DHƐƐˈˈ 9

N dua ˗mü kö ˈa n ˗zoyö pë ˗nu ˗bha ˈˈgla ˗sü ˗dhɛ ˗ee?

˗MËN ˈÖ ˗KË DHƐƐˈˈ BHË, ˈÖ˗ ˗WƆN ˈDHÖ ˈˈGBƖƖ˗?

꞊Ya kë ꞊dhɛ pë ˗nu ˗wo ˗gla wo ˗de ˈka, kö ˗tosɛta ˗gɛn kpɛnŋdhö ˈyaa ˈdhö. ˈˈKɛɛ ꞊ya kë ꞊dhɛ ˗Zlan ˈnën kwa ˗da, kö kwa ꞊mɔɔn˗ ˗bha ˈkwa dhɛɛˈˈ ˗nu ˈwo ˗gban kwa ˗bha ˗tosɛta waa kwa ˗bha ˗dhɛkpaɔ dhiʋ̈ˈˈ ˗nu ˗bha, ˗an ˗yɔ ˈwo ˗dho kwa ˗zokun, ˗an ꞊slɔɔ.

˗MËN ˈÜ ˗DHO ˗A KË?

˗Bhö ü ˗zota ˈwɔn ˈö yö, ˗a ˈgü: Pë ˈö Amɛdhö dhö ö ˗zoyö ˗a ˗dhɛ ˈyaa˗ dɔ ˈzü. ˗A ˗bhaa ˈka ˗be, ˗Zlan ˗yö ˗dhö, ˈö yö ˈnën pë ˗nu ˗da. ˈˈKɛɛ ꞊dɛɛ ˗a ˗bha ꞊klaŋgɔmɛn ˗ya ˗pö ꞊dhɛ ˈwɔngɛnmɛɛnmɛn ˗nu ˗wa ˗pö ꞊dhɛ pë ˗nu ˗wo ꞊gla wo ˗de ˈka. Amɛdhö ˈyaa ˈˈpiʋ̈ kö mɛn ˗nu ˗wo ö yö ꞊dhɛ ˗tamamɛn ˈdhö. ˈGo mü ˈzü, ˗ya ˗pö ö ˗de ˗dhɛ ꞊dhɛ ꞊ya kë ꞊dhɛ ˈwɔngɛnmɛɛnmɛn ˗nu ˗zë ˗waa pö pë ˗nu ˗wo ˗nu wo ˗de ˈka, dö ˗mü ˗a ˈka kö ˗ya pö ꞊sua ˗mü?

Ü ˗kë Amɛdhö ꞊duɛ ˈgü ˗be, ˗a pö ˗a pö ˈö ˈwo˗ wo ˈsëëdhɛ ˗nu ˈgü ꞊dhɛ pë ˗nu ˗wo ˗nu wo ˗de ˈka bhë, ü ˗dho ˗a sü gagade ˈka ˗ee?

ˈDUANNU, ˈÜ Ü ˗ZOTA!

Mɛn ˗nu ˈwo˗ pö ꞊dhɛ pë ˗nu ˗wo ꞊gla wo ˗de ˈka waa mɛn ˗nu ˈwo˗ pö ˈpö ꞊dhɛ ˗Zlan ˈnën pë ˗nu ˗da bhë, ꞊ya kë ˗nuwo pë ˈwo˗ pö bhë, pë ˈö ˗kë ˈwo wo ˗zoyö ˗a ˗dhɛ ˈwaa ˗gɛn dɔ.

Mɛn ˈbha ˗nu ˗wo wo ˗zoyö pë ˗da ˗sü ˗dhɛ ˈyö ˈtɔ˗ ꞊dhɛ ˗wa pö ˗an ˗dhɛ ˈˈdhʋ̈ ˗zlanwokɔ ˗nu ˈgü.
Mɛn ˈbha ˗nu ˗wo wo ˗zoyö pë ˗bha ˈˈgla ˗sü ˗dhɛ ˈyö ˈtɔ˗ ꞊dhɛ ˗wa ˗zɔn ˗an ˗dhɛ ꞊klaŋkɔɔdhö.

Mɛn ˈö˗ pö ꞊dhɛ pë ˗Damɛn ˈyaa ˈdhö, kö ˗ya ˗pö ꞊dhɛ ˈkɔ ˈö yö ˗a dɔmɛn ˈyaa ˈdhö.

DHƐƐˈˈ ˈˈSƆƆDO ˈÜ ˗DHO Ü ˗ZOTA ˗AN ˈGÜ

Biblö ˗ya ˗pö: “ˈKɔ ˈˈpɛpɛ kö ˈdhö, mɛ ꞊në˗ ꞊gban dɔ, ˈsa ˗Zlan ꞊në pë ꞊gban ˈˈpɛpɛ ˗da.” (Eblö 3:4) ˗Wo ˈö bhë, ˗a ˗dhɛ ˗ya ˗bha kö ˈkwa kwa ˗zoyö ˗a ˗dhɛ ˗ee?

