Yesu ˗bha bɔmɛn ˗nu këwɔn ˗nu
12 ˗A ˈˈtʋ̈ŋ ˈö bhë ˗a ˈgü, ˗gblüdë Edhɔdö ˗yö ˗ya ˗zlanwokɔdhi ˈgümɛn ˈbhaa ˗nu ˗wëëdhɛbhosü ˗bha. 2 ˗Yö ö ˗bha ˈˈsɔdha ˗nu ˗bɔ ˈö ˈwo ˗blaan ˗dhaa sü ˈwo Zakö ˈö ˗kë Zan ꞊dhegblü ˈka bhë ˗a zë. 3 ˈDhɛ ˈö˗ yö ꞊dhɛ ˗a kë ˈö˗ wo ˈˈdhʋ̈ bhë ˗a ˈˈyi ˗yö ˗kan Zuifö ˗nu ˈˈdhi, ˈyö mɛn bɔ kö ˗wo Piɛɛ ˈkun ˈpö. (˗Yö ˗kë ˈˈdhʋ̈ ˈBluu˗ ˈö ˈˈsɛkɛ ˈyaa˗ ˈˈpiʋ̈ bhë ˗a ˈwlaan˗ yi do ˈka.) 4 ˈYö ˈwo Piɛɛ kun ˈwo˗ ˗da ˗kaso ˈgü. ˈYö ˗a ˈˈklɔɔn bho ˈˈsɔdha kpö ˗yiishiö ˗bha, kö ˗wo dan ˗yiishiö ˗yiishiö, ˗wo yö wo ˈko pinŋ˗ ˈgü kö ˗wa ˗maan kë. ˗Ya ˗kë ˈˈdhʋ̈ kö Pakö ˈwlaan˗ yi ˗ya ʒiö ˈwo ˈdho ˗a ˈka ˈˈsɛgümɛn ˗nu ˗kuu ˈˈdhiʋ̈.* 5 ˗A ˗wɔn ˈgü, Piɛɛ ˗yö ˗to ˗kaso ˈgü mü. ˈˈKɛɛ ˗zlanwokɔdhi ˈgümɛn ˗nu ˗wo ˗kun bhɛɛˈˈ ˗ni ˈgü ˗Zlan ˗dhɛ ꞊dedewo ˗a ˗bha ˈka.
6 ˗Dhɛkpaɔyi ˈö Edhɔdö dho ˈdho Piɛɛ ˈka ˈˈsɛgümɛn ˗nu ˗kuu ˈˈdhiʋ̈ bhë, gbeŋyi ˈö kun ˗a ˈˈdhiʋ̈ ˗a ˈka, Piɛɛ ˗yö ˗kun yi zë ˗ni ˈgü ˈˈsɔdha ꞊plɛ ˈwo kun ˗a ˗maan kë ˗ni ˈgü bhë ˗an ꞊zinŋgü, kö ꞊yɔɔga ꞊plɛ ˗wa ˗bha, kö ˈˈsɔdha ˈbhaa ˗nu ˗wo dɔ ˗sü ˈka ˗kaso ˈkɔ ˈˈdhi ˗bha ˗wa ˗maan kë ˗ni ˈgü. 7 ˈˈKɛɛ ˈyö to mü ˈö Zoova ˗bha ˈˈkiö ˗yö ˗wo, ˈö ˈˈshiʋ̈ ˈbhü ˗yö ˗dhɛ ˗pʋ ˗kasö ˈkɔ ˈˈdhi ˈö bhë ˗a ˗dhɛ ꞊gban ˈgü. ˈYö ˈˈkiö ˈö bhë ˈö ö ˗kɔ pa* Piɛɛ ˈka, ˈö pa ˗a ˗bha ˈö˗ pö: «˗Bhö luuˈˈ ˈˈvaandhö!» ˈYö ꞊yɔɔga ˗nu ˗wo go Piɛɛ ˗kɔ ˗bha ˈö ˈwo ˗lo ˈˈshia˗. 8 ˈYö˗ ˈˈkiö ˗ya pö ˗a ˗dhɛ: «Ü ˗bha sɔ ˗da ü ˗bha, ˈü ˗sabha ˗nu yö ü ˗gɛn ˗bha.» ˈDhɛ ˈö Piɛɛ ˗ya ˗kë ˈˈdhʋ̈, ˈyö ˈˈkiö ˗ya pö ˗a ˗dhɛ ˈzü: «Ü ˗bha sɔ ˗ta ˈˈbhee ˗da, ˈü nu ˈko ˈdho.» 9 ˈDhɛ ˈö ˗kë ˈˈdhʋ̈, ˈyö Piɛɛ ˗yö yö ˈˈkpɛnŋ ˈö ˗ʒiö ˗a ꞊kee˗. ˈˈKɛɛ ˈwɔn ˗nu ˈö ˗Zlan ˗bha ˈˈkiö ˗yö kun ˗an kë ˗ni ˈgü bhë, ˈyaa kun bhɔ ˗ni ˈgü ˗a ˗dhɛ ˈwɔn ꞊dede ˗bha. ˗Yö ˗kë ˗a ˈgü ꞊dhɛ pë ˈö ö ˈˈɲan ˈgü ˈnën ˗da ˗a ˈdhö. 10 ˈDhɛ ˈwo ˗ʒiö ˗dhɛ ˈö ˈˈsɔdha ˗nu kun dɔ ˗sü ˈka˗ ˗bha ˈö ˈwo ˈˈglaadhiʋ̈ sü bhë ˗a ˗blɛɛsü ˗ta, ˈyö ˈwo dho ˈwo ˗ʒiö ˗a ꞊plɛ ˗naan ˗ta, ˈö ˈwo yö ˗piö ˈˈkwee ˈö ˗yö ˈˈkpɛnŋ ˗dhɛ ˈgü bhë ˗a ˗bha, ˈyö ˈˈkwee ˈˈdhi ˗yö ˗pʋ ö ˗de ˈka. ˈDhɛ ˈwo yö ˈˈkpɛnŋ ˈö ˈwo ˗da ʒiaanga ˗nu ˈwo ˈplöö bhë ˗a do ˗ta, ˈyö to mü ˈö ˗Zlan ˗bha ˈˈkiö ˗yö ꞊dhiɔŋ, ˈö Piɛɛ ˗yö to ö do ˈka. 11 ˈDhɛ ˈö Piɛɛ ˗yö ˈwɔn ˈö kun kë ˗ni ˈgü bhë ˗a ˈgüman ˗së ˈka, ˈyö˗ pö: «ˈMan˗ ˈwɔn dɔ ˈsa ꞊dedewo ꞊dhɛ Zoova ˈnën ˈö ö ˗bha ˈˈkiö bɔ kö ˗yö n dha Edhɔdö waa ˈwɔn ˈˈpɛpɛ ˈö kun Zuifö ˗nu ˈˈpiʋ̈ ꞊dhɛ ˗yö kë n ˈka bhë ˗an ˗gɔ.»
12 ˈDhɛ ˈö˗ yö ˈˈdhʋ̈, ˈyö dho Madhi ˈö ˗kë Zan ˈwo˗ ˗dhɛ ˈpö Makö ˗a dhe ˈka bhë ˗a ˗gɔ ˈkɔɔ. Yesu ˗bha gwëëˈˈ ˈbhaa ˗nu ˗wo ˗kë wo ˈkwëëdhö mü, ˈö ˈwo kun bhɛɛˈˈ ˗ni ˈgü. 13 ˈDhɛ ˈö ˈˈkwee ˗ta ˗man, ˈyö dhebɔnën do ˈö yö ˗kë ˈkɔɔ mü ˈö ˈwo˗ ˗dhɛ Dhodë, ˗yö dho kö mɛn ˈö ˈˈkwee ˗ta ˗man ˈö˗ dɔ. 14 ˈDhɛ ˈö Piɛɛ ˗wo dɔ, ˗a zuʋ̈ˈˈ ꞊nii ˗yö ˗da ꞊dedewo ˈö˗ ˗zo ˗yö bhɔ ˈˈkwee ˈˈpʋ ˗sü ˈka, ˈö ˗bialö ꞊ʒiaan ˈö dho ˈkɔɔ ˈö˗ pö ˗an ˗dhɛ Piɛɛ ˗yö dɔ ˗sü ˈka ˈˈkpan ˈˈdhiʋ̈. 15 ˈDhɛ ˈö˗ pö ˈˈdhʋ̈, ˈyö ˈwo˗ pö ˗a ˗dhɛ: «Slaaˈˈ ˗ya ˗da ü ˈgü ˗ee?» ˈˈKɛɛ ˈdhɛ ˈö ˗kë ꞊dhɛ ˗yö ˗kun ˗a pö ˗ni ˈgü ˈˈdhʋ̈ ˗kplawo, ˈyö ˈwo˗ pö: «˗A ˗bha ˈˈkiö ˗mü.» 16 ˈˈKɛɛ ˗a ˈˈtʋ̈ŋ ˈö bhë ˗a ˈgü kö Piɛɛ ˗yö dɔ ˗sü ˈka ˈˈkpan ˈˈdhiʋ̈ mü, ˗yö ˈˈkwee ˗ta ˗man ˗ni ˈgü ˗kplawo. ˈDhɛ ˈwo ˈˈkwee ˗pʋ ˈwo ˗kpan ˗a ˗bha, ˗a ˈwɔn ˗yö ˗an ˗kun, ˈö ˗an ˈˈdhi pa. 17 ˈˈKɛɛ ˈyö ˈwɔn ꞊blɛɛ ˗an ˗dhɛ ö ˗kɔ ˈgü kö ˗dhɛ ˗ta ˗yö ga ˗an ˗ta. ˈYö ˗kɔ ˈö Zoova ˗ya bho ˗a ˈka ˗kaso ˈgü, ˈö ˗ʒiö ˗a ꞊gban ˈˈpɛpɛ ˈgü ˗an ˗dhɛ. ˈDhɛ ˈö ö bo, ˈyö˗ pö: «˗Kaa blɛɛˈˈ Zakö waa kwa ꞊dhegblü ˈˈwɛɛ ˗nu ˈwo to ˗an ˗dhɛ.» ˈDhɛ ˈö˗ pö ˈˈdhʋ̈, ˈyö yö ˈˈkpɛnŋ ˈö dho ˗dhɛ ˈˈwɛɛ ˈbhaa ˈgü.
