Nɔɔn˗ ˗së ˈsëëdhɛ ˈö Makö ˗ya ˗bɛnzë

13 ˈDhɛ ˈö Yesu ˗yö kun ˈgo ˗ni ˈgü ˗Zlan ˗dhɔkë ˗a ˈgü ˗kɔ ˈgü, ˈyö ˗a ˗bha gwëëˈˈ do ˗ya pö ˗a ˗dhɛ: «˗Gɔmɛn, ˗Zlan ˗dhɔkë ˗a ˈgü ˗kɔ ˈö bhë ˗wa ˗dɔ ˗së ˈka ˈdhɛ! ˗Gwö ˗nu ˈwo˗ dɔ ˗an ˈka bhë ˗an ˗bha ˗sëdhɛ ˗ga!» 2 ˈˈKɛɛ ˈyö Yesu ˗ya pö ˗a ˗dhɛ: «ˈKɔ ˗së ˗nu ˈü ˗an ˗ga ˗ni ˈgü bhë, ˗an ˗gwö dosɛnŋ ˗ʒiaan wo ˈti ˗dho ˈto ˈko ˗ta, ˗an ꞊gban ˗dho ˈwü ˈpapadhö.»

3 ˈDhɛ ˈö kun ˗ya ˗sü ˈka Olivie ˗tɔn ˗ta ˗Zlan ˗dhɔkë ˗a ˈgü ˗kɔ ˈˈtrünŋ ˈka, ˈyö Piɛɛ, Zakö, Zan waa Andre ˈwo ꞊ɲɔɔn ˗a ˈˈsuee ꞊plɛdhe ˈgü ˈö ˈwo˗ dhɛɛˈˈ kpɔ ˈwo˗ pö: 4 «Yi Dëmɛn, ˈwɔn ˗nu ˈwo bhë ˗wo ˗dho kë ˈˈtʋ̈ŋ ˗mɛɛn ˈka? Ɛɛnˈˈ ˈwɔn ˈˈpɛpɛ ˈwo bhë yi ˗dho ˗an ˈˈdhiʋ̈ ˈto ˈˈtʋ̈ŋ ˈsuaan˗ bho ˗mën ˗bha?» 5 ˈYö Yesu ˗ya pö ˗an ˗dhɛ: «˗Ka ka ˗zokë ka ˗de ˈˈpiʋ̈ kö mɛn ˈbhaa ˈya ˗dho ˈˈkpënŋ˗ kë ka ˗gɔ. 6 ˗A ˗gɛn ˗mü ꞊dhɛ mɛn ꞊vadhɛ ˗dho n ˈtɔ ˗ya wo ˗bha ˈö ˈwo nu ˈwo˗ pö: ‹Man ˈnën ˈa ˗tɔ Klito,›* ˈö ˈwo ˈˈkpënŋ˗ ˗kë mɛn ꞊vadhɛ ˗gɔ. 7 ˗Ya ˈgo mü ˈzü ˗gblü ˗ya ˗da ka ˗züzü ˗dhɛ ˗nu ˈgü ˈka˗ man, ɛɛnˈˈ ˗ya ˗da ˗dhɛ ꞊gblɛɛn ˗nu ˈgü ˈka˗ ˗tɔɔ man, ˈˈsuʋ̈ ˈya ˗dho ka kë. ˗A ˗gɛn ˗mü ꞊dhɛ ˈwɔn ˗nu ˈwo bhë ˗an dua ˗mü kö ˗wo kë ˈˈdhʋ̈, ˈˈkɛɛ yö ˈti ˗dho kë ˈˈkpɔnŋtaadhɛ ˈˈdhiʋ̈toyi ˈka ꞊köŋ.

8 «ˈˈSɛgɔ ˗nu ˗dho ˗puö wo ˈko ˗nu ˗ta ˈö ˈwo ˗gblü gɔn, ˈö ˗gblüdë ˗nu ˗wo nu wo ˈko ˗gɔ, ˈö ˈˈsɛ ˗yö ꞊zii ˗dhɛ ˗nu ˈgü ˈö ˈwo yö ˗a ˈka ˈko ˈˈpiʋ̈, ˈö din˗ ˗nu ˗wo ˗da. ˈWɔn ˗nu ˈwo bhë ˗wo ˗dho kë saanˈˈ ˗ziisü zübhodhɛ ˈka.

