ˈSëëdhɛ ˈö Pɔdhö ˗ya bɔ Wlɔmö ˗mɛn ˗nu ˗dhɛ

14 ˗Ka ka ˗kɔ ˗ya ˗së ˈka mɛn ˈö˗ ˗bha ˗zoyödhe ˗gɛn yö ˈti ˗gban ꞊köŋ ˗a ˗gɔ. ˈKaa ˗dho za dɔ ˈpö mɛn ˗nu ˈö ˗an ˗bha ˈwɔn yö ˗kɔ waa ka ˗bha ˈwaa do ˗an ˗bha. 2 ˗Zoyödhe ˗yö mɛn ˈbhaa ˗nu ˗gɔ ˈö ˈwo ꞊mɔɔn˗ ˗bha ˗wo pë ꞊gban ˈˈpɛpɛ ˗bhö. ˈˈKɛɛ mɛn ˈbhaa ˗nu ˈö ˗an ˗bha ˗zoyödhe ˗gɛn yö ˈti ˗gban ꞊köŋ, pë ˗nu ˈwo go ˈˈtʋʋdhɛɛdhö yö ˈnën ˈwo˗ ˗bhö dosɛnŋ. 3 ˈDhɛ ˈö ˈˈdhʋ̈, mɛn ˈö pë ꞊gban ˗bhö, ˗a dua ˈyaa ˗mü kö ˗yö mɛn ˈö ˈyaa pë ꞊gban ˗bhö ˗a ˈsü ˈya˗. Mɛn ˈö ˈyaa pë ꞊gban ˗bhö ˗a dua ˈyaa ˗mü ˈpö kö ˗yö za dɔ mɛn ˈö pë ꞊gban ˗bhö ˗a ˗bha, ˈyö sü ꞊dhɛ ˗Zlan ˗ya ö ˗kɔ ˈkpɔ ˗a ˗gɔ. 4 De ˗mü ü ˈka kö ˈü za dɔ mɛn ˈˈwɛɛ ˗bha yökëmɛn ˗bha? ˗Ya kë ꞊dhɛ ˗a këwɔn ˗yö ˗së ɛɛnˈˈ ˗yö ˈya˗,* ˗a ˗gɔmɛn yö ꞊dede ˈnën ˗dho ˗a pö. Zoova ˗bha ˗takundhe ˈsaa˗ ˈgü, ˗a këwɔn ꞊mɔɔn˗ ˗bha ˈö ˗kë ˗së.*

5 Mɛn ˈbhaa ˗nu ˗bha ˈka, ˗dhɛkpaɔyi ˈbhaa ꞊bhlëë ˗yö ˈkpii˗ ˈö ˗ʒiö ˗a ˈka ˗a ˗dhɛ ˗nu ˈwo to ˗an ˗ta. ˈˈKɛɛ mɛn ˈˈwɛɛ ˈbhaa ˗nu ˗bha ˈgü, ˗dhɛkpaɔyi ˈˈpɛpɛ ꞊gban ˗ta ˗yö do. Mɛn ˈö ˈdhö ˗a ˗bha ˈwɔn ˈö ö ˗zo yö ˗a ˗dhɛ ˗yö kë ga ˗sü ˈka ˗a ˈgü ꞊dedewo. 6 Mɛn ˈö ˗dhɛkpaɔyi ˈbhaa sü ꞊bhlëësü bhë, ˗ya ˗kë ˈˈdhʋ̈ Zoova ˗wɔn ˈgü. Mɛn ˈö pë ꞊gban ˗bhö ˈpö, ˗ya ˗bhö ˈˈdhʋ̈ Zoova ˗wɔn ˈgü, ˈyö sü ꞊dhɛ ˗yö ˗Zlan ˈˈnuɛ ˗bho. Mɛn ˈdhɛ ˈö yö ˗de ˈpö ˈyaa pë ꞊gban ˗bhö bhë, ˗ya ˗kë ˈˈdhʋ̈ Zoova ˗wɔn ˈgü, ˈö yö ˗de ˈpö ˈö ˗Zlan ˈˈnuɛ bho. 7 Kwa kpö ˈgü, mɛn ˈbhaa ˈö ˗dho ˗a pö ꞊dhɛ ö ˗tosɛta ˗kë ö ˗de ˗bha ˈka ˈyaa ˈdhö. Ɛɛnˈˈ mɛn ˈbhaa ˈö ˗dho ˗a pö ꞊dhɛ ö ˗ga ö ˗de ˗bha ˈka ˈyaa ˈdhö. 8 ˗A ˗gɛn ˗mü ꞊dhɛ ˈkwa kë kwa ˈˈɲaan, kö kwa kwa ˈˈɲaan Zoova ˗bha ˈka. ˈKwa ga ˈpö, kö kwa ˗ga Zoova ˗bha ˈka. ˈDhɛ ˈö ˈˈdhʋ̈, kwa ˗kë kwa ˈˈɲaan oo ɛɛnˈˈ kwa ˗ga oo, kwa Zoova ˗bha ˈka. 9 Pë ˈö˗ ˗wɔn ˈgü ˈö Klito ˗yö ga ˈö go ga ˈgü ˈzü ˈyö bhë. ˗Yö ˗kë ˈˈdhʋ̈ kö mɛn ˗nu ˈö ˗wa ga waa mɛn ˗nu ˈö ˈwo wo ˈˈɲaan ˗yö kë ˗an ꞊gban Dëmɛn ˈka.

