ˈSëëdhɛ ˈö Pɔdhö ˗ya bɔ Wlɔmö ˗mɛn ˗nu ˗dhɛ

7 N ꞊dhegblü ˗nu, ˗a ˈwɔn ˈnën ˈö ˈkaa˗ dɔ ꞊dhɛ mɛn ˈö ꞊kun ˈö ˈˈɲaan ꞊köŋ kö ˗yö ˈTɔŋ˗ ˗kɔ ꞊löö ˗ee? (˗A ˗gɛn ˗mü ꞊dhɛ mɛn ˗nu ˈa ˈwɔn blɛɛˈˈ ˗ni ˈgü ka ˗dhɛ bhë, ka ˈwɔn ˈö ˗gban ˈtɔŋ˗ ˗bha ˗a ˗dɔ.) 2 ˗A ˈwɔnzuan ˈnën ˗tɔ, ˈtɔŋ˗ ˗ya ˗pö dhebɔ ˈö gwaan˗ kpɔ, ˗a ꞊gɔn ˗yö ꞊kun ö ˈˈɲaan ꞊köŋ, ˗a dua ˗mü kö ˗yö ˗klu ö ꞊gɔn ˗bha. ˈˈKɛɛ ˗a ꞊gɔn ˗ya ö bo ga ˗sü ˈka, kö ˈtɔŋ˗ ˈö ˗gban ˗a ꞊gɔn ˗bha bhë, ˗ya ˈgo ˗a ˗ta. 3 ˈDhɛ ˈö ˈˈdhʋ̈ ˗a ꞊gɔn yö ˈti ga ꞊köŋ, kö ˗yö ˈdho ˗yö gwaan˗ ˈkpɔ gɔɔn˗ ˈˈwɛɛ ˗gɔ, ˗wo ˗dho ˗a ˗dhɛ niënŋdhe. ˈˈKɛɛ kö ˗a ꞊gɔn ˗yö ga, kö ˗ya ˈgo ˈtɔŋ˗ ˈö ˗gban ˗a ꞊gɔn ˗bha bhë ˗a ˗kɔ ꞊löö. ˗A ˗wɔn ˈgü, ˗ya gwaan˗ ˈkpɔ ˈzü gɔɔn˗ ˈˈwɛɛ ˗gɔ, kö niënŋdhe ˈyaa ˗mü ˗a ˈka.

4 ˗Kɔ do ˈö bhë ˗a ˈka ˈpö, n ꞊dhegblü ˗nu, ˈka ga ˈwɔn ˈö ˗gban ˈTɔŋ˗ ˗bha ˗a ˈgü Klito bun ˈsaa˗ ˈgü, ˗yö kë ˈˈdhʋ̈ kö ˈka kë mɛn ˈˈwɛɛ ˈbhaa ˈö ˗kë mɛn ˈö go ga ˈgü ˗a ˈka bhë ˗a ˗bha ˈka, kö ˈkwa ˗mɔn ˈwɔn ˗nu ˈwo ˗Zlan ˗dhɛ ˗së ˗an kë ˗sü ˗bha.* 5 ˗A ˗gɛn ˗mü ꞊dhɛ, ˈˈtʋ̈ŋ ˈö ˈkwa kun kwa bun dhɔɔbhaawɔn ˗nu kë ˗ni ˈgü ˗a ˈka bhë, ˈTɔŋ˗ ˗ya ˗zɔn kwa ˗dhɛ ˈˈpuu ˈka ꞊dhɛ ˈwɔn yaa kë ˗sü ˗dhɔ ˈö kwa ˈgü ˈyö kwa ˗blü ꞊sɔŋ yaa kë ˗sü ˗bha, ˈyö ꞊sɔŋ yaa ˗yö dho kwa ˈka ga ˗ʒian ˗ta. 6 ˈˈKɛɛ ˈˈtʋ̈ŋ ˈö yö ˗a ˈgü, ˈkwa ˈgo ˈTɔŋ˗ ˗gɔ ˈˈgan ˈgü, ˗a ˗gɛn ˗mü ꞊dhɛ pë ˈö kwa kun ˗a ˈka ˈˈgan ˈka bhë ˈkwa ga ˗a ˗gɔ. ˗Yö ˗kë ˈˈdhʋ̈ kö ˈkwa kë ꞊dhuëŋ ˈka ˗kɔ ˈˈwɛɛ ˈgü, kö ˗zuu ˈˈslʋ̈ʋ̈slʋ̈ ˗yö ˈˈdhiʋ̈sü kwa ˈka, kö ˈkwa ˗dho kë ꞊dhuëŋ ˈdhɛ ˈö ˈkwa kun ˗a ˈka ˈˈdhiʋ̈ ˗be ˈö ˈtɔŋ˗ ˈö ˗bɛnzë ˗sü ˈka ˈyö kun ˈˈdhiʋ̈sü ˗ni ˈgü kwa ˈka bhë ˗a ˈka.

