Yesu ˗bha bɔmɛn ˗nu këwɔn ˗nu

19 ˈDhɛ Apodhɔsö ˗yö kun Kolɛntö, Pɔdhö ˗yö ˗bɔ ˈˈsɛ ˗nu ˈwo ꞊weeyi ˈka ꞊gblɛɛn bhë ˗an ˈgü ˈö dho Efɛzö. ˈDhɛ ˈö ˗lo mü, ˗yö ˗kpan ˗Zlan ˗dhɔkëmɛn* ˈbhaa ˗nu ˗bha, 2 ˈyö dhɛɛˈˈ kpɔ ˗an ˗gɔ ˈö˗ pö: «ˈDhɛ ˈö ˈka ˗we ˗Zlan ˗wo ˗bha, ka ˗zuu ˈˈslʋ̈ʋ̈slʋ̈ ˗slɔɔ ˗ee?» ˈYö ˈwo˗ ˗yɔ bɔ ˗a ˗gɔ ˈwo˗ pö: «Yi ˈti˗ man ˗ʒiaanwo do ꞊dhɛ ˗zuu ˈˈslʋ̈ʋ̈slʋ̈ ˗yö ˗dhö.» 3 ˈYö˗ pö ˗an ˗dhɛ: «˗Bɔ ˈˈyi ꞊bhaa ˗kɔ ꞊suu ˗mɛɛn ˈö ˈka˗ wo ˈsa?» ˈYö ˈwo˗ ˗yɔ bɔ ˗a ˗gɔ ˈwo˗ pö: «˗A ˈdhɛ ˈö Zan ˗ya ˗wɔn ꞊blɛɛ bhë yö ˗mü.» 4 ˈYö Pɔdhö ˗ya pö ˗an ˗dhɛ: «Mɛn bɔ ˈö Zan ˗yö kun ˗a wo ˗ni ˈgü ˈˈyi ꞊bhaa bhë, ˗ya ˗kë ˈˈdhʋ̈ kö mɛn ˗nu ˈö ˗an bɔ ˈˈyi ꞊bhaa ˗wa ˗zɔn ꞊dhɛ ˈwa wo zuʋ̈ˈˈ slëëˈˈ ˗Zlan ˈˈpiʋ̈. ˈYö ˗kun ˗a pö ˗ni ˈgü ˈpö ˈˈsɛgümɛn ˗nu ˗dhɛ ꞊dhɛ ˗wo wo ˗zo yö mɛn ˈö nu ˗ni ˈgü ö ꞊taabha, ˈö ˗kë Yesu ˈka bhë ˗a ˗dhɛ.» 5 ˈDhɛ ˈö Pɔdhö ˗ya ˈgü ˗pʋ ˗an ˗dhɛ ˈˈdhʋ̈, ˈyö ˈwo bɔ ˈˈyi ꞊bhaa Dëmɛn Yesu ˈtɔ ˈgü. 6 ˈDhɛ ˈö ˗kë ˈˈdhʋ̈ ˈö Pɔdhö ˗yö ö ˗kɔ ˗ya ˗an ˗ta, ˈyö ˗zuu ˈˈslʋ̈ʋ̈slʋ̈ ˗yö nu ˗an ˗ta ˈö ˈwo ˗ya ˈwɔn blɛɛˈˈ ˗sü ˗bha ˗wo ˈˈwɛɛ ˗nu ˈgü, ˈö ˈwo ˗ya ˈpö ˗Zlan ˗wo ˈˈdhiʋ̈ ˗lo ˗sü ˗bha. 7 Gɔɔn˗ ˗nu ˈwo ˗kë mü ˗wo ˗mɔn ˗kɔŋ do ö ga ꞊plɛ (12) ˗bha.

