ˈWƆN ˗GƆ 18
Kwa ˗dho kletiɛn ꞊dede ˗nu dɔ ˗kɔ ˗kë ꞊dhɛ?
Mɛn ˈˈmliya ꞊va ꞊dede ˗wa ˗pö wo ˗de ˗dhɛ ꞊dhɛ wo kletiɛn ˈka, ˈˈkɛɛ kö ˗an ꞊gban ˗bha ˗zoyödhe waa ˗an ˗bha ˈtɔŋ˗ ˗nu ˈwaa do. ˗Dhɛ ˈö ˈˈdhʋ̈, kwa dho kletiɛn ꞊dede ˗nu dɔ ˗kɔ ˗kë ꞊dhɛ?
1. De ˗nu ˈwo ˗tɔ kletiɛn?
Yesu ˗bha gwëëˈˈ ˗nu ˈnën ˈwo ˗tɔ kletiɛn ˗nu. (Këwɔn ˗nu 11:26 ˗wo pö.) ˗Kɔ ˗mɛɛn ˈwo ˗dho ˗a ˗zɔn ˗a ˈka ꞊dhɛ wo Yesu ˗bha gwëëˈˈ ˗nu ˈka? Yesu ˗ya ˗pö: ‹ˈKa ˈto ˗klu ˗sü ˈka n ˗wʋ ˗bha ˗së ˈka, kö ˈka kë ma ꞊klang ꞊dede ˈka.› (Zan 8:31) ˗Ya ˗zɔn ꞊dhɛ kletiɛn ꞊dede ˗nu dua ˗mü kö ˗wo Yesu ˗bha ꞊klaŋwo ˗nu ˗ya ꞊bhlëë ˈgü. ˗Ya ˈgo mü ˈzü, Yesu ˗yö ˗gban ˗zlanwo ˗ta ˈö mɛn ˗nu ꞊klaŋkë. ˗Dhɛ ˈö ˈˈdhʋ̈ kletiɛn ꞊dede ˗nu ˗bha ˗zoyödhe dua ˗mü kö ˗yö ˗gban Biblö ˗ta. —Dhukö 24:27 ˗wo pö.
2. Kletiɛn ꞊dede ˗nu ˗wa ˗zɔn ꞊dhɛ ˗an ˗dhɔ ˗yö ˗an ˈko ˗nu ˗kë ˗kɔ ˗kë ꞊dhɛ?
Yesu ˗ya ˗pö ö ˗bha gwëëˈˈ ˗nu ˗dhɛ: «Ka ˗dhɔ ˗yö ka ˈko kë ꞊dhɛ ˗kɔ ˈö ka ˗dhɔ ˗yö n ˗kë ˈka bha˗ ˈdhö.» (Zan 15:12) Yesu ˗ya ˗zɔn ꞊dhɛ ö ˗bha gwëëˈˈ ˗nu ˗dhɔ ˗yö ö ˗kë ˗kɔ ˗kë ꞊dhɛ? ˗Yö ˈˈtʋ̈ŋ ˗kë ˗an ˈˈpiʋ̈, ˗an ꞊faan ˈmën ˗sü waa ˗an ˗takun ˗sü ˈka. ˗Yö ö ˗de ˗nu ˗ʒiaanwo ˗an ˗wɔn ˈgü. (1 Zan 3:16) ˗Kɔ do bhë ˗a ˈka ˈpö kletiɛn ꞊dede ˗nu ˗wa ˗zɔn wo ˈˈdhiwo waa wo këwɔn ˗nu ˈgü ꞊dhɛ, ˗an ˗dhɔ ˗yö ˗an ˈko ˗kë.