9 «Ka ˗zë ˗ka ka ˗zokë ka ˗de ˈˈpiʋ̈. ˗A ˗gɛn ˗mü ꞊dhɛ mɛn ˗nu ˗dho ˈdho ka ˈka zakandhɛ ˗nu ˈgü, ˈö ˈwo ka ˗man ˗yakwëë ˗kë ˗a ˈgü ˗kɔ ˗nu ˈgü. ˗Wo ˗dho ˈdho ka ˈka ˈˈsɛkɔɔnmɛn ˗nu waa ˗gblüdë ˗nu ˗kuu ˈˈdhiʋ̈ n ˗wɔn ˈgü. ˗Yö ˗dho kë ˈˈdhʋ̈ kö ˈka ka ˗bha ˗zoyödhe ˗wɔn blɛɛˈˈ ˗an ˗dhɛ. 10 ˗Ya ˈgo ˗a ˈgü ˈzü, nɔɔn˗ ˗së ˗dho pö ˈˈsɛ ꞊gban ˈˈpɛpɛ ˈgü ꞊köŋ ˗blɛɛsü, kö ˈˈkpɔnŋtaadhɛ ˈˈdhiʋ̈ ˗yö ꞊kun ˈto. 11 ˗Wa ka ˈkun kö ˈwo ˈdho ka ˈka zakandhɛ ˗nu ˈgü, pë ˈö ˈka ˗dho ˗a pö ˗a ˗zotadhe ˈya ˗dho kë ka ˗bha. ˈYö sü ꞊dhɛ pë ˈö ˈka ˗dho ˗a pö ˈˈtʋ̈ŋ ˈö bhë ˗a ˈgü, ˗yö ˗dho nu ka zuʋ̈ˈˈ ˈˈpiʋ̈. ˗A ˗gɛn ˗mü ꞊dhɛ ˈkaa ˈnën ˈka ˗dho ˈwɔn blɛɛˈˈ, ˗zuu ˈˈslʋ̈ʋ̈slʋ̈ ˈnën ˗dho bɔ ka ˗ta ˈö ˈwɔn ꞊blɛɛ. 12 ˗Ya ˈgo mü ˈzü, mɛn ˗dho ö ꞊dhegblü ˈˈdhiʋ̈ dɔ ga ˗gɔ, ˈö ˈnëndë ˗yö ö ˗bha ˈnën ˈˈdhiʋ̈ dɔ ga ˗gɔ ˈpö. ˈNën ˗nu ˗dho ˗gban wo ˗mɛn ˗nu ˗gɔ ˈö ˈwo wo ˗mɛn ˗nu zë. 13 Ka ˗san ˗dho mɛn ꞊gban ˈˈpɛpɛ kë n ˈtɔ ˗wɔn ˈgü. ˈˈKɛɛ ˈmɛn ˈö ö ˈgü dɔ ˈˈgbɩɩ˗ ˈö dho ˈö yö ˗a ˈka ˗a ˈˈdhiʋ̈todhɛ ˗bha, ˗yö ˗dho dha.

14 «ˈKa ˗kpan pë yaa ˗ɲënŋsü ˈö pë ˈgüshiʋ̈ bhë ˗a ˗bha kö ˗yö dɔ ˗sü ˈka ˗dhɛ ˈö˗ dua ˈyaa ˗mü kö ˗yö kë ˗a ˗bha bhë ˗a ˈgü, (mɛn ˈö pë ˗nu bhë ˗an ˗wo pö, ˈwɔn ˗bhokoo dɔ ˗sü ˗yö kë ˗a ˗gɔ) mɛn ˗nu ˈwo Zude ˗sɛ ˈgü, ˗wo ˗ya ꞊duëë ˗sü ˗bha ˗wo ˈdho ˗tɔn ˈˈpiʋ̈ ˗dhɛ ˗nu ˈgü. 15 Mɛn ˈö ˈkɔ ˗ta ˈˈdhuŋ, ˈya ˗dho yɔɔˈˈ ˈö ˗da ö ˗gɔ ˈkɔɔ kö ˈö pë ˈbhaa ˈsü. 16 Mɛn ˈö ˗dho kë ˈbhlaa ˈpö, ˈya ˗dho ö ꞊yɛɛ kë* ˈö nu ö ˗bha sɔ* ˈsü ˈplöö. 17 Dhebɔ ˗nu ˈwo ˗dho kë ˈgblëëdhe ˈka ɛɛnˈˈ ˈö ˈnën dho kë ˗an ˗gɔ ˈɲɔn ˗bha ˈˈtʋ̈ŋ ˈö bhë ˗a ˈgü, ˗an ˗bha ˗dho kë ˗wëësü. 18 ˗Ka bhɛɛˈˈ ˗kplawo kö ˗a ˈˈtʋ̈ŋ ˈö bhë ˈya ˗dho ˗puö ˈˈnɛnnɛn ˈˈtʋ̈ŋ ˗ta. 19 ˗A ˗gɛn ˗mü ꞊dhɛ, ˈˈklʋʋbhɔdhe ˈö ˗dho kë ˈˈtʋ̈ŋ ˈö bhë ˗a ˈgü, ˗a ꞊suu yö ˈti kë do toŋtoŋdhö ˈö go ˗a ˈka ˗Zlan ˗bha ˈˈkpɔnŋtaadhɛ ˗da ˗yi ˗bha ˈö yö ˗a ˈka ˈˈtʋ̈ŋ ˈö bhë ˗a ˗bha, ˈö˗ ˈbhaa yö ˈti ˗dho kë ˈzü ˈpö toŋtoŋdhö ˗a ˈka. 20 ˗Ya kë ꞊dhɛ Zoova yö ˈti ˗a ˗dhɛkpaɔyi ˈbhaa ˗nu bho ˗a ˗ta ˗be, mɛn ˈˈwɛɛ ˈbhaa yö ˈti ˗dho dha. ˈˈKɛɛ ˗a ˗bha mɛn ˗nu ˈö ö ˗kɔ ˗yɛ ˗an ˗bha bhë ˗an ˗wɔn ˈgü, ꞊yaa˗ ˗dhɛkpaɔyi ˈbhaa bho ˗a ˗ta.