8 ˈˈSu ˗yaaga ˈˈpiʋ̈, ˗yö ˈwɔn ˗blɛɛ ˗zogbandhe ˈka ˗yakwëë ˗kë ˗a ˈgü ˗kɔ ˈgü, ˈö ˈˈdhɛɛtadhiaŋ˗ ˗nu zë, ˈö ˈwɔn ˗nu ˈwo ˗gban ˗Zlan ˗bha ˗Gblüdëdhɛ ˗bha ˈwo mɛn ˗nu zuʋ̈ˈˈ sü ˗an ꞊blɛɛ. 9 ˈˈKɛɛ ˈdhɛ ˈö ˗kë ꞊dhɛ mɛn ˈbhaa ˗nu ˈˈtʋ ˗kë ˈˈgbɩɩ˗ ˈö ˈwaa kun ˈˈwɩ ˗ni ˈgü pë ˈö Pɔdhö ˗ya pö ˗a ˗bha, ˈö ˈwo kun Ʒiaan ˈö bhë ˗a ˗wɔn yaa ꞊blɛɛ ˗ni ˈgü mɛn ˗nu ˈˈɲan ˈˈdhiʋ̈ bhë, Pɔdhö ˗yö Yesu ˗bha gwëëˈˈ ˗nu ˗sü ˈö waa˗ ˗nu ˈwo go ˗an ˈˈpiʋ̈. ˗Dhɛkpaɔyi ˈˈpɛpɛ ˈka ˗yö ˗kun ˈˈdhɛɛtadhiaŋ˗ zë ˗ni ˈgü ˈkɔ ˈkpii˗ ˈö ˗kë Tidhanisö ˗bha ꞊klaŋplöödhɛ ˈka bhë ˗a ˈgü. 10 ˗Ya ˗kë ˈˈdhʋ̈ ˗kwɛ ꞊plɛ ˈˈpiʋ̈. ˗A ˗wɔn ˈgü mɛn ˈˈpɛpɛ ˈwo Azi ˗sɛ ˈgü ˈö ˈwo Zuifö ˗nu ɛɛnˈˈ Glɛkö ˗nu ˈka, ˗wo Dëmɛn ˗wo ˗man.

11 ˗Zlan ˗yö ˗kun bɔ ˗ni ˈgü Pɔdhö ˗ta ˗kplawo ˈö ˗dhidha ˈˈmlünmlünsü ˗nu ˗kë. 12 Sɔ ˗nu waa sɔ ˈˈpɛn ˗nu ˈö ˈwo˗ ˗klu sɔ ˗ta, ˈö ˈwo pa Pɔdhö kwi ˈka, ˗wa ˈdho ˗an ˈka ˗ʒiaanwo ꞊waa˗ ˗an ˗da ˈˈyuamɛn ˗nu ˗bha, ˗an ˗bha ˈˈyua ˗yö ˗bo, ˈö ˗zuu yaa ˗nu ˗wo go ˗an ˈgü. 13 Zuifö ˈbhaa ˗nu ˈö ˗ya kë ꞊shiöŋ ˈwo ˗glü kö ˈwo ˗zuu yaa ˗nu bho mɛn ˗nu ˈgü bhë, wo ˗de ˈpö ˗wa ˈˈslö ˗mɛɛn kö ˈwo Dëmɛn Yesu ˈtɔ ˈsü kö ˈwo ˗zuu yaa bho ˗a ˈka mɛn ˗nu ˈgü, ˈö ˈwo˗ pö: «Yesu ˈö Pɔdhö ˈdhö˗ ˗wɔn blɛɛˈˈ ˗ni ˈgü bhë ˗a ˈtɔ ˈgü, a˗ ˗pö ü ˗dhɛ ˈü ˈgo mɛn ˈö yö ˗a ˈgü.» 14 Mɛn ˗nu ˈwo kun ˗a kë ˗ni ˈgü ˈˈdhʋ̈ bhë, ˗a mɛn ˈˈsɔɔplɛ ˗wo ˗kun Zuifö ˗nu ˗bha ˈˈsaabhomɛn ˈkpii˗ ˈö ˈwo˗ ˗dhɛ Seva bhë ˗a gbö ˗nu ˈka. 15 ˈˈKɛɛ ˈyö ˗zuu yaa ˗ya pö ˗an ˗dhɛ: «A Yesu ˗dɔ, ˈö mɛn ˈö Pɔdhö ˈdhö˗ ˈka ˈpö ˈa˗ dɔ. ˈˈKɛɛ ka ˗zë de ˗mü ka ˈka?» 16 ˈYö mɛn ˈö ˗zuu yaa ˗yö ˗kë ˗a ˈgü bhë ˈö ꞊luu ˈö ˗puö ˗an ˗ta, ˈö˗ ˗kɔ ˗yö ˗ʒiö ˗kɔ ˈwo˗ ˗bha do do ˈka ˗an ꞊gban ˗gɔ, ˈyö ˈwo ꞊duëë ˈwo yö ˈˈkpɛnŋ wo bun ˈˈkpaan ˈka kö ˗wa ˗gi. 17 ˈWɔn ˈö bhë ˗a ˗tɔɔ ˗yö ˗pɛn ˈö Zuifö ˗nu waa Glɛkö ˗nu ˈˈpɛpɛ ˈwo Efɛzö ˈwo˗ man, ˈö ˈˈsuʋ̈ ˗yö ˗da mɛn ꞊gban ˈgü, ˈö Dëmɛn Yesu ˈtɔ ˗yö ˗ya bhɔ ˗sü ˗bha ˈö dho ˗a ˈka ˈˈdhiʋ̈. 18 ˈDhɛ ˈö ˗kë ˈˈdhʋ̈, ˈyö mɛn ꞊va ꞊dede ˈö ˈwo ˗we ˗Zlan ˗wo ˗bha bhë, ˈwo nu ˈwo wo ˈˈdhi bho wo ˗bha ꞊sɔŋ yaa ˗nu ˗ta, ˈö ˈwo pë ˗nu ˈwo˗ ˗kë ˗an ꞊gban ꞊blɛɛ ˈkpakpadhö. 19 Mɛn ꞊va ꞊dede ˈwo kun dükëmɛn ˗nu ˈka, ˗wo wo ˗bha dü ˗kë ˗a ˗bha ˈsëëdhɛ ˗be ˗nu ˗lo ˈkwëëdhö ˈö ˈwo ˗an ˗gʋ̈ mɛn ꞊gban ˈˈpɛpɛ ˈˈɲan ˈˈdhiʋ̈. ˗A ˈsëëdhɛ ˗be ˗nu ˈwo ˈˈdhʋ̈ ˗an ꞊sɔnŋ ˗lo ˈko ˗ta ˗sü ˗yö ˗mɔn ˈwëë˗ ˈˈtaman ˈˈgblü ˗kɔŋ ˈˈsoodhu (50.000) ˗bha. 20 ˗Kɔ ˈö bhë ˈyö Zoova ˗wo ˗yö ˗pɛn ˗a ˈka ˗a ˗bha ˈˈpiigbɩɩdhɛ ˈsaa˗ ˈgü, ˈö to ˗a ˈˈgbɩɩ˗ ˈka.

21 ˈDhɛ ˈö ˈwɔn ˗nu bhë ˗wo wo bo kë ˗sü ˈka ˈˈdhʋ̈, ˈyö Pɔdhö ˗ya ˗ya ö zuʋ̈ˈˈ ˈˈpiʋ̈ ꞊dhɛ ˈö bɔ Maseduanö ˗sɛ waa Akai ˗sɛ ˗an ˈgü kö ˈö ˈdho Zedhizadhɛmö. ˗Yö ˗kun ˗a pö ˗ni ˈgü: «ˈMan ˗lo mü, ˗yö ˗dho kë ˗së ˈpö kö ˈa ˈdho ˈa ˗lo Wlɔmö.» 22 ˈDhɛ ˈö ˗kë ˈˈdhʋ̈, ˈyö mɛn ˗nu ˈwo kun ˗a ˗takun ˗ni ˈgü bhë ˗a mɛn ꞊plɛ ˈö ˈwo ˗kë Timote waa Edhasö ˗an ˈka bhë ˗an bɔ Maseduanö, ˈyö yö ˗zë ˈö to Azi ˗sɛ ˈgü ˈö ˈˈtʋ̈ŋ ˈnën ˈbhaa ˗kë mü ˈzü.