10 ˈˈKɛɛ ˈmën ˗kë ˈü za dɔ ü ꞊dhegblü ˗bha? Ɛɛnˈˈ ˈmën ˗kë ˈü ü ꞊dhegblü sü ˈya˗? Mɛn ˈˈpɛpɛ kwa ˗dho dɔ ˗Zlan ˗kuu ˈˈdhiʋ̈ ˗a ˗bha zakandhɛ ˈgü. 11 ˗A ˗gɛn ˗mü ꞊dhɛ pë ˈö ˗bɛnzë ˗sü ˈka ˈyö ˗tɔ: «˗Kɔ ˈö ga ˗sü ˈka ˗a ˗bha ka ˈgü ꞊dhɛ a ˈˈbhɩɩ˗ bhë, ˗yö ꞊mɔɔn˗ ˗bha ˈö ga ka ˈgü ˈpö ꞊dhɛ mɛn ꞊gban ˈˈpɛpɛ ˗dho yö wo kpɔn ˈgü n ˈˈdhiʋ̈, ˈö mɛn ꞊gban ˈˈpɛpɛ ˗wo ˗we ˗a ˗bha ˈˈpuu ˈka ꞊dhɛ man ˈnën ˈa ˗tɔ ˗Zlan. Pë ˈö Zoova ˗ya pö ˈyö bhë.» 12 ˗Ya kë ˈˈdhʋ̈ kö ˗kɔ ˈö ˈkwa˗ ˗bha do do ˈka, mɛn ˈö ˈdhö ˗yö ˗dho dɔ ˗Zlan ˗kuu ˈˈdhiʋ̈ ˈö ˗gban ˗a këwɔn ˗nu ˗ta ˈö za dɔ ˗a ˗bha.

13 ˈDhɛ ˈö ˈˈdhʋ̈, ˗kwa ˈˈkan za ˗dɔ kwa ˈko ˗nu ˗bha ˗sü ˗bha. ˗Kwa pë ꞊gban ˈˈpɛpɛ kë kö pë ˈö ˗dho kë mɛn ˗gɛn ˈˈdhiʋ̈ ˗zuö ˗a ˗bha ˗gwö ɛɛnˈˈ ʒiaan˗ ˗ta mɛn ˗gɔ ˗pë ˈka ˈkwaa ˗dho ˗a ˗ya kwa ꞊dhegblü ˗nu ˈˈdhiʋ̈. 14 N ˗man ˗kë Dëmɛn Yesu ˗bha gwëëˈˈ ˈka ˗sü ˈgü a˗ ˈwɔn ˗dɔ, ˈö ga ˗sü ˈka n ˈgü ꞊dhɛ pë ˈbhaa ˈkö ˗dho kë ˗dhiisü ˈyaa ˈdhö. Mɛn ˗ya pë ˈbhaa yö ꞊dhɛ pë ˗dhiisü ˈdhö, ˈyö˗ ˗ga ꞊dhɛ ˗a pë ˈö ˈˈdhʋ̈ ˗yö ˗dhiisü. 15 Ü ˗bhöpë ˗ya kë ˈwɔn ˗shiö ü ꞊dhegblü ˗dhɛ ˗pë ˈka, kö ˈbhaa ˈwɔn ˗nu kë ˗ni ˈgü ˈzü ˗dhɔ ˈgü. ˈDhɛ ˈö ˈˈdhʋ̈, ü ꞊dhegblü ˈö Klito ˗yö ga ˗a ˗wɔn ˈgü bhë, ˈbhaa ˗dho ˗a ˗bha ˗zoyödhe shiʋ̈ˈˈ ü ˗bhöpë ˗nu ˗wɔn ˈgü. 16 ˈKaa ˗dho ˗a kë kö ˈwɔn ˗së ˈö ˈka˗ ˗kë, mɛn ˗nu ˗wa ˗wɔn yaa blɛɛˈˈ. 17 ˗A ˗gɛn ˗mü ꞊dhɛ ˗da ˗Zlan ˗bha ˗Gblüdëdhɛ ˈgü ˗sü ˈyaa ˗gban pë ˈö mɛn ˗ya ˗bhö ɛɛnˈˈ pë ˈö mɛn ˗ya mü ˗a ˗bha. ˗Yö ˗gban ꞊ʒiaan ˗kë kpɛnŋdhösü, ˗dhikodhɛ* waa zuʋ̈gblüdhi ˈö ˗zuu ˈˈslʋ̈ʋ̈slʋ̈ ˗ya nu mɛn ˗dhɛ ˗an ˗bha. 18 Mɛn ˈö yö ˗kë Klito ˗dhɛ* ꞊dhɛ ˗kɔ ˈö bhë ˗a ˈdhö, ˗Zlan ˗yö ö ˗kɔ ˗kpɔ ˗a ˗gɔ ˈö˗ ˗mɛn ˈˈdhiaa ˗yö ˗kë ˈpö mɛn ˗nu ˈgü.

