ˈWƆN ˗GƆ 37
˗Mën ˈö Biblö ˗ya pö ˈö ˗gban yökësü waa ˈwëëga ˗an ˗bha?
Yökësü waa ˈwëëga ˗wɔn ˗wa zuʋ̈dhiʋ̈tɛ ˗ya ü ˗bha do ˗ee? ˈPë kwa ˗bhawɔn ˈdhö˗ ˗bha ˗a mɛɛnˈˈ ˗sü kö ˈkwa ˈgo mü ˈzü ˈkwa Zoova ˗dhɔkë bhë, ˗yö ꞊mɔɔn˗ ˗bha ˈö ˗kë ˈˈgbɩɩ˗. ˈˈKɛɛ Biblö ˗bha ˗dhioo ˗nu ꞊mɔɔn˗ ˗bha ˈwo kwa ˗takun.
1. ˈMën Biblö ˗ya pö ˈö ˗gban yökësü ˗bha?
Zoova -ya ˈˈpiʋ̈ kö ˈkwa zuʋ̈gblüdhi ꞊slɔɔ yökësü ˈgü. Biblö ˗ya ˗pö «pë ˈö ˗dho kë ˗së mɛnbhɩɩdhe ˗bha ˈka kö ˗yö ʒiö ˗a ˈka [...] zuʋ̈gblüdhi ˈö go ˗a ˗bha yö ˈˈgbɩɩ˗ kë ˗sü ˈgü ˗a ˗ta, ˈyaa ˈdhö.» (Ecclésiaste 2:24) Zoova ˗yö yökë ꞊dedewo. Kö ˈkwa ʒiö ˗a ˗bha yökësü ˈwɔnzuan ˈˈpiʋ̈, kwa ˗kë ˗a ˗dhɛ ˗së, ˈö kwa zuʋ̈ˈˈ ꞊nii ˗yö ˗da.
Yökësü ˗wɔn ˗yö ˈˈgbɩɩ˗. ˈˈKɛɛ ˗a ˗dhɛ ˈyaa˗ ˗bha kö ˗a ˗wɔn ˗yö kë kwa ˗gɔ ˈˈgbɩɩ˗ kö ˗yö ʒiö ˗a ˈka Zoova ˗dhɔkësü ˗ta. (Zan 6:27) Zoova ˗ya ˗pö ꞊dhɛ kö ˈkwa ö gbasü bɔ ˈˈdhiʋ̈ kwa ˗bha ˗tosɛta ˈgü, ˈpë kwa ˗bhawɔn ˈdhö˗ ˗bha ö ˗dho ˗a nu kwa ˗dhɛ.
2. Kwa ˗bha ˈwëëga ˗wɔn yö ˗kɔ ˗yö kë ˗së.
Biblö ˗ya ˗pö ꞊dhɛ «ˈwëëga ˗yö mɛn ˗takun», ˈˈkɛɛ ˗yö kwa ˗zo ˗kpɔɔ ˈzü ꞊dhɛ ˈwëëga dosɛnŋ ˈyaa ꞊mɔɔn˗ ˗bha kö ˗yö zuʋ̈gblüdhi nu mɛn ˗dhɛ. (Ecclésiaste 7:12) ˗A ˗wɔn ˈgü ˗yö kwa ꞊faanmën kö kwa ˗bha ˈwëëga ˗wɔn ˈya ˈdho kë ˈˈgbɩɩ˗, kö ‹pë ˈdhɛ ˈö kwa ˗gɔ ˗yö kwa ˗zʋ ˈkun.› (Eblö 13:5 ˗wo pö.) Kö ˈkwa ˈto ˗dhioo ˈö bhë ˗a ˈˈpiʋ̈, kwa zuʋ̈ˈˈ ˈˈklʋʋ yö ˈti ˗dho bhɔ ꞊dhɛ mɛn ˗nu ˈö pë ˈyaa ˗an ˗zokun bhë ˗an ˈdhö, ˈö ˈkwaa ˈˈpɔ ˈˈwlaasü ˗ya kwa ˗de ˗bha. (Proverbes 22:7) ˗Ya ˈgo mü ˈzü, kwa ˈti ˗dho ˗puö ˈwëë˗ gɔnsü waa ꞊nɔɔn ˗mɛɛn ˗bia ˈka ˗sü ˗nu ˗bha ꞊döŋ ˈgü.
