Yesu ˗bha bɔmɛn ˗nu këwɔn ˗nu

18 ˈDhɛ ˈö ö bo kë ˗sü ˈka ˈˈdhʋ̈, ˈyö Pɔdhö ˗yö go Atɛnö ˈö dho Kolɛntö. 2 ˗Yö ˗kpan Zuifö mi do ˈö go Pɔn ˗sɛ ˈgü ˈö ˈwo˗ ˗dhɛ Akidhasö ˗a ˗bha mü. ˗A ˈˈtʋ̈ŋ ˈö bhë ˗a ˈgü kö gɔndënën ˈö bhë waa ö ˗bha dhebɔ Plisidhö ˗wa ˈgo Itali ˗wa nu ˈpödhɛ ˈö bhë ˗a ˈgü ˗dɛɛ ˈgü, ˈyö sü ꞊dhɛ Klodö ˗yö ˈtɔŋ˗ ˗dɔ ˈö˗ pö Zuifö ˗nu ˈˈpɛpɛ ˗wo ˈgo Wlɔmö ˈˈsɛ ˈgü. ˈYö Pɔdhö ˗yö dho ˗an ˈˈpiʋ̈. 3 ˈDhɛ ˗kë ꞊dhɛ waa˗ ˗nu ˗wo ˗kun yö do kë ˗mɛn ˈka bhë, ˈyö ˗ya ˗an ˗gɔ ˈkɔɔ ˈö waa˗ ˗nu ˈwo yö ˗kë wo ˈkwëë˗. ˗Wo ˗kun sɔkɔdɔmɛn ˗nu ˈka. 4 ˗Yö ˗kun ˈˈdhɛɛtadhiaŋ˗ ˗nu zë ˗ni ˈgü* ˗an ˗bha ˗yakwëë ˗kë ˗a ˈgü ˗kɔ ˗nu ˈgü ꞊Glooyi ˈˈpɛpɛ ˈka, kö ˈö Zuifö ˗nu waa Glɛkö ˗nu ˗an zuʋ̈ˈˈ ˈsü kö ˗wo ˈˈwɩ pë ˈö˗ pö ˗ni ˈgü bhë ˗a ˗bha.

5 ˈDhɛ ˈö Sidhasö waa Timote ˗wo go Maseduanö ˈwo nu, Pɔdhö ˗yö ö ˗bha ˈˈtʋ̈ŋ ꞊gban ˗nu ˗zlanwopösü ˗dhɛ, ˈö˗ ˈgü ˗pʋ Zuifö ˗nu ˗dhɛ ˈkpakpadhö ꞊dhɛ Yesu ˈnën ˈö ˗tɔ Klito. 6 ˈˈKɛɛ ˈdhɛ ˈö ˗kë ꞊dhɛ ˗wo ˗kun ˗gban ˗ni ˈgü ˗a ˗gɔ ˗kplawo, ˈö ˈwo ˈwɔn yaa ˗nu ꞊blɛɛ ˗a ˈka bhë, Pɔdhö ˗yö ö ˗bha sɔ ˗nu ˗kpënŋ, ˈö˗ pö ˗an ˗dhɛ: «Ka ˈti dhasü ꞊slɔɔ kö ˗yö ˗sü ka ꞊dede ka ˗bha.* N ˗kɔ ˈyaa˗ ˈgü. ˈÖ sü ꞊dɛɛ ˗bha, a ˗dho ˈdho ˈˈsɛ ˈˈwɛɛ ˈgümɛn ˗nu ˈˈpiʋ̈.» 7 ˈDhɛ ˈö ˗kë ˈˈdhʋ̈, ˈyö go ˗dhɛ ˈö bhë* ˗a ˈgü ˈö dho gɔndënën do ˈwo˗ ˗dhɛ Titiusö Zutusö ˗a ˗gɔ ˈkɔɔ. ˗A gɔndënën ˈö ˈˈdhʋ̈ ˗yö ˗kun ˗Zlan ˗dhɔkëmɛn ˈka, ˈö˗ ˗bha ˈkɔ ˗yö kun ˗yakwëë ˗kë ˗a ˈgü ˗kɔ ˈˈsuee. 