ˈSëëdhɛ ˈö Pɔdhö ˗ya bɔ Wlɔmö ˗mɛn ˗nu ˗dhɛ
10 N ꞊dhegblü ˗nu, pë ˈö n zuʋ̈ˈˈ ˗dhɛ ˗së, ˈa ꞊bhɛɛ ꞊dedewo ˗a ˗wɔn ˈgü ˈyö ˗tɔ kö n ˗man ˈˈsɛgümɛn ˗nu ˗wo dha. 2 ˗A ˗gɛn ˗mü ꞊dhɛ pë ˈö man ꞊dede ˈa˗ yö ˈyö ˗tɔ, ˗wo ˗Zlan ˗dhɔkësü ˗wɔn ˗sü wo ꞊faan ˈka, ˈˈkɛɛ ˈwaa ˗a ˗gban ˗Zlan dɔ ˗sü ꞊dede ˗ta. 3 ˈDhɛ ˈö ˗kë ꞊dhɛ ˈwaa pë ˈö kpɛnŋdhö ˗Zlan ˈˈɲan ˈˈdhiʋ̈ ˗a dɔ, ˈö ˈwo˗ ˈˈslö ꞊mɛɛn kö ˈwo wo ˗de ˗bha ˈtɔŋ˗ ˈö ˗gban pë ˈö kpɛnŋdhö ˗a ˗bha ˗a ˗ya bhë, ˈwaa wo ˗gɔ ˈdho ˈˈshia˗ ˗a ˈdhɛ ˈö kpɛnŋdhö ˗Zlan ˈˈɲan ˈˈdhiʋ̈ ˗a ˗dhɛ. 4 ˗A ˗gɛn ˗mü ꞊dhɛ Klito ˈnën ˈö ˗tɔ ˈTɔŋ˗ ˈˈdhiʋ̈todhɛ, ˗yö kë ˈˈdhʋ̈ kö mɛn ˈˈpɛpɛ ˈö ˗zoyödhe ˈdhö ˗an ˗gɔ* ˗wo ˗mɔn ˗kë kpɛnŋdhö ˗sü ˗bha.
5 ˈWɔn ˈö ˗gban ˗kë kpɛnŋdhö ˗sü ˈdhɛ ˈwo bɔ ˗a ˈka ˈTɔŋ˗ ˗ta ˗a ˗bha bhë, Moizö ˗ya ˗blɛɛ ˈö˗ pö: «Mɛn ˈö ˈwɔn ˗nu ˈwo bhë ˗an ˗kë, ˗yö ˗dho ˗tosɛta kë ˗an ˈsaa˗ ˈgü.» 6 ˈˈKɛɛ pë ˈö ˗Zlan ˗Wo ˗ya pö ˈö ˗gban ˗kë kpɛnŋdhö ˗sü ˈö go ˗zo ˗yö ˗Zlan ˗dhɛ ˗sü ˈgü ˗a ˗bha ˈyö ˗tɔ: «ˈBhaa ˗dho ˗a pö ü zuʋ̈ˈˈ ˈˈpiʋ̈, ‹De ˈö ˗dho ˈdho dhaŋ˗ ˈgü?› ꞊Waa˗ pö ˈˈdhʋ̈ ˗a ˗gɛn ˈnën ˗tɔ, de ˈö ˗dho ˈdho dhaŋ˗ ˈgü kö ˗yö yɔɔˈˈ Klito ˈka. 7 Ɛɛnˈˈ ‹De ˈö ˗dho yɔɔˈˈ ˗gblü ˈˈkpa ˈö˗ ˈˈdhiʋ̈todhɛ ˈyaa ˈdhö bhë ˗a ˈgü?