ˈö Matiö ˗ya ˗bɛnzë
4 ˈDhɛ ˈö ˗kë ˈˈdhʋ̈, ˈyö ˗Zlan ˗bha ˗zuu ˗yö ˈˈdhiʋ̈sü Yesu ˈka ˈö dho ˗a ˈka ˈˈyɛta. ˗Dhɛ ˈö bhë ˈyö Dügɔmɛn ˗ya ˈgüdan ˗a ˗bha. 2 ˈDhɛ ˈö Yesu ˗yö ˈsunŋ˗ mën ˗dhɛkpaɔyi ˗kɔŋ ˗yiishiö (40) waa˗ gbeŋ ˗kɔŋ ˗yiishiö (40) ˈka, ˈyö din ˗ya kun. 3 ˈDhɛ ˈö ˗kë ˈˈdhʋ̈, ˈyö Dügɔmɛn ˗yö ꞊ɲɔɔn ˗a ˗bha kö ˈö˗ ˈgüdan, ˈyö˗ pö ˗a ˗dhɛ: «˗Ya kë ꞊dhɛ ˗Zlan gbö ˗mü ü ˈka, ˗a pö ˗gwö ˗nu ˈwo ˗lo yö ˗an ˗dhɛ ˗wo ˈˈgla ˈbluu˗ ˈgü.» 4 ˈˈKɛɛ ˈyö Yesu ˗ya pö ˗a ˗dhɛ: «˗Yö ˗bɛnzë ˗sü ˈka ˗Zlan ˗Wo ˈsëëdhɛ ˈgü ꞊dhɛ: ‹Mɛnbhɩɩdhe dua ˈyaa ˗mü kö ˗yö ˗tosɛta kë ˗bhöpë* dosɛnŋ ˗ta. ˗A dua ˗mü ˈpö kö ˗yö ˗tosɛta kë ˗wo ˈˈpɛpɛ ˈö go Zoova ˈˈdhii ˗a ˗ta.›»
5 ˈYö Dügɔmɛn ˗ya sü ˈö dho ˗a ˈka ˈˈkwipö ˈˈslʋ̈ʋ̈slʋ̈ ˈgü, ˈyö˗ dɔ ˗Zlan ˗dhɔkë ˗a ˈgü ˗kɔ ˗ta ˈˈdhuŋ, 6 ˈö˗ pö ˗a ˗dhɛ: «˗Ya kë ꞊dhɛ ˗Zlan gbö ˗mü ü ˈka, ˗bhö ü ꞊kwaa ü ˗de ˗zü kö ˈü ˗puö, ˈyö ˗tɔ ˗yö ˗bɛnzë ˗sü ˈka ˗Zlan ˗Wo ˈsëëdhɛ ˈgü ꞊dhɛ: ‹˗Yö ˗dho ö ˗bha ˈˈkiö ˗nu bɔ› kö ‹˗wo wo ˗kɔ ˈkpɔ ü ˗gɔ, kë ˈˈdhʋ̈ kö ü ˗gɛn ˈya ˗dho ˗gban ˗gwö ˗bha.›» 7 ˈYö Yesu ˗ya pö ˗a ˗dhɛ: «˗Yö ˗bɛnzë ˗sü ˈka ˗Zlan ˗Wo ˈsëëdhɛ ˈgü ˈzü ꞊dhɛ: ‹Ü dua ˈyaa ˗mü kö ˈü Zoova ü ˗bha ˗Zlan ˈgüdan.›»
