö nu ˈö yö n ˈka ꞊klöö˗. 6 ˈDhɛ ˈa ˗dhɛ ˗ga ˗a ˈgü ˗së ˈka, a ˗kpan ꞊kwlaatawü ˗nu, ˈˈblü ˗wü ˗nu, ˗ta ˈgwü ˗ta ˗wü ˗nu waa ˗mannën ˗nu ˈwo ˈˈkpɔnŋ ꞊taa ˗an ˗bha. 7 ˈYö ˗wo do ˈbhaa ˗yö ˗we ˈpö ˈa˗ man, ˈö˗ pö n ˗dhɛ: ‹Piɛɛ, ˗bhö luuˈˈ, ˗an zë ˈü ˗an ˗bhö!› 8 ˈYö ˈa˗ pö ˗a ˗dhɛ: ‹˗Abin ꞊maan n Dëmɛn, ˗a ˗gɛn ˗mü ꞊dhɛ pë ˈö ˗dhiisü ɛɛnˈˈ ˈö ˈyaa ˈˈslʋ̈ʋ̈slʋ̈, yö ˈti ˗da n ˈˈdhii do toŋtoŋdhö.› 9 ˈYö ˗wo ˈö go dhaŋ˗ ˈgü bhë, ˈa˗ man ˈzü ꞊plɛ ˗naan wo ˈö˗ pö: ‹Pë ˈö ˗Zlan ꞊yaa˗ kë ˈˈslʋ̈ʋ̈slʋ̈, ˈbhaa ˗dho ˗a pö ˈü˗ ˗dhɛ ˈzü pë ˗dhiisü.› 10 ˈDhɛ ˈö ˗wo ˈö bhë ˈö ˗we ˗yaaga ˗naan wo, ˈyö pë ꞊gban ˈˈpɛpɛ bhë ˈwo dho ˗an ˈka dhaŋ˗ ˈgü. 11 ˗A ˈˈtʋ̈ŋ ꞊dede ˈö bhë ˗a ˈgü kö gɔɔn˗ ˗nu ˗yaaga ˈö ˈwo go Sezadhe ˈö ˈwo ˗an bɔ n ˈˈpiʋ̈, ˗wo dɔ ˗sü ˈka ˈkɔ ˈyi ˗kë ˗a ˈgü bhë ˗a ˈˈkpan ˈˈdhiʋ̈. 12 ˈYö ˗Zlan ˗bha ˗zuu ˗ya pö n ˗dhɛ yaa˗ ˗nu ˈyi ˈdho, n zuʋ̈ˈˈ ˈyaa ˗dho ˈto ˈzlöö. Kwa ꞊dhegblü ˗nu ˈˈsɔɔdo ˈwo yö, ˗wo ˗ʒiö n ꞊kee˗ ˈö yaa˗ ˗nu ˈyi dho ˈyi ˗da gɔndënën ˈö bhë ˗a ˗gɔ ˈkɔɔ.
