Yesu ˗bha bɔmɛn ˗nu këwɔn ˗nu

17 ˈDhɛ ˈö ˗kë ˈˈdhʋ̈, ˈyö ˈwo bɔ Anfipolisö ˗pö waa Apolonia ˗pö ˈgü, ˈö ˈwo dho ˈwo ˗lo Tesalonikö ˗pö ˈö Zuifö ˗nu ˗bha ˗yakwëë ˗kë ˗a ˈgü ˗kɔ do ˗yö kun mü bhë ˗a ˈgü. 2 ˈYö Pɔdhö ˗yö dho ˗yakwëë ˗kë ˗a ˈgü ˗kɔ ˈö bhë ˗a ˈgü ꞊dhɛ ˗kɔ ˈö˗ ˗kë ˗a ˈka ˗kplawo bhë ˗a ˈdhö. ꞊Glooyi ˗yaaga ˈˈpiʋ̈, ˗yö ˗bɔ ˗Zlan ˗Wo ˗ta ˈö ˈwɔn yö ˈko ˈˈdhiʋ̈ mɛn ˗nu ˈwo nu mü ˗an ˗dhɛ. 3 ˗Ya ˈgü ˗pʋ ˗an ˗dhɛ ꞊dhɛ ˗a ˗dhɛ ˗kun ˗a ˗bha kö Klito ˗yö saanˈˈ ˈsü, kö ˗yö ˈgo ga ˈgü. ˗Dhɛ ˗nu ˈö kun ˗bɛnzë ˗sü ˈka ˗a ˗bha ˈˈdhʋ̈ ˗Zlan ˗Wo ˈgü ˗ya ˗zɔn ˗an ˗dhɛ, ˈö˗ pö: «Yesu ˈa˗ ˗wɔn blɛɛˈˈ ˗ni ˈgü ka ˗dhɛ bhë, yö ˈnën ˈö ˗tɔ Klito.» 4 ˈDhɛ ˈö ˗kë ˈˈdhʋ̈, ˈyö mɛn ˈbhaa ˗nu ˗wo ˗we ˗Zlan ˗wo ˗bha ˈö ˈwo kpa Pɔdhö waa Sidhasö ˗an ˗bha. Glɛkö ˗nu ꞊va ꞊dede ˈö ˈwo kun ˗Zlan ˗dhɔkëmɛn ˗nu ˈka waa dhebɔ ꞊bhlëësü ˈbhaa ˗nu ˗wo ˗we ˗Zlan ˗wo ˗bha ˈö ˈwo kpa ˗an ˗bha ˈpö.

5 ˈˈKɛɛ ꞊druɛɛ˗ ˗yö ˗da Zuifö ˈbhaa ˗nu ˈgü, ˈö ˈwo pëyaakëmɛn ˈbhaa ˗nu ˈö ˗an këyö ˈyaa ˈdhö, ˈö ˈwo kun ˗lo ˗sü ˈka ˈˈdhookwëë˗ bhë ˗an ꞊kpaa ˈkwëë˗, ˈyö ˈwo ˗ya ˗bhluubhluudhe ˗da ˗sü ˗bha ˈplöö. ˗Wo ˗dho ˈwo ˗sɔ Ʒazɔn ˗gɔ ˈkɔɔ ˈˈgbɩɩdhɛ ˈka, ˈö ˈwo ˗ya Pɔdhö waa Sidhasö ˗an mɛɛnˈˈ ˗sü ˗bha kö ˈwo ˗an ˈkun ˈwo nu ˗an ˈka mɛn ꞊gban ˗kuu ˈˈdhiʋ̈. 6 ˈDhɛ wo ˈti ˗kpan ˗an ˗bha, ˈyö ˈwo Ʒazɔn waa kwa ꞊dhegblü ˈbhaa ˗nu kun ˈˈgbɩɩdhɛ ˈka ˈö ˈwo dho ˗an ˈka ˈpödë ˗nu ˗kuu ˈˈdhiʋ̈, ˈö ˈwo ˗ya ˈˈgbla ˗sü ˗bha ˈwo˗ pö: «Gɔɔn˗ ˗nu ˈö ˈwo ˗bhluubhluudhe ˗da ˗dhɛ* ꞊gban ˈˈpɛpɛ ˈgü bhë ˗wa nu ˗wa ˗lo yö, 7 ˈyö Ʒazɔn ˗yö ö ˗kɔ ˗ya ˗an ˗dhɛŋ ˗gɔ ö ˗gɔ ˈkɔɔ. Mɛn ˗nu ˈwo bhë ˗an ꞊gban ˈˈpɛpɛ ˗wo ˗gban Sezaa ˗bha ˈtɔŋ˗ ˗nu ˗gɔ, ˈö ˈwo˗ pö ˗gblüdë ˈˈwɛɛ ˈbhaa ˗yö ˗dhö ˈö ˈwo˗ ˗dhɛ Yesu.» 8 ˈDhɛ mɛn ꞊va ˈwo kun mü waa ˈpödë ˗nu ˈwo˗ man ˈˈdhʋ̈, ˈyö ˗an zuʋ̈ˈˈ ˗yö ꞊kaan ˈˈkwöö. 9 ˈDhɛ ˈö Ʒazɔn waa mɛn ˈˈwɛɛ ˗nu ˈwo to ˗wo pë ˈö ˈpödë ˗nu ˗zokun ˗a go ˗an ˗dhɛ, ˈyö ˈwo wo ꞊kwaa ˗an ˗zü ˈwo dho.

