ˈSëëdhɛ ˈö Pɔdhö ˗ya bɔ Wlɔmö ˗mɛn ˗nu ˗dhɛ

15 Kwa ˈö kwa ˗bha ˗zoyödhe ˗gɛn ˈdhö ˗gban ˗sü ˈka bhë, kwa dua ˗mü kö mɛn ˗nu ˈö ˗an ˗bha ˗zoyödhe ˗gɛn ˈyaa ˗gban ˗sü ˈka ˈkwa ˗an ˗bha ˈˈtëëtëdhɛ ˗nu bun, kö ˈkwaa ˗dho ˈwɔn ˈö ˗dhi kwa ˗dhɛ dosɛnŋ ˗a kë. 2 Mɛn ˈö ˈdhö ˗yö ˈwɔn ˗së kë ö ˗yayoo ˗dhɛ, ˗yö pë ˈö ˗dho kë ˗a ˗dhɛ ˗së ˗a kë, kö ˗ya ˗zo ˗gban. 3 ˗A ˗gɛn ˗mü ꞊dhɛ Klito ˗de ˗ʒiaan yö ˈti ö ˗de ˗dhi ˗a ˗dhɛ ˗wɔn kë. ˗Yö ˈwɔn ˗nu ˗kë ꞊ʒiaan ꞊dhɛ ˗kɔ ˈö ˗Zlan ˗Wo ˈsëëdhɛ ˗ya pö ˗a ˈka ˗a ˈdhö. ˗Ya ˗pö: «Mɛn ˗nu ˈwo ˈsi bho ˗ni ˈgü ü ˗gɔ bhë, ˗an ˗bha ˈsi ˗nu bhë ˗wa ˗bho n ˗gɔ.» 4 ˗A ˗gɛn ˗mü ꞊dhɛ pë ˈˈpɛpɛ ˈö ˈwo˗ ˗bɛnzë ꞊kwɛŋzü bhë, ˗wa ˗bɛnzë ˈˈdhʋ̈ kö ˗yö kë kwa ꞊klaŋ kë ˗pë ˈka. ˗Yö kë ˈˈdhʋ̈ kö kwa ˗bha ˗bɔ ˈwɔn ˈˈgbɩɩ˗ ˗nu ˈgü ˗sü ˈö zuʋ̈saadhɛ ˈka waa ˗zogbandhe ˈö ˗Zlan ˗Wo ˈsëëdhɛ ˗ya nu kwa ˗dhɛ bhë ˗an ˈsaa˗ ˈgü, ˗zo ˗yö ˗dhɛkpaɔyi dhiʋ̈ˈˈ ˗së ˗dhɛ ˗sü ˗yö kë kwa ˗gɔ. 5 A ˗bhɛɛ kö ˗Zlan ˈö zuʋ̈saadhɛ waa ˗zogbandhe nu mɛn ˗dhɛ bhë, ˗yö ka ˗takun kö ˈwɔn yö ˗kɔ ˈö kun Yesu Klito* ˗gɔ bhë ˗yö kë ka ˗gɔ ˈpö. 6 ˗Yö kë ˈˈdhʋ̈ kö ka ˗kɔ ˗bha ˗kë ˈwɔn do ˗bha ˗sü ˈgü, ka ˗wo* ˗yö kë do, kö ˈka ˗Zlan ˈö kwa Dëmɛn Yesu Klito Dë ˈka bhë ˗a ˈtɔ bhɔ.

