˗Zlan ˗dhɔkë ˗a ˈgü sɔ ˈkɔ

ˈDhɛ ˈö Moizö ˗yö kun Sinai ˗tɔn ˗ta, ˈyö Zoova ˗ya pö ˗a ˗dhɛ ˗yö ö ˗dhɔkëgükɔ do ˈö ö ˗de ˗ta ˗a dɔ. ˗A ˗dhɔkëdhɛ ˈö ˈˈdhʋ̈ ˈnën ˈwo˗ ˗dhɛ ˗Zlan ˗dhɔkë ˗a ˈgü sɔ ˈkɔ. Izraɛdhömɛn ˗nu ˗wo ˗dho ˗a ˗dhɔkë ˈdhɛ bhë ˗a ˈgü. ꞊Waa˗ pö ˈwo ˈgo ˈˈgblʋʋ, ˗wo ˗dho ꞊mɔɔn ˗a ˈsü ˗sü ˗bha.

Zoova ˗ya ˗pö: ‹˗A ˗pö lzraɛdhömɛn ˗nu ˗dhɛ ˗wo pë ˈwo ꞊mɔɔn˗ ˗bha ˗wa nu kö ˗wo n ˗dhɔkëdhɛ bhë ˗a dɔ ˗wa nu.› ˈYö Izraɛdhömɛn ˗nu ˗wo nu ˈˈsënŋ, ˈwëë˗, zën, ˗gwë ꞊bhlëësü ˗nu waa ˗bɔtʋʋpë, ˗yöbhɔapë ˗nu ˈka. ˗Wo sɔ waa wü kwi ˗tiaandhö ˗nu nu ˈpö. ˈˈGblüsë ˈwo˗ ˗kë bhë˗ ˗wɔn ˈgü ˈö Moizö ˗ya pö: ‹꞊Kwɛɛ˗ ˗ya kë yi ˗gɔ ꞊va, ˗ka gbɔɔdhe kë ˗sü ˈduannu.›

Mɛn ˗nu ˈö ˗an kwɛɛˈˈ ˈdhö kun ˗së, ˗wo wo ˗de ˗nu kö ˗wo ˗Zlan ˗dhɔkëdhɛ bhë ˗a dɔ. Zoova ˗yö ꞊kpɔɔdhɛ ˗nu ˗an ˗dhɛ ˈwo yö ˈö bhë ˗a ˗kë. Sɔ ˗kɔn baaˈˈ ˗mɛn, ˗a yö ˈkwëë˗ ˗mɛn, ˗gwëɲënmɛn waa ˈˈdhüɲënmɛn ˗nu ˗wo ˗kun ˗an kpö ˈgü.

˗Kɔ ˈö Zoova ˗ya pö ˈˈsɛgümɛn ˗nu ˗dhɛ ˗wa ˗dɔ ˗a ˈka ˈnën˗ ˈwo˗ ˗kë. ˗Wo ˗ʒiö ˈˈkpan ˈˈdhiʋ̈ sɔ ˗së do ˈö ˗naan ˗ya ˗Zlan ˗dhɔkëdhɛ ˈˈpian ˈö ˈˈslʋ̈ʋ̈slʋ̈ waa˗ ˈˈslʋ̈ʋ̈slʋ̈ ˗dhɛ ꞊dede ꞊zinŋgü bhë ˗a ˗yökë. ˗Mlɛɛn ꞊gbëë ˈwo˗ ˗yökë kasia ˗dhü waa ˈˈsënŋ ˈka bhë, ˗yö kun ˗dhɛ ˈˈslʋ̈ʋ̈slʋ̈ ˗dhɛ ꞊dede bhë˗ ˈgü. ˗Dhɛ ˈˈslʋ̈ʋ̈slʋ̈ ˗blɛɛsü ˈgü, ꞊laŋba ˗dɔ ˗a ˗ta ˗pë ˈö ˈˈsënŋ ˈka, tablö waa ansansö ˗gʋ̈ ˗a ˗ta ˗pë ˗kun mü. ˈˈTɛɛ˗ ˈˈgbɛɛ ˈö zën ˈka waa ˈˈsaabhotapë ˈkpii˗ do ˗kun mü. ˗Mlɛɛn ꞊gbëë ˗yö ˗kun Izraɛdhömɛn ˗nu ˗zo ˗bö ˗ni ˈgü ˗an ˗wo ˈwo˗ bhö ˗dhɛ ꞊dhɛ ˗wo dho ˈwɔn man Zoova ˗ta bhë ˗a ˈka. Pë ˈwo˗ ˗dhɛ ˗mlɛɛn bhë ü˗ ˗dɔ ˗ee? ˈYö ˈnën ˗tɔ ˈˈplüün bho ˗wo ˈö ö ˗de ˗ta.

Zoova ˗yö ö ˗kɔ ˗yɛ Aadhɔn waa ˗a gbö ˗nu ˗bha kö ˗wo kë ˈˈsaabhomɛn ˗nu ˈka ˗a ˗dhɔkëdhɛ bhë˗ ˈgü. ˗An dua ˗mü kö ˗wo wo ˗zokë ˗a ˈˈpiʋ̈ kö ˗wo ˈˈsaa˗ ˗nu bho Zoova ˗dhɛ. Aadhɔn ˈö kun ˈˈsaabhomɛn ˈkpii˗ ˈka bhë, yö dosɛnŋ ˈnën˗ dua ˈdhö ˗mü kö ˗yö ˗da ˗a ˗dhɛ ˈˈslʋ̈ʋ̈slʋ̈ ˗dhɛ ꞊dede bhë ˗a ˈgü. ˗Yö ˗kun ˗da ˗ni ˈgü ˗a ˈgü ˗gɛnɲan ˈka dosɛnŋ ˗kwɛ ˗bha kö ˈö ˈˈsaa bho waa ö bha ˈkɔdhigümɛn ˗nu waa Izraɛdhömɛn ˗nu ˗bha ꞊sɔŋyaa ˗wɔn ˈgü.

ˈDhɛ ˗kwɛ do ˗yö ˗ʒiö kö ˗wa ˈgo Ezitö, ˈyö Izraɛdhömɛn ˗nu ˗wo ɲën ˗Zlan ˗dhɔkë ˗a ˈgü sɔ ˈkɔ dɔ ˗sü ˗bha. ˈDhɛ ˈwo dho Zoova ˗dhɔkë ˗a ˗bha, ꞊waa˗ do ꞊slɔɔ.

Zoova ˗yö ˈdhuëë˗ ˗kpɔ ö ˗dhɔkëdhɛ bhë˗ ˗bha ˈˈdhuu kpö ˗dɔ ˗a ˗ta ˗sü ˈka. ˈˈDhuu kpö ˗ya ˈto sɔ ˈkɔ bhë ˗a ˗ta ˈˈdhuŋ, Izraɛdhömɛn ˗nu dua ˗mü kö ˗wo ˈto mü. ˈˈKɛɛ ˈˈdhuu kpö bhë ˗ya ˈgo ˈˈgblʋʋ, ˈwo˗ ˈwɔn dɔ ꞊dhɛ ˗an dua ˗mü kö ˗wo ʒiö. ˗Wo ˗Zlan ˗dhɔkë ˗a ˈgü sɔ ˈkɔ bhë˗ ˗bho ˈko ˈˈdhiʋ̈, ˈwo ˗ʒiö ˈˈdhuu kpö bhë˗ ꞊kee˗.