ˈSëëdhɛ ˈö Pɔdhö ˗ya bɔ Wlɔmö ˗mɛn ˗nu ˗dhɛ

6 ꞊Ya kë ˈˈdhʋ̈ kö ꞊dhɛ ˈnën bhë? Kö kwa dua ˗mü ˈkwa ˈwɔn yaa kë ˗kplawo, kö ˗Zlan ˗bha ˗gasitɛ ˗kë kwa ˗dhɛ ˗sü ˈö bhë ˗yö ˗da ˈˈdhiʋ̈ ˗ee? 2 ˗Abin toŋtoŋdhö! ˈDhɛ ˈö ˗kë ꞊dhɛ ˈkwa ga ꞊sɔŋ yaa kë ˗sü ˗gɔ ˈsaadhö bhë, ˈmën ˗kë ˈö ˈkwa ˗dho ˗tosɛta kë ˈzü ꞊sɔŋ yaa ˈgü ˗kplawo? 3 Ɛɛnˈˈ ˗a ˈwɔn ˈnën ˈyaa ka ˈˈɲaan ꞊dhɛ mɛn ˈˈpɛpɛ ˈö ˈkwa bɔ ˈˈyi ꞊bhaa kö kwaa Yesu Klito kwa ˗kɔ ˗yö kë ˈwɔn do ˗bha* bhë, ˈkwa bɔ ˈˈyi ꞊bhaa ˈpö ˗a ˗bha ga ˈgü ˗ee? 4 ˈDhɛ ˈö ˈˈdhʋ̈, kwa ˗bha ˗bɔ ˈˈyi ꞊bhaa ˗sü ˈö˗ ˗bha ga ˈgü bhë, ꞊yaa˗ kë ˗wa kwaa˗ ˗nu kwa ˗wɛɛ bho. ˗Yö ˗kë ˈˈdhʋ̈ kö ˗kɔ do ˈö Klito ˗yö go ˗a ˈka ga ˈgü ˗a Dë ˗bha ˈˈpiigbɩɩdhɛ ˈˈmlünmlünsü ˈsaa˗ ˈgü bhë, kwa ˗de ˈpö ˈkwa ˗tosɛta ˗dɛɛ kë ˗kɔ do ˈö bhë ˗a ˈgü. 5 ˈDhɛ ˈö ˗kë ꞊dhɛ kwaa˗ ˗nu kwa ˗kɔ ˗yö ˗kë ˈwɔn do ˗bha ˈö ˈkwa ga ꞊dhɛ ˗a ˈdhö bhë, kwaa˗ ˗nu kwa ˗kɔ ˗dho kë ˈwɔn do ˗bha ˈpö ˈö ˈkwa go ga ˈgü ꞊dhɛ ˗a ˈdhö. 6 ˈYö ˗tɔ kwa˗ ˈwɔn ˗dɔ ꞊dhɛ mɛn ꞊suu ˈö ˈkwa kun ˗a ˈka ˈˈdhiʋ̈ ˗be bhë waa Yesu ꞊waa ˗an dɔ ˈˈdhü ˗bha, kë ˈˈdhʋ̈ kö ꞊sɔŋ yaa ˗kwi ˈö kwa ˗bha yö ˈyaa ˗dho kwa ꞊kɔɔn ˈzü, kö ˈkwa ˈgo ˈwɔn yaa ˗gɔ ꞊dhuëŋdhɛ ˈgü. 7 ˗A ˗gɛn ˗mü ꞊dhɛ mɛn ˈö ˗ya ga kö ˗a ˗bha ˈwɔn yaa ˗bhawɔn ˗ya ˈto.*