8 Klipusö ˈö ˗kë ˗yakwëë ˗kë ˗a ˈgü ˗kɔ ˈwɔnyëë˗ ˈka waa mɛn ˈˈpɛpɛ ˈwo˗ ˗gɔ ˈkɔɔ, ˗wo ˗we Dëmɛn ˗wɔn ˗bha. Kolɛntö ˗mɛn ˗nu ꞊va ꞊dede ˈö ˈwo nɔɔn˗ ˗së man, ˗wo wo ˗zo ˗yö ˗a ˗dhɛ ˈö ˈwo bɔ ˈˈyi ꞊bhaa. 9 ˗Ya ˈgo mü ˈzü, ˈdhɛ ˈkwa dɔ gbeŋ, Pɔdhö ˈˈɲan ˈgü ˗yö ˗da ˈö Dëmɛn ˗ya pö ˗a ˗dhɛ: «ˈˈSuʋ̈ ˈyaa ˗dho ü kë, ˗bhö ˗zlanwopö ˗kplawo, ˈbha ˗dho ü ˈˈdhi ta, 10 ˗a ˗gɛn ˗mü ꞊dhɛ a ü ˈˈpiʋ̈, mɛn ˈbhaa ˗kɔ ˈyii ˗dho ꞊mɔɔn˗ ˗bha kö ˗ya nu ü ˗gɔ ˗yö pë ˈˈdhiʋ̈˗ kë ü ˈka. Mɛn ꞊va ˈbhaa ˗nu ˗wo ˈˈkwipö ˈö yö ˗a ˈgü ˈö ˈwo n ˗bha ˈka.» 11 ˈDhɛ ˈö ˗kë ˈˈdhʋ̈, ˈyö to ˈˈkwipö ˈö bhë ˗a ˈgü ˈö ˗kwɛ do waa ˈˈsu ˈˈsɔɔdo ˗kë, ˈö mɛn ˗nu ꞊klaŋ ˗kë ˗Zlan ˗wo ˈka.

12 ˈˈTʋ̈ŋ ˈö Galiɔn ˗yö kun Akai ˈˈsɛ ꞊kɔɔnmɛn* ˈka bhë, Zuifö ˗nu ˗wo ˗dho wo ˈkwëëdhö ˈö ˈwo dho Pɔdhö ˗gɔ, ˈö ˈwo˗ kun ˈwo dho ˗a ˈka zakandhɛ ˈgü, 13 ˈö ˈwo˗ pö: «Gɔndënën ˈö yö, ˗yö mɛn ˗nu zuʋ̈ˈˈ ˈsü ˗ni ˈgü kö ˗Zlan ˗dhɔkë ˗kɔ ˈö ˈyaa ˗bɛ ˈˈsɛ ˗bha ˈtɔŋ˗ ˗nu ˗bha ˗wa kë.» 14 ˈDhɛ Pɔdhö ˗ya ˗kë kö ˈö ˈwɔn blɛɛˈˈ, ˈyö Galiɔn ˗ya pö Zuifö ˗nu ˗dhɛ: «Zuifö ˗nu, ˗ya kë ꞊dhɛ gɔndënën ˈö yö ˈwɔn ˈö ˈyaa kpɛnŋdhö ɛɛnˈˈ ˈwɔn yaa ꞊gbɔɔnsü ˈbhaa ˈnën ˈö˗ ˗kë ˗be, a ˗dho n zuʋ̈ˈˈ ˗kë ˗saa ˗a n ˈˈtʋ to ka ˗wo ˗bha ˗së ˈka. 15 ˈˈKɛɛ ˈdhɛ ˈö ˗kë ꞊dhɛ ˗wo kpö ˗nu, ˈtɔ ˗nu waa ka ˗de ˗bha ˈtɔŋ˗ ˗nu ˈnën ˈka˗ ˗za ˗man ka ˈˈkwöö, ka ˈnën ka dua ˈdhö ˗mü kö ˈka˗ ˈˈɲan bhɔ. ˈMaan˗ ˈˈpiʋ̈ kö ˈa kë ˈwɔn ꞊suu ˗nu ˈwo ˈˈdhʋ̈ ˗a ˗zadɔmɛn ˈka.» 16 ˈDhɛ ˈö ö bo ˗a pö ˗sü ˈka ˈˈdhʋ̈, ˈyö ˗an ˗kë zakandhɛ ˈö bhë ˗a ˈgü. 17 ˈDhɛ ˈö ˗kë ˈˈdhʋ̈, ˈyö ˗an ꞊gban ˈˈpɛpɛ ˗wo sa Sɔsitɛnö ˈö ˗kë ˗yakwëë ˗kë ˗a ˈgü ˗kɔ ˈwɔnyëë˗ ˈka bhë ˗a ˗ta, ˈö ˈwo ˗ya ˗a ˗man ˗sü ˗bha zakandhɛ ˈö bhë ˗a ˈˈdhiʋ̈ mü. ˈˈKɛɛ Galiɔn yö ˈti ö ˈˈdhi ˗da ˈwɔn ˈö bhë ˗a ˈgü toŋtoŋdhö.

18 Pɔdhö ˗yö ˗to ˈˈkwipö ˈö bhë ˗a ˈgü ˈö ˗dhɛkpaɔyi ꞊va ˗kë mü. ˈDhɛ ˈö ö bo, ˈyö ö ˗wo ˗da kwa ꞊dhegblü ˗nu ˗dhɛ ˈö ˗ya ˈˈyitagɔ ˈgü ˈö dho Sidhi. Plisidhö waa Akidhasö ˗wo ˗kun ˗a ꞊kee˗. ˈDhɛ ˈö ˗kë ˈˈdhʋ̈ kö Pɔdhö ˗ya ö ˗bha wun ˈˈkan Sankle ö ˗wo ˈö˗ ˗bhö ˗Zlan ˗dhɛ ˗a ˗wɔn ˈgü. 19 ˈDhɛ ˈwo ˗lo Efɛzö, ˈyö mɛn ˈwo to ˗an to ˈplöö mü, ˈö yö ˗zë ˈö dho ˗yakwëë ˗kë ˗a ˈgü ˗kɔ ˈgü ˈö ˈwɔn yö ˈko ˈˈdhiʋ̈ Zuifö ˗nu ˗dhɛ. 20 ˗Wo ˗gban ˗a ˗bha kö ˗yö ꞊gwëë wo ˈˈpiʋ̈ mü, ˈˈkɛɛ yö ˈti ˈˈwɩ ˗a ˗bha. 21 ˗Yö ö ˗wo ˗da ˗an ˗dhɛ ˈö˗ pö: «Zoova ˗ya ˈˈwɩ ˗a ˗bha, a ˗dho n ꞊yɛɛ kë ˈa nu ˗wo ka ˗dhɛ ˈzü.» ˈDhɛ ˈö ˗ya ˈˈyitagɔ ˈgü Efɛzö 22 ˈyö dho Sezadhe. ˈYö go mü ˈö dho* ˗zlanwokɔdhi ˈgümɛn ˗nu ꞊tuaabho, ˈyö go mü ˈzü ˈö dho Antiɔshö.

23 ˈDhɛ ˈö ˈˈtʋ̈ŋ ˈnën ˈbhaa ˗kë, ˈyö ˗ʒiö ˈzü ˈö dho ˈö ˗glü ˈpö˗ ˗nu ˈö ˈwo Gadhatö ˗sɛ waa Flizi ˗sɛ ˗nu ˈgü bhë ˗an ˈgü Yesu ˗bha gwëëˈˈ ˗nu ꞊faanmën ˗sü ˈka.