21 «Kö mɛn ˈbhaa ˗ya pö ka ˗dhɛ: ‹˗Ka ˗dhɛ ˗ga! Klito ˗yö ˈyö,› ɛɛnˈˈ ‹˗yö ˗de,› ˈka ˗dho ˗a pö ˈka ˈdhaŋ˗ bho ˗a ˈˈdhiʋ̈. 22 ˗A ˗gɛn ˗mü ꞊dhɛ mɛn ˗nu ˈö ˈwo ˗dho wo ˗de ˗dhɛ Klito waa ˗Zlan ˗wodhiʋ̈lomɛn ꞊suasü ˗nu ˗wo ˗dho nu, ˈö ˈwo ˗dhidha ˗nu waa ˈwɔn ˈˈmlünmlünsü ˗nu ˗kë, kö ˈwo ˈˈkpënŋ˗ kë mɛn ˗nu ˗gɔ. ˗Wo ˗dho ꞊mɔɔn˗ ˗bha ˗ʒiaanwo ˈö mɛn ˗nu ˈö ˗Zlan ˗yö ö ˗kɔ ˗yɛ ˗an ˗bha, ˈwo ˗an bho ʒiaan ˗ta. 23 ˈDhɛ ˈö ˈˈdhʋ̈ ˗ka kë ka ˈsuaan˗ ˈka, ˈman ˈwɔn ˗nu ˈwo bhë ˗an ꞊gban ˈto ˈˈdhiʋ̈ ˈman˗ pö ka ˗dhɛ.

24 «ˈˈKlʋʋbhɔdhe ˈö ˈˈtʋ̈ŋ ˈö bhë ˗a ˈgü ˗ya ö bo ʒiö ˗sü ˈka, ˈɲaan˗ ˗dho dhuuˈˈ, ˈö ˗gbɔdë ˗yö ö bo ˈbhü ˗sü ˈka, 25 ˈö ˈˈsusënŋga ˗nu ˗wo go dhaŋ˗ ˗bha ˈö ˈwo ˗puö, ˈö ˈˈpiigbɩɩpë ˗nu ˈwo dhaŋ˗ ˈgü ˈwo ꞊zii. 26 ˗Ya kë ˈˈdhʋ̈, ˗wo ˗dho mɛn Gbö yö kö ˗yö nu ˗ni ˈgü ˈˈdhuu kpö ˗ta dhaŋ˗ ˈgü ˈˈpiigbɩɩdhɛ ˗ziisü waa ˈtɔbhɔdhe ˗an ˈka. 27 ˗Yö ˗dho ˈˈkiö ˗nu bɔ ˈö mɛn ˗nu ˈö ˗Zlan ˗yö ö ˗kɔ ˗yɛ ˗an ˗bha ˈˈkpɔnŋtaadhɛ ˈˈpian ˗yiishiö ꞊gban ˈgü bhë, ˈö ˗an ˗lo ˈkwëëdhö, ˈö go ˗a ˈka ˈˈsɛ züdɔdhɛ ˗bha ˈö dho ˈö yö ˗a ˈka dhaŋ˗ ˈˈdhiʋ̈todhɛ ˗bha.

