˗Zlan ˈnën gɔɔn˗ waa dhebɔ ˗blɛɛsü ˗nu ˗da

Zoova ˗yö ˈˈdhü ꞊dhɛɛdhɛ ˗së ˈwo˗ ˗dhɛ Edɛnö ˗a ˗kë. Blëë ˈˈbin, ˈˈdhü waa wü ˗nu ꞊va ˗wo ˗kun mü. ˈDhɛ ˈgo mü ˈzü, ˈö ˗Zlan ˗yö gɔɔn˗ ˗blɛɛsü ˈwo˗ ˗dhɛ Adan bhë ˗a ˗pëkë ˈˈsɛ ˗bi ˈka ˈö ˈˈtɛɛ ˗piö ˗a ɲundhö. Pë ˈö ˗Zlan ˗ya ˗kë ꞊taabha ü˗ ˗dɔ ˗ee? ˗Ya ˗kë ˈö Adan ˗yö ˗kë mɛnbhɩɩdhe ˈka. Zoova ˗ya ˗pö ˗a ˗dhɛ ˗yö ö ˗zokë ˈˈdhü ꞊dhɛɛdhɛ ˈö bhë ˗a ˈˈpiʋ̈, ˗yö wü ˈdhɛ ˈö ˈdhö ˗a ˈtɔ ˈkpɔ.

Zoova ˗yö ˈtɔŋ˗ ˗wɔngbɩɩsü do ˗dɔ Adan ˗ta. ˗Ya ˗pö ˗a ꞊dhɛ: ‹ˈˈDhü ˗nu ˈwo yö, ü ꞊mɔɔn˗ ˗bha ˈü ˗an ꞊gban bhɛ bhö. ˈˈKɛɛ ˗a do ˈö yö ˈbhaa ˈdho ˗a bhɛ ˗bhö. Yi ˈü dho ˗a bhɛ ˗bhö ˗a ˈka ü dho ga.›

˗Dhɛ ˈö ˈˈtʋ̈ŋ ˈbha ˗yö ˗ʒiö, ˈyö Zoova ˗ya pö: ‹A ˗dho ˗Adan ˗takunmɛn ˈö bhɔ˗ ˗bha ˈpö ˗a kë.› ˈDhɛ ˗kë ˈˈdhʋ̈, ˈyö ˗Zlan ˗yö Adan ˗da yi ꞊gblɛɛn ꞊dede ˈgü, ˈyö˗ ˈˈsɛnga do sü ˈyö dhebɔ do ˗pëkë ˗a ˈka Adan ˗dhɛ. Dhebɔ ˈö ˈˈdhʋ̈, ˗wa ˗dhɛ Ɛvö. Adan waa Ɛvö ˗wo ˗kë ˈkɔdhi ꞊blɛɛsü ˈka. ˈDhɛ Adan ˗yö ˗kpan Ɛvö ˗bha, ˗yö ˗kë ö ˗de ˈgü ˗kɔ ˗kë ꞊dhɛ? ˗A zuʋ̈ˈˈ ˈˈgblü ˗yö ˗dhi ꞊dedewo. ˗A ˗wɔn ˈgü ˗ya ˗pö: ‹ˈPë Zoova ˗ya ˗kë n ˈˈsɛnga ˈka ˗kaa ˗ga! ˗Yö ꞊dhɛ n ˈdhö.›

Zoova ˗ya ˗pö Adan waa Ɛvö ˗an ˗dhɛ ˗wo ˈnën ˗nu ˈkpɔ, ˗wo ˈˈsɛtadhɛ pa. ˗Yö ˗kun ˗a ˈˈpiʋ̈ kö ˗wo yökë wo ˈkwëë˗, ˗wo ˈˈsɛtadhɛ ˗kë ˗bhɔɔ ˈˈsɛ ˈka ꞊dhɛ ˗kɔ ˈö Edɛnö ˈˈdhüdhɛɛdhɛ ˈö kun ˗a ˈka ˗a ˈdhö. ˈˈKɛɛ ˈwɔn ˗nu wo ˈti kë ꞊dhɛ ˗kɔ ˈö bhë ˗a ˈdhö. ˈMën ˗kë? Kwa dho ˗a yö ˈwɔn ˗gɔ ˈö dɔ ˗a ˗dhɛ ˈö yö ˗a ˈˈpiʋ̈ bhë ˗a ˈgü.