˗Kwa ˗gleŋ ˈsü ˗zlanwopömɛn ˗nu ˈö ꞊wa ˗kian ˗zlanwopösü ˈgü ˗an ˗bha

˗Zlanwopömɛn ˗nu ˈö ꞊wa ˗kian ˗zlanwopösü ˈgü ˈö ˈwo ˗zlanwokɔɔdhö, ˗wo ꞊bhlëësü ꞊dedewo kwa ˗bhaa ˈka. ˗An mɛn ˈbhaa ˗nu ꞊wa Zoova ˗dhɔkë ˗klu ˗a ˗bha ˗sü ˈka ˗kwɛ ꞊va ꞊dede ˈˈpiʋ̈. ˗An mɛn ˈbhaa ˗nu ˗de ˈpö ˗wo ˗kë ˗zlanwopömɛn ˗tiaandhö ˈka a yi yö ˈti ꞊gwëë ꞊köŋ. ˈˈTʋ̈ŋ ˗totaabhasü ˈö yö ˗a ˈgü, Yesu ˗yö ˈˈdhiʋ̈sü Kletiɛn ˗nu ˗bha ˗zlanwokɔdhi ˈka, ˈö ˗zlanwopösü waa mɛn ˗nu ˗kë ˗a ˗bha gwëëˈˈ ˈka ˗sü yö ˗yö ˈdho ˈˈdhiʋ̈. ˗A pë ˗nu ˈwo bhë, ˗kɔ ˈwo ˗kë ˗a ˗bha, Kletiɛn ˗nu ˈwo bhë ˗an ˈˈɲan ˗yö ˗da ˗a ˈgü. (Mat. 28:19, 20) ˈWo bɔ ˗ni ˈgü ˈwɔngbɩɩ˗ ˗nu waa ˈgüdandhe ˗nu ˈgü, ˗an ˗bha ˗zlanwopösü ˗ya ˗kë ˈö ˈwo “ˈgügbɩɩdhɛ ˗ziisü” ꞊slɔɔ. (2 Kod. 4:7) ˗Zlanwopömɛn ˗nu ˈö ꞊wa bɔ ˈwɔn ꞊va ˈgü bhë, kwa ꞊mɔɔn˗ ˗bha ˈkwa ˗gleŋ ꞊va ˈsü ˗an ˗bha. Kö ˗wo pë ˗nu ˈwo˗ ꞊draan ˗an ˗zɔn mɛn ˈˈwɛɛ ˗nu ˗dhɛ ˗dhɛ ꞊slɔɔ, ˗a ˗zɔn ˗an ˗dhɛ ˗sü ˗kë ˗an ˗dhɛ ˈˈdhiaasü. (Ps. 71:18) ˗Dhɛ ˈö ˗kë ˈˈdhʋ̈, kwa dua ˗mü kö ˈkwa˗ ˈˈslö mɛɛnˈˈ kö ˈkwa ˗gleŋ ˈsü ˗an ˗bha. Kwa ˗dho ˗a kë ˗kɔ ˗kë ꞊dhɛ?

˗Zlanwopödhɛ ˈgü. ˈWa˗ pö ˈwo kë ˗zlanwöpö ˗mɛn ˗tiaandhö ˈka, ˗zlanwopömɛn ˗dɛɛ ɛɛnˈˈ ˗an zii ˗nu ˈö wo ˈti ˗kian ꞊köŋ, ˗an ˗bhawɔn ˗ya ˗bha kö ˗wo ˗gleŋ ˗da ˗an ˗bha. ˗A kë ˗kɔ ˗së ˈö ˈdhö ˈyö ˗tɔ mɛn ˗nu ˈö ꞊wa ˗kian ˗zlanwopösü ˈgü, ˗an ˗bha ˗zlanwopö ˗kɔ ˈˈsuaanbho ˗sü. (˗Bhö kpɔɔˈˈ ˗kwɛ 2015 Fevlie 15 ˗bha La Tour de Garde ˈwɔn ˗gɔ ˈö ˗kë « Garde ton zèle pour le ministère » ˈka, ˗a ˈwɔn ˗gɔ ˈsɛɛn˗ ˈö ˗kë « Aide les moins expérimentés » ˈka bhë, ˗a ˗wo ˗bhüöö kpö ˗yaaga ˗bhaa ˗naan ˈgü.) Mɛn ˗nu ˈwo bhë, ü ˗zlanwopö ˗an ˈˈpiʋ̈ ˗sü ꞊trɔɔn ˗slɔɔ ˗kɔ ˗kë ꞊dhɛ?