24 Zuifö mi do ˈö go Alɛzandri ˗pö ˈgü, ˈö ˈwo˗ ˗dhɛ Apodhɔsö, ˗yö ˗nu ˈö ˗lo Efɛzö. ˗Yö ˗kun mɛn ˈö˗ ˈˈdhi ˗yö ˗kan, ˈö ˗Zlan ˗Wo dɔ ˗së ˈka ˗a ˈka. 25 Gɔndënën ˈö bhë ˗yö ˗kun ˈpö mɛn ˈwo˗ ꞊klaŋ ˗kë Zoova ˗wo* ˈka ˗a ˈka. ˈDhɛ ˈö ˗kë ꞊dhɛ ˗yö ˗kun ˈwɔn ˗nu kë ˗ni ˈgü ö ꞊faan ˈka ˗zuu ˈˈslʋ̈ʋ̈slʋ̈ ˈsaa˗ ˈgü bhë, ˈwɔn ˗nu ˈwo ˗gban Yesu ˗bha, ˗yö ˗kun ˗an blɛɛˈˈ ˗ni ˈgü, ˈö mɛn ˗nu ꞊klaŋ ˗kë ˗an ˈka ˈkpakpadhö. ˈˈKɛɛ ˗bɔyibhaasü dosɛnŋ ˈö kun ˗a ˈˈɲaan ˈö˗ dɔ ˈyö ˗tɔ Zan ˗bha. 26 ˗Yö ˗ya ˈwɔn blɛɛˈˈ ˗sü ˗bha ˗zogbandhe ˈka ˗yakwëë ˗kë ˗a ˈgü ˗kɔ ˈgü. ˈDhɛ Plisidhö waa Akidhasö ˗wo pë ˈö kun ˗a pö ˗ni ˈgü bhë ˗a man, ˈyö ˈwo˗ ˗dhɛ ꞊plɛdhe ˈgü ˈö ˈwo ˗Zlan ˗bha ꞊klaŋwo* ˈgü ˗pʋ ˗a ˗dhɛ ˈzü ˗së ˈka. 27 ˈDhɛ ˈö ˗kë ꞊dhɛ ˗yö ˗kun ˗a ˈˈpiʋ̈ ˈö ˈdho Akai ˗sɛ ˈgü, kwa ꞊dhegblü ˗nu ˗wo ˈsëëdhɛ ˗bɔ Yesu ˗bha gwëëˈˈ ˗nu ˈwo ˈmü ˗an ˗dhɛ ˈö ˈwo ꞊bhɛɛ ˗an ˗dhɛ kö ˗wo wo ˗kɔ ˗ya ˗a ˗gɔ ˗dhɔkaadhe ˈgü. ˈDhɛ ˈö ˗lo mü, ˗yö mɛn ˗nu ˈö ˗Zlan ˗yö ö ˗bha ˗gasitɛ ˗kë ˗an ˗dhɛ ˈö ˈwo ˗we ˗Zlan ˗wo ˗bha bhë ˗an ˗takun ꞊dedewo. 28 ˗A ˗gɛn ˗mü ꞊dhɛ, ˗yö ˗dɔ mɛn ꞊gban ˈˈɲan ˈˈdhiʋ̈ ˈö˗ ˗zɔn ˈkpakpadhö ö ꞊faan ꞊gban ˈka ꞊dhɛ Zuifö ˗nu ˈwaa gagade ˗ʒian ˗ta. ˗Yö ˗bɔ pë ˈö ˗bɛnzë ˗sü ˈka ˗Zlan ˗Wo ˈgü ˗a ˗ta ˈö˗ ˗zɔn ꞊dhɛ Yesu ˈnën ˈö ˗tɔ Klito.