ˈSëëdhɛ ˈö Pɔdhö ˗ya bɔ Wlɔmö ˗mɛn ˗nu ˗dhɛ

4 ˗Ya kë ˈˈdhʋ̈ ˈsa, ˈmën ˈkwa ˗dho ˗a pö ˈö ˗gban kwa ˈˈbhɛman Ablaamö ˗bha? 2 ˗Ya kë ˗be ꞊dhɛ Ablaamö këwɔn ˗nu ˈnën ˈö˗ ˗wɔn ˈgü ˈö ˈwo˗ pö ˗yö kpɛnŋdhö, ˗yö ꞊mɔɔn˗ ˗bha ˗be ˈö ö ˈtɔ kun ˗a ˗wɔn ˈgü, ˈˈkɛɛ yö ˈti ˗dho ö ˈtɔ ˈkun ˗Zlan ˈˈɲan ˈˈdhiʋ̈. 3 ˗A pö ˈa˗ wo ˈˈdhʋ̈ bhë, ˗yö ˗sü pë ˈö ˗Zlan ˈˈdhiwo ˈsëëdhɛ ˗ya pö ˗a ˗bha. ˗Ya ˗pö: «Ablaamö ˗yö ö ˗zo ˗yö Zoova ˗dhɛ. ˗A ˗wɔn ˈgü ˗yö Ablaamö ˗yö ꞊dhɛ mɛn kpɛnŋdhö ˈdhö.» 4 Yö ˈö mɛn ˗ya ˗kë ꞊waa˗ ꞊saa bho ˗a ˗wɔn ˈgü, kö pë ˈö˗ ꞊duaa ˈka ˈyö ˈwo˗ nu ˗a ˗dhɛ, kö wo ˈti gbɔɔ ˗a ˗gɔ.* 5 ˈˈKɛɛ mɛn ˈö ˈyaa ö ˗zo yö ö ˗de këyö ˗nu ˗dhɛ, ˈö ö ˗zo yö ꞊ʒiaan ˗Zlan ˈö ˈwɔnyaakëmɛn ˈö ˈyaa˗ ꞊bhlëë ˗ya ˗a sü ꞊dhɛ mɛn kpɛnŋdhö ˈdhö bhë ˗a ˗dhɛ, ˗Zlan ˗dho ˗a ˗mɛn ˈsü ꞊dhɛ mɛn kpɛnŋdhö ˈdhö ˗a ˗bha ˗zoyödhe ˗wɔn ˈgü. 6 Mɛn ˈö ˗Zlan ˗ya sü ꞊dhɛ mɛn kpɛnŋdhö ˈdhö, ˈˈkɛɛ ˈö yö ˈti ˈsü ˗a këwɔn ˗nu ˗bha, zuʋ̈gblüdhi ˈö˗ ˗bha ˈka, Davi ˗de ˈpö ˗ya ˗wɔn ˗blɛɛ ˈö˗ pö: 7 «Mɛn ˗nu ˈwo ˈwɔn ˈö ˈyaa kpɛnŋdhö ˗a ˗kë ˈö ˗Zlan ˗yö ˗an ˗bhawɔn to, ɛɛnˈˈ ˈö ˗an ˗bha ˈwɔn yaa ˗nu ˈwo˗ ˗kë ˗a ˗ta kpa,* ˗an ˗bha ˗yö ˗së. 8 Mɛn ˈö Zoova ˗yö ö ˗zo bho ˗a ˗bha ˈwɔn yaa ˈö˗ ˗kë ˗a ˈˈpiʋ̈ ˈpapadhö, ˗a ˗bha ˗yö ˗së.»