› ꞊Waa˗ pö ˈˈdhʋ̈ ˗a ˗gɛn ˈnën ˗tɔ, de ˈö ˗dho yɔɔˈˈ kö ˗yö Klito bho ga ˈgü.» 8 ˈDhɛ ˈö ˈˈdhʋ̈, ˗Zlan ˗Wo ˗ya ˗pö ꞊dhɛ ˈsa? ˗Ya ˗pö: «˗Zlan ˗bha nɔɔn˗ ˗yö ü ˈˈsuee, ˗yö ü ˈˈdhii, ˗yö ü zuʋ̈ˈˈ ˈgü,» yö ˈnën ˈö ˗tɔ «nɔɔn˗» ˈö ˗gban ˗zoyödhe ˗bha. ˗A nɔɔn˗ ˈö ˈˈdhʋ̈, yö ˈnën ˈyi˗ ˗wɔn blɛɛˈˈ ˗ni ˈgü bhë. 9 ˗A ˗gɛn ˗mü ꞊dhɛ ˈbha˗ pö mɛn ꞊gban ˈˈɲan ˈˈdhiʋ̈ ꞊dhɛ Yesu ˈnën ˈö ˗tɔ Dëmɛn, ˗ya ˈgo mü ˈbha ü ˗zo yö ˈkpakpadhö* ꞊dhɛ ˗Zlan ꞊yaa˗ bho ga ˈgü, ü ˗dho dha. 10 ˗A pö ˈa˗ wo ˈˈdhʋ̈ bhë ˗a ˈklɔɔ˗ ˗mü ꞊dhɛ, mɛn zuʋ̈ga ˈnën ˈö mɛn ˗yö ö ˗zo yö ˗a ˈka ˗Zlan ˗dhɛ, ˈö mɛn ˗yö ˗kë kpɛnŋdhö. ˈˈKɛɛ mɛn ˈˈdhi ˈnën mɛn ˗yö ˗zoyödhe ˈö ˈˈdhʋ̈ ˗a ˗wɔn ꞊blɛɛ ˗a ˈka mɛn ꞊gban ˈˈɲan ˈˈdhiʋ̈, ˈö˗ ˗mɛn ˗yö dha.
11 ˈYö sü ꞊dhɛ ˗Zlan ˗Wo ˗ya ˗pö: «Mɛn ˈˈoo ˗mɛn ˈö ˗dho ö ˗zo yö ˗a ˗dhɛ kö ˗yö ˈgo ˗a ˈgü ö ˗kɔ ˈˈfuöö ˈka ˈyaa ˈdhö.» 12 ˗A ˗gɛn ˗mü ꞊dhɛ mɛn ˈö Zuifö ˈka waa mɛn ˈö Glɛkö ˈka, ˗an ˗bho ˈko ˈˈpiʋ̈ ˗dhɛ ˈyaa ˈdhö. Mɛn ꞊gban ˈˈpɛpɛ kwa Dëmɛn ˗yö do, ˗a ˈˈgblü ˗yö ˗së, ˈö ˈwɔn ˗së ˗kë mɛn ˈˈpɛpɛ ˈwo ˗takundhe ˗dhɛ ˗a ˗gɔ* ˗an ˗dhɛ. 13 ˗A ˗gɛn ˗mü ꞊dhɛ «mɛn ˈˈoo ˗mɛn ˈö Zoova ˈtɔ pö, ˈö ˗takundhe ˗dhɛ ˗a ˗gɔ, ˗yö ˗dho dha.» 14 ˈˈKɛɛ ˗wo ˗dho ˗takundhe ˗dhɛ ˗a ˗gɔ ˗kɔ ˗kë ꞊dhɛ kö ˗zo ˗yö ˗a ˗dhɛ ˗sü ˈyaa ˗an ˗gɔ? ˗Zo ˗yö ˗a ˗dhɛ ˗sü ˗dho kë ˗an ˗gɔ ˗kɔ ˗kë ꞊dhɛ ˈpö kö wo ˈti˗ ˗wɔn man? ˗Wo ˗dho ˗a ˗wɔn man ˈpö ˗kɔ ˗kë ꞊dhɛ kö mɛn ˈbhaa yö ˈti˗ blɛɛˈˈ ˗an ˗dhɛ? 15 ˗Wo ˗dho ˗a ˗wɔn blɛɛˈˈ ˗kɔ ˗kë ꞊dhɛ ˈpö kö mɛn ˈbhaa yö ˈti ˗an bɔ?* ˗A ˗gɛn ˗mü ꞊dhɛ pë ˈö ˗bɛnzë ˗sü ˈka ˗ya ˗pö: «Mɛn ˗nu ˈö ˈwo ˈwɔn ˗së ˗nɔɔn pö ˗mɛn ˗nu ˈka, ˗an ˗gɛn ˗nu ˗wo ˗së ꞊dhɛɛ!»
