ˈˈSɛgɔdhiʋ̈mɛn ˗nu ˗wa ˗pö ꞊dhɛ Aamagedɔn nu ˈˈtʋ̈ŋ ˈyaa ꞊gblɛɛn ˈzü: ˈMën Biblö ˗ya pö?

˗Kwɛ 2022 ˗Tɛɛdhooyi Ɔtɔblö ˈˈsu ˗dhɛkpaɔyi 10 dhiapiʋ̈ ˈka, Rusimɛn ˗nu ˗wo buuga ˈˈgblʋ̈gblʋ̈ ˗nu ˗zuö Üklɛnö ˗bha ˈˈkwipö ˈbhaa ˗nu ˈgü. ˗Wa ˗kë ˈˈdhʋ̈ ˈbɔnŋbö ˈö ꞊pöö pɔŋ ˈö Krime waa Rusi ˗dhɛ ˗an ꞊zinŋ ˈgü ˗a ˗ta, ˈö˗ ˈˈpian ˈbha ꞊shiö bhë ꞊nën˗ ˗wɔn ˈgü. ˈYö ˗wa ˗kë ˈˈdhʋ̈ ˗a ˗dhɛkpaɔyi ꞊plɛ ˗naan ꞊nën˗ ˈka. ˈWɔn ˗nu ˈwo ˈˈdhʋ̈ ˗wo ˗kë kö ˈˈsɛgɔdhiʋ̈mɛn ˗nu ˗wa ˈgo ˗a pö ꞊dhɛ Aamagedɔn nu ˈˈtʋ̈ŋ ˈyaa ꞊gblɛɛn ˈzü.

• Pë ˈö Zeta zuni ˗mɛn ˗nu ˗bha ˈˈsɛgɔdhiʋ̈mɛn Ʒoo Baidɛnö ˈö˗ pö, yö ꞊nɛɛn: «ˈÖ sü [˗mlɛnkɛn ˗nu ˗bha ˈˈsɛgɔdhiʋ̈mɛn Ʒɔnö] Kenedi waa Küba ˗mɛn ˗nu ˗bha buuga ˈˈgblʋ̈gblʋ̈ ˗nu ˗gblü ˗bha, ˈö yö ˗a ˈka ꞊dɛɛ ˗bha, mɛnbhɩɩdhe ˗nu ˈwii yö Aamagedɔn ˗gblü ˈˈsɔɔ do ꞊dhɛ ˗kɔ suu ˈö yö ˗a ˈdhö. [...] N ˗maan ˈka ˈkwaa ꞊mɔɔn˗ ˗bha kö ˈkwa ˗gblü gɔn ˈbɔnŋbö nikleɛ ˗nu ˈka kö ˈkwa˗ pö ꞊dhɛ ˗a ˈˈdhiʋ̈ ˈyi ˈdho ta Aamagedɔn ˗ta.»—˗Kwɛ 2022 Ɔtɔblö 6.

• Pë ˈö Üklɛnömɛn ˗nu ˗bha ˈˈsɛgɔdhiʋ̈mɛn Volodimi Zelɛnski ˈö˗ pö kö ꞊waa˗ dhɛɛˈˈ ˈkpɔ ˈwɔn ˈö ˗gban ˗gblü ˗gɔn ˈbɔnŋbö nikleɛ ˈka ˗sü ˗bha ˗a ˈka, yö ꞊nɛn: «˗Yö ga ˗sü ˈka n ˈgü ꞊dhɛ ˗a ˈˈtʋ̈ŋ ˈyaa ꞊gblɛɛn ˈzü kö Aamagedɔn zü ˗yö dɔ. ˗A ˗bha nu ˗sü ꞊mɔɔn˗ ˗bha ˈö ˈˈkpɔnŋtaadhɛ ꞊gban ꞊shiö.»—˗Kwɛ 2022 Ɔtɔblö 8, BBC News.

˗Gblü ˗gɔn ˈbɔnŋbö nikleɛ ˗nu ˈka ˗sü ꞊mɔɔn˗ ˗bha ˈö nu Aamagedɔn ˈka ˗ee? ˈMën Biblö ˗ya pö?

