ˈö Matiö ˗ya ˗bɛnzë

13 -Dhɛkpaɔyi ˈö bhë ˗a ˈka, Yesu ˗yö ˗go ˈkɔɔ ˈö dho ˗ya ꞊weeyi ˈˈkpɔnŋ ˈˈdhiʋ̈. 2 ˈYö mɛn ꞊va ꞊dede ˗wo nu wo ˈkwëëdhö ˗a ˈˈpiʋ̈. ˗A ˗wɔn ˈgü ˗yö ˗da ˈˈyitagɔ ˈgü ˈö ˈɲaannu, kö mɛn kpö ˗nu ˈwo bhë ˗wo dɔ ˗sü ˈka ˈˈyi ˈˈkpɔnŋ ˈˈdhiʋ̈. 3 ˈYö bɔ ˈwɔnzuan ˗nu ˗ta ˈö ˈwɔn ꞊va ꞊blɛɛ ˗an ˗dhɛ, ˈö˗ pö: «Gɔndënën do ˗yö ˗yö ˈˈkpɛnŋ ˈö dho pë ta˗. 4 ˈDhɛ ˈö kun ö ˗bha pë ga ˗pɛn ˗ni ˈgü, ˗a ˈbhaa ˗nu ˗wo ˗puö ˗kpinŋ ˈˈpiʋ̈, ˈyö ˗mannën ˗nu ˗wo nu ˈwo ˗an ˗bhö. 5 ˗A ˈbhaa ˗nu ˗wo ˗puö ꞊gwaadhɛ ˈö ˈˈsɛ ˈyaa mü ꞊va ˗a ˈgü, ˈyö ˈwo to mü ˈwo bhɔ, ˗a ˗gɛn ˗mü ꞊dhɛ ˈˈsɛ ˈdɛdɛ ˈnën mü. 6 ˈˈKɛɛ ˈdhɛ ˈö ˈɲaan˗ ˗yö bhü, ˗yö ˗an ˗gʋ̈ ˈö ˈwo ga ˈyö sü ꞊dhɛ ˗an ɲun ˈyaa kun ˈˈsɛɛdhö ꞊gblɛɛn. 7 ˗A ga ˈbhaa ˗nu ˗wo ˗puö ˈˈglɛɛn ˗kpɔɔ ˈgü. ˈDhɛ ˈwo bhɔ, ˈyö ˈˈglɛɛn ˗kpɔɔ ˗yö sɔ ˗an ˗ta ˈö ˗an zë. 8 ˈYö˗ ga ˈˈwɛɛ ˈbhaa ˗nu ˗wo ˗puö ˈˈsɛ ˗së ˈgü ˈö ˈwo ˗ya wo ga ˗ya ˗sü ˗bha, ˈö˗ ˈbhaa ga ˗yö ˗kë këŋ do (100), ˈö˗ ˈbhaa ˗bha ˗kë ˈpö ˗kɔŋ ˈˈsɔɔdo (60), ˈö˗ ˈbhaa ˗de ˈpö ˗a ˗bha ˗kë ˗kɔŋ ˗yaaga (30). 9 Mɛn ˈö ˈwɔn ˈgüman ˗tʋ ˈdhö ˗a ˗gɔ, ˗yö ˈö ˈˈtʋ ˈto ˗së ˈka.»