13 «˗A gɔndënën ˈö bhë, ˗yö ˗kɔ ˈö ˗kpan ˗Zlan ˗bha ˈˈkiö ˗bha ˗a ˈka ö ˗gɔ ˈkɔɔ ˗a ˗blɛɛ yi ˗dhɛ, ˈö˗ pö ꞊dhɛ ˗a ˈˈkiö ˗ya ˗pö: ‹˗Bhö mɛn bɔ Ʒope kö gɔndënën do ˈö ˈmü ˈö ˈwo˗ ˗dhɛ Simɔn, ˈö˗ ˈtɔ ˗ya ˗a ˗ta ˗yö ˗kë Piɛɛ ˈka bhë ˗wa pö ˗a ˗dhɛ ˗yö nu. 14 ˗Yö ˗dho pë ˗nu ˈö kaa ü ˗bha ˈkɔɔmɛn ˗nu ˈˈpɛpɛ ˈka ˗dho bɔ ˗an ˗ta kö ˈka dha ˗an ˗zɔn ü ˗dhɛ.› 15 ˈDhɛ ˈa ˗ya ˈwɔn blɛɛˈˈ ˗sü ˗bha, ˈyö ˗zuu ˈˈslʋ̈ʋ̈slʋ̈ ˗yö ꞊yɔɔ ˗an ˗ta ꞊dhɛ ˗kɔ do ˈö ꞊yɔɔ ˗a ˈka kwa ˗ta ˗a züdɔdhɛ ˈgü bhë ˗a ˈdhö. 16 ˈDhɛ ˈö ˗kë ˈˈdhʋ̈, ˈyö n ˗zo ˗yö ˗buö pë ˈö kwa Dëmɛn kun ˗a pö ˗ni ˈgü bhë ˗a ˈka. ˗Ya ˗pö: ‹ˈˈYi ˈnën ˈö Zan ˗yö mɛn bɔ ˗a ꞊bhaa, ˈˈkɛɛ ka ˗zë ka ˗bha ˗bɔyibhaasü ˗dho kë ˗zuu ˈˈslʋ̈ʋ̈slʋ̈ ˈka.› 17 ˈDhɛ ˈö ˈˈdhʋ̈, mɛn ˈö ˈkwa ˗kë ˗zo ˗yö Dëmɛn Yesu Klito ˗dhɛ ˗mɛn ˗nu ˈka, gbɔɔdhe ˈö ˗Zlan ˗ya ˗kë kwa ˗gɔ ˈˈwɛɛwɛ bhë, ꞊yaa˗ ˗kë ˈpö ˗an ˗dhɛ, de ˗mü n ˈka kö ˈa ˗gban pë ˈö ˗Zlan ˈdhö˗ ˈˈpiʋ̈ ˈö˗ kë ˗a ˗gɔ?»
18 ˈDhɛ ˈö˗ pö ˈˈdhʋ̈, ˈyö ˈwo wo ꞊kwaa za ˗ya ˗a ˗bha ˗sü ˗zü* ˈö ˈwo ˗Zlan ˈtɔ bhɔ ˈö ˈwo˗ pö: «˗Ya kë ˈˈdhʋ̈ ˈsa kö ˗yö ˈˈpuu ˈkpakpadhö ꞊dhɛ ˗Zlan ˗ya ˈˈwɩ ˗a ˗bha ˈpö kö mɛn ˗nu ˈö ˈwo ˈˈsɛ ˈˈwɛɛ ˈgümɛn ˗nu ˈka, ˗wo wo zuʋ̈ˈˈ slëëˈˈ ö ˈˈpiʋ̈ kö ˗wo dha.»
19 Yesu ˗bha gwëëˈˈ ˗nu ˈwo ˗pɛn ˈˈklʋʋbhɔdhe ˈö ꞊luu kö ˗wa Etiɛnö zë bhë ˗a ˗wɔn ˈgü, ˗wo ˗dho ˈwo ˗lo Fenisi ˗dhɛ ˗nu, Shiplë ˗dhɛ ˗nu waa Antiɔshö ˗dhɛ ˗nu ˈgü. ˈˈKɛɛ Zuifö ˗nu dosɛnŋ ˈnën ˈwo ˗zlanwopö ˗an ˗dhɛ. 20 ˈˈKɛɛ ˗a mɛn ˈbhaa ˗nu ˈwo go Shiplë waa Silɛnö ˗dhɛ ˗an ˗bha, ˗wo ˗dho Antiɔshö ˈwo ˗ya Dëmɛn Yesu ˗bha nɔɔn˗ ˗së pö ˗sü ˗bha mɛn ˗nu ˈö ˈwo Glɛkö ˗wo pö ˗an ˗dhɛ. 21 ˈDhɛ ˈö ˗kë ꞊dhɛ Zoova ˗kɔ ˗yö ˗kun ˗an ˗ta bhë, mɛn ꞊va ꞊dede ˗wo ˗we ˗Zlan ˗wo ˗bha, ˈö ˈwo wo wë ꞊slëë Dëmɛn ˈˈpiʋ̈.
