ˈWƆN ˗GƆ 15
De ˈö ˗tɔ Yesu?
Yesu ˗kun ˈtɔ ˗mɛn ˗nu ˈwo ˈˈdhiʋ̈ ˗be ˗a mɛn do ˈka. Mɛn ꞊vadhɛ ˗wa ˈtɔ -dɔ. ˈˈKɛɛ pë ˈö ˗gban yö ꞊dede ˗a ˗bha mɛn ꞊vadhɛ ˈwaa˗ dɔ. Mɛn ˈbhaa ˗nu ˗wo ˈwɔn ꞊vadhɛ ˗blɛɛ ˗a ˈˈgblʋʋ ˗ta. ˈˈKɛɛ ˗mën ˈö Biblö ˗ya pö ˈö ˗gban Yesu ˗bha?
1. De ˈö ˗tɔ Yesu?
Yesu ˈö bhë ˗Zlan ˗bha ˈˈkiö ˈˈpiigbɩɩsü do ˈö dhaŋ˗ ˈgü yö ˗mü. Yö ˈnën ˈö Zoova ˗Zlan ˗ya ˗da ˗blɛɛsü. ˗A ˗wɔn ˈgü ˗wa ˗dhɛ «˗a ˗bha ˈnë ˗blɛɛzë» (Kodhɔsö 1:15, NTBL) Yesu yö dosɛnŋ ˈnën Zoova dosɛnŋ ˈˈkpaan ˗ya ˗da vɛɛdhö. Pë ˈö ˗kë ˈö Biblö ˗ya ˗dhɛ ˗Zlan ˗bha «ˈnë ga do ˈö˗ ˗gɔ» ˈyö bhë. (Zan 3:16) Yesu ˗yö ö Dë Zoova ˗takun pë ˈˈpɛpɛ ˗nu ˈwo to ˗an ˗da ˗sü ˗bha. (Proverbes 8:30 ˗wo pö.) ˗Mlɛɛn ˈö Zoova waa Yesu ˗an ꞊zinŋgü ˗yö ˈˈgbɩɩ˗ ˗kplawo. ˗Wa ˗dhɛ «˗Wo», ˈyö ˗tɔ ꞊dhɛ ˗yö ˗klu ˗Zlan ˗bha ˈö˗ ˗bha nɔɔn˗ waa- ˗bha ˗dhioo ˗nu ˈˈdhiʋ̈ ˗lo ö ˗lo ˗kɔ ꞊dede ˈka.—Zan 1:14.
2. ˈMën ˗kë ˈö Yesu ˗yö nu ˈˈkpɔnŋ ꞊taa?
˗Ya ˗mɔn ˗kwɛ 2000 ˗bha ꞊dɛɛ ˈö ˗Zlan ˗yö bɔ ö ˗bha ˗zuu ˈˈslʋ̈ʋ̈slʋ̈ ˗ta ˈö ˗dhidha ˗kë, ˈö Yesu ˈö kun dhaŋ˗ ˈgü bhë ˗a ˗bha ˗tosɛta bɔ ˈnëndhiëŋnën do ˈö ˈyaa gɔɔn˗ ˗wɔn dɔ, ˈö ˈwo˗ ˗dhɛ Madhi ˗a ˈˈgblüü. ꞊Dhɛ ˈö ˗kë ˈˈdhʋ̈ ˈyö Yesu ˗yö bhɔ ˈö ˗kë mɛnbhɩɩdhe ˈka. (Dhukö 1:34, 35 ˗wo pö.) ˗Zlan ˗yö Yesu ˗bɔ ˈˈkpɔnŋ ꞊taa kö ˗yö kë ˗a ˗bha ˗Yamɛn ɛɛnˈˈ Klito ˈka, kö ˗yö mɛnbhɩɩdhe ˗nu dha.a Pë ˗nu ˈö Biblö ˗yö ˗an to ˈˈdhiʋ̈ ˈö ˗an ꞊blɛɛ ˈwo ˗gban Yesu ˗bha, ˗wo ˗kë. ˗A ˗wɔn ˈgü mɛn ˗nu ˗wa ˈwɔn ˗dɔ ꞊dhɛ yö ˈnën ˈö ˗tɔ ‹˗Zlan ˈö ˈbhee˗ ˗a ˗bha ˗Yamɛ, ˗a Gbö.› —Matiö 16:16, NTBL.