8 ˗Ya ˈgo mü ˈzü, ˗ya kë ꞊dhɛ kwaa Klito ˈkwa ga, ˗yö ga ˗sü ˈka kwa ˈgü ꞊dhɛ kwa ˗dho ˗tosɛta kë ˗a ˈˈpiʋ̈ ˈpö. 9 ˈYö ˗tɔ kwa˗ ˈwɔn ˗dɔ ꞊dhɛ ˗dhɛ ˈkö Klito ˗ya ˈgo ga ˈgü, yö ˈti ˗dho ga ˈzü toŋtoŋdhö. Ga ˗bha ˈgügbɩɩdhɛ ˈyaa˗ ˗ta ˈzüdho. 10 Ga dosɛnŋ ˈö˗ wo bhë, ˗ya ˗wo ˈˈdhʋ̈ kö ˈwɔn yaa ˗yö ˈgo ˈˈshia˗.* ˈˈKɛɛ ˗tosɛta ˈdhɛ ˈö˗ kë ˗ni ˈˈtʋ̈ŋ ˈö yö ˗a ˈgü bhë, ˗ya ˗kë ˗Zlan ˗bha ˈka. 11 ˗Kɔ do ˈö bhë ˗a ˈka, ka ˗de ˈpö ˗ka ka ˗de ˈsü ꞊dhɛ mɛn ˗nu ˈö ˗wa ga ˈwɔn yaa ˗gɔ, ˈˈkɛɛ ˈwo ˗tosɛta kë ˗ni ˈgü ˗Zlan ˗bha ˈka ˗bɔ Yesu Klito ˗ta ˗sü ˈka ˗an ˈdhö.

12 ˈDhɛ ˈö ˈˈdhʋ̈, ˈkaa ˗dho ka ꞊kwaa ˈwɔn yaa ˗zü ˈö ö ˗bha ˗gblüdëdhɛ ˗kë ka bun ˗nu ˈö ˈwo ga ˗pë ˗nu ˈka bhë ˗an ˗ta ˗kplawo, ˈö ˈka ˗an dhɔɔbhaapë ˗nu ˗kë. 13 ˈKaa ˗dho ka bun* ˗nu ˈto ꞊sɔŋ yaa ˗gɔ kö ˗wo kë ˈwɔn yaa ˗kë ˗a ˈka ˗pë ˗nu* ˈka. ˗Ka ka ˗de nu ꞊ʒiaan ˗Zlan ˗dhɛ ꞊dhɛ mɛn ˗nu ˈö ˈwo go ga ˈgü ˗an ˈdhö. ˗Ka ka bun ˗nu nu ˗Zlan ˗dhɛ kö ˗wo kë ˈwɔn ˗së ˗kë ˗a ˈka ˗pë ˗nu ˈka. 14 ˗A ˗gɛn ˗mü ꞊dhɛ ˈwɔn yaa dua ˈyaa ˗mü kö ˗yö ka ꞊kɔɔn ˈzü, ˈyö sü ꞊dhɛ ˈkaa ˈtɔŋ˗ ˗nu ꞊löö. ˈˈTʋ̈ŋ ˈö yö ˗a ˈgü, ˗Zlan ˗ya ö ˗bha ˗gasitɛ kë ka ˗dhɛ.

