DHƐƐˈˈ 7

˗Wa n ˗blü ˈˈɲangüyaa kë ˗sü ˗bha, ˗mën ˈa ˗dho ˗a kë?

˗MËN ˈÖ ˗KË DHƐƐˈˈ BHË, ˈÖ˗ ˗WƆN ˈDHÖ ˈˈGBƖƖ˗?

Pë ˈü ˗dho ˗a kë, ü ˗dho ˗a ˈgüwɔn ꞊slɔɔ ü ˗bha ˗dhɛkpaɔ dhiaˈˈ ˈgü.

˗MËN ˈÜ ˗DHO ˗A KË?

˗Bhö ü ˗zota ˈwɔn ˈö yö, ˗a ˈgü: Elɛnö waa Zan ˗wo wo ˈko ˗dɔ ˗a ˈˈsu ˗ya ꞊mɔɔn ˈˈsu ꞊plɛ ˈˈkpaan ˗bha, ˈˈkɛɛ Elɛnö ˗yo ö ˗de ˈgü ꞊dhɛ ˈpë ˈwo wo ˈko dɔ ˈö˗ ˗dhɛ ˗ya ˗gɔɔ ˗a ˈdhö. ˗Wo nɔɔn˗ ˗nu ˗bɔ wo ˈko ˗dhɛ yi ꞊gban ˈˈpɛpɛ ˈka, ˈö ˈwo ˗gɔɔ telefɔnö ˈˈdhiʋ̈. ˗A ˗de ˗ʒian mɛn do ˗ya ˗ya ˈwɔn blɛɛˈˈ ˗sü ˗bha, ˗a ˈˈtɔŋdë ˗ya ˈˈdhiʋ̈to ˗a ˗dhɛ. ˈˈKɛɛ ˈˈdoo dɔ ˗sü ˈˈkpaan ˈyaa Zan ˗zokun ˈzü.

ˈˈSu ꞊plɛ ˈwo ˗ʒiö yö ˗an ˈgü, Elɛnö waa Zan ˗wo ˈwo ˈko ˗kɔ ˗nu ˗kun, ˈö ˈwo wo ˈko ˈˈkpɛnŋ ˗nu bhü ˗nuwo. Elɛnö ˈyaa ˈˈpiʋ̈ kö ˈwo ˈdho ˈwɔn bhë, ˗a ˈka ꞊gblɛɛn ˈzü. ˈˈKɛɛ ˈyaa ˈˈpiʋ̈ ˈpö kö waa Zan ˈwo ˗shiö. Mɛn ˈbha ˈö ˗dho ˗a kë kö ˗yö ö ˗de yö ˗së ɛɛnˈˈ ˈˈgian, kö ˗yö ˗ʒiö ˗a ˈka Zan ˗ta, ˈyaa ˗dhö. ‘꞊Ya ˈgo mü ˈzü, ˗ya ˗pö ꞊dhɛ waa Zan ˗an ˗dhɔ ˗yö wo ˈko ˗kë ꞊dedewo...’

˗Ya kë ꞊dhɛ ˈbha ꞊mɔɔn gwan ˈkpɔ ˗sü ɛɛnˈˈ dhe ˈsü ˗sü ˗bha, ˈyö ˈü Elɛnö ˈˈgblʋʋ ˈgü, ˗mën ˈü ˗dho ˗a kë?

ˈDUANNU, ˈÜ Ü ˗ZOTA!

Sɔ ˈbha ˈwo˗ kë ˗ni ˈgü shifɔn ˈka. — Dhe waa ö ꞊gɔn ˗an ˗bha sɛɛˈˈ ˗kë do ˗sü, ˗yö gbɔɔ ˈö ˗Zlan ˗ya ˗kë ˗an ˗dhɛ, ˗a ˈka. ˈˈKɛɛ mɛn ˗nu ˈö ˈwii wo ˈko ˈsü ꞊köŋ ˗wa wɔ wo ˈko ˈˈpiʋ̈, ˗wo gbɔɔ bhë, ˗a ˗shiö. ˗Yö ˗kë ꞊dhɛ sɔ ˈwo gbɔɔ kë ü ˗gɔ, ˗a ˈsü˗sü kö ˈü˗ ˗kë shifɔn ˈka, ˗a ˈdhö.