7 ˗Ya kë ˈˈdhʋ̈ kö kwa ˗dho ˗a pö ꞊dhɛ? Kwa ˗dho ˗a pö ˈwɔn yaa ˗mü ˈTɔŋ˗ ˈka ˗ee? ˗Abin toŋtoŋdhö! ˗A ˗gɛn ˗mü ꞊dhɛ ˈTɔŋ˗ ˈyaa ˈdhö ˗be, pë ˈö ˈwɔn yaa ˈka kwa ˈti ˗dho ˗a dɔ. ˗A ˈwɔnzuan ˈnën ˗tɔ, ˗ya kë ꞊dhɛ ˈTɔŋ˗ yö ˈti˗ pö ˗be: «Ü dua ˈyaa ˗mü kö ü zuʋ̈ˈˈ ˗yö bhɔ mɛn ˗nu ˗bha pë ˗bha,» kö pë ˈwo˗ ˗dhɛ zuʋ̈ˈˈ ˗bhɔ pë ˗bha ˗sü n ˈti ˗dho ˗a dɔ. 8 ˈˈKɛɛ ˈwɔn yaa ˗yö ˗bɔ ˈtɔŋ˗ ˈö bhë ˗a ˗ta ˈö zuʋ̈ˈˈ ˗bhɔ pë ˗bha ˗sü ꞊suu ˈˈpɛpɛ ˗da n ˈgü. ˗Ya kë ꞊dhɛ ˈtɔŋ˗ ˈö bhë ˈyaa ˈdhö ˗be, kö ˈwɔn yaa kë ˗sü ꞊faan ˈyaa ˈdhö.* 9 ˗A ˗gɛn ˗mü ꞊dhɛ, ˈˈsanni ˈtɔŋ˗ ˗yö nu, a ˗kun ˈˈbhɩɩ˗. ˈˈKɛɛ ˈdhɛ ˈö ˈtɔŋ˗ ˗yö nu, ˈyö ˈwɔn yaa kë ˗sü ˗yö go ga ˈgü, ˈyö man ˗zë ˈa ga. 10 ˈYö ˈa˗ yö ꞊dhɛ ˈtɔŋ˗ ˈö dho mɛn ˈka ˗be dha ˗ʒian ˗ta bhë, ˗yö ˗dho mɛn ˈka ꞊ʒiaan ga ˗ʒian ˗ta. 11 ˗A ˗gɛn ˗mü ꞊dhɛ ˈwɔn yaa ˗yö ö zü ˗gban ˈtɔŋ˗ ˗ta ˈö n zuʋ̈ˈˈ sü, ˈö bɔ ˗a ˗ta ˈö n zë. 12 ˗A ˗kë ˈˈdhʋ̈ ˗sü ˈgü, ˈTɔŋ˗ yö ꞊dede ˗yö ˈˈslʋ̈ʋ̈slʋ̈, ˈö pë ˈö˗ pö ˈö ˈˈslʋ̈ʋ̈slʋ̈ ˈpö, ˈö kpɛnŋdhö, ˈö ˗së.