˗Gblü ˗gɔn ˈbɔnŋbö nikleɛ ˗nu ˈka ˗sü ˗dho nu Aamagedɔn ˈka ˗ee?

˗Abin! ˗Wo kpö ˈö ˗kë «Aamagedɔn» ˈka bhë, ˗wo ˗kpan ˗a ˗bha Biblö ꞊nën˗ ˈgü ˗gɛnɲan ˈka dosɛnŋ ˗Dhɛkpaɔ dhiaˈˈ ˈsëëdhɛ 16:16 ˈgü. ˈYaa ˗gban ˗gblü ˈö dho kë ˈˈsɛgɔ ˗nu ꞊zinŋ ˈgü ˗a ˗bha, ˗Abin. ˗Gblü ˈö dho kë ˗Zlan waa ‹˗gblüdë ˈˈpɛpɛ ˈwo [...] ˈˈkpʋngtaadhɛ ꞊gban ˗gɔ ˈˈdhiʋ» ˗an ꞊zinŋ ˈgü, yö ˗mü. (˗Dhɛkpaɔ dhiaˈˈ ˈsëëdhɛ 16:14) ˗Zlan ˗dho bɔ Aamagedɔn ˗gblü ˗ta kö ˗yö mɛnbhɩɩdhe ˗nu ˗bha mɛnkɔɔnsü ˈˈdhiʋ̈ ˈto.—Daniel 2:44.

Pë ˈö Aamagedɔn ˗dho ˗a kë ˈbha˗ pö ˈü ˈbhaa ˈgüman, ˗bhö ˈwɔn ˗gɔ « Qu’est-ce que la bataille d’Armaguédon ? » ˗wo pö.

ˈBɔnŋbö nikleɛ ˈnën dho ˈˈsɛ waa mɛnbhɩɩdhe ˗nu ꞊gban ˈgü shiʋ̈ˈˈ ˗ee?

˗Abin! ˈKö ˗kë ꞊dhɛ mɛnbhɩɩdhe ˗nu ˗wo ˗gblü ˗gɔn ˈbɔnŋbö nikleɛ ˗nu ˈka ˗dhɛkpaɔ dhiʋ̈ˈˈ ˈgü, ˗Zlan ˈyi ˈdho ö ꞊kwaa ˗an ˗zü kö ˗wo ˈˈsɛ shiʋ̈ˈˈ. Biblö ˗ya ꞊pö:

• «ˈˈSɛ ˗zë ˗yö ˗dhö ˈˈtʋ̈ŋ ꞊gban ˗tʋ̈ŋ ꞊gban ˈka.»—Ecclésiaste 1:4.

• «ˈˈSɛ ˗dho ˈto mɛn kpɛnŋdhö ˗nu ˗gɔ ˈö ˈwo to ˗a ˗ta yi ꞊gban ˈˈpɛpɛ ˈka.»—Psaume 37:29.

ˈˈKɛɛ ˈkö ˗kë ˈˈdhʋ̈, pë ˗nu ˈö Biblö ˗yö ˗an to ˈˈdhiʋ̈ ˈö ˗an ꞊blɛɛ waa ˈwɔn ˗nu ˈwo kë ˗ni ꞊dɛɛ ˗wa ˗zɔn ꞊dhɛ ˗a ˈˈtʋ̈ŋ ˈyaa ꞊gblɛɛn ˈzü kö ˈwɔn ˈbha ˗yö kë mɛnbhɩɩdhe ˗nu ˗bha ˗tosɛta ˈgü. (Matiö 24:3-7; 2 Timote 3:1-5) Pë ˈö Biblö ˗ya ˗pö ˈö ˗gban kwa ˗bha ˗dhɛkpaɔ dhiʋ̈ˈˈ ˗bha, ˈbha˗ pö ˈü˗ dɔ, ˗bhö Biblö draansü ˈö ꞊dhɛ ˈˈdoodɔ ˗sü ˈdhö ˈö ˈwɛɛwɛ bhë ˗a kë.