10 ˈYö˗ ˗bha gwëëˈˈ ˗nu ˗wo ꞊ɲɔɔn ˗a ˈˈsuee ˈwo˗ pö ˗a ˗dhɛ: «ˈMën ˗kë ˈü bɔ ˈwɔnzuan ˗nu ˗ta ˈü dhiaŋ zë ˗an ˗dhɛ?» 11 ˈYö˗ pö ˗an ˗dhɛ: «ˈWɔn ˈö ˗gban ˗Gblüdëdhɛ ˈö dhaŋ˗ ˈgü ˗a ˗bha bhë, ˗Zlan ˗ya ˈˈdhɛ bho ˗a ˗ta ka ka ˗dhɛ, ˈˈkɛɛ yö ˈti ˈˈdhɛ bho ˗a ˗ta wo ˗zë ˗an ˗dhɛ. 12 ˗A ˗gɛn ˗mü ꞊dhɛ ˈmɛn ˈö pë ˈdhö˗ ˗gɔ, ˗wo ˗dho ˗a ˈbhaa nu ˗a ˗dhɛ ˈö pë ˗kë ˗a ˗gɔ ꞊va. ˈˈKɛɛ ˈmɛn ˈö pë ˈbhaa ˈyaa˗ ˗gɔ, ˗a ˈdɛdɛ ˗ʒiaan ˈö˗ ˗gɔ, ˗wo ˗dho ˗a ˈsü ˗a ˗gɔ. 13 ˈPë ˈö˗ ˗wɔn ˈgü ˈa bɔ ˈwɔnzuan ˗nu ˗ta ˈa dhiaŋ zë ˗an ˗dhɛ ˈyö bhë. ˗A ˗gɛn ˗mü ꞊dhɛ ˗wo ˗dhɛ ˗ga ˈˈkɛɛ ˈwaa pë ˈbhaa yö, ˗wo wo ˈˈtʋ ˗to ˈˈkɛɛ ˈwaa pë ˈbhaa man ɛɛnˈˈ ˈwaa˗ ˈklɔɔ˗ dɔ. 14 ˈPë ˈö ˗Zlan ˗wodhiʋ̈lomɛn Izai ˗ya to ˈˈdhiʋ̈ ˈö˗ ꞊blɛɛ, ˗yö yö ˗ni ˈgü ˈkodhiʋ̈ ˗an ˗bha. ˗Ya ˗pö: ‹Ka ˗dho ˗a man ˈˈkɛɛ ka ˈti ˗dho ˗a ˈklɔɔ˗ dɔ, ka ˗dho ˗dhɛ ˗ga ˈˈkɛɛ ka ˈti ˗dho pë ˈbhaa yö. 15 ˗A ˗gɛn ˗mü ꞊dhɛ ˈˈsɛgümɛn ˗nu ˈwo yö, ˗an zuʋ̈ga ˗ya kë ꞊dhɛ ˗gwö kpö ˈdhö, ˗an ˈˈtʋ ˗yö ˈwɔn ˗man ˈˈkɛɛ ˈwaa˗ ˈklɔɔ˗ dɔ. ˗Wa wo ˈˈɲan ta kë ˈˈdhʋ̈ kö ˈwa ˗dho pë ˈbhaa yö ɛɛnˈˈ ˈwa ˗dho pë ˈbhaa man. ˈWaa˗ ˈˈpiʋ̈ kö ˈwo ˈwɔn ˗nu ˈgüman ö ˗gɛn ˈka kö ˗yö ˈpa ˗an zuʋ̈ˈˈ ˈka, kö ˗wo wo ꞊yɛɛ kë n ˈˈpiʋ̈ kö ˈa ˗an ˗dhɛ bo.›

16 «ˈˈKɛɛ ka ˗bha ˗yö ˗së ˈyö sü ꞊dhɛ ka ˈˈɲan ˗nu ˗wo ˗dhɛ ˗yö, ˈö ka ˈˈtʋ ˗nu ˗wo ˈwɔn man. 17 A˗ ˗pö ka ˗dhɛ gagade ˈka ꞊dhɛ, ˗Zlan ˗wodhiʋ̈lomɛn ˗nu waa mɛn kpɛnŋdhö ꞊va ˗wo ˗kun ˗a ˈˈpiʋ̈ ꞊dhɛ pë ˗nu ˈö ˈka ˗an yö ˗ni ˈgü yö ˈwo ˗an yö, ˈˈkɛɛ wo ˈti ˗an yö. Ɛɛnˈˈ ˗wo ˗kun ˗a ˈˈpiʋ̈ ꞊dhɛ pë ˗nu ˈö ˈka ˗an man ˗ni ˈgü yö ˈwo ˗an man, ˈˈkɛɛ wo ˈti ˗an man.