23 ˗A ˈˈtʋ̈ŋ ˈö bhë ˗a ˈgü, ˗bhluubhluudhe ˈkpii˗ do ˈbhaa ˗yö ˗luu ˈö ˗gban Dëmɛn ˗bha Ʒiaan ˗bha. 24 Gɔndënën do ˈbhaa ˈwo˗ ˗dhɛ Demetriusö ˈö ˗kë ˗piöbhomɛn ˈka, ˗yö ˗kun Atemisö ˗dhɔkë ˗a ˈgü ˈkɔ ˈsɛɛn˗ ˗nu ˗yö kë ˗ni ˈgü zën ˈka, ˈö mɛn ˗nu ˈö waa˗ ˗nu ˈwo kun ˗a ˗yö kë ˗ni ˈgü wo ˈkwëë˗ bhë ˈwo ˈwëë˗ ꞊va ꞊slɔɔ ˗a ˈgü. 25 ˗Yö mɛn ˗nu ˈwo kun yö kë ˗ni ˈgü ˗a ˈˈpiʋ̈ bhë waa ˗piöbhomɛn ˈˈwɛɛ ˈbhaa ˗nu ˗an ˗dhɛ wo ˈkwëëdhö ˈö˗ pö ˗an ˗dhɛ: «N ˈˈtɔŋdë ˗nu, ka ꞊dede ka˗ ˈwɔn ˗dɔ ꞊dhɛ pë ˈö ˈkwa dɔ ˗a ˈgü ˈkwa ꞊nɔɔn ꞊slɔɔ ˈyö ˗tɔ kwa ˗bha yö ˈö yö. 26 ˈˈKɛɛ ka ꞊dede ka˗ ˗yö, ˈö ˈka˗ man ˈpö ꞊dhɛ gɔndënën ˈö ˈwo˗ Pɔdhö ˗kë bhë ˗ya mɛn ꞊va ꞊dede zuʋ̈ˈˈ ˈsü Efɛzö ˗pö waa Azi ˈˈsɛ ˈkpiidhɛ ˈgü, ˈö pë ˈö˗ pö ˗ni ˈgü bhë ꞊waa˗ ˈsü gagade ˈka. ˗Ya ˗pö ꞊dhɛ ˗zlan ˗nu ˈö mɛnbhɩɩdhe ˗nu ˗wa ˗yö ˗kë wo ˗kɔ ˈˈdhiʋ̈, ˈwaa ˗zlan ꞊dede ˈka. 27 ˗A ˗kë ˈˈdhʋ̈ ˗sü ˗dho kwa ˗bha yö ˈö yö ˗a ˗gɔ dɔ ˈya˗, ˈˈkɛɛ ˗yö ꞊mɔɔn˗ ˗bha ˈö˗ ˗kë ˈö kwa ˗bha ˗zlan dhebɔ ˈkpii˗ Atemisö ˗dhɔkë ˗a ˈgü ˗kɔ ꞊bhlëë ˗yö go ˗a ˗bha, ˈö yö ˈwo˗ gba Azi ˗sɛ ꞊gban ˈˈpɛpɛ waa ˈˈkpɔnŋtaadhɛ ˗todhʋ̈sü ˈgü bhë ˗a ˗bha ˈtɔbhɔdhe ˗gɔ ˗yö ga.» 28 ˈDhɛ ˈö gɔɔn˗ ˗nu ˈwo bhë ˈwo˗ man ˈˈdhʋ̈, ˈyö ˈwɔn ˗yö ˗shiö ˗an ˗dhɛ ˈö ˈwo ˗ya ˈˈgbla ˗sü ˗bha ˈö ˈwo˗ pö: «Efɛzö ˗mɛn ˗nu ˗bha Atemisö ꞊bhlëë ˗yö ˈkpii˗!»