3. Yö ˗mɛɛn ˈö kletiɛn ꞊dede ˗nu ˗wa ˗kë?
Yesu ˗yö ö ˗bha gwëëˈˈ ˗nu ‹˗bɔ [kö ˗wo] ˗Zlan ˗bha ˗gblüdëdhɛ ˗dhiaŋ zë.› (Dhukö 9:2) Kletiɛn ˗blɛɛsü ˗nu ˈwo kun ꞊kwɛŋzü ˗wo ˗zlanwopö ˗wo ˗bha ˗Zlan ˗dhɔkëdhɛ ˈgü, ˈˈkɛɛ ˗wo ˗dho ˈpö ˈˈdhɛɛtadhɛ ˗nu waa mɛn ˗nu ˗bha ˈkɔɔdhɛ ˗nu ˗bha ˈö ˈwo ˗zlanwopö. (Këwɔn ˗nu 5:42; 17:17 ˗an ˗wo pö.) Kwa ˗bha ˈˈtʋ̈ŋ ˈgü ꞊dɛɛ, kletiɛn ꞊dede ˗nu ˗wo ˗zlanwopö ˗dhɛ ꞊gban ˈgü. Mɛn ˗nu ˗dhɔ ˗yö ˗an ˗kë. ˗A ˗wɔn ˈgü ˗wo wo ˗bha ˈˈtʋ̈ŋ waa wo ꞊faan ˗nu ˗sü ˈö ˈwo nɔɔn˗ ˗së ˈö Biblö ˈgü, ˈö mɛn ˗nu ꞊faan ˗mën, ˈö ˗an ˗zogban bhë, ˗a pö ˗an ˗dhɛ.—Makö 12:31.
˗KAA ˈˈPIƲ̈ ˈPƆN
Kletiɛn ꞊dede ˗nu waa mɛn ˗nu ˈö ˈwaa ˈto Yesu ˗bha ꞊klaŋwo waa˗ ˗bha ˈwɔnzuan ˗nu ˈˈpiʋ̈, ˗kwa ˗an ˗gokopiʋ̈dhɛ ˗ga.
4. Gagade ˈö Biblö ˈgü ˈyö ˈwo˗ ꞊mɛɛn.
Kletiɛn ˗nu ˈwo kun ꞊kwɛŋzü ˗wo ˗zlanwo ꞊bhlëë ˗ya
Mɛn ˗nu ˈwo˗ pö wo ˗de ˗dhɛ ꞊dhɛ wo kletiɛn ˗nu ˈka, ˗an ꞊gban ˈwaa gagade ˈö Biblö ˈgü ˗a ꞊bhlëë ˗ya. ˗Kaa VIDEO ˗ga, kö dhɛɛˈˈ ˈö ˈˈshia bhë ˈka˗ ˗yɔ mɛɛnˈˈ.
˗Mën ˈö kletiɛn ꞊suasü ˗nu ˗wa ˗kë kö mɛn ˗nu ˈwa -dho gagade ˈö Yesu ˗yö kwa ꞊klaŋkë ˗a ˈka ˗a dɔ?
Gagade ˈö Biblö ˈgü ˈyö Yesu ˗ya ˗zɔn mɛn ˗nu ˗dhɛ. ˗Ka Zan 18:37 ˗wo pö, kö ˈka dhɛɛˈˈ ˈö yö ˗a ˗yɔ mɛɛnˈˈ:
Yesu ˗ya ˗pö kletiɛn ˗nu ˈwo «tɛanwɔn dɔ» ˗wo ˗an ˗dɔ ˗mën ˗bha?
5. ˗Wo gagade ˈö Biblö ˈgü ˗a ˗zɔn mɛn ˗nu ˗dhɛ.
