˗Dhidha ˈö ˗gban ꞊weeyi ˗zɔɔndhö ˗bha

˗Dhɛ ˈwo˗ pö Fadhaɔn ˗dhɛ ꞊dhɛ Izraɛdhömɛn ˗nu ˗wa ˈgo Ezitö, ˗yö ˗to ˈˈshia˗ mü ˈö˗ ˗bha ˈwɔn yö ˗kɔ ˗yö go ˈˈgblʋʋ ˈzü. ˈYö˗ pö ö ˗bha ˈˈsɔdha ˗nu ˗dhɛ: ‹˗Kwa kwa ˗bha ˗gblü ˗gɔn ˗a ˈka ꞊kwɛɛ˗ ˗nu ꞊gban ˈˈpɛpɛ baaˈˈ ˈkwa ˗nu ˈˈpiʋ̈ ˗kë. Kwa ˗dua ˈyaa ˗mü ˗be kö ˈkwa kwa ꞊kwaa ˗an ˗zü kö ˗wo ˈdho.› ˈYö Fadhaɔn waa ö ˗bha mɛn ˗nu ˗wo ˗ya ˗biasü ˗sü ˗bha Izraɛdhömɛn ˗nu ꞊keŋ˗.

Zoova ˗yö ˗bɔ ˈˈdhuu kpö ˗ta ˈö ˈˈdhiʋ̈sü ö ˗bha ˈˈsɛgümɛn ˗nu ˈka ˈɲanŋ˗ ˈgü, ˈö bɔ ˈˈwo ˈbhü ˗ta ˈö ˈˈdhiʋ̈sü ˗an ˈka gbeŋ. ˗Yö ˗dho Izraɛdhömɛn ˗nu ˈka ꞊weeyi ˗zɔɔndhö ˈˈdhiʋ̈, ˈyö˗ pö ˗an ˗dhɛ ˗wo wo ˗bha ꞊kanŋ ˗ya mü.

˗Dhɛ ˈö ꞊ɲɔɔn mü ˈyö Izraɛdhömɛn ˗nu ˗wa ˈwɔn dɔ ꞊dhɛ Fadhaɔn waa ö ˗bha ˈˈsɔdha ˗nu ˗wo ˗an ˈˈpiʋ̈ kë ˗ni ˈgü. ˗Dhɛ ˈö ˗kë ꞊dhɛ ˗wo ˗kun ꞊nënŋ ˗sü ˈka Ezitö ˗bha ˈˈsɔdha ˗nu waa ꞊wëëyi ˗zɔɔndhö ˗an ꞊zinŋgü bhë, ˗wo ˗gbla Moizö ˈtɔ ˈka ˈwo˗ pö: ‹Kwa ˗dho ga ˗wa! Ü yi ˗to Ezitö ˗sɛ ˈgü be ˗yö ˗dho kë ˗së.› ˈYö Moizö ya pö ˗an ˗dhɛ: ‹Suʋ̈ˈˈ ˈyaa ˈdho ka kë! ˗Ka dɔ kö ˗kɔ ˈö Zoova ˈö dho kwa dha ˗a ˈka ˈkwa˗ yö.› Moizö ˗kun ö ˗zo yö ˗ni ˈgü Zoova ˗dhɛ ꞊dedewo.

Zoova ˗ya ˗pö Izraɛdhömɛn ˗nu ˗dhɛ ˗wo wo ꞊kwɛɛ˗ baaˈˈ kö ˗wo ʒiö. Gbeŋ do ˈö bhë ˗a ˈka, ˈö ˈˈdhuu kpö bhë ˗yö go ˈˈgblʋʋ ˈö ˗ya Izraɛdhömɛn ˗nu waa Ezitömɛn ˗nu ꞊zinŋgü. ˗A ˗wɔn ˈgü ˗dhɛ ꞊gban ˈˈpɛpɛ ˗kun tii Ezitömɛn ˗nu ˗bha ˈˈpian ˗ta. ˈˈKɛɛ Izraɛdhömɛn ˗nu zë, ˗wo ˗kun ˗dhɛpuudhɛ ˈgü.