8 ˈYö Dügɔmɛn ˗ya sü ˈzü ˈö dho ˗a ˈka ˗tɔn ꞊gblɛɛn ꞊dede do ˈbhaa ˗ta, ˈyö ˗gblüdëdhɛ ˗nu ˈˈpɛpɛ ˈwo ˈˈkpɔnŋ ꞊taa waa ˗an ˗bha ˈtɔbhɔdhe ˗nu ˗zɔn ˗a ˗dhɛ. 9 ˈYö˗ pö ˗a ˗dhɛ: «Kö ˈü ˈˈgblü n ˗dhɛ ˈˈshia˗ ˈü n ˗dhɔkë, ˈkö ˗kë ꞊dhɛ ü˗ ˗kë ˗gɛnɲaan ˈka dosɛnŋ ˈˈkpaan, a ˗dho pë ˈˈpɛpɛ ˈwo yö ˗an nu ü ˗dhɛ.» 10 ˈYö Yesu ˗ya pö ˗a ˗dhɛ: «ˈGo n ˗bha Sɔtraan, ˗a ˗gɛn ˗mü ꞊dhɛ ˗yö ˗bɛnzë ˗sü ˈka ˗Zlan ˗Wo ˈsëëdhɛ ˈgü ꞊dhɛ: ‹Zoova ü ˗bha ˗Zlan ˈnën ü dua ˈdhö ˗mü kö ˈü˗ ˗dhɔkë. Yö dosɛnŋ ˈˈkpaan ˈnën ü dua ˈdhö ˗mü kö ˈü˗ ˗dhɔkë.›» 11 ˈDhɛ ˈö ˗kë ˈˈdhʋ̈, ˈyö Dügɔmɛn ˗yö ö ꞊kwaa˗ ˗zü. ˗Yö ˗to ˗dhɛ do ˈö bhë ˗a ˈgü ˈö ˗Zlan ˗bha ˈˈkiö ˗nu ˗wo nu ˈwo˗ ꞊faanmën, ˈö pë ˗nu ˈö˗ ˗bhawɔn yö ˗a ˗bha ˈwo˗ ˗kë ˗a ˗dhɛ.
12 ˈDhɛ ˈö Yesu ˗ya man ꞊dhɛ ˗wa Zan ˗da ˗kaso ˈgü, ˈyö dho Galile ˗sɛ ˈgü. 13 ꞊Taabha ˗yö ˗go Nazadhɛtö ˈyö dho ˈö ˗ya Kapɛɛnaɔmö ꞊weeyi ˈö Zabilɔn waa Nɛfütadhi ˗bha ˈˈsɛ ˈgü bhë, ˗a ˈˈsuee. 14 ˗Kɔ ˈö ˗kë ˗a ˈka, ˈö pë ˈö ˗Zlan ˗wodhiʋ̈lomɛn Izai ˗ya to ˈˈdhiʋ̈ ˈö˗ pö ˈö yökodhiʋ̈, ˈyö bhë. ˗Ya ˗pö: 15 «Galile ˗sɛ ˈü ˗kë ˗dhɛŋ ˗nu ˗bha ˈˈsɛ ˈka, Zabilɔn waa Nɛfütadhi ˗an ˗bha ˈˈsɛ ˗nu ˈö ˈka ʒiaan ˈö dho ꞊weeyi ˈˈpian ˗ta ˗a ˈka Zuudɛn ga ꞊taabha: 16 Mɛn ˗nu ˈö ˈwo ˗ya ˗sü ˈka ˗dhɛtiidhɛ ˈgü ˗wa ˗kpan ˗dhɛpuudhɛ ˗bha, ˈö mɛn ˗nu ˈö ˈwo ˈˈsɛ ˈˈpian ˈö ga ꞊dhɔŋ˗ ˗ya ˗dhɛ tröö ˗a ˗bha ˗a ˈgü, ˈˈshiʋ̈ ˈbhü ˗ya yö ˗an ˗bha.» 17 ˈÖ sü ˈˈtʋ̈ŋ ˈö bhë ˗a ˗bha, Yesu ˗yö ˗ya ˗zlanwopösü ˗bha ˈö˗ pö: «˗Ka ˈgo ka ˗bha ꞊sɔŋ yaa ˈgü ˈka ka zuʋ̈ˈˈ slëëˈˈ, ˗a ˗gɛn ˗mü ꞊dhɛ ˗Gblüdëdhɛ ˈö dhaŋ˗ ˈgü* ˗ya yö ꞊klöö˗.»