16 ˈˈKɛɛ ˗an ꞊gban wo ˈti ˈˈwɩ nɔɔn˗ ˗së ˗bha.* ˗A ˗gɛn ˗mü ꞊dhɛ Izai ˗ya ˗pö: «Zoova, de ˈö ö ˗zo yö ˈwɔn ˗nu ˈö ˗an man yi ˈˈdhi* ˗an ˗dhɛ?» 17 ˗A ˗kë ˈˈdhʋ̈ ˗sü ˈgü, mɛn ˗yö ˈwɔn ˗man ꞊köŋ ˗blɛɛsü ˈyö ꞊kun ö ˗zo yö ˗a ˗dhɛ. ˈˈKɛɛ mɛn ˗ya ˈwɔn man, kö mɛn ˈbhaa ˈnën ˈwɔn ˈö ˗gban Klito ˗bha ˗a ꞊blɛɛ, ˈyö˗ man. 18 ˈˈKɛɛ dhɛɛˈˈ do ˈbhaa ˈö n ˗gɔ ˈyö ꞊nɛn: ˗A man ˈnën wo ˈti˗ wo ˗ee? ˗Wa ˗man, ˈyö sü ꞊dhɛ ˗Zlan ˗Wo ˈsëëdhɛ ˗ya ˗pö: «ˈˈKpɔnŋtaadhɛ ˗todhʋ̈sü ˈgü mɛn ˗nu ˗wo ˗an vin ˗man, ˈö nɔɔn˗ ˗nu ˈwo ˗an bɔ ˗wa ˈdho ˗wa ˗lo ˈˈsɛ ˈˈdhiʋ̈todhɛ ˗nu ˈgü.» 19 ˗Ya kë ˈˈdhʋ̈ kö ˗a ˈwɔn ˈyaa Izraɛdhö ˗mɛn ˗nu ˈˈɲaan ˈnën bhë ˗ee? ˗A ˗yɔ ˗blɛɛsü ˈö Moizö ˗ya bɔ ˈyö ꞊nɛn: «A ˗dho bɔ pë ˈö ˈyaa ˈˈsɛgɔ ˈka ˗a ˗ta, ˈa ꞊druɛɛ ˗da ka ˈgü. A ˗dho bɔ pë ˈö ˈˈsɛgɔ ˈˈwlaasü ˈka ˗a ˗ta ˈa ka zuʋ̈ˈˈ ˗da.» 20 ˈYö Izai ˗de ˈpö, ˈö ˗zlanwopö ˗zogbandhe ˈka ˈö˗ pö: «Mɛn ˗nu ˈö ˈwaa kun n mɛɛnˈˈ ˗ni ˈgü ˗wo ˗kpan n ˗bha. Mɛn ˗nu ˈö ˈwaa kun n dhɛɛˈˈ ˈkpɔ ˗ni ˈgü mɛn ˗nu ˗gɔ, ˗wa n dɔ.» 21 ˈˈKɛɛ pë ˈö˗ pö ˈö ˗gban Izraɛdhö ˗mɛn ˗nu ˗bha ˈyö ˗tɔ: «ˈˈSɛ ˈö˗ ˈgümɛn ˗nu ˈwaa ˈwɔn man, ˈö ˗an ꞊gɔɔ ˈdhö ˈˈgbɩɩ˗ bhë, a ˗gloo n ˗kɔ ˈˈpʋ ˗sü ˗bha ˗an ˗gɔ.»