Yesu ˗bha bɔmɛn ˗nu këwɔn ˗nu

20 ˈDhɛ ˈö ˗bhluubhluudhe ˈö bhë ˗a ˗gɔ ˗yö ꞊zɔɔ, ˈyö Pɔdhö ˗yö Yesu ˗bha gwëëˈˈ ˗nu ˗dhɛ, ˈö ˗an ꞊faanmën, ˈö ö ˗wo ˗da ˗an ˗dhɛ ˈö dho Maseduanö. 2 ˈDhɛ ˈö bɔ ˈˈsɛ ˈö bhë ˗a ˈgü, ˈö mɛn ˗nu ˈwo mü ˗an ꞊faanmën ꞊dedewo, ˈyö dho ˈö ˗lo Glɛsö. 3 ˗Yö ˈˈsu ˗yaaga ˗kë ˗dhɛ ˈö bhë ˗a ˈgü. ˗Yö ˗kun ˗a ˈˈpiʋ̈ ˗be ꞊dhɛ ˈö ˗ya ˈˈyitagɔ ˈgü kö ˈö ˈdho Sidhi, ˈˈkɛɛ ˈdhɛ ˈö˗ yö ꞊dhɛ Zuifö ˗nu ˗wo ˗ya ˗mɔn kö ˈwo ö zë, ˈyö ö ˗bha ˈˈta ˈö bhë ˗a ˗yɛ kö ˈö ö ꞊yɛɛ kë Maseduanö. 4 Mɛn ˗nu ˈwo kun ˗a ꞊kee˗ ˈyö ˈwo ˗tɔ: Pidhusö ˈö go Beedhe ˗a gbö Sopatɛɛ, Adhitakö waa Sekundusö ˈö ˈwo go Tesalonikö, Gayusö ˈö go Dɛɛbe, Tishikö waa Trofimö ˈö ˈwo go Azi ˗sɛ ˈgü waa Timote. 5 Mɛn ˗nu ˈwo bhë ˗wo ˗dɔ yi ˈˈdhiʋ̈ ˈö ˈwo wo ˈˈɲan to yi ˗gɔ Troasö. 6 ˈˈKɛɛ yi ˗zë ˈdhɛ ˈö ˈbluu˗ ˈö ˈˈsɛkɛ ˈyaa˗ ˈˈpiʋ̈ bhë ˗a ˈwlaan˗ ˗yö ɲën, ˈyö ˈyi ˗ya ˈˈyitagɔ ˈgü Filipö ˈö ˈyi ˗dhɛkpaɔyi ˈö ˗mɔn ˈˈsoodhu ˗bha ˗a ˗kë ʒiaan ˗ta, ˈyö ˈyi yö ˗an ˗bha Troasö. ˗Dhɛkpaɔyi ˈˈsɔɔplɛ ˈnën ˈyi˗ ˗kë mü.