꞊Ya kë ꞊dhɛ ˈbha kë ˈˈdhü ꞊gbinŋ, ˈbha˗ pö ˈü ꞊wlö ꞊dhɛ ˗maannën ˈdhö, ü ˗dho pë ˈˈdhiʋ̈ kë ü ˗de ˈka. ˗Kɔ do bhë˗ ˈka ˈpö, ˈtɔŋ˗ ˈö ˗kë: ‘˗Ka ka ˗dɩ ˈkun [ˈˈɲangüyaa] kë ˗sü [...] ˗gɔ’ ˈka bhë, ˈbha˗ ꞊lö ˈgü, ü ˗dho ˈwɔn yaa kë ü ˗de ˈka.—1 Tesadhonikö 4:3.

ˈBha ˈtɔŋ˗ bhë˗ ꞊lö ˈgü, ˗mën ˈü ˗dho ˗a ꞊slɔɔ? Biblö ˗ya ˗pö: “Mɛ ꞊ya ꞊sɔɔn kë kö ꞊ya ꞊sɔɔn yaa kë ö ˗de bun ˈka.” (1 Kodhɛngtö 6:18) ˗A ˗gɛn ˈtɔ˗ ˗mën?

ˈWɔndɔmɛn ˗nu ˗wa ˗pö ꞊dhɛ wlüünën ꞊vadhɛ ˈwo ˗pö ˗sɔŋ yaa bhë, ˗a ˈgü kö ˈwi ˈdho ꞊köŋ gwaan˗ ɛɛnˈˈ ko ˈwii dhe ˈsü ꞊köŋ, pë ˈwo˗ ꞊slɔɔ ˗a ˈgü ꞊nɛn:

ˈˈKLƲƲBHƆDHE. Wlüünën ꞊vadhɛ ˈwo ˈˈɲangüyaa ˗kë ˈˈkɛɛ kö ˈwi ˈdho ꞊köŋ gwaan˗ ɛɛnˈˈ kö ˈwii dhe ˈsü ꞊köŋ, ˗an zuʋ̈ˈˈ ˈˈklʋʋ ˗yö ˗bhɔ.
ˈWII WO ˗ZOYÖ WO ˈKO ˗DHƐ ˈZÜ. ˗Dhɛ ˈö ˈwo wo bo ˈˈɲangüyaa kë ˗sü ˈka, mɛn ˈö ˈdhö ˗yö ö ˗de dhɛɛˈˈ ˗kpɔ ꞊dhɛ: “Waa dö ˈbha ˈö ˗wa ˈˈɲangüyaa kë ˗be?”
ˈGÜGADHE. ˈNëndhiëŋ ꞊vadhɛ ˗zë, mɛn ˈö ˗dho ö ˗zokë ˗an ˈˈpiʋ̈, ˈö ˈyi ˈdho trʋʋˈˈ kë ˗an ˈka, ˈnën wo˗ ˈˈpiʋ̈. ˈYö ˈnëngɔɔnnën ꞊vadhɛ ˗de ˈpö ˈwo˗ pö ꞊dhɛ ˈnëndhiëŋ ˗nu ˈö ˈwo ˗we ˗an ˗bha ˈwɔn ˗bha ˈˈvaandhö bhë, ˗an ˗dhɔ ˈyaa ˗an kë.
˗A yaa ꞊dede ˈö˗ ˈgü. ꞊Ya kë ꞊dhɛ ˈbha ˈˈɲangüyaa kë ˈˈkɛɛ kö ˈbhi ˈdho gwaan˗ ɛɛnˈˈ ˈbhii dhe ˈsü ꞊köŋ, kö ˗dhii ˈnën ˈü˗ ˗ya ü ˗de ˗bha bhë. (Wlɔmö 1:24) Ü bun ˗yö ꞊bhlëësü, ˈbha ˈdho ˗dhii ˗ya ˗a ˗bha.

˗Bhö ˗a ˗zɔn ꞊dhɛ ü ꞊mɔɔn˗ ˗bha ‘ˈü ü ˗dɩ ˈkun [ˈˈɲangüyaa] kë ˗sü ꞊në˗ ˗gɔ.’ (1 Tesadhonikö 4:3) ˈBha dhe ˈsü ɛɛnˈˈ ˈbha ˈdho gwaan˗ yi ˈbha ˈka, kö kaa ü ꞊gɔn, ka -bha sɛɛˈˈ ꞊mɔɔn˗ ˗bha kö ˗yö kë do, ˈö ü zuʋ̈ˈˈ ˈyaa ˗za dɔ ü ˗bha.—Proverbes 7:22, 23; 1 Kodhɛngtö 7:3.