18 «ˈWɔnzuan ˈö ˗gban gɔndënën ˈö kun pë ta ˗ni ˈgü ˗a ˗bha bhë, ˗ka ka ˈˈtʋ ˈto ˗a ˈklɔɔ˗ ˗bha. 19 Pë ga ˈö ˗puö ˗kpinŋ ˗ta bhë, yö ˈnën ˈö ˗tɔ mɛn ˈbhaa ˈö ˗Zlan ˗bha ˗Gblüdëdhɛ ˗nɔɔn man ˈˈkɛɛ ˈö yö ˈti˗ ˈklɔɔ˗ dɔ, ˈyö ˈwɔnyaakëmɛn* ˗yö nu ˈö pë ˈö kun ta ˗sü ˈka ˗a zuʋ̈ˈˈ ˈgü bhë ˗a bho mü. 20 ˗A ˈdhɛ ˈö ˗puö ꞊gwaadhö yö ˈnën ˈö ˗tɔ mɛn ˈö nɔɔn˗ bhë ˗a man, ˈö to mü ˈö ˗we ˗a ˗bha zuʋ̈gblüdhi ˈka. 21 ˈˈKɛɛ kë ˈö˗ wo ꞊dhɛ nɔɔn˗ ˈö bhë ˗a ɲun yö ˈti ʒiö ˗a ˈgü, ˈyaa ꞊gwëë ˗a zuʋ̈ˈˈ ˈgü. ˈWɔn ˈˈgbɩɩ˗ ɛɛnˈˈ ˈˈklʋʋbhɔdhe ˗ya nu ˗a ˗ta nɔɔn˗ ˈö˗ man ˈˈdhʋ̈ bhë ˗a ˗wɔn ˈgü, ˈyö ˗a ˗bha ˗zoyödhe ˗gɔ ˗yö ga. 22 ˗A ga ˈdhɛ ˈö ˗puö ˈˈglɛɛn ˗kpɔɔ ˈgü bhë, yö ˈnën ˈö ˗tɔ mɛn ˈö ˗Zlan ˗bha ˗Gblüdëdhɛ ˗nɔɔn man, ˈˈkɛɛ ˈö zuʋ̈dhiʋ̈tɛ ˗nu ˈwo ˈˈkpɔnŋ ꞊taa yö waa ꞊nɔɔn ˗dhɔ ˗bha mɛn zuʋ̈ˈˈ ˈsü ˗sü ˈö ˈˈkpënŋ˗ ˗kë mɛn ˗gɔ bhë, ˗wo sɔ ˗a ˗ta ˈö˗ ꞊trɔɔn ˈyaa kë ˗dhö. 23 ˗A ga ˈdhɛ ˈö ˗puö ˈˈsɛ ˗së ˈgü, yö ˈnën ˈö ˗tɔ mɛn ˈö ˗Gblüdëdhɛ ˗nɔɔn man, ˈö˗ man ˈö ˗gɛn ˈka. ˈYö ˈdhɛ ˈö ˗a ˈˈdhü ˗yö bhɔ ˈö ö ˗kpaa ˗ya, ˈyö˗ ˗kpaa ˈbhaa ga ˗yö ˗kë këŋ do (100), ˈö˗ ˈbhaa ga ˗yö ˗kë ˗kɔŋ ˈˈsɔɔdo (60), ˈö˗ ˈbhaa ga ˗yö ˗kë ˗kɔŋ ˗yaaga (30).»