3. Kwa ˗dho ˈˈgblüsë kë kwa ˗bha ˈwëëga ˈka ˗kɔ ˗kë ꞊dhɛ?
Zoova ˗yö ˗Zlan ˈö˗ ˈˈgblü ˈdhö ˗së ˗a ˈka. Kö ˈkwa ‹kë ˗kɔwomɛ ˈka kö ˈkwa gbaɔ˗› kö kwa ˗bhɔ ˗a ˗bha. (1 Timote 6:18) Kwa ꞊mɔɔn˗ ˗bha ˈkwa kwa ˗kɔ ˗da ˗zlanwokɔdhi ˗dhɛ kwa ˗bha ˈwëëga ˈka, ˈö ˈkwa kwa ˗kɔ ˗da ˗a ˈka ˈpö mɛn ˗nu ˈö ˗an ˗bhawɔn ˈdhö ˗takundhe ˗bha ˗an ˗dhɛ. Mɛn ˗nu ˈö ˈkwa ˗dho ˗an ˗takun ˈˈdhʋ̈ ˗blɛɛsü ˈyö ˈwo ˗tɔ kwa ꞊dhegblü kletiɛn ˗nu. ˈPë ˗a ˗wɔn ˈdhö ˈˈgbɩɩ˗ Zoova ˗gɔ ˈyaa ˈnën ˈö ˗tɔ pë ˈkpii˗ ˗nu mɛn ˗dhɛ ˗sü, ˈˈkɛɛ kwa zuʋ̈ga ˈö ˈkwa˗ ˗nu ˗a ˈka bhë ˈyö˗ ˗ga. Kö ˈkwa gbɔɔ mɛn ˗gɔ kwa zuʋ̈ga ꞊gban ˈka, kwa zuʋ̈ˈˈ ꞊nii ˗yö ˗da, ˈö ˈkwa ˗kë Zoova ˗dhɛ ˗së.—Këwɔn ˗nu 20:35 ˗wo pö.
˗KAA ˈˈPIƲ̈ ˈPƆN
˗Kɔ ˈö ˈkwa yökësü yö ˗a ˈka ˗ya kë ˗së, kö pë ˈö kwa ˗gɔ ˗yö kwa ˗zokun ˈpö, ˈwɔn ˗së ˈö ˈkwa ˗dho ˗a ꞊slɔɔ, ˗a ˗ga.
4. Kwa ˗bha yökë ˗kɔ dua ˗mü kö ˗yö Zoova ˈtɔ bhɔ.
Kwaa Zoova kwa ˗bha ˈˈtɔŋdhɛ dua ˗mü kö ˗yö kwa ˗takun kö ˗kɔ ˈö ˈkwa yö ˗wɔn yö ˗a ˈka ˗yö kë ˗së. ˗Kaa video ˗ga, kö ˈka dhɛɛˈˈ ˗nu ˈwo ˈˈshia bhë ˗an ˗yɔ mɛɛnˈˈ.
Video ˈö bhë ˗a ˈgü, ˈmën ˈü˗ ˈsuanbho Ʒasɔn ˗bha ˈwɔnyökɔ waa˗ ˈˈtakɔ ˗nu ˈwo yö ˈˈdhiʋ̈ ˗an ˗bha?
˗Mën ˈö˗ ˗kë kö yökësü ˈya ˗dho ˗a ˗bha ˗Zlan ˗dhɔkësü shiʋ̈ˈˈ?
˗Ka Kodhɔsö 3:23, 24 ˗wo pö, kö ˈka dhɛɛˈˈ ˈö yö ˗a ˗yɔ mɛɛnˈˈ:
˗Kɔ ˈö ˈkwa yö ˗wɔn sü ˗a ˈka, ˈmën ˗kë ˈö˗ ˗wɔn ˈdhö ˈˈgbɩɩ˗?
Yökësü ˗wɔn ˗yö ˈˈgbɩɩ˗. ˈˈKɛɛ ˗a ˗wɔn dua ˈyaa ˗mü kö ˗yö kë kwa ˗gɔ ˈˈgbɩɩ˗ kö ˗yö ʒiö ˗a ˈka Zoova ˗dhɔkësü ˗ta.