ˈNëngɔɔnnën do ˈö ˈkɔ ˈbha ˗ga ˗ni ˈgü — Mɛn ˈö˗ pö ꞊dhɛ pë ˗Damɛn ˈyaa ˈdhö, kö ˗ya ˗pö ꞊dhɛ ˈkɔ ˈö yö ˗a dɔmɛn ˈyaa ˈdhö.

ˈPË ˈWO˗ PÖ: Pë ˈbha ˈnën ˗pöö ˈyö pë ˈˈpɛpɛ ˈwo ˈˈkpɔnŋ ꞊taa ˈwo go ˗a ˈgü.

1. De ɛɛnˈˈ ˗mën ˈö pë ˈö ˈˈdhʋ̈, ˗a ˗pöö?

2. Pë ˗nu ˗wo ˗nu wo ˗de ˈka, ɛɛnˈˈ mɛn ˈbha ˈnën ˗an ˗da. ˗A ˗mɛɛn ˈö bhɔ gagade ˗bha?

ˈPË ˈWO˗ PÖ: Mɛnbhɩɩdhe ˗nu ˗go wü ˗nu ˈgü.

3. ꞊Ya kë ꞊dhɛ mɛnbɩɩdhe ˗nu ˗go ˗kwlëë ˈgü, ˗mën ˈö ˗kë ˈö waa ˗kwlëë ˗nu ˗an ˗bha ˈwɔndɔdhe ˈyaa do?

4. ˗Mën ˈö ˗kë ˈö pëbhɩɩdhe ˗nu ˈˈtɩɩsü ˈö ˗dhö, ˈö˗ ˗bha ˗këdhösü ˈgüman ˗dhɛ ˈdhö ˈˈgbɩɩ˗?

ˈPË ˈWO˗ PÖ: Pë ˗nu ˗bha ˈˈgla ˗sü ˗yö ˈwɔn ꞊dede ˈka.

5. Mɛn ˈö˗ pö ꞊dhɛ pë ˗nu ˗bha ˈˈgla ˗sü ˗yö ˈwɔn ꞊dede ˈka bhë, yö ꞊dede ˗yaa ˗dhɛ yö do ˗ee?

6. Mɛn ˗nu ˈwo˗ pö ˗an ˗dhɛ ꞊dhɛ ˈwɔndɔmɛn ˗nu ꞊gban ˈˈpɛpɛ ˗wo wo ˗zoyö pë ˗nu ˗bha ˈˈgla ˗sü ˗dhɛ bhë, ˗a mɛn ꞊dhɛ ˈwo wo ˗zoyö ꞊klaŋwo ˈö ˈˈdhʋ̈, ˗a ˗dhɛ?

“꞊Ya kë ꞊dhɛ ü ˈˈglü ˗ni ˈgü ˈˈblü kpö ˈbha ˈgü, ˈbha ˗kpan ˈkɔ ˗së do ˈbha ˗bha, ü ˗dho ˗a pö ꞊dhɛ ˈˈdhü ˗nu ˗wo ˗pö wo ˗de ˈka ˈwo ˗kë ˈkɔ ˈka ˗ee? ˗Abin! ˗Dhɛ ˈö ˈˈdhʋ̈, kö kwa dua ˗mü kö ˈkwa kwa ˗zoyö ꞊dhɛ pë ˈˈpɛpɛ ˈwo ˈˈkpɔnŋ ꞊taa, ˗wo ˗nu wo ˗de ˈka ˗ee?”—Ivɔnö.

“˗Bhö ü ˗zota ˈwɔn ˈö yö, ˗a ˈgü: Mɛn ˈbha ꞊ya ˗pö ü ˗dhɛ ꞊dhɛ pë ˈbha ˗ya püʋ̈ˈˈ ˈsëëdhɛ ˗bɛnzëdhɛ ˈgü. ˗Dhɛ ˈö ˗pöö, ˈyö pë ˗bɛnzë ˗a ˈka ˈˈyi ˗yö ˗pɛn ˗kɔ ˈˈbhaŋ waa plafɔɔn ˗nu ˗bha, ˈö yö ˈnën ꞊gla ˈgü ˈsëëdhɛ ˗be ˗nu ˈka, ü ˗dho ˗a yö gagade ˈka ˗ee?”—ˈGuëë.

˗MËN ˈÖ ˗KË ˈÜ ˗DHO Ü ˗ZOYÖ ˗ZLAN ˗DHƐ?