3. ˗Dhɛ ˗mɛɛn ˈö Yesu ˈdhö ˗a ˗bha ꞊dɛɛ?
˗Dhɛ ˈö Yesu ˗yö ga ˗yö ˗go ga ˈgü ˈö ˗kë ˗zuu ˈka, ˈö ö ꞊yɛɛ ˗kë ˈö dho dhaŋ˗ ˈgü. Dhaŋ˗ ˈgü ˈmü ‹˗Zlan ˗ya ˗gɔ ˈˈdhiʋ̈ ˗wlü, ˈyö˗ gba ˗yɛa ˈö ꞊bhlëësü ˗yɛa ꞊gban ˈˈpɛpɛ ˗bha ˗a ˈka.› (Fidhipö 2:9) ꞊Dɛɛ, ˗kɔmɔnwɔnbhasü ˈkpii˗ ˗yö Yesu ˗gɔ. ˗Ya ˈgo Zoova ˗bha yö ˈnën ˈö yö ˗a ˗bha.
˗KAA ˈˈPIƲ̈ ˈPƆN
ˈWɔn ꞊dede ˗nu ˈwo ˗gban Yesu ˗bha waa ˈpë ˗kë ˈö ˗an dɔ ˗sü ˈdhö ˗së, ˗kwaa ˗ga.
4. ˗Zlan ˈö˗ ˗bha ˈˈpiigbɩɩdhɛ ˈˈdhiʋ̈todhɛ ˈyaa ˈdhö bhë, ˈyaa ˈnën ˗tɔ Yesu.
Biblö ˗ya ˗pö, ˈkö ˗kë ꞊dhɛ Yesu ˗yö ˈˈkiö ˈˈpiigbɩɩsü ˈka dhaŋ˗ ˈgü, ˗yö ö ˗gɔ ˗dho ˈˈshia˗ ö Dë Zoova ˗Zlan ˗dhɛ. ˗Mën ˈö ˗kë ˈkwa˗ pö ˈˈdhʋ̈? ˗Kaa VIDEO ˗ga kö pë ˈö Biblö ˗ya pö ˈö ˗gban Yesu ˗duɛɛ ˈö ˗Zlan ˈö˗ ˗bha ˈˈpiigbɩɩdhɛ ˈˈdhiʋ̈todhɛ ˈyaa ˈdhö ˗a ˈˈsuee bhë ˗a ˗bha, kö ˈka˗ dɔ.
Biblö ˈˈɲan ˗nu ˈwo ˈˈshia˗ bhë, ˗wo ˗dho ka ˗takun kö ˗mlɛɛn ˈö Yesu waa Zoova ˗an ꞊zinŋgü kö ˈka˗ dɔ. ˗Kaa Biblö ˈˈɲan ˗nu ˗wo pö, kö ˈka dhɛɛˈˈ ˗nu bhë ˗an ˗yɔ mɛɛnˈˈ.
˗Ka Dhukö 1:30-32 ˗wo pö.
-Zlan ˗bha ˈˈkiö ˈö bhë ˗ya ˗pö ‹˗Zlan ˈö ˗ya ˗sü ˈka dhang˗ ˈgü› bhë, ˗a ˗bha de ˗mü Yesu ˈka?
˗Ka Matiö 3:16, 17 ˗wo pö.
Yesu ˗bha ˗bɔyibhaasü ˈˈtʋ̈ŋ ˈka, ˗wo ˈö go dhaŋ˗ ˈgü bhë ˗ya ˗pö ꞊dhɛ?
Ü ˗bha ˈgü de ˗wo ˗mü?
˗Ka Zan 14:28 ˗wo pö.
ˈNën waa ö dë ˗a ˈde ˈkpii˗, ˈö ˗wogbindhɛ ˈdhö ˗a ˗gɔ?