Ü ꞊mɔɔn˗ ˗bha ˈü˗ pö ˗zlanwopömɛn ˈö ꞊ya ˗kian ˗a ˗dhɛ kö ˈka ˗zlanwopö ka ˈkwëë˗ ˗ee? ꞊Ya kë ꞊dhɛ ˗zlanwopömɛn ˈö bhë ˗yö ꞊niɔɔnmɛn ˈka, ü ꞊mɔɔn˗ ˗bha ˈü ü ˗bha Biblö ꞊klaŋ ˗dhɛ ˗a ˗gɔ ˈkɔɔ ꞊shiö ꞊shiö kö kaa yi ˈka˗ ꞊klaŋ kë.

Ü ˗bha ˈˈtʋ̈ŋ ˈbhaa ˈsü kö ˈü dho ˗an ˈˈpiʋ̈: ˗Zlanwopömɛn ˗kiansü ˗nu ˈwo bhë, ˗an dɔ ˈˈtʋ̈ŋ ˗kë ˗an ˈˈpiʋ̈ ˗sü ˈka. ˗A mɛn do ˈbha ˗dhɛ ka ˗bha ˗Zlan ˗dhɔkë ˈkɔɔ ˈˈtʋ̈ŋ ˈka kö ˈka˗ dhɛɛˈˈ ˈkpɔ. ꞊Ya kë ꞊dhɛ ˗yö ꞊niɔɔnmɛn ˈka, ˗kaa ˈˈslö mɛɛnˈˈ kö ˈka ˈdho ka ˗bha ˗Zlan ˗dhɔkë ˈkɔɔ ˗sü ˈka ˗a ˈˈpiʋ̈. ˗Kɔ ˈö gagade dɔ ˗a ˗bha ˗ya pö ka ˗dhɛ. ˈDhuëë˗ ˗mɛɛn ˗nu ˈö ꞊yaa˗ ˗an ꞊slɔɔ? ˗Dhɛ ˈö ˈka˗ ˗bha bhë, ˗zlanwo ˗bha ˗dho ˈˈdhiʋ̈ ˗kɔ ˗mɛɛn ˈö˗ ˈˈɲan ˗daa ˈgü mü? Zuʋ̈gblüdhi ˗mɛɛn ˈö˗ ꞊slɔɔ Zoova ˗dhɔkë ˗sü ˈgü?

˗Takundhe ˈö ˈka˗ ꞊mɛɛn ˗a ˈˈpiʋ̈, ˗yö kë ˈpö pë ˈö ꞊mɔɔn˗ ˗bha ˈö˗ ˗kë ˗a ˈka, ˈyö ˗tɔ ꞊dhɛ ˗a ˗kɔkunkapë ˗nu ˗dhö. Mɛn ꞊gban ˈˈpɛpɛ, ˈmɛn ˈö ꞊ya ꞊gwëë ˗zlanwopösü ˈgü, ˗a ˗bha pë ˈö ˗Zlan ˗ya gbɔɔ ˗a ˗gɔ ˗yö ˗dhö. (Wlɔ. 12:6-8) Mɛn ˈbha ˗nu ꞊wa kë zii, ˈö pë ˗nu ˈwo ꞊mɔɔn˗ ˗bha ˈwo˗ kë ˗zlanwopö ˗yö ˈgü ɛɛnˈˈ ˈwɔn ˈˈwɛɛ ˗nu ˈgü ˈwaa ꞊va ˈzüdɔ. ˈˈKɛɛ ˈkö ˗kë ˈˈdhʋ̈, kwa ꞊mɔɔn˗ ˗bha ˈkwa ˗gleŋ ꞊va sü ˗an ˗bha, ˈyö ˗tɔ ꞊dhɛ ˗an ˗bha ˗klu ˗Zlan ˗bha ˗sü ˈö˗ ˗dhɔkësü ˈgü bhë, ˗ya ˗kë ˈwo bɔ ˈwɔn ꞊va ˈgü.