Pë ˗nu sɔnŋ ˗yö ˗da ˗ni ˈgü˗ ˈˈdhiʋ̈ ꞊dedewo ˈˈkpɔnŋ ꞊taa: ˈMën Biblö ˗ya pö?

ˈWëëkɔ ˈkpii˗ do ˈbha ˈö ˈˈkpɔnŋ ꞊taa, ˗a ˗gɔmɛn ˗ya ˗pö ˗kwɛ 2022 Ʒuɛn ˈˈsu ˈgü ꞊dhɛ: «ˈˈKpɔnŋtaamɛn ˗nu ˗todhʋ̈sü ˗bha ˈwëëga ˗ya dɔ ˈya˗. Pë ˗nu ˈwo ˈˈkpɔnŋ ꞊taa ˗an ꞊gban ˈˈpɛpɛ sɔnŋ ˗yö ˗da ˗ni ˈgü˗ ˈˈdhiʋ̈ ˈˈvaanvandhö, ˈˈkɛɛ ˗a ˈˈtʋ̈ŋ do ˈö bhë ˗a ˈka ˈwëëga ˗yö ɲën ˗ni ˈgü mɛn ˗nu ˗ta ˈpö.»

ˈˈKpɔnŋtaamɛn ˗nu ˗bha ˈwëëga ˗kɔlokota ˈkpii˗ ˈwo˗ Fonds Monétaire International ˗kë bhë, ˗ya ˗pö ꞊dhɛ: «ˈˈWɔyi waa ˗bhöpë sɔnŋ ˗wa ˗dadhiʋ̈ ꞊dedewo. ˗An sɔnŋ ˗bha ˗dadhiʋ̈ ˗sü ˗yö saanˈˈ ˗wɔ ˗ni ˈgü mɛn ˗nu ˈwo ˈˈsɛ ˈö ˈwëëga ˗wɔn ˈdhö mü -an ˈgü, ˗an ˗ta.»

ˈPë ˗kë ˈkwa bɔ ˗ni ˈgü ˈwɔn ˈˈgbɩɩ˗ ˗nu ˈwo ˗gban ˈwëëga ˗wɔn ˗bha ˗an ˈgü, ˗kɔ ˈö ˈkwa dho ˗a ˈkun˗ ˈka waa pë ˈö dho ˗a ˈˈɲan bhɔ ˗tokpa ˈka Biblö kwa ˗takun ˗a dɔ ˗sü ˗bha.

Pë ˗nu sɔnŋ ˗bha ˗dadhiʋ̈ ˗sü ˈö «ˈˈkpʋngtaadhɛ yën ˈˈtʋ̈ng ˈgü»

• ˈˈTʋ̈ŋ ˈkwa˗ ˈgü yö Biblö ˗ya ˗dhɛ «ˈˈkpʋngtaadhɛ yën ˈˈtʋ̈ng.»—2 Timote 3:1.

• Yesu ˗ya ˗pö ꞊dhɛ «ˈˈdhabhliwɔn ˗nu ˈö ꞊ya kë ˈö ˈˈsuʋ̈ ˗da mɛ ˈgü» ɛɛnˈˈ ˈˈshiʋ̈ ˗kan mɛn ˈˈgblʋ̈ʋ̈˗ ˗pë ˗nu ˗wo ˗dho kë ˈˈtʋ̈ŋ ˈö bhë ˗a ˈka. (Dhukö 21:11) Pë ˗nu sɔnŋ ˈö ˗da ˗ni ˈgü˗ ˈdhiʋ̈, ˗yö ˈˈsuʋ̈ ˗da mɛn ˈgü. Mɛn ˗nu ˗wa ˗ya ˗dhɛkpaɔ dhiʋ̈ˈˈ ˗wɔn ꞊zuën ˗ta, ˈyö ˗wo wo ˗de dhɛɛˈˈ ˈkpɔ ˗ni ˈgü ꞊ya kë ꞊dhɛ ˗dhɛkpaɔ dhiʋ̈ˈˈ ˈgü, ˗wo ˗dho ꞊mɔɔn wo ˗bha ˈkɔdhigümɛn ˈˈdhiʋ̈ ˗gba ˗sü ˗bha.

• ˗Dhɛkpaɔ dhiaˈˈ ˈsëëdhɛ ˗ya ˗to ˈˈdhiʋ̈ ˈö˗ pö ꞊dhɛ ˈˈtʋ̈ŋ ˗totaabhasü ˈgü, ˗bhöpë sɔnŋ ˗dho ˗dadhiʋ̈. Pë ˈö pö ˗sü ˈka ˗a ˈgü, yö ꞊nɛɛn: «ˈYö ˈa ˗wʋ do ˈbha ma [...] ˈö˗ pö: ‹˗Bhö ˗mlüga waa˗ ˈˈklëënga bha˗ ˗nu dan kö ˈi˗ ˈˈdhɔɔ ˗siö.›»—˗Dhɛkpaɔ dhiaˈˈ ˈsëëdhɛ 6:6.