7 ˈDhɛ ˈö ꞊Glooyi ˗yö ˗ʒiö, ˗a ˗dhɛkpaɔyi ˈö dɔ ˗a ˈˈpiʋ̈* bhë ˗a ˈka, yi ˗dho yi ˈkwëëdhö kö ˈyi ˗bhöpë ˗bhö yi ˈkwëë˗. ˈDhɛ ˈö ˗kë ꞊dhɛ Pɔdhö ˗yö ˗dho ʒiö ˗dhɛkpaɔyi ˈö dɔ ˗a ˈˈpiʋ̈ bhë ˗a ˈka, ˗yö ˗ya ˈwɔn blɛɛˈˈ ˗sü ˗bha mɛn ˗nu ˈwo kun mü ˗an ˗dhɛ. ˗Yö dhiaŋ ˗zë ꞊va ꞊dedewo ˈö dho ˈö yö ˗a ˈka gbeŋ ꞊zinŋgü ˗bha. 8 ˈKɔdhi ˈö ˈyi ˗kë ˗a ˈgü ˈˈdhuŋ bhë, ꞊laŋba ꞊va ꞊dede ˗kë mü. 9 ˈDhɛ ˈö Pɔdhö ˗yö kun ˈwɔn blɛɛˈˈ ˗ni ˈgü, kö ˈnëngɔnnën do ˈwo˗ ˗dhɛ Etishö ˗yö ˗ya ˗sü ˈka fönɛtrö ˈˈdhiʋ̈ ˗yö yi zë ˗ni ˈgü. ˈDhɛ ˈö yi ˗yö ˗ʒiö ˗a ˈka, ˈyö bhɔ ˈkɔ ˗yaaga ˗naan ˈö ˈkɔ ˗ta ˈˈdhuŋ bhë ˗a fönɛtrö ˈka ˈö ˗puö. ˈDhɛ ˈwo˗ ꞊luu ˈˈshia˗ kö ˗ya ga. 10 ˈDhɛ ˈö ˗kë ˈˈdhʋ̈ ˈyö Pɔdhö ˗yö ꞊yɔɔ ˈö ˈˈgblëënnu ˗a ˗ta ˈö˗ sü ö ꞊kwɛɛ˗ ˈö˗ pö: «˗Ka ka zuʋ̈ˈˈ kë ˗saa, ˗yö ˈˈbhɩɩ˗.» 11 ˈDhɛ ˈö bo kë ˗sü ˈka ˈˈdhʋ̈, ˈyö Pɔdhö ˗yö ˗da ˈzü ˈkɔdhi ˈö ˈˈdhuŋ bhë ˗a ˈgü ˈö ˗ya pë ˗bhö ˗sü ˗bha. ˈDhɛ ˈö dhiaŋ zë ˗an ˗dhɛ ˈzü pinŋdhö ˈö to ˗a ˈka ˈˈdhʋ̈ ˈö ˗dhɛ ˗yö ꞊kpɔɔ, ˈyö ˗ʒiö. 12 ˈDhɛ ˈö ˗kë ˈˈdhʋ̈, ˈyö ˈwo dho ˈnëngɔnnën ˈö bhë ˗a ˈka ˗a ˗gɔ ˈkɔɔ kö ˗yö ˈˈbhɩɩ˗, kö mɛn ꞊gban ˈˈpɛpɛ zuʋ̈ˈˈ ꞊nii ˗yö ˗da ˗ni ˈgü ꞊dedewo.

13 Yi ˗dho ˈyi ˗da ˈˈyitagɔ ˈgü ˈö ˈyi dho Asɔsö. ˗Dhɛ ˈö bhë ˈyö Pɔdhö ˗ya pö yi ˗dho ö ˈsü ˈˈyitagɔ ˈgü ˗a ˗bha, ˈyö sü ꞊dhɛ ˗yö ˗kun ˗a ˈˈpiʋ̈ ˈö ˈdho mü ö ˗gɛn ˗ta. 14 ˈDhɛ ˈö nu ˈö yö yi ˗bha Asɔsö, ˈyö ˈyi˗ sü ˈˈyitagɔ ˈgü ˈö ˈyi dho Mitilɛnö. 15 ˈDhɛ ˈö˗ ˗ta ˗dhɛ ˗yö ꞊kpɔɔ, ˈyö ˈyi ˗ya ˈˈyitagɔ ˈgü ˈö ˈyi dho ˈyi ˗lo Kio ˗dhɛ ˈˈsuee. ˗A ˗dhɛkpaɔyi ˈö dɔ ˗a ˈˈpiʋ̈, yi ˗dho ˈyi ˗lo Samɔsö. ˈDhɛ ˈö˗ ˗ta ˗dhɛ ˗yö ꞊kpɔɔ ˈzü, ˈyö ˈyi dho ˈyi ˗lo Mile. 16 Pɔdhö yö ˈti ˈˈwɩ ˗a ˗bha kö ˈö ˈduaannu Efɛzö, ˗yö kë ˈˈdhʋ̈ kö ˈyaa ˗dho ˈˈtʋ̈ŋ ꞊va kë Azi ˗sɛ ˈgü. ˗Yö ˗kun ˈdho ˗ni ˈgü ˈˈvaandhö Zedhizadhɛmö, ˈyö sü ꞊dhɛ ˗yö ˗kun ˗a ˈˈpiʋ̈ ꞊dhɛ ˈö kë mü Pantekɔtö ˈwlaan˗ yi ˈka.