5. Pë ˗bha kwa ˗zokunsü ˗yö ˗së.
Mɛn ꞊vadhɛ ˗wa ˈˈpiʋ̈ kö ˈwëëga ˗yö kë wo ˗gɔ ꞊va ꞊dedewo. ˈˈKɛɛ Biblö ˈyaa˗ ˈˈpiʋ̈ kö ˈkwa kwa ˗zota ˈˈdhʋ̈. ˗Ka 1 Timote 6:6-8 ˗an ˗wo pö, kö ˈka dhɛɛˈˈ ˈö yö ˗a ˗yɔ mɛɛnˈˈ:
˗Mën ˈö Biblö ˗yö kwa ꞊faanmën ˗a ˗bha?
ˈKö ˗kë ꞊dhɛ ˈwëëga ˈyaa kwa ˗gɔ ꞊va, kwa ꞊mɔɔn˗ ˗bha ˈkwa ˗kë zuʋ̈gblüdhi ˈgü. ˗Kaa VIDEO ˗ga, kö dhɛɛˈˈ ˈö ˈˈshia bhë ˈka˗ ˗yɔ mɛɛnˈˈ.
ˈKö ˗kë ꞊dhɛ ˗wo ˈˈflɛɛsü, ˗mën ˈö mɛn ˗nu ˈwo bhë ˗an ˗takun ˈö ˈwo ˗kë zuʋ̈gblüdhi ˈgü?
ˈWëëga ˗yö mɛn ˈbhaa ˗nu ˗gɔ ꞊va, ˈˈkɛɛ ˈyaa ˗an ˗zokun. Yesu ˗ya ˗zɔn ꞊dhɛ ˈwɔnyökɔ suu ˈö ˈˈdhʋ̈ ˈyaa ˗së. ˗Ka Dhukö 12:15-21 ˗an ˗wo pö, kö ˈka dhɛɛˈˈ ˈö yö ˗a ˗yɔ mɛɛnˈˈ:
Yesu ˗bha ˈwɔnzuan ˈö bhë, ˗gleŋ ˗mɛɛn ˈö˗ ˗da ü ˗bha? —˗Ka kpɔɔˈˈ ˗a ˈˈɲan ˈsɛɛn˗ 15 ˗bha.
˗Ka Proverbes 10:22 waa 1 Timote 6:10 ˗wo pö kö ˈka ˗an dan ˈˈkwëë. ˈKa ka bo kö ˈka dhɛɛˈˈ ˗nu ˈwo ˈˈshia bhë ˗an ˗yɔ mɛɛnˈˈ:
Ü ˗bha ˈka, ˗kë Zoova ˈˈtɔŋdë ˈka ˗sü waa ˈwëëga ꞊va ˗bha ˗kë kwa ˗gɔ ˗sü, ˗a ˗mɛɛn ˈö˗ ˗wɔn ˈdhö ˈˈgbɩɩ˗ ꞊dedewo? ˈMën ˗kë ˈü˗ pö ˈˈdhʋ̈?
Kwa zuʋ̈ˈˈ ˗ya bhɔ ˈwëëga ꞊va ꞊slɔɔ ˗sü ˗bha ˗kplawo, ˈwɔn yaa ˗mɛɛn ˈö ˈkwa ꞊mɔɔn˗ ˗bha ˈkwa˗ ꞊slɔɔ ˗a ˈgü?
6. Zoova ˗dhö ö ˗zokë kwa ˈˈpiʋ̈.
ˈWëëga ˗wɔn waa yö ꞊slɔɔ ˗sü ˗yö ꞊gbɔɔn ˗ni ˈgü kwa ˗ta, kwa ˗bha ˗zo -yö Zoova ˗dhɛ ˗sü ˗yö ꞊mɔɔn˗ ˗bha ˈö ˗da ˈgüdandhe ˈgü. ˗Kaa video ˗ga kö ˈpë ˈkwa ꞊mɔɔn˗ ˗bha ˈkwa˗ kë ˈwɔn ˈˈgbɩɩ˗ suu ˈö ˈˈdhʋ̈ ˗a ˈgü ˈka˗ yö, kö ˈka dhɛɛˈˈ ˈö ˈˈshia bhë ˗a ˗yɔ mɛɛnˈˈ.
Video ˈö bhë ˗a ˈgü, ˈwɔn ˈˈgbɩɩ˗ ˗nu ˗mɛɛn ˈö kwa ꞊dhegblü ˗yö bɔ ˗an ˈgü?