ˈWɔn ˈö ˗gban «ˈˈkpʋngtaadhɛ yën ˈˈtʋ̈ng» waa pë ˈö ˗Dhɛkpaɔ dhiaˈˈ ˈsëëdhɛ ˗ya pö ˗an ˗bha, ˈü˗ ˈˈpiʋ̈ ˈü˗ ˈgüman, ˗bhö video Le monde a changé depuis 1914 ˗ga, kö ˈü ˈwɔn ˗gɔ « Les cavaliers de l’Apocalypse : qui sont-ils ? » ˗wo pö.

Pë ˈö ˗dho ˈwëëga ˗wɔn bho ˈˈshia˗

• «˗Wo ˗dho ˈkɔ ˗nu dɔ˗ ˈwo ˗wɔ ˗an ˈgü, ꞊ii, ˗wo ˗dho ˗drɔɔndhü ˗nu ta ˈö ˈwo ˗an ga ˗bhö. Wo ˈti ˗dho ˈkɔ dɔ kö mɛn ˈˈwɛɛwɛ ˈbha ˗yö ˗ya ˗a ˈgü, wo ˈti ˗dho pë ta kö mɛn ˈˈwɛɛ ˗ya bhɛ ˗bhö.»—Isaïe 65:21, 22.

• «˗Bhöpë ga ˗nu ˗dho kë ꞊va ˗dhɛ ꞊gban ˈgü ˈˈkpɔnŋ ꞊taa, ˗tɔn ˗tadhɛ ˗nu ˈgü pë ˗dho dhi mü ꞊dedewo.»—Psaume 72:16.

• «˗Dhɛ ˈö ˗kë ꞊dhɛ ˗wo saanˈˈ wɔ ˗ni ˈgü ˗wëëmɛn ˗nu ˗ta, ˈö ˈˈflɛɛmɛn ˗nu ˈdhö ˗wëë ˗wo ˈkpɔ ˗ni ˈgü bhë, a ˗dho wlüüˈˈ kö ˈa ˗an ˗takun. Pë ˈö Zoova ˗ya pö ˈyö bhë!»—Psaume 12:5.a

ˈWëëga ˗gblü ˗kɔ ˈö ˈˈkpɔnŋ ꞊taa ˈyaa ꞊mɔɔn ˈkwëë˗. Mɛn ˈbha ˗nu ˗wo ꞊bhɔɔmɛn ˈka ˈö mɛn ˈˈwɛɛ ˈbha ˗nu ˈwo ˈˈflɛɛsü. ˗A ˈwɔn ˈö ˈˈdhʋ̈, ˗a ˈˈtʋ̈ŋ ˈyaa ꞊gblɛɛn ˈzüdho kö ˗Zlan ˗yö ˗a ˈˈɲan bhɔ. ˈYii ˈdho ˗a ˈˈɲan bhɔ ˈˈsɛ dosɛnŋ ˈgü, ˈˈkɛɛ ˗yö ˗dho ˗a kë ˈˈdhʋ̈ ˈˈkpɔnŋtaadhɛ ˗todhʋ̈sü ˈgü. ˗Kɔ ˈö dho ˗a kë ˗a ˈka ˈü˗ ˈˈpiʋ̈ ˈü˗ dɔ, ˗bhö ˈwɔn ˗gɔ «Peut-on espérer un système économique plus juste ?» ˗wo pö.

ˈˈKɛɛ ˗kɔ ˈö ˈkwa dho pë ˗nu sɔnŋ ˗bha ˗dadhiʋ̈ ˗sü ˈkun ˗a ˈka ꞊dɛɛ, Biblö ꞊mɔɔn˗ ˗bha ˈö kwa ˗takun ˗a ˗bha. ˗Kɔ ˗kë ꞊dhɛ? ˗Dhioo ˗sɛŋbɔ ˗nu ˈwo ˗gban kwa ˗bha ˈwëëga -nu ˈkun ˗kɔ ˗nu ˗bha, ˗wa ˈgü. (Proverbes 23:4, 5; Ecclésiaste 7:12) ˈÜ˗ ˈˈpiʋ̈ ˈü˗ ˈbha ˈgüman, ˗bhö ˈwɔn ˗gɔ ˗nu «Protégez vos moyens de subsistance» waa «Comment vivre avec moins» ˗wo pö.