22 Nɔɔn˗ ˈö go ˗an ˈˈpiʋ̈ mü ˗yö ˗dho ˈö ˗da ˗zlanwokɔdhi ˈö Zedhizadhɛmö bhë ˗a ˈgümɛn ˗nu ˈˈtʋʋdhö, ˈyö ˈwo Baanabasö bɔ Antiɔshö. 23 ˈDhɛ ˈö dho ˈö ˗lo mü, ˈö ˗kpan ˗gasitɛ ˈö ˗Zlan ˗ya ˗kë Yesu ˗bha gwëëˈˈ ˗nu ˈwo mü ˗an ˗dhɛ bhë ˗a ˗bha, ˗a zuʋ̈ˈˈ ꞊nii ˗yö ˗da ꞊dedewo, ˈö ˗an ꞊gban ˈˈpɛpɛ ꞊faan mën kö ˗wo ˈto ˗klu ˗sü ˈka Dëmɛn ˗bha wo zuʋ̈ˈˈ ꞊gban ˈka. 24 Baanabasö ˗yö ˗kun këwɔnsëmɛn, ˈö ˗zuu ˈˈslʋ̈ʋ̈slʋ̈ kun pa ˗sü ˈka ˗a ˈgü, ˈö zoyödhe ˗yö ˗kë ˗a ˗gɔ ˗a ˈka. ˗A ˗wɔn ˈgü, mɛn ꞊va ꞊dede ˗wo ˗we Dëmɛn ˗wo ˗bha. 25 ˈDhɛ ˈö ö bo kë ˗sü ˈka ˈˈdhʋ̈, ˈyö go ˗dhɛ ˈö bhë ˗a ˈgü ˈö dho Taasö, ˈö Sɔdhö ꞊mɛɛn ˗dhɛ ꞊gban ˈgü. 26 ˈDhɛ ˈö ˗kpan ˗a ˗bha, ˈyö nu ˗a ˈka Antiɔshö. ˗Wo ˗kwɛ do ˗todhʋ̈sü ˗kë ˈˈkwipö ˈö bhë ˗a ˈgü, ˈö waa ˗zlanwokɔdhi ˈgümɛn ˗nu ˈwo mü ˈwo ˗yakwëë ˗nu ˗kë wo ˈko ꞊bhaa, ˈö ˈwo mɛn ꞊va ꞊dede ꞊klaŋ ˗kë. ˗Dhɛ ˈö Antiɔshö bhë, yö ˈnën ˗Zlan ˗ya ˗kë ˈö ˈwo Yesu ˗bha gwëëˈˈ ˗nu ˗dhɛ ˗a ˗bha ˗blɛɛsü kletiɛn ˗nu.
27 ˗A ˈˈtʋ̈ŋ ˈö bhë ˗a ˈgü, ˗Zlan ˗wodhiʋ̈lomɛn ˈbhaa ˗nu ˗wo ˗go Zedhizadhɛmö ˈö ˈwo nu* Antiɔshö. 28 ˗A mɛn do ˈö ˈwo˗ ˗dhɛ Agabusö, ˗Zlan ˗bha ˗zuu ˗ya ˗kë ˈö ꞊luu ˈö˗ to ˈˈdhiʋ̈ ˈö˗ pö din˗ ˈkpii˗ do ˗dho ˗da ˈˈsɛ ˗ta ˗dhɛ ꞊gban ˈgü. ˗A din˗ ˈö ˈˈdhʋ̈ ˗yö ˗da ˈpö ꞊dedewo Klodö ˗bha ˈˈtʋ̈ŋ ˈgü. 29 ˈDhɛ ˈö ˗kë ˈˈdhʋ̈, ˈyö Yesu ˗bha gwëëˈˈ ˗nu ˗wo ˗yö ˗mɔn kö mɛn ˈö ˈdhö pë ˈö ꞊slɔɔ ˗a ˗gɔ ˈwo˗ bɔ wo ꞊dhegblü ˗nu ˈwo Zude ˗an ˗dhɛ, ˗an ˗takunpë ˈka. 30 Pë ꞊dede ˈwo˗ ˗kë ˈpö ˈyö bhë. Pë ˈwo˗ ˗lo ˈko ˗ta bhë ˗wa ˗dɔ Baanabasö waa Sɔdhö ˗an ˗gɔ kö ˗wo ˈdho ˗a ˈka mɛn zii ˗nu ꞊dhiaa.