10 ˈDhɛ ˈö ˈˈbin ˗yö mën, ˈyö kwa ꞊dhegblü ˗nu ˗wa ˈˈslö ꞊mɛɛn ˈzozodhö kö Pɔdhö waa Sidhasö ˗wo ˈdho Beedhe. ˈDhɛ ˈwo ˗lo mü, ˈyö ˈwo dho Zuifö ˗nu ˗bha ˗yakwëë ˗kë ˗a ˈgü ˗kɔ ˈgü. 11 Zuifö ˗nu ˈwo kun Beedhe bhë ˗an ˗bha ˈwɔn yö ˗kɔ ˗yö ˗kun ˗së ˈö ˗ʒiö ˗a ˈka ˗a mɛn ˗nu ˈwo Tesalonikö ˗an ˗bha ˗ta. ˗A ˗gɛn ˗mü ꞊dhɛ ˗wo wo ˗kɔ ˗ya ˗Zlan ˗wo ˗gɔ wo ꞊faan ˈka ˈgbɛ, ˈö ˗dhɛkpaɔyi ˈˈpɛpɛ ˈka ˈwo ˗dhɛ ˗ga ˗Zlan ˗Wo ˈsëëdhɛ ˈgü, ˈwo˗ ˈˈpiʋ̈ pɔn ˗së ˈka kö ˗ya kë ꞊dhɛ pë ˈwo˗ pö ˗ni ˈgü wo ˗dhɛ bhë ˗yö gagade ˈka ˈwo˗ ˈwɔn dɔ. 12 ˗A ˗wɔn ˈgü ˗a mɛn ꞊va ꞊dede ˗wo ˗we ˗Zlan ˗wo ˗bha, ˈö Glɛkö ˗nu kpö ˈgü, dhebɔ ˗nu ꞊bhlëësü ꞊va waa gɔɔn˗ ˈbhaa ˗nu ˗wo ˗we ˗Zlan ˗wo ˗bha ˈpö. 13 ˈˈKɛɛ ˈdhɛ ˈö Zuifö ˗nu ˈwo Tesalonikö ˈwo˗ man ꞊dhɛ Pɔdhö ˗yö ˗zlanwopö ˗ni ˈgü Beedhe, ˈyö ˈwo nu ˈwo ˗da mɛn ꞊va ˈˈtʋʋ kö ˗wo ˗bhluubhluudhe ˗da. 14 ˈDhɛ ˈö ˗kë ˈˈdhʋ̈, ˈyö kwa ꞊dhegblü ˗nu ˗wo go Pɔdhö ˈka ˈpödhɛ ˈö bhë ˗a ˈgü ˈzozodhö, ˈyö ˈwo dho ˗a ˈka ꞊weeyi ˈˈdhiʋ̈ ˗ʒian ˈka. ˈYö Sidhasö waa Timote ˗zë ˈwo to ˗dhɛ ˈö bhë ˗a ˈgü. 15 Mɛn ˗nu ˈwo kun Pɔdhö dɔ ˗ni ˈgü ʒiaan˗ bhë ˗wo ˗dho ˈwo ˗lo ˗a ˈka Atɛnö. ˈYö ˈdhɛ ˈwo kun wo ꞊yɛɛ kë ˗ni ˈgü, Pɔdhö ˗ya pö ˗an ˗dhɛ ˗wa pö Sidhasö waa Timote ˗an ˗dhɛ ˗wo nu ˗wo ˗kpan ö ˗bha mü ˈzozodhö.