17 ˈˈKɛɛ ˈdhɛ ˈö kun Mile, ˗yö mɛn ˗bɔ mɛn zii ˗nu ˈwo Efɛzö ˗an ˗dhɛ ˈö˗ pö ˗wo nu. 18 ˈDhɛ ˈwo ˗lo ˗a ˈˈpiʋ̈ mü, ˈyö˗ pö ˗an ˗dhɛ: «ˈÖ sü ˈˈtʋ̈ŋ ˗blɛɛsü ˈa nu ˗a ˈka Azi ˗sɛ ˈgü ˗a ˗bha ˈö dho ˈö yö ˗a ˈka ꞊dɛɛ ˗bha, ˗kɔ ˈa ˗tosɛta ˗kë ˗a ˈka ka ˈˈpiʋ̈, ka ꞊dede ka˗ ˗yö. 19 A yö ˗kë Dëmɛn ˗dhɛ ꞊dhɛ ˗a ˗bha ꞊dhuëŋ ˈdhö ˗dekëtɩtɩsü* ˈka, ˈa˗ ˗kë ˈpö ˈˈgbʋ waa ˈˈklʋʋbhɔdhe ˗nu ˈgü, ˈˈslö yaa ˗nu ˈö Zuifö ˗nu ˗wo kun ˗a kë ˗ni ˈgü n ˈka bhë ˗a ˗wɔn ˈgü. 20 ˈˈKɛɛ n ˈti n ˈˈdhi yö ˈkwëë˗ kö ˈa n bo ˈwɔn ˈö ˗së ka ˗bha ˈka ˗a ˗pö ka ˗dhɛ ˗sü ˈka ɛɛnˈˈ n ˈti ˈˈkan ka ꞊klaŋ kë ˗sü ˈö ˈˈdhɛɛta ɛɛnˈˈ ˈkɔ ˈgü ˈkɔ ˈgü bhë ˗a ˗bha. 21 A ˈwɔn ˈö ˗gban ˗go ö ꞊sɔŋ yaa ˈgü ˗sü ˈö ˈwo wo zuʋ̈ˈˈ slëëˈˈ ˗Zlan ˈˈpiʋ̈ waa ˗zo ˗yö kwa Dëmɛn Yesu ˗dhɛ ˗sü ˗bha ˗an ˈgü ˗pʋ ꞊ʒiaan ˈkpakpadhö* Zuifö ˗nu waa Glɛkö ˗nu ˗an ˗dhɛ. 22 ˈˈKɛɛ ˈˈtʋ̈ŋ ˈö yö ˗a ˈgü, a ˈdho ˗ni ˈgü Zedhizadhɛmö ꞊dhɛ ˗kɔ ˈö ˗zuu ˈˈslʋ̈ʋ̈slʋ̈ ˈdhö˗ ˈˈpiʋ̈ ˈa˗ kë ˗a ˈka gboŋgboŋdhö bhë ˗a ˈdhö. Pë ˈö n ˈˈdhiʋ̈ ˈˈgan ˗ni ˈgü mü ˈmaan˗ dɔ. 23 Pë dosɛnŋ ˈa˗ dɔ ˈyö ˗tɔ ˈˈkwipö ˈˈpɛpɛ ˈa bɔ ˗ni ˈgü ˗an ˈgü bhë, ˗zuu ˈˈslʋ̈ʋ̈slʋ̈ ˗ya ˗zɔn n ˗dhɛ ˗an ˈgü ꞊dhɛ ˗kaso waa ˈˈklʋʋbhɔdhe ˗wo n ˈˈdhiʋ̈ ˈˈgan ˗ni ˈgü. 24 ˈˈKɛɛ ˈkö ˗kë ˈˈdhʋ̈, pë ˈö˗ ˗wɔn ˈdhö n ˗gɔ ˈˈgbɩɩ˗ ˈyaa ˈnën ˗tɔ n ˗de ˗bha ˗tosɛta.* Pë dosɛnŋ ˈö˗ ˗wɔn ˈdhö n ˗gɔ ˈˈgbɩɩ˗ ꞊ʒiaan ˈyö ˗tɔ n ˗man ˗bia ˈa˗ ˗lö ˗ni ˈgü bhë waa yö ˈö Dëmɛn Yesu ˗ya ˈˈklɔɔn bho n ˗bha ˈö ˗kë nɔɔn˗ ˗së ˈö ˗gban ˗Zlan ˗bha ˗gasitɛ ˗bha ˗a ˗pö n ꞊faan ˈka ˗sü ˈka bhë, ˈa ɲën ˗a ˗bha.