7 ˈDhɛ ˈö ˈˈdhʋ̈, ˗ka ka ˗kɔ ˗ya ka ˈko ˗nu ˗gɔ ˗së ˈka ꞊dhɛ ˗kɔ ˈö Klito ˗yö ö ˗kɔ ˗ya ˗a ˈka ka ˗gɔ bhë ˗a ˈdhö, ˗yö kë ˈˈdhʋ̈ kö ˗Zlan ˈtɔ ˗yö bhɔ. 8 A˗ ˗pö ka ˗dhɛ ꞊dhɛ Klito ˗yö ˗kë mɛn ˗nu ˈö ˗wa ˈgo ˈˈbɔnŋ ˗an ˈˈdhiʋ̈ ˗yö kë ˗mɛn ˈka kö ˈö˗ ˗zɔn ꞊dhɛ ˗Zlan ˈyaa ꞊sua kë, kö ˈö˗ ˗zɔn ˈpö ꞊dhɛ ˈwɔn ˗nu ˈö˗ ˈˈplünŋ bho ˗an ˈˈbhɛman ˗nu ˗dhɛ bhë, ˗zo ˗yö ˗a ˗dhɛ ˗wɔn ˗mü. 9 ˗Ya ˗kë ˈˈdhʋ̈ ˈpö kö ˈˈsɛ ˈˈwɛɛ ˈgümɛn ˗nu ˗wo ˗mɔn ˗Zlan ˈtɔ bhɔ ˗sü ˗bha ˗a ˗bha mɛn ˗wëëzësü ˗wɔn ˈgü. Pë ꞊dede ˈö ˗bɛnzë ˗sü ˈka ˗Zlan ˗Wo ˈsëëdhɛ ˈgü ˈyö bhë. ˗Ya ˗pö: «Yö ˈnën ˈö˗ ˗wɔn ˈgü ˈa ˗dho ü ˈtɔ bhɔ ˈˈsɛ ˈˈwɛɛ ˈgümɛn ˗nu ꞊zinŋgü, ˈa ˗we ü ˈtɔ ˈˈpiʋ̈.» 10 ˗Yö ˗go mü ˈzü ˈö˗ pö: «ˈˈSɛ ˈˈwɛɛ ˈgümɛn ˗nu ka zuʋ̈ˈˈ ꞊nii ˗yö ˗da ˗a ˗bha ˈˈsɛgümɛn ˗nu ˈˈpiʋ̈.» 11 ˈYö˗ pö ˈzü: «ˈˈSɛ ˈˈwɛɛ ˈgümɛn ˗nu ꞊gban ˈˈpɛpɛ ˗ka Zoova ˈtɔ bhɔ. Mɛn ꞊gban ˈˈpɛpɛ ˗wa ˈtɔ bhɔ.» 12 Izai ˗ya ˗pö ˈzü: «Ʒese ꞊suugünën* do ˗dho kë ˗dhö, yö ˈnën ˈö ˗dho luuˈˈ kö ˗yö ˈˈsɛ ˈˈwɛɛ ˈgümɛn ˗nu ꞊kɔɔn. Yö ˈnën ˈö ˈˈsɛ ˈˈwɛɛ ˈgümɛn ˗nu dho wo ˗zo yö ˗a ˗dhɛ.» 13 A ˗bhɛɛ kö ˗Zlan ˈö mɛn gba ˗zo ˗yö ˗dhɛkpaɔyi dhiʋ̈ˈˈ ˗së ˗dhɛ ˗sü ˈka bhë, ˗yö ka pa zuʋ̈niidadhe waa ˗yadeflëëgüsü ˈka, ka ˗bha ˗zo ˗yö ˗a ˗dhɛ ˗sü ˗wɔn ˈgü. ˗Yö kë ˈˈdhʋ̈ kö ˗zuu ˈˈslʋ̈ʋ̈slʋ̈ ˗yö ka ˗bha ˗zo ˗yö ˗dhɛkpaɔyi dhiʋ̈ˈˈ ˗së ˗dhɛ ˗sü ˗dadhiʋ̈ ꞊dedewo.

14 N ꞊dhegblü ˗nu, ˗yö ga ˗sü ˈka man ꞊dede n ˈgü ꞊dhɛ ka ˗de ˈpö ka zuʋ̈ˈˈ ˗yö ˈˈwɩ ˗sü ˈka ˗a ˗bha ꞊dedewo kö ˈka ˈwɔn ˗së kë, ˈö ˈwɔn ˈö ˈkaa˗ dɔ ˈyaa ˈdhö, ˈö ˈka ˗mɔn ka ˈko ˗nu ꞊klaŋ kë ˗sü ˗bha. 15 ˗Zlan ˗bha ˗gasitɛ ˈö˗ ˗kë n ˗dhɛ bhë ˗a ˗wɔn ˈgü, a ˈsëëdhɛ ˈö yö ˗a ˗bɛnzë ka ˗dhɛ, ˈa pë ˈbhaa ˗nu ˗wɔn ꞊blɛɛ ˗a ˈgü ˈˈpuu ˈka kö ˗yö kë ka ˗zo ˗buö ˗sü ˈka. 16 ˗Yö ˗gasitɛ ˗kë n ˗dhɛ kö ˈa kë Yesu Klito* ˗bha yökëmɛn ˈka, kö ˈa nɔɔn˗ ˗së pö ˈˈsɛ ˈˈwɛɛ ˈgümɛn ˗nu ꞊gban ˈˈpɛpɛ ˗dhɛ. Yö ˈˈslʋ̈ʋ̈slʋ̈ ˈö bhë, yö ˈnën ˈa˗ kë ˗ni ˈgü n ꞊faan ꞊gban ˈka. ˗Yö kë ˈˈdhʋ̈ kö ˈˈsɛ ˈˈwɛɛ ˈgümɛn ˗nu ˈwo ˈˈdhʋ̈ ˗wo kë ˈˈsaapë ˈö ˗dhi ˗Zlan ˗dhɛ, ˈö ˗zuu ˈˈslʋ̈ʋ̈slʋ̈ ˗ya ˗dhii bho ˗a ˗bha ˗a ˈka.