24 ˗Yö ˈwɔnzuan do ˈˈwɛɛ ˈbhaa ˗zɔn ˗an ˗dhɛ ˈzü ˈö˗ pö: «˗Gblüdëdhɛ ˈö dhaŋ˗ ˈgü ˗yö ꞊dhɛ gɔndënën do ˈö pë ˗së ga ta ö ˗gɔ ˈbhlaa ˗a ˈdhö. 25 ˈDhɛ ˈö ˈkwa dɔ gbeŋ kö mɛn ꞊gban ˗wa yi zë, ˈyö gɔndënën ˈö bhë ˗a ˈyɔɔ˗ ˗yö nu ˈyö pë ga yaa ˗pɛn ˗a ˗bha ˈble˗ ˈö˗ ta bhë ˗an ꞊zinŋgü, ˈyö ˗ʒiö. 26 ˈDhɛ ˈö ˈble˗ bhë ˈö bhɔ ˈö ö ˗kpaa ˗nu ˗ya, ˈyö ꞊blëë yaa ˈö bhë ˈö bhɔ ˈpö. 27 ˈYö ˈbhladhɛ bhë ˗a dëmɛn ˗bha yökëmɛn ˗nu ˗wo dho ˈwo˗ pö ˗a ˗dhɛ: ‹Yi dëmɛn, pë ˗së ga ˗nu ˈwaa ˈnën ˈü ˗an ta ü ˗gɔ ˈbhlaa ˗be ˗ee? ˈMën ˗kë ˈö ꞊blëë yaa ˗yö ˗kë ˗an ꞊zinŋgü ˈsa?› 28 ˈYö˗ ˗yɔ bɔ ˗an ˗gɔ ˈö˗ pö: ‹N ˈyɔɔ˗ ˈnën ˈwɔn ˗kë bhë.› ˈYö˗ ˗bha yökëmɛn ˗nu ˗wa pö ˗a ˗dhɛ: ‹˗Yö ü ˈˈpiʋ̈ ꞊dhɛ ˈyi ˈdho ˈyi ꞊blëë yaa ˗nu ˈwo bhë ˗an ˗wo ˗ee?› 29 ˈYö˗ pö ˗an ˗dhɛ: ‹˗Abin, ˗a ˗gɛn ˗mü ꞊dhɛ ꞊blëë yaa ˗nu bhë ˈka˗ pö ˈka ˗an ˗wo, ˈble˗ ˗gɔ ꞊mɔɔn˗ ˗bha ˈö kpa ˗an ˗bha ˈö ˈka ˗an ˗wo. 30 ˗Ka ka ꞊kwaa ˗an ꞊gban ꞊plɛ ˗zü ˗wo ˈˈgla wo ˈˈkwëë ˗yö ˈdho ˗yö yö ˗a ˈka ˗a ˈˈkan ˈˈtʋ̈ŋ ˗bha. ˗A ˈˈkan ˈˈtʋ̈ŋ ˗ya ˗lo, a ˗dho ˗a pö ˗a ˈˈkanmɛn ˗nu ˗dhɛ: ˗Ka ꞊blëë yaa ˗nu bhë ˗an ˗lo ˈkwëëdhö ˗blɛɛsü ˈka ˗an ˗klu kö ˈka ˗an ˈˈgʋ̈, ˈka ka bo kö ˈka ˈble˗ ˗lo ˈˈkwëëdhö n ˗gɔ ˈˈslöödhö.›»

31 ˈYö ˈwɔnzuan do ˈˈwɛɛ ˈbhaa ˗zɔn ˗an ˗dhɛ ˈzü ˈö˗ pö: «˗Gblüdëdhɛ ˈö dhaŋ˗ ˈgü ˗yö ˗dhɛ mutaadö ga ˈö gɔndënën do ˗ya sü ˈö˗ ta ö ˗gɔ ˈbhlaa ˗a ˈdhö. 32 Yö ˈnën ˈö ˗tɔ pë ga ˈˈpɛpɛ ˈwo˗ ta ˗a ˈˈtɩtɩ ˗sü. ˈˈKɛɛ ˗ya ˈˈgla ˗yö ˗kë ˈˈdhü ˈˈpɛpɛ ˈwo ˈˈtʋʋdhɛɛdhö ˗an ˈkpii˗ ˗sü ˈka, ˈyö ˗mannën ˗nu ˗wo nu ˈwo wo ˈkɔ dɔ ˗a kwɛɛˈˈ ˗nu ˗ta.»

33 ˗Yö ˈwɔnzuan do ˈˈwɛɛ ˈbhaa ˗zɔn ˗an ˗dhɛ ˈzü ˈö˗ pö: «˗Gblüdëdhɛ ˈö dhaŋ˗ ˈgü ˗yö ꞊dhɛ ˈˈsɛkɛ ˈö dhebɔnën do ˗ya ˗da ˈbluu˗ ˗bi ˈˈkidhʋŋ ˗kɔŋ do ˈˈpiʋ̈ ˈö˗ ꞊kaankwöö, ˈö˗ ˗böö ˗yö ˗da ˗a ˈdhö.»