29 ˈYö ˗bhluubhluudhe ˗yö ˗da ˈˈkwipö ˈö bhë ˗a ˗dhɛ ꞊gban ˈgü, ˈyö ˗an ꞊gban ˈˈpɛpɛ ˗wo ˗ya ˈdho ˗sü ˗bha ˈˈdhɛɛdhö* kö ˗wo Gayusö waa Adhitakö ˈö ˈwo go Maseduanö ˈö ˈwo ˗kë Pɔdhö ˈˈtayoo ˗nu ˈka bhë ˗an ˗gaangaanˈˈ ˗ni ˈgü ˗wo ˈdho ˗ni ˈgü ˗an ˈka. 30 ˗Yö ˗kun Pɔdhö ˈˈpiʋ̈ ꞊dhɛ ˈö ˈdho mɛn ˗nu ˈwo bhë ˗an kpö ˈgü kö ˈö dɔ ˗an ˈwëëdhö, ˈˈkɛɛ Yesu ˗bha gwëëˈˈ ˗nu wo ˈti ˈˈwɩ ˗a ˗bha. 31 Mɛn ˗nu ˈwo kun ˈwlaan˗ ˗nu waa trʋʋˈˈ ˗nu ˈwɔnyëë˗ ˗nu ˈka ˗ʒiaanwo, ˗a mɛn ˈbhaa ˗nu ˈö ˈwo kun Pɔdhö ˈˈtɔŋdë ˗nu ˈka, ˗wo mɛn ˗bɔ ˗a ˗dhɛ ˈö ˈwo ꞊bhɛɛ ˗a ˗dhɛ kö ˈyaa ˗dho ˈdho ˈˈdhɛɛdhö mü ˈö ˈwɔn ꞊slɔɔ ˗a ˈgü. 32 ˗A ˈˈtʋ̈ŋ ˈö bhë ˗a ˈgü, mɛn ˈbhaa ˗nu ˗wo ˈˈgbla ˗ni ˈgü ˗wo pë ˈbhaa pö ˗ni ˈgü, kö ˗a mɛn ˈbhaa ˗nu ˗wo ˈˈgbla ˗ni ˈgü ˈpö ˗wa ˈˈwɛɛ ˈbhaa pö ˗ni ˈgü. ˗A ˗gɛn ˗mü ꞊dhɛ ˈwɔn ꞊gban ˗yö ˗kun kaanˈˈ ˗sü ˈka ˈˈkwöö mü, ˈyö pë ˈö ˗kë ˈwo nu wo ˈkwëëdhö mü ˗a mɛn ꞊vadhɛ ˈwaa kun ˗a ˗gɛn dɔ ˗ni ˈgü. 33 ˈDhɛ ˈö ˗kë ˈˈdhʋ̈, ˈyö Alɛzandrö ˈö Zuifö ˗nu ˗wo kun ˗a ˗blü ˗ni ˈgü ˈˈdhiʋ̈ bhë, ˈwo˗ sü mɛn ˗nu ꞊zinŋgü mü ˈwo nu ˗a ˈka. ˈYö Alɛzandrö ˗yö ˈwɔn ꞊blɛɛ mɛn ˗gbaa ˈwo bhë ˗an ˗dhɛ ö ˗kɔ ˈgü kö ˗dhɛ ˗ta ˗yö ga ˗an ˗ta, kö ˈwɔn ˈö ˗kë ˈö˗ blɛɛˈˈ. 34 ˈˈKɛɛ ˈdhɛ ˈö mɛn ˗nu ˗wa yö ꞊dhɛ Zuifö ˗mü ˗a ˈka, ˈyö ˗an ꞊gban ˈˈpɛpɛ ˗wo ˗ya ˈˈgbla ˗sü ˗bha wo ˈˈkwöö ˈˈlɛlɛ ˈö ˗mɔn ꞊plɛ ˗bha ˗a ˈˈpiʋ̈ ˈö ˈwo˗ pö: «Efɛzö ˗mɛn ˗nu ˗bha Atemisö ꞊bhlëë ˗yö ˈkpii˗!»

