Zoova ˗yö ꞊faan ˗nu Sansɔn ˗dhɛ

Izraɛdhömɛn ˗nu ꞊vadhɛ ˗wo ˗ya ˈzü ꞊geebɔ ˗nu ˗dhɔkësü ˗bha, ˗a ˗wɔn ˈgü Zoova ˗ya ˗kë ˈö Fidhitɛn ˗nu ˗kɔ ˗yö ˗ʒiö ˗an ˗gɔ. ˈˈKɛɛ Zoova ˗dhɔ ˗kun Izraɛdhömɛn ˗nu ˈbha ˗nu kë ˗ni ˈgü. ˗Dhɛkpɔayi do ˈka, ˈyö Zoova ˗yö ö ˗bha ˈˈkiö do bɔ Manoa ˗bha dhebɔ ˈˈpiʋ̈. ˈˈKiö bhë ˗ya ˗pö: ‹Ü dho ˈnëngɔɔn˗ do ꞊slɔɔ. ˗Yö ˗dho Izraɛdhömɛn ˗nu bho Fidhitɛn ˗nu ꞊kwɛɛ˗. ˗Yö dho kë Nazidheɛn ˈka.› ꞊Waa˗ pö nazidheɛn kö ˗wo ˗we de ˈka? ˗Wo ˗we Zoova ˗bha yökëmɛn ˗nu ˈwo wo ˗de ˗ta ˗an ˈka, ˈyö ˗an dua ˈyaa ˗mü kö ˗wo wo ˗bha wundhɛ ˈˈkan.

ˈDhɛ ˈˈtʋ̈ŋ ˈbha ˗yö ˗ʒiö ˈyö Manoa gbö ˗yö bhɔ. ˈYö ˈwo˗ ˗dhɛ Sansɔn. ˈDhɛ ˈö ˗kë ˈkpii˗, ˈyö Zoova ˗yö ꞊faan ˗da ˗a ˈgü ˈö ˗kë ˈˈgbɩɩ˗. ˗Yö kun ꞊mɔɔn ˗ni ˈgü ˗a ˗bha kö ˗yö ꞊laa zë ö ˗kɔ ˈˈkpan ˈka. Yi do ˈka, yö dosɛnŋ ˗yö Fidhitɛn ˗nu 30 ˗zë. ˗A ˗san ˗kun Fidhitɛn ˗nu kë ˗ni ˈgü ˈwo kun ˗a ˈˈpiʋ̈ ˗kplawo kö ˈwo˗ zë. Gbeŋ˗ do ˈka kö ˗yö yi zë ˗ni ˈgü Gaza, ˗wo dho ˗wo dɔ ˗a ˗gɔ ˈˈkwipö bhë ˗a ˈˈkpan ˈˈdhiʋ̈ kö ˈwo˗ zë dhiapiʋ̈. ˈˈKɛɛ gbeŋ˗ ꞊zinŋgü, ˈyö Sansɔn ˗yö ꞊luu ˈö dho ˈˈkwipö bhë ˗a ˈˈkpan ˈˈdhiʋ̈, ˈö˗ ˈˈkwee bho mü. ˈYö˗ ˗sü ö gban ˗ta ˈö dho˗ ˈka ˗tɔn ˈö Eblɔn ˗dhɛ ˈˈsuee bhë ˗a ˗ta.