ˈö ˈwo ˗zlanwopö mɛn ˈˈwɛɛ ˗nu ˗dhɛ
ˈˈSanni kö Yesu ˗yö ˈdho dhaŋ˗ ˈgü, ˗yö yö ˈbhaa ˈˈklɔɔn ˗bho ö ˗bha gwëëˈˈ ˗nu ˗bha. ˗A yö ˈö ˈˈdhʋ̈ ˗wa ˗kë ˈö yö ˗a ˈka ꞊dɛɛ ˗bha. ˗Ka Matiö 28:19, 20 waa Këwɔn ˗nu 1:8 ˗an ˗wo pö, kö ˈka dhɛɛˈˈ ˈö yö ˗a ˗yɔ mɛɛnˈˈ:
Kletiɛn ˗nu ˗wo ˗dho ˗zlanwopö ˈˈmɛn, ˈö dho ˈö yö ˗a ˈka ˈˈtʋ̈ŋ ˗mɛɛn ˗bha?
6. Pë ˗nu ˈwo mɛn ˗nu ꞊draan ˗a ˈka, wo ꞊dede ˗wa ˗ya ꞊bhlëë ˈgü.
ˈMën ˗kë ˈö gɔndë do ˈwo˗ ˗dhɛ Tɔmö ˈö˗ ˈwɔn dɔ ˈkpakpadhö ꞊dhɛ ˈya ˗kpan kletiɛn ꞊dede ˗nu ˗bha? ˗Kaa VIDEO ˗ga, kö ˈka dhɛɛˈˈ ˗nu ˈwo ˈˈshia bhë ˗an ˗yɔ mɛɛnˈˈ.
Video ˈö bhë ˗a ˈgü, ˈmën ˗kë ˈö Tɔmö ˗yö ˗kan ˗zlanwo ˗nu ˗bha?
ˈMën ˗kë ˈö ga ˗a ˈgü ꞊dhɛ ˈya ˗kpan kletiɛn ꞊dede ˗nu ˗bha?
Kwa këwɔn ˗nu ˗wo mɛn ˈö ˈkwa˗ ˈka ˗a ˗zɔn ˈö ˗ʒiö ˗a ˈka kwa ˈˈdhiwo ˗ta. ˗Ka Matiö 7:21 ˗wo pö, kö ˈka dhɛɛˈˈ ˈö yö ˗a ˗yɔ mɛɛnˈˈ:
˗A pö ˗sü ˈö ꞊dhɛ kwa ˗Zlan ˗dhɔkëmɛn ˈka yö ˈpö ˗wɔn ˈdhö Yesu ˗gɔ ˈˈgbɩɩ˗ ˗ee, ɛɛnˈˈ ˗a ˗zɔn ˈö ˈkwa˗ wo kwa ˈˈtakɔ ˗nu ˈgü yö ˗mü ˗ee?
7. ˗Dhɔ ꞊dede ˗yö ˗an ꞊zinŋgü.
˗Dhɔ ꞊dede ˗kun ˗an ꞊zinŋgü
Kletiɛn ˗nu ˗wa wo ˗de dɔ ga ˗yɛ ˈˈdhiʋ̈ do wo ꞊dhegblü kletiɛn ˈbhaa ˗wɔn ˈgü ˗ee? ˗Kaa VIDEO ˗ga, kö ˈka dhɛɛˈˈ ˗nu ˈwo ˈˈshia bhë ˗an ˗yɔ mɛɛnˈˈ.
Video ˈö bhë ˗a ˈgü, ˗mën ˈö Lɔdö ꞊faan mën ˈö ö ˗de nu ö ꞊dhegblü Ʒoansɔn ˗wɔn ˈgü?
Ü ˗bha ˈgü ˗ya ˗zɔn ꞊dhɛ kletiɛn ꞊dede ˗mü ö ˈka ˗ee?
˗Ka Zan 13:34, 35 ˗wo pö, kö ˈka dhɛɛˈˈ ˗nu ˈwo yö ˗an ˗yɔ mɛɛnˈˈ:
Yesu ˗bha gwëëˈˈ ˗nu (kletiɛn ꞊dede ˗nu) ˗wo ˈˈsɛ ˈˈwɛɛ ˈgümɛn ˗nu, ˈö waa˗ ˗nu ˗an kwi ˈˈɲan ˈyaa do ˗an ˗sü ˗kɔ ˗kë ꞊dhɛ?
