˗Wo ˈti ˈto wo ˗wo ˗ta

Zoova ˗ya pö Moizö ˗dhɛ: ‹˗Bhö nu n ˈˈpiʋ̈ ˗tɔn ˗ta, a ˗dho n man ˈtɔŋ˗ ˗nu ˗ya ˗gwë ˈˈpɛn ˗nu ˗ta kö ˈa˗ nu ü ˗dhɛ.› Moizö ˗yö ˗to ˗tɔn bhë˗ ˗ta ˗dhɛkpɔayi 40 waa gbeŋ 40 ˈˈpiʋ̈. ˈDhɛ kun mü, ˈyö Zoova ˗yö ö ˗bha ˈtɔŋ˗ ˗nu bhë ˗an ˗ya ˗gwë ˈˈpɛn ˗nu ˗ta ˈö˗ nu ˗a ˗dhɛ.

ˈDhɛ ˈˈtʋ̈ŋ ˈbha ˗yö ˗ʒiö, Izraɛdhömɛn ˗nu ˗wa ˗ga ꞊dhɛ Moizö ˗ya ga. ˈWo˗ pö Aadhɔn ˗dhɛ: ‹Yi ˗bhawɔn ˗yö mɛn ˈbha ˈö dho ˈˈdhiʋ̈sü yi ˈka ˗a ˗bha. ˗Bhö ˗zlan do ˈö dho ˈˈdhiʋ̈sü yi ˈka ˗a ˗pëkë ˈü˗ nu yi ˗dhɛ.› ˈYö Aadhɔn ˗ya pö: ‹˗Ka ka ˗bha ˈˈsënŋ ˗nu nu n ˗dhɛ.› ˈYö ˈˈsënŋ ˗nu bhë ˗an sü ˈö˗ ˗söŋ ˈö ˗dunen ˈˈbin do ˗pëkë ˗a ˈka, ˈö ˈˈsɛgümɛn ˗nu ˗wa pö: ‹˗Zlan ˈö ˈˈdhiʋ̈sü yi ˈka yi go Ezitö yö ˗mü.› ˈWo ˗ya ˗dunën ˈˈbin bhë˗ gba ˗sü ˗bha, ˈwo ˈwlaan˗ ˗nu ˗kë. ˈWɔn bhë kun ˈya˗ ꞊dedewo ˗ee? ꞊Ii! ˈYö ˗tɔ ꞊dhɛ ˈˈsɛgümɛn ˗nu ˗wa pö ˗be Zoova ˗dhɛ ꞊dhɛ wo ˈti dho ˗zlan ˈˈwɛɛ ˗dhɔkë. ˈˈKɛɛ wo ˈti ˈto wo ˗wo ˗ta.

Zoova ˈˈɲan ˗yö ˗da ˈwɔn ˗nu ˈwo bhë ˗an ˈgü ˈö˗ pö Moizö ˗dhɛ: ‹˗Bhö ü yɛɛkë ˈˈsɛgümɛn ˗nu ˈˈpiʋ̈, ˈyö ˗tɔ ꞊dhɛ wo ˈti ˈwɔn man n ˗ta. ˗Wo ˗zlan ˈˈwɛɛ ˗dhɔkë ˗ni ˈgü. ‹ˈÖ Moizö ˗yö ꞊yɔɔ kö ˗gwë ˈˈpɛn ꞊plɛ ˗nu bhë ˗wa ꞊kwɛɛ˗.›

ˈDhɛ ˈö ˗lo ˗ni ˈgü ˗an ˗bha ꞊kanŋ ˈˈsue, ˈyö Moizö ˈˈtʋ ˗yo ˗da ˈˈsɛgümɛn ˗nu ˈˈtan bho ˗wo ˗nu ˈgü ˈö ˗kpan ˗an ˗bha ˈzü kö ˗wo ˈˈsënŋ ˗dunën ˗dhɔkë ˗ni ˈgü. ˈWɔn ˈö bhë ˗yö ˗shiö ꞊dedewo Moizö ˗dhɛ, ˈö ˗gwë ˈˈpɛn ꞊plɛ ˗nu bhë ˗an wü. ˗Yö ˗to mü ˈö ˗dunën ˈwo˗ ˗pëkë bhë ˗a ꞊shiö, ˈö˗ ˗bi bho ˈtrëëtrëdhö. ˈYö Moizö ˗ya pö Aadhɔn ˗dhɛ: ‹ˈMën ˗kë ˈü ˗we ˗a ˗bha kö ˈˈsɛgümɛn ˗wo ü ˗blü pë yaa suu ˈö yö ˗a kë ˗sü ˗bha?› ˈYö Adhɔn ˗ya pö: ‹ˈWɔn ˈyaa dho ꞊shiö ü ˗dhɛ, ˈˈsɛgümɛn ˗nu ˈwo yö ü ˗an ˗dɔ. ˗Wo ˗kun ˗a ˈˈpiʋ̈ ˈwo ˗zlan ˈˈwɛɛ ˈbha ˗dhɔkë, ˈyö ˈa ˗an ˗bha ˈˈsënŋ ˗nu ˗zuö ˈˈwo ˈgü ˈö ˗dunën yö ˈö yö ˈˈkpɛnŋ. Aadhɔn dua ˈyaa ˗mü ˗be kö ˗ya kë ˈˈdhʋ̈. ˈYö Moizö ˗yö ˗da ˗tɔn ˗ta ˈzü ˈö ꞊bhɛɛ Zoova ˗dhɛ kö ˗yö ˈˈsɛgümɛn ˗nu ˗bhawɔnto.

Zoova ˗yö mɛn ˈˈpɛpɛ ˈwo kun ˗a ˈˈpiʋ̈ kö ˈwo ˈˈwɔn man ö ˗ta bhë ˗an ˗bhawɔnto. ˈPë ˗kë ˈö˗ ˗wɔn ˈdhö kun ˈˈgbɩɩ˗ kö Izraɛdhömɛn ˗nu ˗wo ʒiö Moizö ˗bha ˗dhioo ˗nu ˈˈpiʋ̈ bhë, ü˗ ˗yö ˗ee?