17 ˈDhɛ ˈö ˈˈdhʋ̈, ˗a ˗dhɛ ˗a ˗bha kö n zuʋ̈ˈˈ ꞊nii ˗yö ˗da n ˗bha ˗kë Yesu Klito* ˗bha gwëëˈˈ ˈka ˗sü ˈa ˗Zlan ˗bha yö ˗kë bhë ˗a ˗wɔn ˈgü. 18 N ˈti ˗dho ˗a ˈsü n ˗de ˈgü kö ˈa pë ˈˈwɛɛ ˈbhaa ˗wɔn blɛɛˈˈ kö yö ˈti kë pë ˈö Klito ˗yö bɔ n ˈˈdhiwo waa n këwɔn ˗nu ˗ta ˈö˗ ˗kë, ˗yö kë ˈˈdhʋ̈ kö ˈˈsɛ ˈˈwɛɛ ˈgümɛn ˗nu ˗wo ˈwɔn man ö ˗ta ˗a ˈka. 19 ˗Zlan ˗bha ˗zuu ˈˈslʋ̈ʋ̈slʋ̈ ꞊faan ˈsaa˗ ˈgü a ˗dhidha ˗nu waa ˈwɔn ˈˈmlünmlünsü ˗nu ˗kë. Yö ˈnën ˈö˗ ˗wɔn ˈgü ˈa ˗glü nɔɔn˗ ˗së ˈö ˗gban Klito ˗bha ˗a ˗pö ˗sü ˈka ꞊dedewo, ˈa go ˗a ˈka Zedhizadhɛmö ˈa dho ˈa ˗lo ˗a ˈka Idhidhi ˗sɛ ˗nu ˈgü. 20 Kë ˈö˗ wo ˈˈdhʋ̈ bhë, a pë ꞊gban ˈˈpɛpɛ ˗kë kö ˈmaan ˗dho nɔɔn˗ ˗së pö ˗dhɛ ˈö mɛn ˗nu ˗wo Klito ˈtɔ dɔ ˗a ˗bha ˈsaadhö ˗a ˈgü, kö ˈyaa ˗dho kë ꞊dhɛ ˈkɔ dɔ ˗sü ˈö mɛn ˈˈwɛɛ ˗bha ˈkɔ ˈˈkpan ˗ta ˗a ˈdhö. 21 A˗ ˗kë ꞊ʒiaan ꞊dhɛ ˗kɔ ˈö ˗bɛnzë ˗sü ˈka ˗a ˗bha ˗Zlan ˗Wo ˈsëëdhɛ ˈgü ˗a ˈdhö. ˗Ya ˗pö: «Mɛn ˗nu ˈö wo ˈti ˈwɔn ˈö ˗gban ˗a ˗bha ˗a blɛɛˈˈ ˗an ˗dhɛ, ˗wo ˗dho ˗a yö, ˈö mɛn ˗nu ˈö wo ˈti˗ ˗wɔn man do, ˈwo ˗dho ˈwɔn ˈgüman.»

22 Pë ˈö˗ ˗wɔn ˈgü ˈpö ˈa ˗nu ka ˈˈpiʋ̈ ˗sü ˗wɔn ˗ya n zuʋ̈ˈˈ ˈˈpiʋ̈ ˈko ˗ta ꞊va ˈˈkɛɛ ˈö n ˗kɔ ˈti ꞊mɔɔn˗ ˗bha bhë ˈyö bhë. 23 ˈˈKɛɛ ꞊dɛɛ, ˈˈsɛ ˈˈpian ˗nu ˈwo bhë ˗a ˈdhɛ ˈö n ˈti ˗zlanwopö ˗a ˗bha ꞊köŋ ˈyaa ˈdhö. ˗Ya ˈgo mü ˈzü, ˗nu ka ˈˈpiʋ̈ ˈmü ˗wɔn ˗yö n zuʋ̈ˈˈ ˈgü ˗a ˗kwɛ ˗ya kë ꞊va. 24 Yö ˈnën ˈö˗ ˗wɔn ˈgü, ˈa˗ ˈˈpiʋ̈ ꞊dhɛ ˈˈtʋ̈ŋ ˈa ˗dho ˈdho ˗a ˈka Ɛsüpaɲö ˗sɛ ˈgü ˈa bɔ ka ˈˈpiʋ̈ mü. Kwaa˗ ˗nu ˈkwa ˈˈtʋ̈ŋ ˈnën ˈbhaa kë kwa ˈkwëë˗ ˗së ˈka, ˈka ˈdho ˈka n dɔ ʒiaan˗, ˗yö ˗dho kë n ˗dhɛ ˗së. 25 ˈˈKɛɛ ˈˈtʋ̈ŋ ˈkö yö ˗a ˈgü, ˈdho ˈnën ˈa ˗dho ˗a wo Zedhizadhɛmö bhë, kö ˈa mɛn ˈˈslʋ̈ʋ̈slʋ̈ ˗nu ˗takun. 