19 ˈDhɛ ˈö ˈˈdhʋ̈, ˗kwa ˈwɔn ˗nu ˈö ˈwo nu ˗dhikodhɛ ˈka waa ˈwɔn ˗nu ˈö ˈwo dho ˗a kë kö ˈkwa kwa ˈko ˗nu ꞊faanmën ˗an kë ˗ʒian mɛɛnˈˈ ˗kplawo. 20 Yö ˈö ˗Zlan ˗ya ˗kë bhë, ˈkwaa ˗dho ˗a shiʋ̈ˈˈ ˗bhöpë ˗wɔn ˈgü. ˗Yö ˈˈdhʋ̈ ꞊dede ˈka ꞊dhɛ pë ꞊gban ˈˈpɛpɛ ˗wo ˈˈslʋ̈ʋ̈slʋ̈, ˈˈkɛɛ ü ˗bha pë ˈbhaa ˗bhö ˗sü ˗ya kë mɛn ˈbhaa ˗gɛn ˈˈdhiʋ̈ ˗zuö ˗gɛn ˈka, kö ˗yö ˈya˗. 21 ˗Yö ˗kë wü ˗bhö ˗sü ˈka oo, ˗yö ˗kë we mü ˗sü ɛɛnˈˈ pë ˈˈoo ˗pë ˈbhaa ˈka ˈö kwa ꞊dhegblü ˗gɛn ˈˈdhiʋ̈ ˗zuö ˗pë ˈka, ˗yö ˗dho kë ˗së kö ˈkwa ˈˈkan ˗a ˗bha. 22 ˗A ˈdhɛ ˈö ga ˗sü ˈka ü ˈgü ˈö ˗gban ˈwɔn ˈö bhë ˗a ˗bha, ˗yö ˈto kaa ˗Zlan ka ꞊zinŋgü. Mɛn ˈö ˈwɔn ˈö˗ ˈgü ˗së ˗a ˗kë, ˗a zuʋ̈ˈˈ ˈyii za dɔ ˗a ˗bha, kö ˗a ˗bha ˗yö ˗së. 23 ˈˈKɛɛ ˗ya kë ꞊dhɛ mɛn ˈbhaa zuʋ̈ˈˈ ˗ya dɔ ˈdudhö pë ˈbhaa ˗bhö ˗sü ˗wɔn ˈgü, ˗a pë ˈö ˈˈdhʋ̈ ꞊yaa˗ ˗bhö, kö za ꞊yaa˗ ˈkun ˈsaadhö, ˗a ˗gɛn ˗mü ꞊dhɛ ˗a ˗bhö ˗wɔn ˈyaa kun ga ˗sü ˈka ˗a ˈgü. ˈWɔn ˈˈpɛpɛ ˈö mɛn ˗ya ˗kë ˈö ˈyaa ˗gban ˗sü ˈka ˗zoyödhe ˗ta, kö ˈwɔn yaa ˗mü.