9 Mɛn ˗nu ˈö ˗wa ˈgo ˈˈbɔnŋ, wo dosɛnŋ ˈnën ˈwɔn ˗së ˈö bhë ˈö ˗kë ˗an ˗dhɛ ˗ee? ˈYaa kë ˈpö mɛn ˗nu ˈö wo ˈti ˈgo ˈˈbɔnŋ ˗an ˗dhɛ ˗ee? ˈYö sü ꞊dhɛ yi˗ ˗pö ka ˗dhɛ: «Ablaamö ˗bha ˗zoyödhe ˗wɔn ˈgü, ˗Zlan ˗ya ˗yö ꞊dhɛ mɛn kpɛnŋdhö ˈdhö.» 10 ˈDhɛ ˈö ˈˈdhʋ̈, ˗kɔ ˗mɛɛn ˈö Ablaamö ˗yö kun ˗a ˈka ˈˈtʋ̈ŋ ˈö ˗Zlan ˗ya pö ˗a ˈka ꞊dhɛ ˗yö kpɛnŋdhö bhë ˗a ˈgü? ˗A ˈˈtʋ̈ŋ ˈö bhë ˈgü kö ˗ya ˈgo ˈˈbɔnŋ ˗ee, ɛɛnˈˈ kö yö ˈti ˈgo ˈˈbɔnŋ? ˈÖ ˗kë ˈˈdhʋ̈ kö yö ˈti ˈgo ˈˈbɔnŋ ꞊köŋ. 11 ꞊Taabha, ˗Zlan ˗ya ˗pö ˗a ˗dhɛ ˗yö ˈdho ˈˈbɔnŋ, kö ˗yö kë ˗a ˗bha ˗kë kpɛnŋdhö ˗sü ˈö˗ ˈˈɲan ˈˈdhiʋ̈ ˗zoyödhe ˈö kun ˗a ˗gɔ kö yö ˈti ˈgo ˈˈbɔnŋ ꞊köŋ ˗a ˗wɔn ˈgü bhë, ˗a ꞊duaa ˈö˗ ˗bha ˗a ˈka. ˗Ya ˗kë ˈˈdhʋ̈ kö ˗yö kë mɛn ˈˈpɛpɛ ˈö ˗zoyödhe ˈdhö ˗an ˗gɔ, ˈˈkɛɛ ˈö wo ˈti ˈgo ˈˈbɔnŋ bhë ˗an dë ˈka, kö ˗Zlan ˗yö ˗an yö ꞊dhɛ mɛn kpɛnŋdhö ˗nu ˈdhö. 12 ˗Yö ˗kë ˈˈdhʋ̈ ˈpö kö ˗yö kë mɛn ˗nu ˈö ˈwo dho ˈˈbɔnŋ ꞊taabha ˗an dë ˈka. ˗Ya ˈˈkan ˈzü mɛn ˗nu ˈö ˈwo ˗we ˗dho ˈˈbɔnŋ ˗sü ˗bha bhë ˗an ˗bha, ˗yö ˗dho kë ˈpö mɛn ˗nu ˈwo to ˗zoyödhe ˈö ˗kë Ablaamö ˗gɔ kö yö ˈti ˈgo ˈˈbɔnŋ ꞊köŋ ˗a ˈwɔnzuan ˈˈpiʋ̈ bhë ˗an dë ˈka.

13 ˈTɔŋ˗ ˈkun ˗sü ˈyaa ˈnën ˈö˗ ˗wɔn ˈgü ˈö ˗Zlan ˗yö ˈˈplünŋ bho Ablaamö waa ö ꞊suugünën ˗nu ˗an ˗dhɛ ꞊dhɛ ö ˗dho ˈˈkpɔnŋtaadhɛ nu ˗an ˗dhɛ ˈkɛnŋpë ˈka. ˗Yö ˗sü ꞊ʒiaan ˗a ˗bha ˗kë kpɛnŋdhö ˗sü ˈö˗ ˈˈɲan ˈˈdhiʋ̈ ˗a ˗bha ˗zo ˗yö ˗a ˗dhɛ ˗sü ˗wɔn ˈgü bhë ˗a ˗bha. 14 ˗A ˗gɛn ˗mü ꞊dhɛ, ˗ya kë ˗be ꞊dhɛ mɛn ˗nu ˈö ˈwo ˗klu ˈtɔŋ˗ ˗bha wo ˈnën ˈkɛnŋ˗ ˈö bhë ˈö ˗dho ˈto ˗an ˗gɔ, kö ˗zoyödhe ˗bha ˗kë mɛn ˗gɔ ˗sü ˗gɛn ˈyaa ˈdhö, kö ˈˈplünŋ ˈö ˗Zlan ˗ya bho Ablaamö ˗dhɛ bhë ˗ya ˈto ˈˈwɛɛwɛ. 15 ˗A pö ˈa˗ wo ˈˈdhʋ̈ bhë ˗a ˈklɔɔ˗ ˗mü ꞊dhɛ ˈTɔŋ˗ ˈˈpiʋ̈ ˗pë ˈö ˈdhö, yö ˈnën ˈö ˗tɔ ˗Zlan ˗bha ˗naanzuëëdhe. ˈˈKɛɛ ˈdhɛ ˈö ˈtɔŋ˗ ˈyaa˗ ˗bha, ˈtɔŋ˗ ˗lögü ˗sü ˈyaa mü ˈpö.