25 «A˗ ˈwɔn ˗dɔ ꞊dhɛ ˈö sü ꞊dɛɛ ˗bha, mɛn ˗nu ˈa ˗Zlan ˗bha ˗Gblüdëdhɛ ˗nɔɔn pö ka ˗dhɛ bhë, ka ˈti ˗dho ˗kpan n ˈwëëdhɛ ˗bha ˈzü. 26 ˈDhɛ ˈö ˈˈdhʋ̈, ˗yö kë ka ˈˈɲaan ꞊dɛɛ ꞊dhɛ mɛn ˈˈoo ˗mɛn ˈö yö ˈti dhasü ꞊slɔɔ, kö ˈyii ˈsü n ˗bha.* 27 ˗A ˗gɛn ˗mü ꞊dhɛ ˗Zlan ˗zokunwɔn ˈˈpɛpɛ ˈö ˈdhö, a˗ ꞊gban ˗blɛɛ ka ˗dhɛ, n ˈti˗ ˈˈwɛɛ ˈbhaa ˗bin ka ˗gɔ. 28 ˗Ka ka ˗zo ˈto ka ˗de ˈˈpiʋ̈, ˈka ka ˗zo ˈto ˈpö ˗tuëë ˗nu ˈˈpɛpɛ ˈö ˗zuu ˈˈslʋ̈ʋ̈slʋ̈ ˗yö ka ˗ya ˗an ˗maankëmɛn ˈka bhë ˗an ˈˈpiʋ̈, kö ˗Zlan ˗bha ˈkɔdhigümɛn ˗nu ˈö ˗an dhɔ ö ˗de Gbö ꞊ɲɔɔn ˈka bhë ˈka ˗an ˗maan kë. 29 A˗ ˈwɔn ˗dɔ ꞊dhɛ ˈman ˈdho, mɛn ˈbhaa ˗nu ˈwo ꞊dhɛ ˈˈblü ˗gbɛn ˈˈdhiʋ̈˗ ˗nu ˈdhö, ˗wo ˗dho nu ˈwo ˗da ka ꞊zinŋgü, ˈö ˈwo ˗tuëë ˗nu kun ˈya˗. 30 ˗Ya ˈgo mü ˈzü, mɛn ˈbhaa ˗nu ˗dho luuˈˈ ka ꞊zinŋgü ˗ʒiaanwo ˈö ˈwo mɛn ˗nu ꞊klaŋ ˗kë ˈwɔn ˗nu ˈö ˈwaa gagade ˈka ˗an ˈka, kö ˈwo Yesu ˗bha gwëëˈˈ ˗nu bho ʒiaan ˗ta, kö ˗wo ʒiö wo ꞊kee˗.

