Ʒedeɔn ˗kɔ ˗yö ˗ʒiö Madianmɛn ˗nu ˗gɔ

ˈDhɛ ˈˈtʋ̈ŋ ˈbha ˗yö ˗wo, Izraɛdhömɛn ˗nu ˗wo wo ˗taa ˗yö Zoova ˗bha ˈzü ꞊sua ˗zlan ˗nu ˗dhɔkë ˗sü ˈka. ˗Kwɛ ˈˈsɔɔplɛ ˈˈpiʋ̈, Madianmɛn ˗nu ˗wo ˗an ˗bha ˗tuëë ˗nu ꞊kwaan, ˈwo ˗an ˗bha tapë ˗nu ꞊gban ꞊shiö. Izraɛdhömɛn ˗nu ˗wo wo ˗bin ˗gwë ꞊duudhɛ waa ˗tɔn ˗nu ˈgü kö ˗wo dha ˗an ˗gɔ. ˗Wo ˗bhɛɛ Zoova ˗dhɛ kö ˗yö ˗an dha. ˈYö Zoova ˗yö ö ˗bha ˈˈkië do bɔ ˈnëngɔɔn˗ do ˈwo ˗dhɛ Ʒedeɔn bhë ˗a ˈˈpiʋ̈. ˈˈKiö bhë ˗ya ˗pö ˗dhɛ: ‹Zoova ˗ya ö ˗kɔ ˈˈyɛ ü ˗bha kö ˈü kë ˈˈsɔdha ˈgügbɩɩsü do ˈka›. ˈYö Ʒedeɔn ˗ya pö: ‹˗A ˗dho Izraɛdhömɛn ˗nu dha ˗kɔ ˗kë ꞊dhɛ ˈˈkɛɛ kö ˈmaan pë ˈbha ˈka?›

Ʒedeɔn ˗dho ˗a ˈwɔn dɔ ˗kɔ ˗kë ˗dhɛ ꞊dhɛ Zoova ˗ya ö ˗kɔ ˈˈyɛ ö ˗bha? ˗Yö wü kwi ˈˈpɛn do ˗ya ˈˈshia˗ ˈö˗ pö Zoova ˗dhɛ: ‹˗Dhɛ ˗ya ꞊kpɔɔ kö ˈˈflinŋ ˗yö wü kwi ˈˈpɛn ˈö yö ˗a ˗bha ˈˈkɛɛ ˈkö ˈˈsɛ ˗zë ˗yö ˈˈkpɛɛ, a d˗ho ˗a ˗wɔn dɔ ꞊dhɛ ˈbha ˈü ˗kɔ ˈˈyɛ n ˗bha kö ˈa Izraɛdhömɛn ˗nu dha.› ˗Dhɛkpɔayi ˈö dɔ ˗a ˈˈpiʋ̈ ˗a ˈka, wü kwi ˈˈpɛn ˗yö ˗tɔɔ ˈˈkɛɛ ˈˈsɛ ˗zë ˗yö ˗to ˈˈkpɛɛ. ˈYö Ʒedeɔn ˗ya pö ˈzü dhiʋ̈ˈˈ dhiapiʋ̈, wü kwi ˈˈpɛn ˗zë ˗yö ˈto ˈˈkpɛɛ kö ˈˈsɛ ˗zë ˗yö ˗tɔɔ! ˈDhɛ ˈwɔn ˗nu bhë ˗wo ˗kë, ˈö˗ yö ꞊dedewo ꞊dhɛ Zoova ˗ya ˈö ˗kɔ ˈˈyɛ ö ˗bha. ˗Yö ö ˗bha ˈˈsɔdha ˗nu ˗kpaa ˈkwëë˗ kö ˗wo ˈdho ˗gblü ˗gɔn Madianmɛn ˗nu ˈka.

Zoova ˗ya ˗pö Ʒedeɔn ˗dhɛ: ‹A dho ˗a kë ˈö ˗gblü ˗yö ˗dhi Izraɛdhömɛn ˗nu ˗gɔ.› ˈˈKɛɛ ˗kë ˈö˗ wo ꞊dhɛ ˈˈsɔdha ˗nu ka ˗gɔ ꞊va bhë, ka ˗dho ka ˗zota ꞊dhɛ ˗gblü ˗yö ˗dhi ka ˗gɔ ka ˗de ꞊faan ˈka. Mɛn ˗nu ö ˈˈsuʋ̈ ˈdhö ˗an ˈgü, ˗a pö ˗an ˗dhɛ ˗wo wo ꞊yɛɛkë›. ˗A ˗wɔn ˈgü, mɛn 22.000 ˗wo wo ꞊yɛɛkë ˈyö mɛn 10.000 ˗wo to. ˈYö Zoova ˗ya pö ˈzü: ‹ˈˈSɔdha ˗nu ˗wo ꞊va, ˗bhö ˈdho ˗an ˈka ˈˈyiga ꞊bhaa kö ˈü˗ pö ˗an ˗dhɛ ˗wo ˈˈyi mü. Mɛn ˗nu ˈwo dho ˗dhɛga wo ˗züzü kö ˗wo ˈˈyi mü ˗ni ˈgü, ˈnën ˈü dho ˈü ˗kɔ ˈˈyɛ ˗an ˗bha›. Mɛn 300 ˈnën ˈwo ˈˈyi mü ˗dhɛ ˗kɔ ˈö bhë ˗a ˈdhö. Zoova ˗ya ˈˈplüün bho ꞊dhɛ ˈˈsɔdha kpö ˈˈtɩtɩ ˈdɔɔni ˈö bhë, ˗a ˗kɔ ˗dho ʒiö Madian ˈˈsɔdha 135.000 ˗nu bhë ˗an ˗gɔ.

Gbeŋ ˈö bhë˗ ˈgü, Zoova ˗ya pö Ʒedeɔn ˗dhɛ: ‹˗A ˈˈtʋ̈ŋ ˗ya ˗wo kö ˈka ˈka ˈdho Madianmɛn ˗nu ˗gɔ!› ˈYö Ʒedeɔn ˗yö wü ˗sö waa gbɔ ˈˈsɛ ˗nu ˈö ˈˈgbia ˈdhö˗ ˈgü, ˗an nu ö ˗bha ˈˈsodha ˗nu ˗dhɛ ˈö˗ pö: ‹˗Ka n ga kö ˈka˗ kë ꞊dhɛ n ˈdhö ˈpö.› ˈYö Ʒedeɔn ˗yö ˈˈtrʋʋ ˗piö, ˈö ö ˗bha gbɔ ˈˈsɛ ˗wü, ˈö ö ˗bha ˈˈgbia ˗vuu ˗ʒiö ˈö ˗gbla ˈˈgbɩɩ˗ ˈka ˈö˗ pö: ‹Zoova waa Ʒedeɔn ˗an ˗bha ˗blaandhaa!› ˗Kɔ do ˈö bhë, ˈö˗ ˗bha mɛn 300 ˗nu ˗wa kë ˗bha ˈpö. ˈYö ˈˈsuʋ̈ ˗yö ˗da Madianmɛn ˗nu ˈgü ꞊dedewo, ˈwo ˗ya ˗bialö ˗sü ˗bha ʒian ꞊gban ˈka. ˗Wo ˗ya wo ˈko ˗nu zë ˗sü ˗bha. Zoova ˈˈsaa˗ ˈgü Izraɛdhömɛn ˗nu ˗wo ˗to ˗a ˈˈgbɩɩ˗ ˈka wo ˈyɔ˗ɔ ˗nu ˗ta ˈzü.