Biblö ˗yö ü ꞊faan ˗mën kö ˈü ˈwɔn ˗nu kë ‘ü ˈˈyaaki ˈka.’ (2 Timote 1:7) ꞊Ya ˗zɔn ꞊dhɛ ü ˗bha ˗zoyödhe dua ˈyaa ˗mü kö ˗yö ˗gban

Ü ZUƲ̈PIƲ̈WƆN (N ˗maan ˈka ꞊faan ˈˈpiigbɩɩsü ˈbha ˗yö ˗dhö.)
PË ˈÖ MƐN ˈˈWƐƐ ˗NU ˗WA PÖ (A ˗zlanwo ˈgü.)
MƐN ˈˈGBƖƖDHƐBHOSÜ (N ˗mɛn ˗nu ˗wa ˗pö ˗Zlan ˗yö ˗dhö, n dua ˗mü kö ˈa n ˗zoyö ˗a ˗dhɛ.) ˗an bha.

Ü ˗bha ˗zoyödhe ˗gɛn kpɛnŋdhö dua ˗mü kö ˗yö kë ˗dhö.

“ˈMan kë ꞊klaŋkɔɔdhö, n ˗bha ꞊klaŋgɔmɛn ˈö mɛn ˗dhü ˗wɔn blɛɛˈˈ ˗ni ˈgü, ˗yö ˗ga n ˈgü ꞊dedewo ꞊dhɛ ˗Zlan ˗yö ˗dhö. Mɛn ˗dhü dɔ ˈö ˗dhö, ˗a ˗bha yö ˈö˗ ˗kë ˗yö ˗dhö. ˈYö ꞊ya kë ˗nuwo ˈwo yö kë ˗ni ˈgü, ˈkwaa˗ ˗bhokoo ˗ʒian yö. ˗Kɔ ˈö ˗Zlan mɛnbhɩɩdhe ˗dhü kë ˗a ˗bha, ˗yö ˈˈmlümlüsü ꞊dedewo.”—Tedhɛzö.

“꞊Ya kë ˗nuwo ˈman ˈkɔ ˈˈgblʋ̈gblʋ̈, ˈˈyitagɔ ˈˈkpii˗ ɛɛnˈˈ gɔ ˗nu yö, a n ˗de dhɛɛˈˈ ˗kpɔ ꞊dhɛ “De ˈö pë ˈö yö ˗a ˗yö ˗kë?” Mɛnbhɩɩdhe ˈö ˈwɔndɔdhe ˈdhö˗ ˗gɔ ˈnën ꞊mɔɔn˗ ˗bha kö ˗yö gɔ ˗yö kë, ˈyö ˈtɔ˗ ꞊dhɛ, pë ˈsɛɛn˗ ˗nu ˈwo˗ ˈgü ˗an ꞊gban dua ˗mü kö ˗wo yö kë wo ˈko ˗bhaa kö ˗a gɔ ˗yö ꞊mɔɔn ʒiösü ˗bha. ˗Dhɛ ˈö ˈˈdhʋ̈, ꞊ya kë ꞊dhɛ mɛnbhɩɩdhe ˈnën gɔ yö ˗kë kö mɛn ˗nu ˗de ˈpö, ˗an damɛn ˈyaa ˈdhö ˗ee?”—Bɛnzamɛn.

“ˈWɔn ˗nu ˈwo ˗gban ˈˈkpɔnŋtaapë ˗nu ˗bha, a ˗an draanˈˈ ˗ni ˈgü ˈgbɛ, ˈwɔn ˈö ˗gban pë ˗nu ˗bha ˈˈglasü ˗bha bhë, ˈyaa bhɔ n ˗dhɛ ˈzü gagade ˗bha. N ˗maan ˈka ˗zoyödhe ˈö mɛn ˗bhawɔn ˈdhö˗ ˗bha kö mɛn ˗yo ö ˗zöyö pë ˗bha ˈˈgla ˗sü ˗dhɛ, ˗yö ʒiö ˗zoyö pë ˗Damɛn ˗dhɛ ˗sü ˗bha ˗zoyödhe ˗ta.”—Antuanö.

˗BHÖ Ü ˗ZOTA

꞊Klaŋ ˈˈgblʋ̈gblʋ̈ këmɛn ˗nu ˗wa pë ˗nu ˗bha ˈˈgla ˗sü ˗gɛn mɛɛnˈˈ ˗kwɛ ˗kɔŋ ꞊va ˈˈpiʋ̈, ˈˈkɛɛ pë ˈö ˗an ꞊gban ˗wo yöö ˈto˗ ˗bha do, ˈwii ˗a ꞊slɔɔ ꞊köŋ. ˈWɔn ˈö ˗gban pë ˗bha ˈˈgla ˗sü ˗bha bhë, ꞊ya kë ꞊dhɛ ꞊klaŋ ˈˈgblʋ̈gblʋ̈ këmɛn ˗nu ˈö wo ˗zë, ˈö ˗an dua ˈdhö ˗mü kö ˗wo kë ˗a ˈgümanmɛn ˗nu ꞊blɛɛsü ˈka, ˗an ˗wo ˈyii ꞊mɔɔn ˗a ˈgü, ˗mën ˈö ˗kë ˈö kwa ˗zë kwa ˗dho kwa ˗zoyö ˗a ˗dhɛ ˗ee?