Olɛnpikö trʋʋˈˈ ˗nu ꞊mɔɔn˗ ˗bha ˈwo mɛn ˗nu ˗gɔ ꞊ɲɔɔn ˈkwëë˗ ꞊dedewo ˗ee?: ˈMën Biblö ˗ya pö?

Mɛn ˗nu ˗wa ˗pö ꞊dhɛ mɛn ˗nu ˈö ˈwo dho ˗kwɛ 2024 Olɛnpikö trʋʋˈˈ ˗nu ˗ga bhë, ˗wo ꞊mɔɔn mɛn ˈˈmliya ˈˈsoodhu ˗bha. ˈYö mɛn ˗nu ˈwo ˗dho ˗an ˗ga kö ˗wo trʋʋˈˈ ˗nu bhë ˗an kë ˗ni ˈgü, ˗wo ˗go ˈˈsɛ 206 ˈgü. Pë ˈö Olɛnpikö trʋʋˈˈ ˗bha ˈwɔnyëë˗ ˈkpii˗ ˈö ˈwo˗ ˗dhɛ Toma Bakö ˈö˗ pö, yö ꞊nɛɛn: «Trʋʋˈˈ ˈö ˈˈsɛ ꞊gban ˈˈpɛpɛ ˈgümɛn ˗gɔ ꞊ɲɔɔn ˈkwëë˗ ˗dhikodhɛ ˈgü ˈnën ˈkwa˗ ˗bha yö. ˗Kwaa ˗zɔn ꞊dhɛ mɛnbhɩɩdhe ˗nu ꞊gban ˈˈpɛpɛ dua ˗mü kö ˗wo ˗tosɛta kë ˗dhikodhɛ ˈgü ˈkö ˗kë ꞊dhɛ ˈkwaa do, ˗dhɛ ˗kɔ ˈö Olɛnpikö trʋʋˈˈ ˗nu ˗wa ˗kë ˗a ˈka bhë, ˗a ˈdhö.»

Olɛnpikö trʋʋˈˈ ˗nu ꞊mɔɔn˗ ˗bha ˈwo ˈwɔn ˗së suu ˗nu ˈwo bhë ˗an ˗kë ˗ee? Kwa ꞊mɔɔn˗ ˗bha ˈkwa ˗yadeflëëgüsü ꞊dede ꞊slɔɔ ˈö ˈkwa ˗kë ˗dhikodhɛ ˈgü ˗ee?

˗Wo ˗dho nu ˗yadeflëëgüsü waa ˗dhikodhɛ ˈka ˗ee?

Olɛnpikö ˈö ˗kwɛ ˈö yö ˗a ˈka, ˈyaa trʋʋˈˈ dosɛnŋ ˈka. ˗A trʋʋˈˈ ˗nu ˈwo ˈˈdhʋ̈, ˗wa pë ˗nu ˈwo mɛn ˗nu ˗pɛ ˈgü ˈö ˈwo ˗kë ꞊dhɛ ˗duɛɛ waa politikö ˗wɔn ˗nu ˈdhö bhë, ˗an yö zaŋta. Pë ˗nu ˈwo mɛnbhɩɩdhe ˗nu dua ˈka, mɛn zë ˈgü kë ˗sü, mɛn ˈˈwɛɛ ˗nu ˗bha ˗zlanwo ˗sü ˈya˗ ˗sü waa ˗naan ˈö mɛn ˗nu ꞊zinŋ ˈgü ˗wa yö zaŋta ˈpö.

Trʋʋˈˈ ˗nu ˈö ˈˈsɛ ꞊gban ˈˈpɛpɛ ˈgümɛn ˗nu ˗kɔ ˈdhö ˗an ˈgü, ˈö ˗an ˈbha ˗nu ˗kë ꞊dhɛ Olɛnpikö ˈdhö bhë, ˗yö mɛn ˗nu ˈgü ˗pʋ. ˈKö ˗kë ˈˈdhʋ̈, trʋʋˈˈ ˗nu ˈwo bhë ˈwaa nu ˗yadeflëëgüsü waa ˗dhikodhɛ ꞊dede ˈka. ˗Wo mɛn ˗nu ˗blü ˗ʒian kö ˗an ˗zotakɔ ˗nu waa ˗an ˗bha ˈwɔn kë ˗kɔ ˗nu ˗wo nu ˈˈkankwëëdhö ˈka.

