Gagade ˈö Biblö ˈgü ˗yö ˗yö zaŋ ˗ta ˈzü ˗kɔ ˗kë ꞊dhɛ?

Biblö ˗ya ˗to ˈˈdhiʋ̈ ˈö˗ pö ꞊dhɛ Klito ˗ya ga, mɛndraanmɛn yaa ˗nu ˗dho ꞊wlü Kletiɛn ˗nu ˈwo kun ˗kwɛ këŋ do ˗blɛɛsü ˈgü, ˗an kpö ˈgü ˈö ˈwo ˈˈdhɛ kpa gagade ˈö Biblö ˈgü, ˗a ˗ta. (Këwɔn ˗nu 20:29, 30) Pë ꞊dede ˈö ˗kë ˈyö bhë! ˗Wo mɛnbhɩɩdhe ˗bha ˈwɔndɔdhe ˗nu ꞊kaan Yesu ˗bha mɛn ꞊klaŋkëwo ˗nu ˈka. ˗A kë ˈö ˈwo˗ wo ˈˈdhʋ̈ bhë, ˈyö Klito ˗bha mɛn ꞊klaŋkëwo ˗yö go ö ˈˈgblʋʋ, ˈyö˗ yaa ˗yö nu. (2 Timote 4:3, 4) ˗Dhɛ ˈö ˈˈdhʋ̈, kwa ˗dho ˗a ˈwɔn ˗dɔ ˗kɔ ˗kë ꞊dhɛ ꞊dhɛ pë ꞊dede ˈö Biblö ˗ya pö kwa ˗dhɛ bhë, kwa ˗bhaa ˈgü man ˗kɔ ˈö ꞊dɛɛ ˗yö kpɛnŋdhö?

Zoova ˗yö ˈˈdhɛ bho gagade ˗ta ö ˈˈtʋ̈ŋ ˗bha. Zoova ˗ya ˗to ˈˈdhiʋ̈ ˈö˗ pö ꞊dhɛ ‘ˈˈtʋ̈ŋ ˗totaabhasü ˈgü, ˈwɔndɔdhe ꞊dede ˈö ˗gban ˗Zlan ˗bha ˗dho ˗pɛn.’ (Daniel 12:4) ˗Kwɛ 1870 ˈgü, gagade mɛɛnˈˈ mɛn ˗nu kpö ˈˈtɩtɩ ˗wa ˗yö ꞊dhɛ pë ˗nu ˈwo mɛn ˗nu ꞊klaŋ ˗kë ˗an ˈka ˗zlanwokɔ ˗nu ˈgü, ˈwii ˈgo Biblö ˈgü. ˗Dhɛ ˈö ˗kë ˈˈdhʋ̈, ˈyö ˗wo ˗ya mɛn ꞊klaŋkëwo ꞊dede ˈö Biblö ˈgü ˗a mɛɛnˈˈ ˗sü ˗bha. Zoova ˗yö ˗an ˗takun ˈö ˈwo˗ ꞊slɔɔ.

˗Kɔ ˈö ˈwo Biblö ꞊draan ˗a ˈka. ˗Kɔ ˈö Biblö Draanmɛn ˈwo Biblö ꞊draan˗ ˈka ˈnën ˈkwa˗ ˗kë ˗ni ˈgü ꞊dɛɛ bhë. ˗Wo ˈwɔn ˗gɔ ˗nu ˗sü do do ˈö ˈwo˗ ˈgü ˈˈdoo dɔ. ˗Wa ˗kpan Biblö ˈˈɲan ˈbha, ˈö˗ ˈgümandhɛ ˈdhö ˈˈgbɩɩ˗ ˗a ˗bha, ˗mën ˈwo˗ ˗kë? ˗Wo Biblö ˈˈɲan ˈˈwɛɛ ˈwo ˗dho ꞊mɔɔn ˗a ˗dhɛ ˈö ˈˈdhʋ̈ ˗a ˈgü ˈˈpʋ ˗sü ˗bha, ˗an mɛɛnˈˈ ˈö ˈwo ˗an ˗wo pö. ꞊Ya kë ꞊dhɛ ˗wa yö ꞊dhɛ ˗a Biblö ˈˈɲan bhë˗ ˈgümankɔ ˗yö ˗bɛ Biblö ˈˈɲan ˈˈwɛɛ ˗nu ˈwo to ˗an ˈgümankɔ ˗bha, ˈyö ˈwo˗ ˗bɛn zë. Biblö ˈˈɲan ˈbha ˈsü ˗sü kö ˗wa ˈˈwɛɛ ˈbha ˈgü ˈˈpʋ̈ ˗a ˈka bhë, ˗yö ˗an ˗takun kö gagade ˈö ˗gban ˗Zlan ˈtɔ waa˗ ˗bha ˗Gblüdëdhɛ, pë ˈö˗ ˈˈpiʋ̈ ˈˈsɛ waa mɛnbhɩɩdhe ˗nu ˗bhaa ˈka ˗an ˗bha bhë, ˗wa dɔ. ˗Yö ˗an ˗takun ˈzü ˈö ˗wo gagade ˈö ˗gban mɛn ˗nu ˈö ꞊wa ga waa ˗go ga ˈgü ˗sü ˗bha, ˗an dɔ. ˗An ˗bha gagade mɛɛnˈˈ ˗sü ˗ya ˗kë ˈö ˈwo go ˗zoyödhe yaa waa këkɔyaa ˗nu ˗gɔ ˈˈgan ˈgü.—Zan 8:31, 32.

˗Kwɛ 1879 ˈgü, Biblö Draanmɛn ˗nu ˗wa ˗yö ˈpö ꞊dhɛ ˗a ˈˈtʋ̈ŋ ˗ya ˗wo kö gagade bhë, ˗wa ˈgü ˈˈpʋ mɛn ꞊gban ˗dhɛ. ˗A ˗wɔn ˈgü, ˈyö ˈwo ˗ya ˈˈsu ˗bha ˈsëëdhɛ ˗be ˈnën ˈwo˗ ˗dhɛ La Tour de Garde annonce le Royaume de Jéhovah bhë, ˗a ˗pë ˗kë ˗sü ˗bha. ˈSëëdhɛ ˈö bhë yi ˗tun ˗a nu ˗ni ˈgü mɛn ˗nu ˗dhɛ ꞊dɛɛ. ꞊Dɛɛ, yi gagade ˗nu ˈwo Biblö ˈgü, ˗an ˗wɔn ꞊blɛɛ mɛn ˗nu ˗dhɛ ˗wo ˗nu ˈwo ꞊mɔɔn ˗wo 750 ˗bha, ˗an ˈgü ˈˈsɛ ˈö ʒiö ˈˈsɛ 240 ˗ta, ˗an ˈgü. ˗Wɔndɔdhe ꞊dede ˈö ˗gban ˗Zlan ˗bha ˗ya ˗pɛn ꞊dedewo ꞊dɛɛ!

• ˗Dhɛ ˈö Klitö ga, ˗mën ˈö mɛn ˗nu ˈwo˗ ˗kë gagade ˈö Biblö ˈgü, ˗a ˈka?

• Gagade ˈö Biblö ˈgü ˗yö ˗yö zaŋ ˗ta ˈzü ˗kɔ ˗kë ꞊dhɛ?