Yesu ˗yö Zoova ˗dhɛ n Dë. ˗Mën ˈö˗ ˗pö ˈˈdhʋ̈ ˗sü ˗ya ˗zɔn kwa ˗dhɛ?
˗Ka Zan 12:49 ˗wo pö.
Yesu ˗bha ˈgü waa ö Dë ˗wo do ˗ee? Bhi ˗de ˈpö ꞊wɛ, ü ü ˗bha ˗pö ˗a ˈgü ꞊dhɛ?
5. ˗Mën ˗nu ˈwo˗ ˗zɔn ꞊dhɛ Yesu ˈnën ˗tɔ ˗Zlan ˗bha ˗Yamɛn?
˗Zlan ˗bha ˗Yamɛn ˈö ö ˗kɔ ˗yɛ ˗a ˗bha kö ˗yö mɛnbhɩɩdhe ˗nu dha bhë, Biblö ˗yö ˈwɔn ꞊vadhɛ ˗to ˈˈdhiʋ̈ ˈö˗ ꞊blɛɛ ˗a ˗bha kö ˗yö kwa ˗takun kö ˈkwa˗ dɔ. ˗Kaa VIDEO ˗ga kö pë ˈbhaa ˗nu ˈö Biblö ˗yö ˗an to ˈˈdhiʋ̈ ˈö ˗an pö ˈö ˈwo yökodhiʋ̈ Yesu ˗bha kö ˗ya nu ˈˈsɛ ˗ta, ˈka ˗an dɔ.
ˈWɔn ˗nu ˈö Biblö ˗yö ˗an to ˈˈdhiʋ̈ ˈö ˗an ꞊blɛɛ, ˗ka ˗an ˗wo pö kö ˈka dhɛɛˈˈ ˗nu ˈwo ˈˈshia bhë ˗an ˗yɔ mɛɛnˈˈ.
˗Ka Michée 5:2 ˗wo pö, kö ˗dhɛ ˈö ˗Zlan ˗bha ˗Yamɛn dhö bhɔ ˗a ˗bha, ˈka˗ dɔ.b
ˈWɔn ˈö Biblö ˗ya to ˈˈdhiʋ̈ ˈö˗ pö bhë, ˗yö ˗yökodhiʋ̈ Yesu ˗bha ˗kɔ ˗kë ꞊dhɛ?—Matiö 2:1.
˗Ka Psaume 34:20 waa Zacharie 12:10 -an ˗wo pö, kö ˈwɔn ꞊plɛ ˈö Biblö ˗yö ˗an to ˈˈdhiʋ̈ ˈö ˗an ꞊blɛɛ ˈö ˈwo ˗gban ˗Zlan ˗bha ˗Yamɛn ˗bha ga ˗sü ˗bha ˈka ˗an dɔ.
ˈWɔn ˗nu ˈö Biblö ˗yö ˗an to ˈˈdhiʋ̈ ˈö ˗an ꞊blɛɛ bhë, ˗wo ˗yökodhiʋ̈ ˗ee?—Zan 19:33-37.
Ü ˗bha ˈgü Yesu ˈnën pë ꞊gban ˈˈpɛpɛ ˗kë kö pë ˗nu ˈö Biblö ˗yö ˗an to ˈˈdhiʋ̈ ˈö ˗an ꞊blɛɛ bhë, ˗wo ˗bɛ ö ˗bha ˗ee?
˗Mën ˈö˗ ˗zɔn ü ˗dhɛ ˈö ˗gban Yesu ˗bha?
6. Yesu dɔ ˗sü ˗dho ˈwɔn ˗së kë kwa ˗dhɛ.
Biblö ˗ya ˗pö kwa dua ˗mü kö ˈkwa Yesu waa yö ˈö ˗Zlan ˗ya nu ˗a ˗dhɛ ˈkwa ˗an dɔ. ˗Ka Zan 14:6 waa 17:3 ˗an ˗wo pö, kö ˈka dhɛɛˈˈ ˈö yö ˗a ˗yɔ mɛɛnˈˈ:
ˈMën ˗kë ˈö Yesu dɔ ˗sü ˗wɔn ˈdhö ˈˈgbɩɩ˗?