Biblö ˗ya ˗to ˈˈdhiʋ̈ ˈö ˈˈtakɔ ˗nu ˈö ˗an ˗wɔn ˈgü ˗dhikodhɛ kë ˗sü ˈdhö ˈˈgbɩɩ˗ ꞊dedewo ꞊dɛɛ, ˗an ˗wɔn ˗blɛɛ. (2 Timote 3:1-5) ˈBha˗ pö ˈwɔn ˈö ˗gban pë ˈö Biblö ˗ya to ˈˈdhiʋ̈ ˈö˗ ꞊blɛɛ bhë ˗a ˗bha, ˈü˗ ˈbha man, ˗bhö ˈwɔn ˗gɔ « La Bible a-t-elle prédit la mentalité et la conduite des gens de notre époque ? » ˗wo pö.

Pë ꞊dede ˈö ˗dho nu ˗yadeflëëgüsü waa ˗dhikodhɛ ˈka

Pë ꞊dede ˈö ˗dho nu ˗yadeflëëgüsü waa ˗dhikodhɛ ˈka ˈkpɔnŋ ꞊taa, Biblö ˗ya ˗wɔn ˗blɛɛ. ˗Ya ˈˈplüün ˗bho ˈö˗ pö ꞊dhɛ mɛn ꞊gban ˈˈpɛpɛ ˗kɔ ˈdhö kë ˈwɔn do ˗bha mɛnkɔɔnsü do ˈbha ˈö dhaŋ˗ ˈgü ˈö ˈwo˗ ˗dhɛ «˗Zlan ˗bha ˗Gblüdëdhɛ» bhë, ˗a ˗kɔ ꞊löö.—Lukö 4:43; Matiö 6:10.

Mɛn ˈö ˗Gblüdëdhɛ ˈö bhë ˗a ˗gɔ ˈˈdhiʋ̈ ˈnën ˗tɔ Yesu Klito. ˈYö ˗yö ˗dho ˗a kë ˈö ˈˈsɛ ˗todhʋ̈sü ꞊gban ˗yö ˈwaannu. Biblö ˗ya ˗pö:

• «Mɛn kpɛnŋdhö ˗nu ˗dho wo ˈˈbin ˗ya, ˈö ˗yadeflëëgüsü ˗gɛn ˗yö ˗gban.»—Psaume 72:7.

• «ˈˈFlɛɛmɛn ˈö ˗takundhe ˗dhɛ ˗ni ˈgü ˈˈgbʋ ˈka, [...] ˗yö ˗dho ˗an dha. [...] ˗Yö ˗dho ˗an dha saanˈˈ waa ˈwɔn ˈˈdhiʋ̈˗ ˗nu ˗gɔ.»—Psaume 72:12, 14.

Yesu ˗bha mɛn ꞊klaŋkëwo ˗nu ˗wa mɛn ˈˈmliɲɔn ꞊va ꞊dede ꞊ɲɔɔn ˈkwëëdhö ˈsaadhö ꞊dɛɛ ˈˈsɛ 239 ˈgü. Zoova ˗bha ꞊Gbɛkiö ˗nu ˈö ˈwo ˈˈkpɔnŋtaadhɛ ˗todhʋ̈sü, ˗wa ˗tosɛta ˗kë ˗dhikodhɛ ˈgü ˗sü draanˈˈ. ˈBha˗ pö ˈü ˈbha ˈgüman, ˗bhö ˈˈGlaadhiʋ̈ ˗tɔn ˗bha ˈwɔn ˗gɔ ˈö˗ ˗gɔ ˗kë « Briser le cercle de la haine » ˈka bhë, ˗a ˗wo pö.