35 ˈDhɛ ˈö ˈˈkwipö ˈö bhë ˗a ꞊kɔɔnmɛn ˈkpii˗ ˗yö pë ꞊gban ˗kë ˈö ˗dhɛ ˗ta ˗yö ga mɛn ꞊va ˈwo ˗kë mü bhë ˗an ˗ta, ˈyö˗ pö: «Efɛzö ˗mɛn ˗nu, de ˈö ˈyaa˗ ˈwɔn dɔ ꞊dhɛ mɛn ˈö ˈkwa ˗kë Efɛzö ˗mɛn ˗nu ˈka, kwa ˈnën ˈö ˈkwa ˗tɔ Atemisö ˗dhɔkë ˗a ˈgü ˗kɔ ˈkpii˗ waa˗ ˈˈbin ˈö go dhaŋ˗ ˈgü ˈö ˗puö bhë ˗a ˗maankëmɛn ˗nu? 36 ˈDhɛ ˈö ˗kë ꞊dhɛ ˈwɔn ˗nu ˈwo bhë ˗an zɔɔdhɛ ˈyaa ˈdhö, ˗ka ka zuʋ̈ˈˈ kë ˗saa, ˈkaa ˗dho ˈwɔn ˗nu kë ˗bhluubhluudhe ˈka. 37 ˗A ˗gɛn ˗mü ꞊dhɛ, mɛn ˗nu ˈö ˈka nu ˗an ˈka yö wo ˈti kwa ˗bha ˗zlan ˗dhɔkë ˗a ˈgü ˗kɔ ˗nu ꞊kwaan ɛɛnˈˈ wo ˈti ˈwɔn yaa blɛɛˈˈ kwa ˗bha ˗zlan ˈka. 38 ˈDhɛ ˈö ˈˈdhʋ̈, ˗ya kë ꞊dhɛ ˈwɔn ˈbhaa ˗yö ˗shiö ˗sü ˈka Demetriusö waa ˗piöbhɔmɛn ˗nu ˈwo˗ ꞊kee˗ bhë ˗an ˗dhɛ, za ˈˈkan ˗dhɛkpaɔyi ˗yö ˗dhö, ˈö ˈˈsɛ ꞊kɔɔnmɛn ˗nu ˈdhö ˗dhö ˈpö. ˗Wo ˈdho ˗an ˈˈdhiʋ̈ kö ˗wo wo ˈko ˗nu ˗ta ˗zɔn. 39 ˈˈKɛɛ ˗ya kë ꞊dhɛ ˈwɔn ˈˈwɛɛ ˈbhaa ˗yö mü, ka dua ˗mü ˈka ˈdho ˗a ˈka ˗a ˈˈɲanbhɔmɛn ˗nu ˗kuu ˈˈdhiʋ̈ kö ˗wa ˈˈɲan bhɔ ꞊dhɛ ˗kɔ ˈö ˈtɔŋ˗ ˗ya pö ˗a ˈka ˗a ˈdhö. 40 ˗A ˗gɛn ˗mü ꞊dhɛ ˈwɔn ˈö ˈkwa dɔ ˗a ˈka ꞊dɛɛ yö, ˗a za ꞊mɔɔn˗ ˗bha ˈö kwa kun, ˈö ˈwo˗ pö ꞊dhɛ ˈkwa ˗gban ˈˈsɛ ꞊kɔɔnmɛn ˗nu ˗gɔ, ˈyö sü ꞊dhɛ ˗zuö ˈö ˈkwa˗ dɔ ˗ni ˈgü yö ˗a dɔ ˗gɛn kpɛnŋdhö ˈö ˗dho kë kwa ˗gɔ kö ˈkwa˗ pö ˈyaa ˈdhö.» 41 ˈDhɛ ˈö ö bo ˗a pö ˈˈdhʋ̈ ˗sü ˈka, ˈyö˗ pö mɛn ꞊gban ˗dhɛ ˗wo ˈˈkan wo ˈkwëë˗.