Dhebɔ do ˗kun ˗dhö ˈö˗ ˗dhɔ kun Sansɔn kë ˗ni ˈgü. ˗A dhebɔ ˈö ˈˈdhʋ̈ ˗wa ˗dhɛ Dalila. Fidhitɛn ˗nu ˗wo ˗dho ˗a ˈˈpiʋ̈ ˈwo˗ pö ˗a ˗dhɛ: ‹ˈPë ˗kë ˈö ꞊faan ˗yö ˗kë Sansɔn ˗gɔ ˈbha˗ pö yi ˗dhɛ, yi ˗dho ˈwëëga ꞊va nu ü ˗dhɛ. ˗Yö yi ˈˈpiʋ̈ kö ˈyi˗ kun ˈyi˗ ˗da ˗kasho ˈgü.› ˈWëëga ˗dhɔ ˗kun Dalila kë ˗ni ˈgü, ˗a ˗wɔn ˈgü ˗yö ˗we ˗a ˗bha. ˗A zübhodhɛ ˈgü, Sansɔn ˈyii ˈˈwɩ˗ ˗bha kö ˈö ö ꞊faan ˈgodhɛ pö ˗a ˗dhɛ. ˈˈKɛɛ ˗ya ˗dhɛ ˗a ˗gɔ ˗fɛɛfɛsü ˈka, ˈö Sansɔn ˗ya pö ˗a ˗dhɛ ˈö˗ pö: ‹ˈA bhɔ wo ˈti n man wun ˈˈkan do, ˈyö ˗tɔ ꞊dhɛ a Nazidheɛn ˈka. ˗Wa n man wun ˈˈkan, ꞊faan ꞊gban ˗dho ˈgo n ˈgü.› ˗A pö ˈö Sansɔn ˗ya ˗wo ˗a ˗dhɛ bhë, ˗ya ˗kë ˗së ˗ee?

Dalila ˗yö ˗dho ˈˈvaandhö Fidhitɛn ˗nu ˈˈpiʋ̈ ˈö˗ pö: ‹ˈMan˗ ꞊faan ˈgodhɛ dɔ.› ˈYö Sansɔn ˗da yi ˈgü ö ˈˈgban ˗ta. ˈÖ mɛn ˈbha ˗dhɛ kö ˗ya ˗bha wun ˈˈkan. ˗Dhɛ ˈö ꞊waa˗ ˈˈkan ˈö ˗gbla ˈö˗ pö: ‹Sansɔn Fidhitɛn ˗nu ˗wa nu!› ˈDhɛ Sansɔn ˗yö ꞊luu ˈö ˈsuanbho ꞊dhɛ ꞊faan ˈyaa ö ˈgü ˈzü. ˈYö Fidhitɛn ˗nu ˗wa kun ˈwo˗ ˈˈɲan ˗wü ˈwo˗ ˗da ˗kasho ˈgü.

Yi do ˈka, kö Fidhitɛn ˗nu ˈˈgblü ꞊va ꞊dede ˗wa ˈdho wo ˈkwëëdhö ˗an ˗bha ˗zlan Dagɔn ˗dhɔkëdhɛ ˈgü, ˗a pö ˗sü ˈka ꞊dhɛ: ‹Kwa ˗bha ˗zlan ˗ya Sansɔn nu ˈkwa ˗dhɛ. ˗Ka nu˗ ˈka ˈkwa trʋʋˈˈ kë ˗a ˈka ˈnën ˈbhawo. ˗Wo Sansɔn ˗dɔ ˈkɔ ˈwo kun ˗a ˈgü bhë ˗a ˗gɛn ꞊plɛ ꞊zinŋgü, ˈwo ꞊wɛɛdɔ ˗a ˗bha. Sansɔn ˗yö ˗gbla ˈˈgbɩɩ˗ ˈka ˈö˗ pö: ‹Zoova ˗bhö dɔ ˈˈgbɩɩ˗ ˈü ꞊faan nu n ˗dhɛ ˈzü.› ˈYö Sansɔn ˗bha wundhɛ ˗nu ˗wo ˗ya bhɔ ˗sü ˗bha. ˈYö ˈkɔ ˗gɛn ꞊plɛ ˈwo bhë ˗an ˗blü ö ꞊faan ꞊gban ˈka, ˈyö ˈkɔ ˈkpii˗ bhë ˗a ꞊gban ˗yö ˗lo mɛn ˈˈpɛpɛ ˈwo kun mü waa Sansɔn de ˈpö ˗an ˗ta, ˈwo ˗ga.