ˈYö Zoova ˗ya pö Moizö ꞊dhɛ ˗yö ö kɔ ˈˈdhiʋ̈ luuˈˈ ꞊weeyi ˗zɔɔndhö ˗ta. Zoova ˗ya ˗kë ˈö ˈˈtɛɛ ˈˈgbɩɩ˗ ˗yö ʒiö gbeŋ do ˈö bhë ˗a ˈgü, ˈyö ꞊weeyi ˗zɔɔndhö ˗yö ˗pɛ ˈkoo ꞊plɛ ˈö ʒianga ˗së ˗yö ˗kë ˗a ꞊zinŋgü. ˈYö Izraɛdhömɛn ˗nu ˈwo ꞊mɔɔn ˈˈmliɲɔn ˗bha ˈwo ˈˈta sü ˗dhɛ ˈˈkpɛɛdhɛ ˗ta, ꞊weeyi ˈö bhë ˗a ꞊zinŋgü.

Zoova ˗yö ˗bhluubhludhe ˗da Ezitö ˗bha ˈˈsɔdha ˗nu ꞊zinŋgü ˈyö ˗an ˗bha ˗gblü ˗gɔn ˗a ˈka ˗gɔ ˗nu ˗koŋ ˗nu ˈwo ˗ya ˗go mü ˗sü ˗bha wo ˗de ˈka. ˗An ˗bha ˈˈsɔdha ˗nu ˗wo ˗ya ˈˈgbla ˗sü ˗bha ˈwo˗ pö: ‹˗Kwa ˈgo ˗dhɛ ˈö yö˗ ˈgü, Zoova ˈnën ˗gblü ˗gɔn ˗ni ˈgü ˗an ˗bha ˈka bhë!›

ˈYö Zoova ˗ya pö Moizö ꞊dhɛ: ‹˗Bhö ü ˗kɔ ˈkpɔ ꞊weeyi ˗ta.› ˗Dhɛ ˈö Moizö ˈö˗ ˗kë ˈˈdhʋ̈, ˈyö ˈˈyi ˗yö sɔ Ezitömɛn ˗nu ˗bha ˈˈsɔdha ˗nu ˗ta. ˈYö Fadhaɔn waa ö ˗bha mɛn ˗nu ꞊gban ˗wo ga. Mɛn ˈbha ˗mɛn ˗bha ˈti dha.

˗Dhɛ ˈö go mü, ˈyö ˈˈsɛgümɛn ˗nu ˗wo ˈˈtan bho ˗Zlan ˈˈpiʋ̈ ˗a ˈtɔ ˈbhɔ ˗sü ˈka: ‹˗Kwa ˈˈtan bho Zoova ˗dhɛ ˈyö ˗tɔ ꞊dhɛ ˗a ˈˈpii ˗yö ˈˈgbɩɩ˗. ˗Ya ꞊soo waa ö ˗ta ˗mɛn ˗nu ꞊gban ˗zuö ꞊weeyi ꞊bhaa.› ˈˈSɛgümɛn ˗nu ˗wo ˗to ˈˈtan bho ˗dhɛ ˈgü, ˈyö ˗dhebɔ ˗nu ˗wo ˗ya ˈˈtan kë ˗sü ˗bha, ˈwo ˗ya trʋʋˈˈ ˗nu kë ˗sü ˗bha ˈyö ˈwo ˗bhaŋ ˗nu zë. ˗An ꞊gban ˈˈpɛpɛ zuʋ̈ˈˈ ˈˈgblü ˗kun dhi ˗sü ˈka ˈyö ˗tɔ ꞊dhɛ ˗wa ˈgo ˈˈgan ˈgü.