˗Gblü ˗ya ˗da, ˗dhɔ ˗yö kletiɛn ꞊dede ˗nu ˗takun ˈö ˈwaa ˗mën ˗kë?
MƐN ˈBHAA ˗NU ˗WA ˗PÖ: «˗Zlanwo ˗yö dosɛnŋ ˈyaa ꞊plɛ.»
Mɛn ˈö˗ ˈpö ˈˈdhʋ̈, Biblö ˈˈɲan ˗mɛɛn ˈü ˗dho ˗a ˗zɔn ˗a ˗dhɛ kö ˗yö kletiɛn ꞊dede ˗nu dɔ?
˗A ˈDHƐ TO KWA ˈˈƝAAN
Kletiɛn ꞊dede ˗nu ˗wo Biblö ˗wo ꞊bhlëë ˗ya. ˗Dhɔ ꞊dede ˗yö ˗an ꞊zinŋgü, ˈö ˈwo gagade ˈö Biblö ˈgü ˗a ˗zɔn mɛn ˗nu ˗dhɛ.
˗Zobuödhe
Kletiɛn ꞊dede ˗nu ˗bha ˗zoyödhe ˗yö ˗gban ˗sü ˈka ˗mën ˗ta?
ˈˈKlʋʋsë ˗mɛɛn ˈö ˈkwa ˗dho kletiɛn ꞊dede ˗nu dɔ ˗a ˗bha?
Yö ˗mɛɛn ˈö kletiɛn ꞊dede ˗nu ˗wa ˗kë?
˗AN ˗GA ˈPÖ
Kletiɛn ˗nu ˈö ˈwo wo ˈgü dɔ ˈˈgbɩɩ˗ ˈö ˈwo to Yesu ˗bha ˈwɔnzuan waa˗ ˗bha ꞊klaŋwo ˗nu ˈˈpiʋ̈, ˈwɔn ˈö ˗gban ˗an ˗bha ˗a ˗ga.
Dhebhɔnën do ˈö kun ˗zlanwo ˈˈwɛɛ ˈgü ˗be, pë ˈö˗ ˗takun ˈö mɛn ˗nu ˈö ˗an ˗dhɛ ö ˗bha ˗zlanwokɔdhi ˈgümɛn ˗nu ꞊dede ˈö ˗an ꞊slɔɔ ˗a ˗ga.
«˗Wo n ˗man dhɛɛˈˈ ꞊gban ˗yɔ ˗bɔ Biblö ˈka!» (˗Kwɛ 2014 Avlidhö 1 -bha ˈˈGlaadhiʋ̈ ˗tɔn)
˗Kɔ ˈö kletiɛn ꞊dede ˗nu ˗wo wo ꞊dhegblü kletiɛn ˗nu ˗takun ˗a ˈka ˈwɔn ˈˈgbɩɩ˗ ˗nu ˈgü ˗a ˗ga.
Kwa kwa ꞊dhegblü ˗nu ˗takun ˈwɔn ˈˈgbɩɩ˗ ˗nu ˈgü (˗A ˈˈklu) (3:57)
ˈˈKlʋʋsë ˗nu ˈwo ˗dho ˗a ˗bha gwëëˈˈ ˗nu dɔ ˗a ˗bha, Yesu ˗yö ˗an ˗wɔn ˗blɛɛ. ˗Kɔ ˈö kletiɛn ˗nu ˈwo kun ꞊kwɛŋzü waa kletiɛn ꞊dede ˗nu ˈwo ꞊dɛɛ ˈwo ˈˈklʋʋsë ˗nu bhë ˗an ˗zɔn ˗a ˈka, ˗a ˗ga.
«˗Wo kletiɛn ꞊dede ˗nu ˗dɔ ˗mën ˗bha?» (˗Kwɛ 2012 Masö 1 ˗bha ˈˈGlaadhiʋ̈ ˗tɔn)