18 ˈDhɛ ˈö ˗dhɛ ˗yö ꞊kpɔɔ, ˈyö ˈˈsɔdha ˗nu ˈwo kun Piɛɛ ˗maan kë ˗ni ˈgü ˗kasö ˈgü bhë, ˗an zuʋ̈ˈˈ ˗yö ꞊kaan ˈˈkwöö ˈö ˈwo ˗ya wo ˗de dhɛɛˈˈ kpɔ ˗sü ˗bha ˈwo˗ pö: Piɛɛ ˗yö ˈˈmɛn? 19 ˈDhɛ ˈö Edhɔdö ˗ya ꞊mɛɛn ˗dhɛ ꞊gban ˈˈpɛpɛ ˈgü ˈö yö ˈti ˗kpan ˗a ˗bha, ˈyö ˗kasö ˈkɔ ˗maankëmɛn ˗nu bhë ˗an dhɛɛˈˈ kpɔ. ˈDhɛ ˈö ö bo, ˈyö˗ pö ˗wo ˈdho ˗an ˈka ˗wo ˈwɔn bho ˗an ˈgü. ˈDhɛ ˈö bo ˗kë ˈˈdhʋ̈ ˗sü ˈka, ˈyö go Zude ˈö dho Sezadhe ˈö ˈˈtʋ̈ŋ ˈnën ˈbhaa ˗kë mü.
20 ˈˈKɛɛ ˈwɔn ˈbhaa ˗yö ˗kun ˗shiö ˗sü ˈka ˗a ˗dhɛ ˈTii˗ ˗mɛn ˗nu waa Sidɔn ˗mɛn ˗nu ˗bha. ˈDhɛ ˈö ˗kë ˈˈdhʋ̈, ˈyö mɛn ˗nu ˈwo bhë ˗an ˗wo ˗yö ˗mɔn kö ˈwo ˈdho ˗a ˈˈpiʋ̈. ˈDhɛ ˈwo yö Blatusö ˈö ˗kë ˗gblüdë ˗bha ˈkɔɔ ˗yö ˈwɔnyëë˗ ˈka bhë ˗a ˗bha, ˈö waa˗ ˗nu ˗an ˗wo ˗yö ˗mɔn, ˈyö ˈwo bɔ ˗a ˗ta ˈwo ˗dhikodhɛ ꞊mɛɛn ˗gblüdë ˈˈpiʋ̈, ˗a ˗gɛn ˗mü ꞊dhɛ ˗a ˗bha ˈˈsɛ ˈnën kun ˗bhöpë nu ˗ni ˈgü ˗an ˗dhɛ. 21 ˈDhɛ ˈö ˗dhɛkpaɔyi ˈwo˗ ˗ya bhë ˈö ˗wo, ˈyö Edhɔdö ˗yö ö ˗bha ˗gblüdëdhɛ ˗sɔ ˗da ˈö ˈɲaannu zakandhɛ ˈgü, ˈö ˗ya ˈwɔn blɛɛˈˈ ˗sü ˗bha ˗an ˗dhɛ. 22 ˈYö mɛn ˗nu ˈwo kun mü ˈwo ˗ya ˈˈgbla ˗sü ˗bha ˈwo˗ pö: «˗Zlan ˈnën ˈö ˈˈwɩ ˗ni ˈgü bhë, mɛnbhɩɩdhe ˈyaa ˗mü!» 23 ˗Yö ˗to ˈˈshia˗ mü ˈö Zoova ˗bha ˈˈkiö do ˗yö ˈˈyua ˗ya ˗a ˗bha, ˈö pë ꞊ɲuun ˗nu ˗wo gɔn ˗a ˈgü, ˈö ˈwo˗ ˗bhö ˈö ga, ˗a ˗gɛn ˗mü ꞊dhɛ ˈtɔbhɔdhe ˈö ˗Zlan ˗bha ˈka yö ˈti˗ nu ˗a ˗dhɛ.
24 ˗A ˈˈtʋ̈ŋ ˈö bhë ˗a ˈgü, Zoova ˗wo ˗yö ˗kun ˈdho ˗ni ˈgü ˈˈdhiʋ̈ ˗kplawo, ˈö mɛn ꞊vadhɛ ˗wo ˗kë Yesu ˗bha gwëëˈˈ ˗nu ˈka.
25 ˈDhɛ Baanabasö waa Sɔdhö ˗wo wo bo yö ˈö ˗gban ˗an ꞊dhegblü ˗nu ˈwo Zedhizadhɛmö ˗an ˗takun ˗sü ˗bha ˗a kë ˗sü ˈka, ˈyö ˈwo Zan ˈwo˗ ˗dhɛ ˈpö Makö bhë ˗a kpa wo ˗bha ˈö ˈwo wo ꞊yɛɛ ˗kë Antiɔshö.