34 Yesu ˗yö ˗bɔ ˈwɔnzuan ˗nu ˗ta ˈö ˈwɔn ˈˈpɛpɛ ˈwo bhë ˗an ꞊blɛɛ mɛn kpö ꞊va ˈwo bhë ˗an ˗dhɛ. ˈYaa kun dhiaŋ zë ˗ni ˈgü ˗an ˗dhɛ ˈˈwɛɛwɛ kö yö ˈti ˈwɔnzuan ˈsü. 35 ˗Yö ˗kë ˈˈdhʋ̈ kö pë ˈö ˗Zlan ˗wodhiʋ̈lomɛn ˗ya pö ˗yö yökodhiʋ̈. ˗Ya ˗pö: «A ˗dho n ˈˈdhi ˈˈpʋ ˈa bɔ ˈwɔnzuan ˗nu ˗ta ˈa ˈwɔn ꞊blɛɛ. ˈÖ sü ˈwɔnzüdɔyi ˗bha, pë ˗nu ˈwo ˗bin ˗sü ˈka a ˗dho ˗an ˗wɔn blɛɛˈˈ.»

36 ˈDhɛ ˈö ö ꞊kwaa mɛn kpö ˈwo bhë ˗an ˗zü ˈö ˈwo ˗ʒiö, ˈyö ˗da ˈkɔɔ. ˈYö˗ ˗bha gwëëˈˈ ˗nu ˗wo ꞊ɲɔɔn ˗a ˈˈsuee ˈwo˗ pö: «ˈWɔnzuan ˈö ˗gban ꞊blëë yaa ˈö kun ˈbhlaa ˗a ˗bha bhë, ˗bhö ˗a ˈgü ˈˈpʋ yi ˗dhɛ.» 37 ˈYö ˗yɔ bɔ ˗an ˗gɔ ˈö˗ pö: «Mɛn ˈö pë ga ˗së ta ˈbhlaa bhë, yö ˈnën ˈö ˗tɔ maan mɛn Gbö ˗mɛn. 38 ˈYö ˗a ˈbhladhɛ ˈö bhë ˈyö ˗tɔ ˈˈkpɔnŋtaadhɛ. ˗A pë ga ˗së ˈnën ˈö ˗tɔ mɛn ˗nu ˈwo dho ˗da ˗Gblüdëdhɛ* ˈö dhaŋ˗ ˈgü ˗a ˈgü. ˈYö ꞊blëë yaa ˗yö ˗kë ˈwɔnyaakëmɛn ˗bha ˈnën ˗nu ˈka. 39 ˈBhladëmɛn ˈyɔɔ˗ ˈö nu ˈö pë ta ˈbhlaa bhë, ˈyö ˗tɔ Dügɔmɛn. ˗A pë ˈˈkan ˈˈtʋ̈ŋ ˈnën ˈö ˗tɔ ˈˈkpɔnŋtaadhɛ ˈö ꞊dɛɛ ˗a ɲën ˈˈtʋ̈ŋ. Ta ˗pë ˈö bhë ˗a ˈˈkanmɛn ˗nu ˈnën ˈwo ˗tɔ ˗Zlan ˗bha ˈˈkiö ˗nu. 40 ˗Kɔ do ˈwo ꞊blëë yaa ˗lo ˈkwëëdhö ˈwo˗ ˗gʋ̈ ˗a ˈka bhë, ˗yö ˗dho kë ˈˈdhʋ̈ ˈpö ˈˈkpɔnŋtaadhɛ ɲën ˈˈtʋ̈ŋ ˈgü. 41 Maan mɛn Gbö ˗mɛn a ˗dho ˈˈkiö ˗nu bɔ ˈö ˈwo mɛn ˈˈpɛpɛ ˈwo mɛn ˈˈwɛɛ ˗nu ˗puö ˗mɛn ˈka waa mɛn ˗nu ˈö ˈtɔŋ˗ ˗san ˗yö ˗an ˗kë ˈö ˈwaa˗ ꞊bhlëë ˗ya, ˗an ꞊gban kpa ˈkwëë˗ ˈö ˈwo ˗an bho n ˗man ˗Gblüdëdhɛ kë ˗dhɛ ˈgü. 42 ˗Wo ˗dho ˗an ˗zuö ˈˈshiʋ̈ ˈˈgaa ˈgü. ˈDhɛ ˈö bhë ˈyö ˈwo ˗dho ˈˈgbʋ bɔ ˗a ˗bha ˈö ˈwo wo ˈˈsɔn ˗bhö mü. 43 ˗A ˈˈtʋ̈ŋ ˈö bhë ˗a ˈka, mɛn kpɛnŋdhö ˗nu ˈbhü ˗dho kë ꞊dhɛ ˈɲaan˗ ˈbhü ˈdhö ˗an Dë ˗bha ˗Gblüdëdhɛ kë ˗dhɛ ˈgü. Mɛn ˈö ˈwɔn ˈgüman ˗tʋ ˈdhö˗ ˗gɔ, ˗yö ö ˈˈtʋ ˈto ˗së ˈka.

