Yesu ˗bha bɔmɛn ˗nu këwɔn ˗nu

15 ˈDhɛ ˈö ˗kë ˈˈdhʋ̈, ˈyö gɔɔn˗ ˈbhaa ˗nu ˗wo go Zude ˈö ˈwo nu ˈwo ˗ya kwa ꞊dhegblü ˗nu ꞊klaŋ kë ˗sü ˗bha ˈwo˗ pö: «Ka ˈti ˈdho ˈˈbɔnŋ* ꞊dhɛ ˗kɔ ˈö Moizö ˗bha ˈtɔŋ˗ ˗ya pö ˗a ˈka ˗a ˈdhö, ka ˈti ˗dho ꞊mɔɔn˗ ˗bha ˈka dha.» 2 ˈYö ˗zuöödhe ˗yö ˗da mɛn ˈwo bhë waa Pɔdhö ˗nu, Baanabasö ˗nu ˗an ꞊zinŋgü, ˈö ˈwo ˗ya zɔɔdhe ˈˈgbɩɩ˗ ˗man ˗sü ˗bha wo ˈko ˗nu ˈka. ˈDhɛ ˈö ˗kë ˈˈdhʋ̈, ˈyö ˗an ˗wo ˗yö ˗mɔn kö Pɔdhö waa Baanabasö waa mɛn ˈˈwɛɛ ˈbhaa ˗nu ˗wo ˈdho ˈwɔn ˈö bhë ˗a ˈka bɔmɛn ˗nu waa mɛn zii ˗nu ˗an ˗kuu ˈˈdhiʋ̈ Zedhizadhɛmö kö ˗wa ˈˈɲan bhɔ.

3 ˈDhɛ ˈö ˗zlanwokɔdhi ˈgümɛn ˗nu ˗wo wo bo ˗an ˗dɔ ʒiaan˗ ˗sü ˈka, ˈyö mɛn ˈwo ˗an bɔ bhë ˈwo dho ˈwo bɔ Fenisi ˗sɛ waa Samadhi ˗dhɛ ˗an ˈgü. ˗Dhɛ ˗nu ˈwo bɔ ˗a ˗bha ˈˈdhʋ̈ bhë, ˗wo ˗kɔ ˈö ˈˈsɛ ˈˈwɛɛ ˈgümɛn ˗nu ˗wo wo zuʋ̈ˈˈ ꞊slëë ˗a ˈka ˗a ꞊gban ˗gɛn ˗dɔ kwa ꞊dhegblü ˗nu ˈwo mü ˗an ˗dhɛ, ˈö ˗an ꞊gban ˈˈpɛpɛ zuʋ̈ˈˈ ꞊nii ˗yö ˗da ꞊dedewo. 4 ˈDhɛ ˈwo ˗lo Zedhizadhɛmö, ˗zlanwokɔdhi ˈö mü ˗a ˈgümɛn ˗nu, bɔmɛn ˗nu waa mɛn zii ˗nu, ˗wo wo ˗kɔ ˗ya ˗an ˗gɔ ˗së ˈka, ˈyö ˈwɔn ˈˈpɛpɛ ˈö ˗Zlan ˗yö bɔ ˗an ˗ta ˈö˗ ˗kë bhë ˈwo˗ ꞊gban ˗gɛn bho ˗an ˗dhɛ. 5 ˈˈKɛɛ ˈyö mɛn ˈbhaa ˗nu ˈö ˈwo kun Fadhiziɛn ˗nu ˗bha mɛn ˗nu ˈka ˗be ˈö ˈwo ꞊kun ˈˈwɩ ˗Zlan ˗wo ˗bha bhë, ˗wo ꞊luu wo ˗yɛɛ ˈgü ˈö ˈwo˗ pö: «˗An dua ˗mü kö ˗wo ˈdho ˈˈbɔnŋ. ˗Kwaa pö ˗an ˗dhɛ ˈpö ˗wo Moizö ˗bha ˈTɔŋ˗ ꞊bhlëë ˗ya.»