16 Yö ˈnën ˈö˗ ˗wɔn ˈgü ˈö ˗zoyödhe ˈnën ˗dho ˗a kë kö pë ˗nu ˈö ˗Zlan ˗yö ˗an ˈˈplünŋ bho ˈkwa ˗an ꞊slɔɔ, ˗a ˗gɛn ˗mü ꞊dhɛ gbɔɔdhe* ˈö˗ ˗kë kwa ˗gɔ ˈˈwɛɛwɛ yö ˗mü. Ablaamö ꞊suugünën ˗nu ꞊gban ˈˈpɛpɛ ˗dho pë ˈö ˗Zlan ˗ya ˈˈplünŋ bho bhë ˗a ꞊slɔɔ˗. Yö ˈti ˗dho kë mɛn ˗nu ˈö ˈwo ˈTɔŋ˗ ꞊bhlëë ˗ya wo dosɛnŋ ˗an ˗dhɛ. ˗Yö ˗dho kë ˈpö mɛn ˗nu ˈö ˗an ˗bha ˗zoyödhe dho kë ꞊dhɛ Ablaamö ˈö mɛn ꞊gban kwa dë ˈka bhë ˗a ˗bha ˈdhö, ˗an ˗dhɛ. 17 (Kë ˈö˗ wo ˈˈdhʋ̈ bhë, ˗yö ˗bɛ pë ˈö ˗bɛnzë ˗sü ˈka ˗Zlan ˗Wo ˈsëëdhɛ ˈgü ˗a ˗bha. ˗Ya ˗pö: «ˈMan ü kë ˈˈsɛgɔ ꞊va ꞊dede dë ˈka.») ˗Yö ˗kë ˈˈdhʋ̈ ˗Zlan ˈü ü ˗zo ˗yö ˗a ˗dhɛ, ˗Zlan ˈö ˗këdhösü nu mɛn ˗nu ˈö ˗wa ga ˗an ˗dhɛ, ˈö ˈwɔn ˗nu ˈö wo ˈti kë ꞊köŋ ˗an ˗wɔn ꞊blɛɛ ꞊dhɛ pë ˈö ˗wa kë ˈsaadhö ˗a ˈdhö* bhë, ˗a ˈˈɲaan. 18 ˈKö ˗kë ꞊dhɛ ˈnën ꞊slɔɔ ˗sü ˈyaa kun ˗a ˈˈɲaan ˗be ˈzü, ˗a ˗bha ˗zoyödhe ˗ya ˗kë ˈö ga ˗a ˈgü ꞊dhɛ ö ˗dho kë ˈˈsɛgɔ ꞊va dë ˈka ꞊dhɛ ˗kɔ ˈö ˗Zlan ˗ya pö ˗a ˈka ö ˗dhɛ bhë ˗a ˈdhö. ˗Ya ˗pö ˗a ˗dhɛ: «Ü ꞊suugünën ˗nu ˗dho kë ꞊dhɛ ˗kɔ ˈö bhë ˗a ˈdhö.» 19 ˗A ˈwɔn ˗kun ˗a ˈˈɲaan ꞊dhɛ ö kwigüdhɛ ˗yö ꞊dhɛ pë ˈö ˗ya ga ˗a ˈdhö, (ˈyö sü ꞊dhɛ ˈˈtʋ̈ŋ ˈö bhë ˗a ˈgü kö ˗a ˗kwɛ ˗ya ˗mɔn këŋ do (100) ˗bha), kö Saadha ˗de ˈpö ˗yö ꞊kun ˈˈbhöödhe* ˈka. ˈˈKɛɛ ˗a ˗bha ˗zoyödhe ˈti ˈdho ˈˈshiaa. 20 ˗A zuʋ̈ˈˈ yö ˈti dɔ ˈdudhö ˈˈplünŋ ˈö ˗Zlan ˗ya bho ˗a ˗dhɛ bhë ˗a ˗wɔn ˈgü. ˗A ˗bha ˗zoyödhe ˗ya ˈgü ˗kë ˈˈgbɩɩ˗ ꞊ʒiaan, ˈö ˗Zlan ˈtɔ bhɔ. 21 ˗Yö ˗kun ga ˗sü ˈka ˗a ˈgü ꞊dedewo ꞊dhɛ pë ˈö ˗Zlan ˗ya ˈˈplünŋ bho ˗yö ˗mɔn ˗a kë ˗sü ˗bha. 22 ˗A ˗wɔn ˈgü, «˗Zlan ˗ya ˗yö ꞊dhɛ mɛn kpɛnŋdhö ˈdhö.»

23 ˈˈKɛɛ ˗wo ˈö ˗kë «˗Zlan ˗ya ˗yö ꞊dhɛ» ˈka bhë, wo ˈti˗ ˗bɛnzë yö dosɛnŋ ˗a ˗bha. 24 ˗Yö ˗gban ˈpö kwa ˗bha. Kwa ˗de ˈpö ˗yö ˗dho kwa yö ꞊dhɛ mɛn kpɛnŋdhö ˗nu ˈdhö, ˗a ˗gɛn ˗mü ꞊dhɛ kwa kwa ˗zo ˗yö yö, ˈö kwa Dëmɛn Yesu bho ga ˈgü bhë ˗a ˗dhɛ. 25 ˗Wo Yesu ˗zë kwa ˗bha ꞊sɔŋ yaa ˗wɔn ˈgü, ˈö go ga ˈgü. ˗Yö ˗kë ˈˈdhʋ̈ kö ˗Zlan ˗yö kwa yö ꞊dhɛ mɛn kpɛnŋdhö ˗nu ˈdhö.