28 «ˈWɔnzuan ˈö ˗gban figö ˗dhü ˗bha ˈö yö, ˗ka ˗gleŋ ˈsü ˗a ˗bha. Figö ˗dhü ˗ya ˈö ˗gböŋ ˗dɛɛ ˗ya, ˗a ˈˈdhɛ ˗ya bhɔ, kö ˗ya kë ka ˈˈɲaan ꞊dhɛ dha ˈˈyi ˈˈtʋ̈ŋ ˗ya yö ꞊klöö˗. 29 ˗Kɔ do ˈö bhë ˗a ˈka ˈpö, ˈwɔn ˗nu ˈwo bhë ˗wo kë ˗ni ˈgü ka ˈˈɲan ˗ya ˗da ˗an ˈgü, kö ˗a ˈwɔn ˗yö kë ka ˈˈɲaan ꞊dhɛ mɛn Gbö ˗ya yö ka ˗bha ˈˈkweedhi ˗bha. 30 A˗ ˗pö ka ˗dhɛ gagade ˈka ꞊dhɛ, ˈwɔn ˗nu ˈwo bhë ˗an ꞊gban ˗dho kë kö ˈˈtʋ̈ŋ ˈö bhë ˗a ˈgümɛn ˗nu ˈˈpɛpɛ wo ˈti ga ꞊köŋ. 31 Dhaŋ˗ waa ˈˈsɛ ˗wo ˗dho ʒiö, ˈˈkɛɛ n ˗wo ˗nu ˗zë, wo ˈti ˗dho ˈgo ˈˈgblʋʋ toŋtoŋdhö.

32 «˗Dhɛkpaɔyi ˈö bhë waa˗ ˈˈlɛlɛ ˗zë, mɛn ˈbhaa ˈyaa˗ dɔ. ˗Zlan ˗bha ˈˈkiö ˗nu ˈwo dhaŋ˗ ˈgü waa ˗Zlan Gbö ˈwaa˗ dɔ ˗ʒiaanwo. N Dë ˈnën ˈö ö ˗bha pë dɔ. 33 ˈDhɛ ˈö ˈˈdhʋ̈, ˗ka kë ˈwɔnsuaanbhomɛn ˗nu ˈka, ˈka ˗ya ka ˈˈɲaan, ˗a ˗gɛn ˗mü ꞊dhɛ ˈˈtʋ̈ŋ ˈö ˗Zlan ˗ya ˗ya bhë ˈkaa˗ dɔ. 34 ˗A ꞊tɛɛ ˗yö ˗kë ꞊dhɛ gɔndënën do ˈö ö ˗bha ˈkɔ to ˈö dho ˈˈta ˈgü ˗a ˈdhö. ˈDhɛ ˈö ˗dho ʒiö, ˈyö ö ˗bha ˈkɔɔ ˗wɔn ˗nu ˈˈklɔɔnbho ö ˗bha yökëmɛn ˗nu ˗bha. ˈYö mɛn ˈö ˈdhö ˗a ˗bha yö ˈö ˗dho ˗a kë ˈö˗ nu ˗a ˗dhɛ. ˈYö˗ pö ˈˈkwee ˗mankëmɛn ˗dhɛ ˗yö ˗ya ö ˈˈɲaan. 35 ˈDhɛ ˈö ˈˈdhʋ̈ ˗ka ˗ya ka ˈˈɲaan, ˗a ˗gɛn ˗mü ꞊dhɛ ˈˈtʋ̈ŋ ˈö ˈkɔdëmɛn dho nu ˗a ˈka, ˈkaa˗ dɔ. ˗Yö ˗dho nu ˈˈdooka ˗ee, ˗yö ˗dho nu gbeŋ ꞊zinŋgü ˗ee, ˗yö ˗dho nu ˗dhɛkpɔɔ ˗ta* ɛɛnˈˈ dhiapiʋ̈ ˗ee, ˈkaa˗ dɔ. 36 Ka ˈti˗ kë ˈˈdhʋ̈, ˗yö ˗dho nu ˈö ˗kan ka ˈgü kö ka yi zë ˗ni ˈgü. 37 ˈWɔn ˈa˗ blɛɛˈˈ ˗ni ka ˗dhɛ bhë, a˗ ˗blɛɛ mɛn ꞊gban ˗dhɛ: ˗Ka ˗ya ka ˈˈɲaan.»