6 ˈDhɛ ˈö ˗kë ˈˈdhʋ̈, ˈyö bɔmɛn ˗nu waa mɛn zii ˗nu ˗wo dho wo ˈkwëëdhö kö ˈwo ˗dhɛ ˗ga ˈwɔn ˈö bhë ˗a ˈgü. 7 ˈDhɛ ˈwo za ˗man wo ˈˈkwöö pinŋdhö, ˈyö Piɛɛ ˗yö ꞊luu ˈö˗ pö: «N ꞊dhegblü ˗nu, ka ꞊dede ka˗ ˈwɔn ˗dɔ ꞊dhɛ kwa ꞊zinŋgü, man ˈnën ˗Zlan ˗yö ö ˗kɔ ˗yɛ n ˗bha ˗blɛɛsü kö ˈˈsɛ ˈˈwɛɛ ˈgümɛn ˗nu ˗wo bɔ n ˗ta ˗wo nɔɔn˗ ˗së man, kö ˗wo wo ˗zo yö ˗a ˗dhɛ. 8 ˈYö ˗Zlan ˈö mɛnbhɩɩdhe zuʋ̈ga dɔ bhë, ˈö˗ ˗zɔn ꞊dhɛ ˈya ö ˗kɔ ˈkpɔ ˗an ˗gɔ, ˈyö ö ˗bha ˗zuu ˈˈslʋ̈ʋ̈slʋ̈ ˗nu ˗an ˗dhɛ ꞊dhɛ ˗kɔ ˈö˗ nu ˗a ˈka kwa ˗dhɛ ˈpö bhë ˗a ˈdhö. 9 ˗Ya ˈgo mü ˈzü, yö ˈti mɛn ˗nu ˈö ˈwaa Zuifö ˈka kwaa˗ ˗nu kwa ˗bhokoo ˈˈwɛɛ ˈbhaa kë. Pë ˈö˗ ˗kë ꞊ʒiaan ˈyö ˗tɔ ˗an zuʋ̈piʋ̈dhɛ ˈnën ˈö˗ ˗zu ˗an ˗bha ˗zoyödhe ˗wɔn ˈgü. 10 ˈDhɛ ˈö ˗kë ˈˈdhʋ̈, ˈmën ˗kë ˈö ˈka ˗Zlan ˈgüdan, ˈö ꞊kwɛɛ˗ ˈgbinŋ˗ ˈö kwa ˈˈbhɛman ˗nu ɛɛnˈˈ kwa ꞊dede ˈkwaa ˗mɔn ˗a ˈsü ˗sü ˗bha bhë, ˈka˗ pö ˈka˗ nu Yesu ˗bha gwëëˈˈ ˗nu ˈwo bhë ˗an ˗dhɛ kö ˗wa ˈsü. 11 ˗Yö ga ˗sü ˈka kwa ˈgü ꞊ʒiaan ꞊dhɛ Dëmɛn Yesu ˗bha ˗gasitɛ ˈnën ˈö˗ ˈsaa˗ ˈgü ˈö ˈkwa dhasü ꞊slɔɔ. Yö ˈnën ˈö˗ ˈsaa˗ ˈgü ˈpö ˈö ˈwo ˗de ˈpö ˈwo dhasü ꞊slɔɔ.»

12 ˈDhɛ ˈö˗ pö ˈˈdhʋ̈, ˈyö ˗dhɛ ˗ta ˗yö ga mɛn ꞊gban ˗ta, ˈö ˈwo ˗ya wo ˈˈtʋ ˈto ˗sü ˗bha. ˈYö Baanabasö waa Pɔdhö ˗wo ˈwɔn ˈˈmlünmlünsü waa ˗dhidha ˗nu ˈö ˗Zlan ˗yö bɔ ˗an ˗ta ˈö ˗an ˗kë ˈˈsɛ ˈˈwɛɛ ˈgümɛn ˗nu ꞊zinŋgü mü bhë, ˈwo˗ ꞊blɛɛ ˗an ˗dhɛ. 13 ˈDhɛ ˈwo wo bo ˈwɔn blɛɛˈˈ ˗sü ˈka, ˈyö Zakö ˗yö ˈwɔn blɛɛsü sü ˈö˗ pö: «N ꞊dhegblü ˗nu, ˗ka ka ˈˈtʋ ˈto n ˗bha. 14 ˗Kɔ ˗blɛɛsü ˈö ˗Zlan ˗yö ö wë ꞊slëë ˗a ˈka ˈˈsɛ ˈˈwɛɛ ˈgümɛn ˗nu ˈˈpiʋ̈, ˈö mɛn ˗nu sü ˗an ꞊zinŋgü kö ˗wo kë ˈˈsɛgɔ ˈö˗ ˈtɔ ˈdhö˗ ˗bha ˗a ˈgümɛn ˗nu ˈka bhë, Simɔn* ꞊yaa˗ blɛɛˈˈ kwa ˗dhɛ ˈkpakpadhö. 15 Pë ˈö˗ ꞊blɛɛ bhë ˗yö ˗bɛ ˗sü ˈka pë ˈö ˗Zlan ˗wodhiʋ̈lomɛn ˗nu ˗wa pö ˈö ˗bɛnzë ˗sü ˈka ˗a ˗bha. ˗Wa ˗pö: 16 ‹ˈWɔn ˗nu ˈwo bhë ˗wa wo bo kë ˗sü ˈka, a ˗dho n ꞊yɛɛ kë ˈa nu, ˈa Davi ˗bha sɔ ˈkɔ ˈö ˗puö bhë ˗a ꞊luu. A ˗dho ˗a ˈwüdhɛ ˗nu baaˈˈ ˈö ˈa˗ ˗gɛn ˗gban ˈzü, 17 ˗yö kë ˈˈdhʋ̈ kö mɛn ˗nu ˈö ˗wa ˈto waa ˈˈsɛ ꞊gban ˈˈpɛpɛ ˈgümɛn ˗nu ˈö n ˈtɔ ˈdhö ˗an ˗bha, ˗wo maan Zoova ˗mɛn n mɛɛnˈˈ ꞊dedewo. Maan Zoova ˗mɛn ˈa ˗dho ˈwɔn ˗nu ˈwo ˈˈdhʋ̈ ˗an kë bhë, man ˈnën ˈa˗ pö. 18 A˗ ˗kë ˈˈdhʋ̈ ˗sü ˗ya n ˗zo ˈˈpiʋ̈ ˗a yi ˗ya ꞊gwëë ꞊dedewo.› 19 ˈDhɛ ˈö ˈˈdhʋ̈, n ˗man ˈö n ˈgü ˗së, ˈyö ˗tɔ ˈˈsɛ ˈˈwɛɛ ˈgümɛn ˗nu ˈö ˈwo wo wë ꞊slëë ˗Zlan ˈˈpiʋ̈ bhë, ˈkwaa ˗dho ˗an ꞊sëë bho. 20 ˗Kwa ˈsëëdhɛ bɔ ˗an ˗dhɛ ꞊ʒiaan ˈkwa˗ pö ˗wo ˈˈkan pë ˗nu ˈwo ˈˈsaa˗ bho ˗an ˈka gbapë ˗nu ˗dhɛ, ˈˈɲangüyaa kë ˗sü ˗nu, wü ˈö wo ˈti˗ bhuɛɛˈˈ bho ˈö ga* waa ꞊ɲɔɔn ˗an ˗bha. 21 ˗A ˗gɛn ˗mü ꞊dhɛ ˈö˗ ˗bhɔ ˈˈdhʋ̈ ꞊kwɛŋzü, pë ˈö Moizö ˗ya ˗bɛnzë bhë ˗a ˗wɔn blɛɛˈˈ ˗mɛn ˗nu ˗wo ˈˈkwipö ꞊gban ˈgü, ˈyö sü ꞊dhɛ ꞊Glooyi ˈˈpɛpɛ ˈka ˗wa ˗wo ˗pö wo ˗wo ˗ta ˗yakwëë ˗kë ˗a ˈgü ˗kɔ ˗nu ˈgü.»