13 ꞊Ya kë ˈˈdhʋ̈ kö pë ˈö ˗së bhë, yö ˈnën ˈö ˗kë n zë ˗pë ˈka ˗ee? ˗Abin toŋtoŋdhö! Pë ˈö n zë yö ˈnën ˈö ˗tɔ ꞊sɔŋ yaa. ˈTɔŋ˗ ˗yö ˗së, ˈö ˗zɔn ˗sü ˈka ˈˈpuu ˈka ꞊dhɛ pë ˈö˗ ˗wɔn ˈgü ˈa ga ˈyö ˗tɔ ꞊sɔŋ yaa. ˗A ˗kë ˈˈdhʋ̈ ˗sü ˈgü, pë ˈö ˈtɔŋ˗ ˗ya pö ˗ya ˗zɔn ꞊dhɛ ꞊sɔŋ yaa ˗yö pë yaa ꞊dede ˈka. 14 Kwa˗ ˈwɔn ˗dɔ ꞊dhɛ ˈtɔŋ˗ ˗yö ˗go ˗Zlan ˈˈpiʋ̈, ˈyö man ˗zë ˈa ˗kë mɛnbhɩɩdhe ˈö ꞊sɔŋ yaa ˗gɔ ꞊dhuëŋdhɛ ˈgü* ˗a ˈka. 15 ˗A ˗gɛn ˗mü ꞊dhɛ pë ˈa˗ kë ˗ni ˈgü ˈmaan˗ ˈgüman n ˗de ˗gɔ. ˈYö sü ꞊dhɛ pë ˈa˗ ˈˈpiʋ̈ ꞊dhɛ ˈa˗ kë, a˗ ˗to, ˈö ˈpë ˈö˗ ˗san ˗yö n ˗kë ꞊ʒiaan ˈa˗ ˗kë. 16 ˈKö ˗kë ꞊dhɛ pë ˈö˗ ˗san ˗yö n ˗kë ˈyö ˈa˗ ˗kë, ˗a ˈwɔn ˗zë a˗ ˗dɔ ꞊dhɛ ˈTɔŋ˗ ˗yö ˗së. 17 ˗Ya kë ˈˈdhʋ̈ kö ˈˈtʋ̈ŋ ˈö yö ˗a ˈgü, mɛn ˈö ˈwɔn yaa ˗nu kë ˗ni ˈgü bhë ˈmaan ˗mü, ꞊sɔŋ yaa ˈö n ˈgü bhë yö ˗mü. 18 ˗A ˗gɛn ˗mü ꞊dhɛ n bun ˈö ˗kë n mɛnbhɩɩdhe kwi ˈka bhë, a˗ ˈwɔn ˗dɔ ꞊dhɛ pë ˗së ˈyaa˗ ˈgü. ˈYö sü ꞊dhɛ ˈwɔn ˗së kë ˗sü ˗dhɔ ˗yö n ˗bha, ˈˈkɛɛ ˗a kë ˗sü ˈˈse ˈnën ˈyaa n ˗dhɛ. 19 ˈWɔn ˗së ˈö˗ kë ˗dhɔ ˈdhö n ˗bha ˈmaan˗ kë, ˈˈkɛɛ ˈwɔn yaa ˈö˗ kë ˗dhɔ ˈyaa n ˗bha, yö ˈnën ˈa˗ ˗kë. 20 ˈDhɛ ˈö ˈˈdhʋ̈ pë ˈö˗ ˗dhɔ ˈyaa n ˗bha ˈman˗ kë, kö mɛn ˈö˗ kë ˗ni ˈgü bhë ˈmaan ˗mü, ꞊sɔŋ yaa ˈö n ˈgü bhë yö ˗mü.

21 ˗A ˗kë ˈˈdhʋ̈ ˗sü ˈgü, ˈwɔn* ˈa˗ yö ꞊dhɛ ˗yö ˗kë n ˈka ˈyö ˗tɔ: ˈMan˗ pö ˈa ˈwɔn ˈö kpɛnŋdhö ˗a kë, ˈwɔn yaa kë ˗sü ˈnën ˈö nu n zuʋ̈ˈˈ ˈˈpiʋ̈. 22 ˗Zlan ˗bha ˈtɔŋ˗ ˗dhɔ ˗yö n ˗kë ꞊dedewo n zuʋ̈ˈˈ ˈgü. 23 ˈˈKɛɛ a˗ ˗yö ꞊dhɛ n dɔɔ˗ ˗nu ˈgü, ˈtɔŋ˗ do ˈˈwɛɛ ˈbhaa ˗yö mü ˈö ˗gblü gɔn ˗ni ˈgü ˈtɔŋ˗ ˈö ˈˈdhiʋ̈sü n ˗man ˗zotadhe ˈka bhë ˗a ˈka, ˈö ˈdho ˗ni ˈgü n ˈka ꞊sɔŋ yaa ˗bha ˈtɔŋ˗ ˈö n kwi* ˈgü bhë ˗a ˗gɔ ˈˈgan ˈgü. 24 ˗Mën ˈa dɔ ˗a ˈka ˗wëësü ˈka ꞊nii! De ˈö ˗dho n dha bun ˈö ˈdho ˗ni ˈgü n ˈka ga ˗ʒian ˗ta yö ˗a ˗gɔ? 25 A ˗Zlan ˈˈnuɛ ˗bho, ˈyö sü ꞊dhɛ ˗yö ˗bɔ kwa Dëmɛn Yesu Klito ˗ta ˈö n dha. ˗A ˗kë ˈˈdhʋ̈ ˗sü ˈgü, n ˗zo ˗ta ˗a ˈgü ˗wɔn ˗nu ˈgü, a ˗Zlan ˗bha ˈtɔŋ˗ ˗gɔ ꞊dhuëŋdhɛ ˈgü, ˈˈkɛɛ n ˗man ˗kë mɛnbhɩɩdhe ˗kwi ˈgü ˗sü ˗wɔn ˈgü, a ꞊sɔŋ yaa ˗bha ˈtɔŋ˗ ˗gɔ ꞊dhuëŋdhɛ ˈgü.