31 «ˈDhɛ ˈö ˈˈdhʋ̈ ˗ka ˗ya ka ˈˈɲaan, ka ˗zo ˈyaa ˗dho bhɔ ꞊dhɛ ˗kwɛ ˗yaaga ˈˈpiʋ̈ a ka ˗zo ˗kpɔɔ ˈˈgbʋ ˈka ˗kplawo ˈɲënŋ˗ ˈgü waa gbeŋ ꞊gban ˈka. 32 ˈˈTʋ̈ŋ ˈö yö ˗a ˈgü, ˈman ka ˈˈklɔɔn bho ˗Zlan waa˗ ˗bha ˗gasitɛ kë ˗wo ˗an ˗bha. ˗A ˗wo ˈö ˈˈdhʋ̈ bhë yö ˈnën ˈö ꞊mɔɔn˗ ˗bha ˈö ka ˈgü ˗kë ˈˈgbɩɩ˗, ˈö ʒiaan ˗pʋ ka ˗gɔ kö ˈkɛnŋpë ˈö ˗Zlan dho ˗a nu mɛn ˈˈpɛpɛ ˈö ˗an ˗kë ˈˈslʋ̈ʋ̈slʋ̈ ˗an ˗dhɛ bhë, ˈka˗ ꞊slɔɔ. 33 N zuʋ̈ˈˈ yö ˈti bhɔ mɛn ˈbhaa ˗bha ˈwëë˗, ˗a ˗bha ˈˈsënŋ ɛɛnˈˈ ˗a ˗bha sɔ ˗nu ˗bha. 34 Ka ꞊dede ka˗ ˈwɔn ˗dɔ ꞊dhɛ a yö ˗kë n ˗de ˗kɔdhɛ ˈka kö pë ˈö man ꞊dede waa mɛn ˗nu ˈwo n ꞊kee˗ yi ˗bhawɔn ˈdhö˗ ˗bha ˈa˗ ꞊slɔɔ. 35 ˈWɔn ꞊gban ˈˈpɛpɛ ˈgü, a˗ ˗zɔn ka ˗dhɛ ꞊dhɛ ka dua ˗mü ˈka yö kë ˈˈgbɩɩ˗ ꞊dhɛ ˗kɔ ˈö bhë ˗a ˈdhö kö ˈka nu mɛn ˗nu ˈö ˗an ˗bhawɔn ˈdhö ˗takundhe ˗bha ˗an ˗dhɛ, kö ˈka ˗zo ˗yö ˗buö ˗kplawo pë ˈö Dëmɛn Yesu yö ꞊dede ˗ya pö ˗a ˈka. ˗Ya ˗pö: ‹Zuʋ̈gblüdhi ˈö pë ˗nu mɛn ˗dhɛ ˗sü ˈgü ˗yö ˈkpii˗ ˈö ˗ʒiö ˗a ˈka ˗a ˈdhɛ ˈö mɛn ˗bha pë ˗nu ü ˗dhɛ ˗sü ˈgü ˗a ˗ta.›»

36 ˈDhɛ ˈö ö bo ˗wo ˗nu ˈwo bhë ˗an pö ˗sü ˈka, ˈyö waa˗ ˗nu ˈˈpɛpɛ ˈwo yö wo kpɔn ˈgü ˈö ˈwo ꞊bhɛɛ. 37 ˈDhɛ ˈwo wo bo, ˈyö ˗an ꞊gban ˈˈpɛpɛ ˗wo ˗lo ˈˈgbʋ ˗bha, ˈö ˈwo wü* Pɔdhö ˗bha ˈö ˈwo˗ ˈˈkpɛnŋ mü. 38 ˗A ˗gɛn ˗mü ꞊dhɛ, ˗a pö ˈö˗ wo ˗an ˗dhɛ ꞊dhɛ wo ˈti ˗dho ˗kpan ö ˗bha ˈzü bhë, ˗yö ˗wëë ˗bɔ ˗an ˗ta ꞊dedewo. ˈYö ˈwo˗ dɔ ʒiaan˗ ˈö ˈwo dho ˈwo ˗lo ˗a ˈka ˈˈyitagɔ ˈsü ˗dhɛ ˈgü.