22 ˈDhɛ ˈö ˗kë ˈˈdhʋ̈, ˈyö bɔmɛn ˗nu, mɛn zii ˗nu waa ˗zlanwokɔdhi ˈgümɛn ˗nu ˈˈpɛpɛ ˗an ˗wo ˗yö ˗mɔn kö mɛn ˗nu ˈwo wo ˗kɔ ˗yɛ ˗an ˗bha ˗wo kpa Pɔdhö waa Baanabasö ˗an ˗bha ˗wo ˈdho Antiɔshö. ˈYö ˈwo Zuda ˈö ˈwo˗ ˗dhɛ ˈpö Baasabasö waa Sidhasö ˈö ˈwo kun ˈˈdhiʋ̈sümɛn ˗nu ˈka ˗zlanwokɔdhi ˈgü bhë ˗an bɔ. 23 ˈSëëdhɛ ˈwo˗ dɔ ˗an ˗gɔ kö ˗wo ˈdho ˗a ˈka bhë, ˗wo ˈö kun ˗a ˈgü ˈyö ꞊nɛn:

«Bɔmɛn ˗nu waa mɛn zii ˗nu ˈö ˈyi ˗kë ka ꞊dhegblü ˗nu ˈka, yi ˈnën ˈyi ˈsëëdhɛ ˈö yö ˗a bɔ yi ꞊dhegblü ˗nu ˈö ˈka ˗kë ˈˈsɛ ˈˈwɛɛ ˈgümɛn ˗nu ˈka, ˈö ˈka Antiɔshö, ˈö ˈka Sidhi ˗sɛ waa Silisi ˗sɛ ˗nu ˈgü ˈpö ka ˗dhɛ. ˈYa ka ꞊tuaabho! 24 Yi˗ ˗man ꞊dhɛ mɛn ˈbhaa ˗nu ˗wo ˗go yi ˈˈpiʋ̈ yö ˈö ˈwo nu ˈwo ka zuʋ̈kaankwëëwɔn ˗nu ꞊blɛɛ, ˈö ˈwo˗ ˈˈslö ꞊mɛɛn kö ˈwo ka ˗bha ˗zoyödhe shiʋ̈ˈˈ, ˈˈkɛɛ kö ˈyaa ˈnën ˈyi ˗an bɔ. 25 Yö ˈnën ˈö˗ ˗wɔn ˈgü mɛn ꞊gban yi ˗wo ˗yö ˗mɔn, ˈö ˈyi yi ˗kɔ ˗yɛ mɛn ˈbhaa ˗nu ˗bha ˈyi ˗an kpa yi ˗bha mɛn dhɔɔbhaasü Baanabasö waa Pɔdhö ˗an ˗bha ˈö ˈyi ˗an bɔ ka ˈˈpiʋ̈. 26 ˗Kɔ ˈwo˗ ˗bha ꞊plɛ ˗wo wo ˗bha ˗tosɛta* ˗nu kwa Dëmɛn Yesu Klito ˈtɔ ˗wɔn ˈgü. 27 Yö ˈnën ˈö˗ ˗wɔn ˈgü ˈyi Zuda waa Sidhasö ˗an bɔ kö pë do ˈö ˗bɛnzë ˗sü ˈka ˈsëëdhɛ ˈyi˗ bɔ ka ˗dhɛ ˗a ˈgü bhë, ˗yö ˈgo ˗an ˈˈdhi ˈpö kö ˈka˗ man. 28 ˗A ˗gɛn ˗mü ꞊dhɛ, ˗yö ˗zuu ˈˈslʋ̈ʋ̈slʋ̈ waa yi ꞊dede yi ˈgü ˗së kö ˈyaa ˗dho ꞊kwɛɛ˗ ˈgbinŋ˗ ˈˈwɛɛ ˈbhaa ˗ya ka ˗ta kö yö ˈti kë pë ˗nu ˈö ˗an ˗wɔn ˈdhö ˈˈgbɩɩ˗, ˈö ˈwo yö ˗an ˈka: 29 ˗Ka ˈˈkan pë ˗nu ˈö ˈwo ˈˈsaa˗ bho ˗a ˈka gbapë ˗nu ˗dhɛ, ꞊ɲɔɔn, wü ˈö wo ˈti˗ bhuɛɛˈˈ bho ˈö ga waa ˈˈɲangüyaa kë ˗sü ˗nu ˗an ˗bha. ˈKa ka ˗de ˈkun ˗së ˈka pë ˗nu ˈwo bhë ˗an ˗gɔ, ˈwɔn ꞊gban ˗dho dhi ka ˗gɔ. ˈYa ˈˈwɩ ka ˈka ˈgbɛ˗!»