16 ˈDhɛ ˈö Pɔdhö ˗yö kun ˗an ˈˈdhiʋ̈ ˈˈgan ˗ni ˈgü Atɛnö, ˈwɔn ˗yö ˗shiö ˗a ˗dhɛ ꞊dedewo, ˈyö sü ꞊dhɛ ˗yö ˗kpan gbapë ˗nu ˗bha ˈˈkwipö ˈö bhë ˗a ˗dhɛ ꞊gban ˈˈpɛpɛ ˈgü. 17 ˈDhɛ ˈö ˗kë ˈˈdhʋ̈, ˈyö ˗ya ˗Zlan ˗wo ˈgü ˈˈpʋ ˗sü ˗bha Zuifö ˗nu waa ˗Zlan ˗dhɔkëmɛn ˈˈwɛɛ ˗nu ˈö ˈwo kun Zuifö ˗nu ˗bha ˗yakwëë kë ˗dhɛ ˈgü bhë ˗an ˗dhɛ. ˗Ya ˈgo mü ˈzü, ˗dhɛkpaɔyi ˈˈpɛpɛ ˈka ˗yö ˗dho ˈˈdhookwëë˗ ˈö ˗Zlan ˗wo ˈgü ˗pʋ mɛn ˗nu ˈwo mü ˗an ˗dhɛ. 18 ˈˈKɛɛ ꞊klaŋ ˈˈgblʋ̈gblʋ̈ ˈbhaa ˗nu ˈö ˈwo ˗kë Epikudhö ˗wo ꞊bhlëëyamɛn ˗nu waa Sitoisiɛn* ˗nu ˈka, ˗wo ˗ya zɔɔdhe ˗man Pɔdhö ˈka ˗sü ˗bha. Mɛn ˈbhaa ˗nu ˗kun ˗a pö ˗ni ˈgü: «˗Zuöödɔmɛn ˈö yö ˗ya ˗pö ꞊dhɛ ˈö ˈˈwɩ ˗ni ˈgü ˗a ˈka yö?» ˈYö˗ mɛn ˈbhaa ˗nu ˗wa pö: «˗Yö ˗kë ꞊dhɛ ˗zlan ˗dɛɛ ˈbhaa ˗nu ˈnën ˈö ˗an ˗wɔn blɛɛˈˈ ˗ni ˈgü bhë.» ˈPë ˗kë ˈwo˗ pö ˈˈdhʋ̈ ˈyö ˗tɔ Pɔdhö ˗yö ˗kun nɔɔn˗ ˗së ˈö ˗gban Yesu waa ˗go ga ˈgü ˗sü ˗an ˗bha ˗an ˗wɔn blɛɛˈˈ ˗ni ˈgü. 19 ˈDhɛ ˈö ˗kë ˈˈdhʋ̈ ˈyö ˈwo Pɔdhö kun ˈö ˈwo dho ˗a ˈka zakandhɛ* ˈgü ˈö ˈwo˗ pö: «ˈWɔn ˗dɛɛ ˈü mɛn ˗nu ꞊klaŋ kë ˗ni ˈgü ˗a ˈka bhë, ü ꞊mɔɔn˗ ˗bha ˈü˗ ˈgü ˗pʋ yi ˗dhɛ ˗ee? 20 ˗A ˗gɛn ˗mü ꞊dhɛ ˈwɔn ˈdhɛ ˈü˗ blɛɛˈˈ ˗ni ˈgü bhë, yi ˈti˗ man do toŋtoŋdhö, yi˗ ˈˈpiʋ̈ kö ˈü˗ ˈgü ˈˈpʋ yi ˗dhɛ.» 21 ˗Wa ˗pö ˗a ˗dhɛ ˈˈdhʋ̈ ˈyö sü ꞊dhɛ Atɛnö ˗mɛn ˗nu ˈˈpɛpɛ waa ˗dhɛŋ ˗nu ˈwo nu ˈpödhɛ ˈö bhë ˗a ˈgü, ˈˈtʋ̈ŋ ˈkö yö ˈyaa ˗an ˗bha ˗a ˈka, ˗wa ˗sü ˈö ˈwo ˈwɔn ˗dɛɛ ˗nu ˈˈdoo dɔ ɛɛnˈˈ ˈwo wo ˈˈtʋ ˗to ˗an ˗bha. 22 ˈDhɛ ˈö ˗kë ˈˈdhʋ̈, ˈyö Pɔdhö ˗yö dɔ mɛn ˗nu ꞊zinŋgü zakandhɛ ˈö bhë ˗a ˈgü ˈö˗ pö:

«Atɛnö ˗mɛn ˗nu, ˈwɔn ꞊gban ˈgü ka ˗bhɔ n ˗dhɛ mɛn ˗nu ˈwo ˗suʋ̈ ˗Zlan ˗gɔ ˗an ˗bha ˈö ʒiö ˗a ˈka mɛn ˈˈwɛɛ ˗nu ˈwo to ˗an ˗ta. 23 ˗A ˗gɛn ˗mü ꞊dhɛ, ˈdhɛ ˈa kun bɔ ˗ni ˈgü ˈplöö yö, ka ˗bha pë ˗nu ˈö ˈka ˗an gba, a ˗an ˗ga ˗së ˈka. ˈˈSaabhodhɛ do ˈbhaa ˈa ˗kpan ˗a ˗bha, pë ˈö kun ˗bɛnzë ˗sü ˈka mü ˗ʒiaanwo ˈyö ˗tɔ: ‹˗Zlan do ˈö ˈyaa˗ dɔ ˗a ˗dhɔkëdhɛ ꞊nɛn.› Pë ˈö ˈkaa˗ dɔ ˈö ˈka˗ ˗dhɔkë bhë, yö ˈnën ˈa˗ ˗wɔn blɛɛˈˈ ˗ni ˈgü ka ˗dhɛ bhë. 24 ˗Zlan ˈö ˈˈkpɔnŋtaadhɛ waa ö ˈgüpë ˗nu ꞊gban ˈˈpɛpɛ ˗an ˗da, ˈö ˗kë dhaŋ˗ waa ˈˈsɛ ˗an Dëmɛn ˈka bhë, ˈyaa ˗ya ˗sü ˈka ˗a ˗dhɔkë ˗a ˈgü ˗kɔ ˗nu ˈö mɛnbhɩɩdhe ˗nu ˗wa dɔ wo ˗kɔ ˈˈdhiʋ̈ ˗an ˈgü, 25 ɛɛnˈˈ pë ˈö˗ ˗bhawɔn ˈdhö˗ ˗bha ˈyaa ˈnën ˈö ˗tɔ mɛnbhɩɩdhe ˗nu ꞊kwɛɛ˗ ˗pë. ˗A ˗gɛn ˗mü ꞊dhɛ, yö ˈnën ˈö ˗këdhösü, ˈˈtësü waa pë ˈˈpɛpɛ ˗an nu mɛn ꞊gban ˗dhɛ. 26 Yö ˈnën ˈö˗ ˗kë ˈö ˈˈsɛgɔ ꞊gban ˈˈpɛpɛ ˈgümɛn ˗nu ˗wo go gɔɔn˗ dosɛnŋ ˈgü kö ˗wo ˗tosɛta kë ˈˈsɛtadhɛ ˗todhʋ̈sü ˈgü. ˗Yö ˈˈtʋ̈ŋ waa ˗dhɛ ˈö mɛnbhɩɩdhe ˗nu dho ˗tosɛta kë ˗a ˗bha ˗a ˗naan ˗ʒiö ˈpö, 27 ˗yö kë ˈˈdhʋ̈ kö ˗wo ˗Zlan mɛɛnˈˈ. ˈYö ˈkö ˗kë ꞊dhɛ ˗wa ˗mɛɛn wo ˗kɔ ˗taataaˈˈ ˗sü ˈka, kö ˗wo ˗kpan ˗a ˗bha. ˗A ˗Zlan ˈö ˈˈdhʋ̈ ˈyaa mɛn ˈö ˈkwa yö mɛn ˈö ˈdhö ˗a ˈka ꞊gblɛɛn. 28 Yö ˈnën ˈö˗ ˈsaa˗ ˈgü ˈö ˈkwa ˗tosɛta ˗kë, ˈö ˈkwa pa kwa ꞊diëë, ˈö ˈkwa ˗kë ˗dhö. Ka ˗bha ˈˈdhikanmɛn ˈbhaa ˗nu ˗wa ˗pö ˈˈdhʋ̈ ˗ʒiaanwo. ˗Wa ˗pö: ‹Kwa ˗de ˈpö kwa˗ ˗bha ˈnën ˗nu ˈka.›

29 «ˈDhɛ ˈö ˈˈdhʋ̈, kë ˈö˗ wo ꞊dhɛ ˗Zlan ˗bha ˈnën ˗nu ˗mü kwa ˈka bhë, kwa dua ˈyaa ˗mü kö ˈkwa kwa ˗zota ꞊dhɛ ˗Zlan ˈö bhë ˗yö ꞊dhɛ pë ˈbhaa ˈö ˈˈsënŋ, ˈwëë˗ ɛɛnˈˈ ˗gwö ˈka, ˈö mɛnbhɩɩdhe ˗nu ˗wo wo ˗zo ˗ta ˗a ˈgü ˈwo˗ ˗yö ˗kë ˗a ˈdhö. 30 ˗Yö ˈˈdhʋ̈ ꞊dhɛ ˈˈdhiʋ̈ ˗be, ˈwɔn ˗nu ˗kë ö tii ˗bha ˗kɔ ꞊suu ˈö bhë, ˗Zlan ˗yö ö ˈˈɲan ˗ta ˗a ˗zü. ˈˈKɛɛ ꞊dɛɛ, ˗dhɛ ꞊gban ˈˈpɛpɛ ˈgü ˗ya pö ˗ni ˈgü mɛn ꞊gban ˈˈpɛpɛ ˗dhɛ ꞊dhɛ ˗wo ˈgo wo ˗bha ꞊sɔŋ yaa ˈgü. 31 ˗A ˗gɛn ˗mü ꞊dhɛ ˗ya ˗dhɛkpaɔyi do ˗ya kö ˈö bɔ mɛn ˈö ö ˗kɔ ˗yɛ ˗a ˗bha bhë ˗a ˗ta ˈö za dɔ ˈˈsɛ ˗ta ˗mɛn ˗nu ꞊gban ˈˈpɛpɛ ˗bha kpɛnŋdhödhɛ ˈgü. ˗Yö mɛn ˈö bhë ˗a ˗bho ga ˈgü, ˈö˗ ˗zɔn mɛnbhɩɩdhe ˈˈpɛpɛ ˗dhɛ ꞊dhɛ ˈwɔn ꞊dede ˈö ˗dho kë yö ˗mü.»

32 ˈDhɛ ˈwɔn ˈö ˗gban ˗go ga ˈgü ˗sü ˗bha ˈwo˗ man, ˈyö mɛn ˈbhaa ˗nu ˗wo ˗ya ˈˈyɩɩ ˈto ˗sü ˗bha Pɔdhö ˗bha. ˈYö˗ mɛn ˈbhaa ˗nu ˗de ˈpö ˈwo˗ pö: «Yi ˗dho yi ˈˈtʋ ˈto ü ˗bha ˈzü yi ˈˈwɛɛ ˈka kö ˈü˗ ˈbhaa blɛɛˈˈ.» 33 ˈDhɛ ˈö ˗kë ˈˈdhʋ̈ ˈyö Pɔdhö ˗yö ˗an to mü ˈö ˗ʒiö. 34 ˈˈKɛɛ mɛn ˈbhaa ˗nu ˗wo ˗ʒiö ˗a ˈˈpiʋ̈ ˈö ˈwo ˗we ˗Zlan ˗wo ˗bha. Mɛn ˗nu ˈwo ˈˈdhʋ̈, ˗a mɛn ˈbhaa ˗nu ˈnën ˈwo ˗tɔ Denisö ˈö kun zakanmɛn do ˈka zakandhɛ ˈö bhë ˗a ˈgü, dhebɔnën do ˈö ˈwo˗ ˗dhɛ Damadhisö waa mɛn ˈˈwɛɛ ˈbhaa ˗nu.