Ü˗ ˗YÖ ˗KƆ ˗KË ꞊DHƐ?

Mɛn ˈö ü ˗dhɔ ˗ya ˗kë ꞊dedewo ꞊mɔɔn˗ ˗bha kö ˗yö ü ˗da ˈwɔn ˈgü ˗ee?
Mɛn ˈö ü ˗dhɔ ˗ya ˗kë ꞊dedewo ꞊mɔɔn˗ ˗bha kö ˗yö kaa Zoova ka ˗bha ˈˈtɔŋdëdhɛ shiʋ̈ˈˈ ˗ee?—Eblö 13:4.

ˈNËNDHIËŊ DOSƐNŊ ˗NU ˗BHAA ˗MÜ

ˈNëngɔɔnnën ꞊vadhɛ ˗wa ˗pö ꞊dhɛ ˈnëndhiëŋ ˗nu ˈö ˗wa wɔ ˗an ˈˈpiʋ̈ ˈsaadhö bhë, ˈwi ˈdho ˗an ˈsü dhe ˈka ˗toŋtoŋdhö. ˗Mën ˈö ˗kë? ˈYö ˈtɔ˗ ꞊dhɛ dhebɔ ˈö ˈyaa gɔɔn˗ ˗wɔn dɔ ˈnën ˈö ˗an ˗dhɛ ˗së.

Pë ˈwo˗ pö bhë ˗a ˗wɔn ˗yö ü ˗kun, ɛɛnˈˈ ˗yö ˗mën ü ˈka ˗ee? ˗Dhɛ ˈö ˈˈdhʋ̈, ˗bhö ü ˗zo ˈto ˈwɔn yö ˗a ˈˈpiʋ̈: Tele waa ˈsëëdhɛ ˗nu ˗wo mɛn ˗nu ˈö ˗wo ˈti wo ˈkö ˈsü ꞊köŋ, ˗an ˗bha sɛɛˈˈ ˗kë do ˗sü ˗zɔn ꞊dhɛ pë ˗së ˈdhö. ˗A ˗de ˗ʒian ˗wa ˗zɔn ꞊dhɛ ˗dhɔ ꞊dede ˈdhö.

ˈˈKɛɛ ˈbha ˈdho ˗a ˈsü gagade ˈka! Mɛn ˗nu ˈwo˗ ˈˈpiʋ̈ kö kaa˗ ˗nu ˈka ˈˈɲangüyaa kë bhë, ˗wo wo ˗zota wo dosɛnŋ ˈnën wo ˗wɔn ˈgü. —1 Kodhɛngtö 13:4, 5.

ˈNËNGƆƆN˗ DOSƐNŊ ˗NU ˗BHAA ˗MÜ

꞊Ya kë ꞊dhɛ kaa mɛn ˈbha ka ˈˈtɔŋdëdhɛ ˗bha, ˗bhö ü ˗de dhɛɛˈˈ ˈkpɔ ꞊dhɛ: “A n ˗zota n ˈˈtɔŋdhe ˗wɔn ˈgü ꞊dedewo ˗ee?” ꞊Ya kë ꞊dhɛ ˈbha˗ ˗yɔ bɔ ꞊ii, ü ˗dho ˗a ˗zɔn ˗a ˗dhɛ ˗kɔ ˗kë ꞊dhɛ? ˗Bhö ü ˈgü dɔ ˈˈgbɩɩ˗ kö ˈü ˗Zlan ˗bha ˈtɔŋ˗ ˗nu ˗ya ꞊bhlëë ˈgü. ˗Bhö ü ˗de ˗zɔn ˈkpaakpa ˗kan pë ˗nu ˗wo ˗dho ka ˗blü ˈˈɲangüyaa kë ˗sü ˗bha bhë, ˗an ˗bha ˗sü ˈka. Ü ˗bha ˗dhɔ ˗yö ü ˗blü kö ˈü ü ˗zota ˗a ˗wɔn ˈgü.

ˈˈKlʋʋsë ˗nu ˈwo bhë, ˗wa kë ü ˗gɔ, ü ˈˈtɔŋdhe ˗dho ö ˗de yö ˗së ꞊dhɛ Shunɛmö ˈnëndhiëŋ ˈdhö. ˗Yö ˗dho ˗a pö: “N dhɔɔbhaamɛn ˗yö n ˗gɔ. ˈYö man ꞊dee ˈa˗ ˗gɔ.” (Chant de Salomon 2:16) Ü ˗dhɔ ˗dho ˗a kë ꞊dedewo!