15 ꞊Ya kë ˈˈdhʋ̈ kö ꞊dhɛ ˈnën bhë? Kö kwa dua ˗mü ˈkwa ˈwɔn yaa kë, ˈyö sü ꞊dhɛ ˈkwaa ˈtɔŋ˗ ˗nu ꞊löö ˈzüdho, ˗Zlan ˗ya ö ˗bha ˗gasitɛ kë kwa ˗dhɛ ˗ee? ˗Abin toŋtoŋdhö! 16 ˗A ˈwɔn ˈnën ˈö ˈkaa˗ dɔ ꞊dhɛ mɛn ˈö ˈbha ü ˗de nu mɛn ˈbhaa ˗dhɛ ꞊dhɛ ꞊dhuëŋ ˈdhö kö ˈü ˈwɔn man ˗a ˗ta, kö ˈbha kë mɛn ˈü ˈwɔn man ˗a ˗ta ˈˈdhʋ̈ bhë ˗a ˗bha ꞊dhuëŋ ˈka ˗ee? Kö ˈka kë ꞊sɔŋ yaa ˗bha ꞊dhuëŋ ˈka, pë ˈö ˈka ˗dho ˗a ꞊slɔɔ ˗a ˈgü ˈyö ˗tɔ ga. ˈˈKɛɛ kö ˈka kë ˗Zlan ˗bha ꞊dhuëŋ ˈka, ˈka ˈwɔn man ˗a ˗ta, ka ˗dho kë mɛn kpɛnŋdhö ˗nu ˈka. 17 ˈˈKɛɛ kwa ˗Zlan ˈˈnuɛ ˗bho ˈyö sü ꞊dhɛ ka ˈö ˈka kun ꞊sɔŋ yaa ˗gɔ ꞊dhuëŋdhɛ ˈgü ˗be bhë, ˗wo ˗nu ˈö ˗Zlan ˗yö ka ꞊klaŋ ˗kë ˗an ˈka, ka ˗an ˗ya ˗ni ˈgü ꞊bhlëë ˈgü ka zuʋ̈ˈˈ ꞊gban ˈka. 18 ˈYö ˈdhɛ ˈö ˗kë ꞊dhɛ ˈka ˈgo ꞊sɔŋ yaa ˗gɔ ꞊dhuëŋdhɛ ˈgü bhë, ˈka kë ˈwɔn ˈö kpɛnŋdhö ˗a ˗bha ꞊dhuëŋ ˗nu ˈka. 19 A ˈwɔn ˗blɛɛ ka ˗dhɛ mɛnbhɩɩdhe ˗nu ˗bha ˈwɔn blɛɛˈˈ ˗kɔ ˈka, ka ˗bha ˗kë mɛnbhɩɩdhe ˗nu ˈwo ˈˈtëëtë ˗an ˈka ˗sü ˗wɔn ˈgü. ˗A ˗gɛn ˗mü ꞊dhɛ, ˗kɔ do ˈö ˈka ka dɔɔ˗ ˗nu ˗kë ˗dhiiwɔn waa ˈwɔn ˈö ˈyaa kpɛnŋdhö ˗an ˗bha ꞊dhuëŋ ˗nu ˈka ˗be ˈö ˈka ˈwɔn yaa ˗kë bhë, ˗kɔ do ˈö bhë ˗a ˈka, ˗ka ka dɔɔ˗ ˗nu nu ˈpö ˈˈtʋ̈ŋ ˈö yö ˗a ˈgü kö ˗wo kë ˈwɔn ˈö kpɛnŋdhö ˗a ˗bha ꞊dhuëŋ ˗nu ˈka, kö ˈka ˈwɔn ˈö ˈˈslʋ̈ʋ̈slʋ̈ ˗a kë. 20 ˈYö sü ꞊dhɛ ˈˈtʋ̈ŋ ˈö ˈka kun ˗a ˈka ꞊sɔŋ yaa ˗bha ꞊dhuëŋdhɛ ˈgü bhë, ka ˗bhawɔn ˈyaa kun ˈwɔn ˈö kpɛnŋdhö ˗a kë ˗sü ˗bha.

21 Ka këwɔn ˗nu ˈwo kun ˈˈtʋ̈ŋ ˈö bhë ˗a ˈgü, ˗an ꞊trɔɔn ˈnën ˈwo ˗tɔ ˗mën? Ka pë ˗nu ˈö ˗an ˈlëë˗ ˈdhö ka kë ˗ni ˈgü ˈˈtʋ̈ŋ ˈö yö ˗a ˈgü ˗an ˗kë. ˈYö pë ˗nu ˈwo ˈˈdhʋ̈, ˈwo dho mɛn ˈka ga ˗ʒian ˗ta. 22 ˈˈKɛɛ ˈdhɛ ˈö ˗kë ꞊dhɛ ˈka ˈgo ꞊sɔŋ yaa ˗gɔ ꞊dhuëŋdhɛ ˈgü, ˈka kë ˗Zlan ˗bha ꞊dhuëŋ ˗nu ˈka bhë, ka ˈwɔn ˗nu ˈwo ˈˈslʋ̈ʋ̈slʋ̈ ˗an kë ˗ni ˈgü. ˗A ꞊trɔɔn ˈka ˗dho ˗a ꞊slɔɔ ˗a ˈgü ˈyö ˗tɔ ˗tosɛta ˈö ˈyaa ɲën ˗a kë ˗sü. 23 ˗A ˗gɛn ˗mü ꞊dhɛ ꞊trɔɔn ˈö ꞊sɔŋ yaa ˈgü ˈyö ˗tɔ ga, ˈˈkɛɛ gbɔɔdhe ˈö ˗Zlan ˗yö bɔ kwa Dëmɛn Yesu Klito ˗ta ˈö˗ ˗kë, ˈyö ˗tɔ ˗tosɛta ˈö ˈyaa ɲën.