˗Mën ˈö˗ ˗kë ˈö to ˗a ˈˈgbɩɩ˗ ˈka ˈwɔn ˗nu ˈwo bhë ˗an ˈgü?
˗Ka Matiö 6:25-34 ˗an ˗wo pö, kö ˈka dhɛɛˈˈ ˈö yö ˗a ˗yɔ mɛɛnˈˈ:
ˈMën Zoova ˗ya ˈˈplüün bho mɛn ˗nu ˈwo ˗a ˗dhɔkësü bɔ ˈˈdhiʋ̈ wo ˗bha ˗tosɛta ˈgü ˗an ˗dhɛ?
MƐN ˈBHAA ˗NU ˗WA ˗PÖ: «N dua ˗mü kö ˈa yökë n ˗sɔbhɛɛ ˈka kö ˈa n ˗zokë n ˗man ˈkɔdhigümɛn ˗nu ˈˈpiʋ̈. ˈMaan ꞊mɔɔn˗ ˗bha ˈa kë ˗zlanwokɔdhi ˗bha ˗bhɔkwëë ꞊gban ˗ta.»
Biblö ˈˈɲan ˗mɛɛn ˈö˗ ˗zɔn ü ˗dhɛ ꞊dedewo ꞊dhɛ ˈbha Zoova ˗dhɔkësü bɔ ˈˈdhiʋ̈ ü ˗bha ˗tosɛta ˈgü ˗kplawo, kö ˗yö ˗së ü ˗bha ˈka?
˗A ˈDHƐ TO KWA ˈˈƝAAN
Yökësü waa ˈwëëga ˗wo kwa ˗takun, ˈˈkɛɛ ˗a ˗dhɛ ˈyaa˗ ˗bha kö ˗an ˗wɔn ˗yö kë kwa ˗gɔ ˈˈgbɩɩ˗ ꞊gbɔnŋsü kö ˗wo kwa ˈˈkan Zoova ˗dhɔkësü ˗bha.
˗Zobuödhe
ˈMën ˈö ꞊mɔɔn˗ ˗bha ˈö ü ˗takun kö ˗kɔ ˈü yö ˗wɔn sü ˗a ˈka ˗yö kë kpɛnŋdhö?
꞊Trɔɔn ˗mɛɛn ˈü ˗dho ˗a ꞊slɔɔ˗ pë ˗bha ü ˗zokunsü ˈgü?
Zoova ˗ya ˗pö ö ˗dho ö ˗zokë ö ˗dhɔkëmɛn ˗nu ˈˈpiʋ̈. Ü ˗dho ˗a ˗zɔn ˗kɔ ˗kë ꞊dhɛ ꞊dhɛ ü ü ˗zo ˗yö ˗a ˗dhɛ?
˗AN ˗GA ˈPÖ
Biblö ˗ya ˗pö ˈwëëga ˗yö ˈya˗ ˗ee? ˗A ˗yɔ ˗ga.
«ˈWëëga ˗yö ˈwɔn yaa ꞊gban ˈˈpɛpɛ ˗gɔgodhɛ ˈka ˗ee?» (ˈWɔn ˗gɔ ˈö jw.org ˗ta)
˗Kɔ ˈö ˈkwa ˗dho Zoova dhɔɔbhaawɔn kë ˗a ˈka kwa ˗bha ˈwëˈwëëga ˈka, ˗a ˗ga.
«ˈMën ˈö Biblö ˗ya pö ˈö ˗gban gbɔɔdhe kë ˗sü ˗bha?» (ˈWɔn ˗gɔ ˈö jw.org ˗ta)
ˈWëë˗ gɔn ˗sü ˗yö ˗së ˗ee? ˗A ˗yɔ ˗ga.
«ˈMën ˈö Biblö ˗ya pö ˈwëë˗ gɔn ˗sü ˗bha?» (˗Kwɛ 2015 Masö ˗bha ˗Ka ˗ya ka ˈˈɲaan!)
Pë ˈö gɔndënën do ˈö kun ꞊kwaanmɛn waa ˈwëë˗ gɔnmɛn ˈka ˗a ˗takun ˈö ö ˗bha ˗tosɛta kë ˗kɔ bho ˈˈgblʋʋ, ˗a ˗ga.