Yesu ˗yö ˗kë ˗Zlan ˈˈtɔŋdë ˈka ˗sü ˗ʒian ˗zɔn kwa ˗dhɛ. Gagade ˈö ˗gban Zoova ˗bha ˗ya ˈgü ˗pʋ kwa ˗dhɛ. ˗A ˈsaa ˈgü, ˗tosɛta ˈö ˈyaa ɲën kwa ꞊mɔɔn˗ ˗bha ˈkwa˗ ꞊slɔɔ
MƐN ˈBHAA ˗NU ˗WA ˗PÖ: «Zoova ˗bha ꞊Gbɛkiö ˗nu ˈwaa ˈdhaŋ˗ bho Yesu ˈˈdhiʋ̈.»
Ü ü ˗bha ˗pö ˗a ˈgü ꞊dhɛ?
˗A ˈDHƐ TO KWA ˈˈƝAAN
Yesu ˈö bhë ˗zuu ˈˈpiigbɩɩsü ˗mü. ˗Zlan Gbö waa˗ ˗bha ˗Yamɛn ˗mü.
˗Zobuödhe
ˈMën ˗kë ˈwo Yesu ˗dhɛ ˗Zlan «˗bha ˈnë ˗blɛɛzë»?
˗Mën ˈö Yesu kun ˗a kë ˗ni ˈgü dhaŋ˗ ˈgü ˈyö ꞊kun nu ˈˈkpɔnŋ ꞊taa?
ˈKwa˗ ˈwɔn ˗dɔ ˗kɔ ˗kë ꞊dhɛ ꞊dhɛ, Yesu ˈnën ˈö ˗tɔ ˗Zlan ˗bha ˗Yamɛn?
˗AN ˗GA ˈPÖ
ˈWɔn ˗nu ˈwo ˗gban Yesu ˗bha ˗kë ˗Yamɛn ˈka ˗sü ˗bha, ˗an ˈbhaa ˗ga.
Biblö yö ˈti˗ pö ˗Zlan ˗yö Yesu ˗kpɔ ꞊dhɛ ˗kɔ ˈö mɛnbhɩɩdhe ˗nu ˗wo ˈnën kpɔ ˗a ˈka ˗a ˈdhö. Pë ˈö˗ pö ˗a ˗ga.
«˗Mën ˈö ˗kë ˈö ˈkwa Yesu ˗dhɛ ˗Zlan Gbö?» (ˈWɔn ˗gɔ ˈö jw.org ˗ta)
Biblö yö ˈti˗ pö ˗Zlan ˗yö ö ˈkoodhö -yaaga. Pë ˈö˗ pö ˗a ˗ga.
«Yesu ˗yö ˗Zlan ˈka ˗ee?» (˗Kwɛ 2009 Avlidhö 1 ˗bha ˈˈGlaadhiʋ̈ ˗tɔn)
Pë ˈö Biblö ˗ya pö ˈö ˗gban Yesu ˗bha, ˗dhɛ ˈö dhebɔ do ˗ya dɔ, ˗kɔ ˈö˗ ˗bha ˗tosɛta ˗yö go ˗a ˈka ˈˈgblʋʋ, ˗a ˗ga.
a ˈSëëdhɛ ˈö yö ˗a ˈwɔn ˗gɔ 26 waa˗ 27 ˈgü, kwa ˗dho pë ˈö ˗kë ˈö mɛnbhɩɩdhe ˗nu ˗bhawɔn ˈdhö dhasü ˗bha waa ˗kɔ ˈö Yesu ˗yö kwa dha ˗a ˈka, ˗an yö.
b ˈˈTʋ̈ŋ ꞊dede ˈö Yesu dho nu ˗a ˈka ˈˈsɛ ˗ta, ˗kɔ ˈö Biblö ˗ya to ˈˈdhiʋ̈ ˈö˗ ꞊blɛɛ ˗a ˈka, ˗a ˗ga ˗zoto ˗a ˈˈpiʋ̈ ˗wɔn 2 ˈgü.