ˈˈSɩyi, Sɛtanblö 13
Mɛn ˗wɔngbɩɩsü ꞊dede ˗mü ü ˈka.—Dan. 9:23.
ˈDhɛ Babidhɔnömɛn ˗nu ˗wo Daniɛdhö kun ˈwo dho ˗a ˈka wo ˗gɔ ˈˈsɛ ˈgü, kö ˗Zlan ˗wodhiʋ̈lomɛn ˈö bhë ˗yö wlüünën ˈka. ˈKö ˗kë ˈˈdhʋ̈, Babidhɔnömɛn ˗nu ˈˈɲan ˗ya ˗kun, ˈyö ˗tɔ ꞊dhɛ ˈpë ‹mɛn ˈˈɲan ˗yö ˗kpan ˗a ˗bha› ˈyö ˈwo˗ yö. ˗Wa ˗yö ꞊dhɛ Daniɛdhö ˗kun ‹ˈnëngɔɔn ˗së› ˈö go ˈkɔdhi ˗tiaandhö ˈgü ˗a ˈka. (1 Sam. 16:7) ˗A ˗wɔn ˈgü, ˗wa ꞊klaŋkë kö ˗yö yökë ˗gblüdë ˗kɔ ꞊löö. (Dan. 1:3, 4, 6) Mɛn ˈö Daniɛdhö kun ˗a ˈˈpiʋ̈ kö ˈö kë ˗a ˈka bhë ˈnën˗ ˗wɔn ˈgü ˈö˗ ˗dhɔ ˗yö Zoova ˗kë. ˈDhɛ Zoova ˗yö Daniɛdhö ˗zɔn Noe waa Zɔbö ˗an ˈka, kö Daniɛdhö ˗kwɛ ˗yö 20. Zoova ˗ya ˗pö Daniɛdhö ˗yö mɛn kpɛnŋdhö ˈka ꞊dhɛ mɛn ꞊plɛ ˈwo ˗klu ö ˗bha ˗kwɛ ꞊va ˈˈpiʋ̈ bhë, ˗an ˈdhö. (ˈWun. 5:32; 6:9, 10; Job 42:16, 17; Ézéch. 14:14) Daniɛdhö ˗yö ˗tosɛta ˗së ˗kë ˈö ꞊gwëë piŋdhö, ˈö˗ ˗dhɔ Zoova ˗kë.—Dan. 10:11, 19. w23.08 2 § 1-2.
˗Tɛɛdhoowayi, Sɛtanblö 14
‹˗A ˈduaan ˗bha ˗kë ꞊gblɛɛn ˗sü, ˗a ˗bha ˗kë ˈˈgbɛa ˗sü, ˗a ˗dɔ ˗gɛan ˗sü ˗bha ˗kë ꞊gblɛɛn ˗kɔ ˗nu ˈwo bhë, ˗ka ˗an dɔ ˈkpakpadhö ˗së ˈka.›—Efɛ. 3:18.
ˈKwa˗ pö ˈkwa ˈkɔ ˈbha ˈdhɔ, kwa dua ˗mü kö ˗a ˈkɔ ˈö ˈˈdhʋ̈ ˈkwa ˗a ˗dhɛ ꞊gban ˈˈpɛpɛ ˗ga ˗së ˈka. Pë ꞊dede ˈö ˈkwa dho ˗a kë kö kwa Biblö ˗wo pö ˗ni ˈgü ɛɛnˈˈ kö ˈkwa˗ draanˈˈ ˗ni ˈgü, ˈyö bhë. ˈKwa Biblö ˗wo pö ˗bia ˈka, «pë ˈnë ˗nu ˈwo ˗gban [˗Zlan] ˗wʋ ˗bha ˈö ˈwo ˈmɛ ꞊wa ˗da ˗a ˗bha zian ˗ta ˗dee ˈgü, ˗a ˗nu ꞊draan˗ ˗bha» bhë, ˈnën ˈkwa dho ˗an dɔ. (Ebl. 5:12) ꞊Dhɛ ˗kɔ do ˈö ˈkwa ˈkɔɔdhɛ ˗ga ˗a ˈka ˗së ˈka bhë ˗a ˈdhö, kwa dua ˗mü ˈpö kö ˈkwa Biblö ˗wo pö, ˈkwa˗ ˈˈpiʋ̈ ˈpɔn kö ˈkwa˗ ˈgüman ˗së ˈka. Biblö draanˈˈ ˗kɔ ˗së do ˈnen ˗tɔ ˗kɔ ˈö˗ ˈˈpian ˗nu ˗wo ˗gban ˗a ˈka wo ˈko ˗bha ˗a dɔ ˗sü. Gagade ˗nu ˈkwa ˈdhaŋ˗ bho ˗an ˈˈdhiʋ̈ waa pë ˈö ˗kë ˈkwa ˈdhaŋ˗ bho ˗an ˈˈdhiʋ̈, ˗kwa pë kë kö ˈkwa ˗an ˈgüman. ˈKwa˗ pö ˈkwa ˗Zlan ˈˈDhiwo ˈgüman ˗së ˈka, kwa dua ˗mü kö ˈkwa gagade ˗nu ˈˈpiʋ̈ ˈpɔn. Bɔmɛn Pɔdhö ˗yö ö ꞊dhegblü ˗nu ꞊faanmën kö ˗wo ˗Zlan ˈˈDhiwo draanˈˈ ˗kplawo, kë ˈˈdhʋ̈ kö ˗wo gagade ‹ˈduaan ˗bha ˗kë ꞊gblɛɛn ˗sü, ˗a ˗bha ˗kë ˈˈgbɛa ˗sü, ˗a ˗dɔ ˗gɛan ˗sü ˗bha ˗kë ꞊gblɛɛn ˗kɔ ˗nu› ˈgüman ˗së ˈka. ꞊Waa˗ kë ˈˈdhʋ̈, ‹Klisi ˗wɔn ˗dho ˈto ˗an zuëˈˈ ˈgü ˗kpɛawo› ˈö ˗an ˗bha ˗zoyödhe ˗gɛn ˗yö ˗gban. (Efɛ. 3:14-19) Kwa dua ˗mü ˈkwa˗ kë ˈˈdhʋ̈ ˈpö. w23.10 18 § 1-3.
˗Tɛɛdhooyi, Sɛtanblö 15
Ka ˗zʋ ˈya ˈdho bhɔ ˈwɔn ˈö [˗Zlan] ˗wʋdhiʋ̈loomɛ ˗nu ˈwo kwa Dëmɛ ˗bha dhiang zë bha ˈwo˗ ˗kë bha˗ ˈka tongtongdhö. ˗Ka ka ˗bha kë ˗kɔ ˈsü wo ꞊në˗ ˗nu ˗bha ˗bha ˗a ˗nu ˗bha zuësɛadhɛ waa˗ saanˈˈ ˈwo˗ sü [ . . . ] bha˗ ˈgü.—Zak. 5:10.
Biblö ˗yö mɛn ꞊va ˈbha ˗nu ˈwo wo zuʋ̈ˈˈ ˗kë ˗saa ˗an ˗wɔn ˗blɛɛ. Kwa ꞊mɔɔn˗ ˗bha ˈkwa ˗an ˗bha ˗kwɛzlan ꞊draan Biblö ˈgü. ˗A mɛn do ˈnën ˗tɔ Davi. ˈKö ˗kë ꞊dhɛ ˗yö ˗to ˈˈtɩtɩ ˈö ˗Zlan ˗yö ˈˈɲɔn ˗lo ˗a ꞊troo kö ˗yö kë ˗gblüdë ˈka Izraɛdhö, ˗a dua ˗mü kö ˗yö ˗kwɛ ꞊va ˈˈdhiʋ̈ ˈˈgan kö ˗yö ꞊kun ˗ya ˗gblüdëdhɛ kë ˗sü ˗bha. Simeɔn waa Anö ˈwo kun Zoova ˗dhɔkëmɛn ˗nu ˈka ˈpö ˗wo ˗kun wo ˈˈɲan ˈto ˗ni ˈgü Mesi ˗gɔ zuʋ̈saadhɛ ˈka. (Dhu. 2:25, 36-38) Kwa ˗kwɛzlan ˗nu ˈwo bhë ˗an ˗wo pö ˗ni ˈgü, ˗kwa kwa ˗zota dhɛɛˈˈ ˗nu ˈwo yö ˗an ˈgü: «˗Mën ˈö mɛn ˈö yö ˗a zuʋ̈ˈˈ ˗kë ˗saa? ˈWɔn ˗së ˗mɛɛn ˗nu ˈö ˗an ꞊slɔɔ? A ˗dho ˈto ˗a ˗bha ˈwɔnzuan ˈˈpiʋ̈ ˗kɔ ˗kë ꞊dhɛ?» Kwa ꞊mɔɔn˗ ˗bha ˈzü ˈkwa ˗gleŋ sü mɛn ˗nu ˈö ˈwii wo zuʋ̈ˈˈ kë ˗saa ˗an ˗bha ˈwɔnzuan ˈgü. (1 Sam. 13:8-14) ˗A ˗wɔn ˈgü, ˗kwa kwa ˗de dhɛɛˈˈ ˈkpɔ ˈkwa˗ pö: «ˈMën ˗kë ˈö ˈwii wo zuʋ̈ˈˈ kë ˗saa? ˈWɔn yaa ˗mɛɛn ˈwo˗ ꞊slɔɔ?» w23.08 25 § 15.