44 «˗Gblüdëdhɛ ˈö dhaŋ˗ ˈgü ˗yö kë ˗sü ˈka ꞊dhɛ ꞊nɔɔn ˗pë ˈö ˗bin ˗sü ˈka ˈbhladhɛ do ˈgü ˗a ˈdhö. ˈYö gɔndënën do ˗yö ˗kpan ˗a ˗bha ˈö dho ˈzü ˈö˗ ˗bin. ˈDhɛ ˈö ˗kë ˈˈdhʋ̈ ˈyö˗ zuʋ̈ˈˈ ˈˈgblü ˗yö dhi ꞊dedewo, ˈö dho ˈö pë ˈˈpɛpɛ ˈö˗ ˗gɔ ˗an ˈˈdhoodɔ ˈyö ˈbhladhɛ ˈö bhë ˗a dhɔ.

45 «˗Gblüdëdhɛ ˈö dhaŋ˗ ˈgü ˗yö kë ˗sü ˈka ˈzü ꞊dhɛ ˈˈdhoodɔmɛn ˈö ˈˈglü ˗ni ˈgü ˗zlɔɔ ꞊bhlëësü mɛɛnˈˈ ˗sü ˈka ˗a ˈdhö. 46 ˈDhɛ ˈö ˗kpan ˗zlɔɔ ˈö˗ ꞊bhlëë ˈdhö ꞊va ꞊dedewo ˗a ˗bha, ˈyö dho ˈˈvaandhö ˈö pë ˈˈpɛpɛ ˈö˗ ˗gɔ ˗an ˈˈdhoodɔ, ˈyö˗ dhɔ.

47 «˗Gblüdëdhɛ ˈö dhaŋ˗ ˈgü ˗yö ꞊dhɛ ˈˈkplʋ̈ kpö ˈkpii˗ ˈö ˈwo˗ ˗zuö ꞊weeyi ˗bhaa ˈö ˈyuö˗ ꞊suu ˈˈpɛpɛ kun ˗a ˈdhö ˈpö. 48 ˈDhɛ ˈö pa, ˈyö ˈˈkplʋ̈zuömɛn ˗nu ˗wa ˗gan ˈˈyi ˈˈkpɔnŋ ˈˈdhiʋ̈, ˈyö ˈwo ˈɲaannu ˈwo ˗an zë ˈgü, ˈyö ˗a ˗dhɛ ˗nu ˈwo ˗së ˈwo ˗an ˗lo ˈtia˗ ˗nu ˈgü, ˈyö˗ ˗dhɛ ˗nu ˈö ˈwaa ˗së ˈwo ˗an ˗zuö. 49 Pë ˈö ˗dho kë ˈˈkpɔnŋtaadhɛ ɲën ˈˈtʋ̈ŋ ˈgü ˈyö bhë. ˗Zlan ˗bha ˈˈkiö ˗nu ˗wo ˗dho ˈwɔnyaakëmɛn ˗nu waa ˈwɔnsëkëmɛn ˗nu bho ˈko ˈˈpiʋ̈, 50 ˈö ˈwo ˈwɔnyaakëmɛn ˗nu ˗zuö ˈˈshiʋ̈ ˈˈgaa ˈgü. ˈDhɛ ˈö bhë ˈyö ˈwo ˗dho ˈˈgbʋ bɔ ˗a ˗bha ˈö ˈwo wo ˈˈsɔn ˗bhö mü.