26 ˗A ˗gɛn ˗mü ꞊dhɛ ˈmɛn ˈwo Maseduanö waa Akai ˗sɛ ˈgü, ˗yö ˗kë ˗an ˗dhɛ ˗së kö pë ˈö ˗an ˗gɔ ˗wa ˗gblü, ˗wo gbɔɔdhe kë ˈˈfleemɛn ˗nu ˈwo mɛn ˈˈslʋ̈ʋ̈slʋ̈ ˗nu ˈwo Zedhizadhɛmö ˗an ꞊zinŋgü ˗an ˗gɔ. 27 ˗Wo gbɔɔdhe ˈö bhë ˗a ˗kë ˈˈgblüsë ˈka ˈˈdhʋ̈, ˈˈkɛɛ kwa ꞊dhegblü ˗nu ˈwo Zedhizadhɛmö ˗an ˗bha ˈˈpɔ ˗kë ˗an ˗bha ˈpö. ˗A ˗gɛn ˗mü ꞊dhɛ pë ˈö go ˗Zlan ˈˈpiʋ̈ ˈö ˗kë ˗an ˗gɔ bhë, ˗wa ˗nu ˈˈsɛ ˈˈwɛɛ ˈgümɛn ˗nu ˗dhɛ. ˈDhɛ ˈö ˈˈdhʋ̈, ˗a ˗dhɛ ˗a ˗bha kö ˈˈsɛ ˈˈwɛɛ ˈgümɛn ˗nu ˗de ˈpö ˗wo ꞊nɔɔn ˗pë ˗nu ˈwo ˗an ˗gɔ ˗a ˈbhaa nu ˗an ˗dhɛ. 28 ˗Ya kë ꞊dhɛ ˈman n bo ˗a ˗dhɛ ˈö bhë ˗a ˈka, ˈman gbɔɔdhe ˈö ˈwo˗ ˗kë bhë ˗a nu Zedhizadhɛmö ˗mɛn ˗nu ˗dhɛ, a ˗dho bɔ ka ˈˈpiʋ̈ ˈmü ˈa dho Ɛsüpaɲö. 29 A˗ ˈwɔn ˗dɔ ˈpö ꞊dhɛ a nu ˗ni ˈgü ka ˈˈpiʋ̈, a ˗dho nu ˈdhuëë˗ ꞊va ꞊dede ˈö go Klito ˈˈpiʋ̈ ˗a ˈka.

30 ˈDhɛ ˈö ˈˈdhʋ̈ n ꞊dhegblü ˗nu, a˗ ˗dhɛ ka ˗gɔ kö ˈka zë kwa Dëmɛn Yesu Klito waa ˗dhɔ ˈö ˗zuu ˈˈslʋ̈ʋ̈slʋ̈ ˗ya ˗da kwa ꞊zinŋgü bhë ˗a ˗wɔn ˗dhɛ kö ˈka kpa n ˗bha ˈkwa bhɛɛˈˈ ꞊dedewo ˗Zlan ˗dhɛ n ˗bha ˈka. 31 ˗Yö kë ˈˈdhʋ̈ kö ˈa dha mɛn ˗nu ˈö ˈwaa ˈdhaŋ˗ bho Yesu ˈˈdhiʋ̈ ˈö ˈwo Zude bhë ˗an ˗gɔ, kö n ˗man yö ˈa ˗dho ˗a kë mɛn ˈˈslʋ̈ʋ̈slʋ̈ ˗nu ˈwo Zedhizadhɛmö ˗an ˗dhɛ bhë, ˗yö kë ˗an ˗dhɛ ˗së ˈpö. 32 ˗Ya kë ˈˈdhʋ̈, ˈyö ˗Zlan ˗ya ˈˈwɩ ˗a ˗bha, ˈa ˗dho nu ka ˈˈpiʋ̈ zuʋ̈gblüdhi ˈka, ˈö ˈkwa kwa ˈko ˗nu ꞊faanmën. 33 Kö ˗Zlan ˈö zuʋ̈waannusü nu mɛn ˗dhɛ, ˗yö ˈto mɛn ꞊gban ˈˈpɛpɛ ka ˈˈpiʋ̈ bhë, ˈaa ˗yö kë!