30 ˈDhɛ ˈö ˗kë ˈˈdhʋ̈, ˈyö ˈwo wo ꞊kwaa gɔɔn˗ ˗nu ˈwo bhë ˗an ˗zü ˈö ˈwo dho Antiɔshö. ˈDhɛ ˈwo ˗lo mü, ˈyö ˈwo Yesu ˗bha gwëëˈˈ ˗nu ꞊gban ˗dhɛ wo ˈkwëëdhö ˈö ˈwo ˈsëëdhɛ ˈö bhë ˗a nu ˗an ˗dhɛ. 31 ˈDhɛ ˈwo wo bo ˗a ˗wo pö ˗sü ˈka, ˗an zuʋ̈ˈˈ ꞊nii ˗yö ˗da ꞊dedewo ˗an ꞊faanmën ˗wo ˈö bhë ˗a ˗wɔn ˈgü. 32 ˈYö ˈdhɛ ˈö ˗kë ꞊dhɛ Zuda waa Sidhasö ˗wo ˗kun ˈpö ˗Zlan ˗wodhiʋ̈lomɛn ˗nu ˈka, ˗wo ˈˈdhɛɛtadhiaŋ˗ ꞊va ˗zë, ˈö ˈwo kwa ꞊dhegblü ˗nu ˈwo bhë ˗an ꞊faanmën, ˈö ˈwo ˗an ˗zo ˗gban. 33 ˈDhɛ ˈwo ˈˈtʋ̈ŋ ˈnën ˈbhaa ˗kë mü, kwa ꞊dhegblü ˗nu ˈwo mü ˗wo wo ˗kwaa ˗an ˗zü kö ˗wo wo ꞊yɛɛ kë wo ˈflëëgü mɛn ˗nu ˈwo ˗an bɔ bhë ˗an ˈˈpiʋ̈. 34 —— 35 ˈˈKɛɛ Pɔdhö waa Baanabasö ˗zë ˗wo ˗to Antiɔshö mü, ˈö waa mɛn ꞊va ˈˈwɛɛ ˈbhaa ˗nu ˈwo kun mɛn ˗nu ꞊klaŋ kë ˗ni ˈgü, ˈö ˈwo nɔɔn˗ ˗së ˈö ˗gban Zoova ˗wo ˗bha ˗a pö mɛn ˗nu ˗dhɛ.

36 ˈDhɛ ˈö ˗dhɛkpaɔyi ˈnën ˈbhaa ˗yö ˗ʒiö, ˈyö Pɔdhö ˗ya pö Baanabasö ˗dhɛ: «˗Ko ko ꞊yɛɛ kë ˈko bɔ ˈzü ˈˈkwipö ˗nu ˈö ˈko Zoova ˈˈdhiwo ꞊blɛɛ mü bhë ˗an ˈgü, kö ˈko ˗wo kwa ꞊dhegblü ˗nu ˈwo mü ˗an ˗dhɛ, kö ˈwɔn ˈö ˗an ˗ta ˈko˗ dɔ.» 37 Baanabasö ˗yö ˗kun ˗a ˈˈpiʋ̈ ꞊dedewo kö Zan ˈö ˈwo˗ dhɛ Makö bhë, ˗yö ʒiö wo ꞊kee˗. 38 ˈˈKɛɛ Pɔdhö ˗zë ˈyaa kun ˗a ˈˈpiʋ̈ ꞊dhɛ ˈwo˗ kpa wo ˗bha, ˗a ˗gɛn ˗mü ꞊dhɛ ˈˈtʋ̈ŋ ˗blɛɛsü ˈö ˗ʒiö ˗a ˈka ˗an ˈˈpiʋ̈ bhë, ˈdhɛ ˈwo yö Panfili, ˗yö ˗an ˗to ˈö ˗ʒiö ˈö yö ˈti ˈdho yö ˈö bhë ˗a ˈka ˈˈdhiʋ̈. 39 ˈDhɛ ˈö ˗kë ˈˈdhʋ̈, ˈyö ˗zuöödhe ˈkpii˗ ˗yö ˗da ˗an ꞊zinŋgü, ˈö ˈwo ˗kan wo ˈkwëë˗. ˈYö Baanabasö ˗yö Makö sü ˈö waa˗ ˗nu ˈwo ˗ya ˈˈyitagɔ ˈgü ˈwo dho Shiplë. 40 Pɔdhö ˗de ˈpö ˗yö ö ˗kɔ ˗yɛ Sidhasö ˗bha kö ˗yö ˈdho dɔ ö ˗gɔ, ˈö ˈdhɛ ˈö kwa ꞊dhegblü ˗nu ˗wo ꞊bhɛɛ ˗a ˗bha ˈka, ˈö ˈwo˗ ˈˈklɔɔn bho Zoova ˗bha kö ˗yö ö ˗bha ˗gasitɛ kë ˗a ˗dhɛ, ˈö ˗ʒiö. 41 ˗Yö ˗dho ˈö bɔ Sidhi ˗sɛ ˗nu waa Silisi ˗sɛ ˗nu ˈgü ˗zlanwokɔdhi ˗nu ꞊faanmën ˗sü ˈka.