18 ˈDhɛ ˈö kun ˈˈta ˈsü ˗ni ˈgü Galile ꞊weeyi ˈˈkpɔnŋ ˈˈdhiʋ̈, ˗yö ˗kpan ꞊dhegblüzë ˗nu ꞊plɛ ˈö ˈwo ˈˈyiblükëmɛn ˗nu ˈka ˗an ˗bha kö ˗wo ˈˈkplʋ̈ ˗zuö ˗ni ˈgü. ˗Wo ˗a mɛn do ˗dhɛ Simɔn ˈö˗ ˈtɔ ˗ya ˗ta ˗kë Piɛɛ ˈka, ˈyö ˈwo˗ ꞊dhegblü ˗dhɛ Andre. 19 ˈYö˗ pö ˗an ˗dhɛ: «˗Ka ʒiö n ꞊kee˗. A ˗dho ka kë ˈˈkplʋ̈ ˗zuö mɛnbhɩɩdhe ˗nu ˗gɔ ˗mɛn ˗nu ˈka.» 20 ˈDhɛ ˈö ˗kë ˈˈdhʋ̈, ˈyö ˈwo wo ˗bha ˈˈkplʋ̈ to ˈˈshia˗ ˈwo ˗ʒiö ˗a ꞊kee˗. 21 ˈDhɛ ˈö ˗ya ꞊ɲɔɔn ˈˈdhiʋ̈, ˈyö ˗kpan ˈzü ꞊dhegblüzë ˗nu ꞊plɛ ˈbhaa ˗bha. ˗Wo ˗a mɛn do ˗dhɛ Zakö, ˈö ˈwo˗ ꞊dhegblü ˗dhɛ Zan. ˗Wo ˗kun Zebede gbö ˗nu ˈka. Waa wo dë Zebede ˗nu ˗wo ˗kun wo ˗bha ˈˈkplʋ̈ baaˈˈ ˗ni ˈgü ˈˈyitagɔ ˈgü, ˈyö Yesu ˗yö ˗an ˗dhɛ. 22 ˗Wo ˗to ˗dhɛ do ˈö bhë ˗a ˈgü, ˈö ˈwo wo ˗bha ˈˈyitagɔ waa wo dë ˗an to,ˈwo ˗ʒiö ˗a ꞊kee˗.
23 ˈDhɛ ˈö ˗kë ˈˈdhʋ̈, ˈyö Yesu ˗yö bɔ Galile ˗sɛ ꞊gban ˈgü, ˈö mɛn ˗nu ꞊klaŋ ˗kë ˗an ˗bha ˗yakwëë ˗kë ˗a ˈgü ˗kɔ ˗nu ˈgü, ˈö nɔɔn˗ ˗së ˈö ˗gban ˗Zlan ˗bha ˗Gblüdëdhɛ ˗bha ˗a pö mɛn ˗nu ˗dhɛ, kö ˗yö mɛn ˗nu ˈö ˈˈyua suu ˈˈpɛpɛ ˈdhö ˗an ˗bha waa ꞊niɔɔnmɛn ˗nu suu ˈˈpɛpɛ ˗dhɛ bo ˗ni ˈgü. 24 ˈYö ˗a ˗tɔɔ ˗yö ˗pɛn Sidhi ˗sɛ ꞊gban ˈgü ˈö mɛn ˗nu ˗wa man, ˈyö ˈwo nu mɛn suu ˈˈpɛpɛ ˈö ˈˈyua ˈdhö ˗an ꞊sëëbho ˗ni ˈgü, mɛn ˗nu ˈö ˗zuu yaa ˗nu ˈdhö ˗an ˈgü, ˗pupumɛn ˗nu waa mɛn ˗nu ˈö ˗an ˗dhɛ ꞊gban ˗ya ga ˗an ˗bha ˗an ˈka ˗a ꞊dhiaa, ˈyö ˗an ˗dhɛ bo. 25 ˗A ˗wɔn ˈgü mɛn ꞊va ꞊dede ˈwo go Galile ˗sɛ, Dekapɔdhö* ˗dhɛ ˗nu, Zedhizadhɛmö ˗dhɛ ˗nu, Zude ˗sɛ waa ˗dhɛ ˗nu ˈwo Zuudɛn ga ꞊taabha ˗an ˈgü, ˗wo ˗ya ʒiö ˗sü ˗bha ˗a ˈˈpiʋ̈.