51 «ˈWɔn ˗nu ˈwo bhë, ˈka ˗an ꞊gban ˈˈpɛpɛ ˈgüman ˗së ˈka ˗ee?» ˈYö˗ ˗bha gwëëˈˈ ˗nu ˗wa ˗yɔ bɔ ˈwo˗ pö: «꞊Ii.» 52 ˈYö go mü ˈzü ˈö˗ pö ˗an ˗dhɛ: «ˈDhɛ ˈö ˈˈdhʋ̈, ˗kaa ˈwɔn dɔ ꞊dhɛ mɛn ꞊klaŋkëmɛn ꞊suu ˈˈoo ˗su ˈö ˈwo˗ ꞊klaŋ ˗kë ˈwɔn ˗nu ˈwo ˗gban ˗Gblüdëdhɛ ˈö dhaŋ˗ ˈgü ˗a ˗bha ˗a ˈka, ˗yö ꞊dhɛ ˈkɔdë ˈö pë ˗dɛɛ waa pë zii ˗nu sü ö ˗bha ꞊nɔɔn ˗kwɛɛ ˈgü ˈö˗ yö ˈˈkpɛnŋ ˗a ˈdhö.»

53 ˈDhɛ ˈö Yesu ˗yö ö bo ˈwɔnzuan ˗nu ˈwo bhë ˗an ˗zɔn ˗sü ˈka, ˈyö go ˗dhɛ ˈö bhë ˗a ˈgü ˈö dho. 54 ˈDhɛ ˈö dho ˈpödhɛ ˈö ˗gla ˗a ˈgü bhë ˗a ˈgü, ˈyö ˗ya mɛn ˗nu ꞊klaŋ kë ˗sü ˗bha ˗an ˗bha ˗yakwëë ˗kë ˗a ˈgü ˗kɔ ˈgü, ˈyö˗ ˈwɔn ˗yö mɛn ˗nu kun ˈö ˈwo˗ pö: «Gɔndënën ˈö yö, ˗yö ˗go ꞊kpɔɔdhɛ ꞊suu ˈö yö ˗a ˈka ˈˈmɛn? ˈDe ˈö ˗dhidha ˗nu ˈwo yö ˗an kë ˗sü ꞊faan nu ˗a ˗dhɛ? 55 ˈˈDhüɲënmɛn gbö ˈö bhë ˈyaa ˈnën ˈö yö ˗ee? ˗A dhe ˈyaa ˈnën ˈö ˗tɔ Madhi, ˈö ˗a ꞊dhegblü ˗nu ˗wo ˗kë Zakö, Zozɛfö, Simɔn waa Zuda ˗an ˈka ˗ee? 56 ˈYaa ˈnën ˈö˗ ꞊dhegblü ˈnëndhoo ˗nu ˈˈpɛpɛ ˈwo kwa ˈˈpiʋ̈ yö ˗ee? ˈDhɛ ˈö ˈˈdhʋ̈, ˗kɔmɔnwɔnbhasü ˈö˗ ˗gɔ bhë ˗yö ˗go ˗a ˈka ˈˈmɛn?» 57 ˗A ˗wɔn ˈgü wo ˈti ˈdhaŋ˗ ˗bho ˗a ˈˈdhiʋ̈. ˈYö Yesu ˗ya pö ˗an ˗dhɛ: «˗Wo ˗Zlan ˗wodhiʋ̈lomɛn ꞊bhlëë ˗ya ˗dhɛ ꞊gban ˈˈpɛpɛ ˈgü, ˈˈkɛɛ ˗a ˗de ˗gɔ ˈpömɛn ˗nu waa˗ ˗gɔ ˈkɔɔmɛn ˗nu ˈwaa˗ ꞊bhlëë ˗ya.» 58 ˈDhɛ ˈö ˗kë ꞊dhɛ ˗zo ˗yö ˗a ˗dhɛ ˗sü ˈyaa kun mɛn ˗nu ˗gɔ ˗dhɛ ˈö bhë ˗a ˈgü, yö ˈti ˗dhidha ꞊va kë mü.