-
Ü ˗dho ˗da ˈwɔn ˗së ˗nu ˗ʒian ˗ta ˗kɔ ˗kë ꞊dhɛ?Zuʋ̈gblüdhi ꞊slɔɔ ˗toëpö ˈka! (˗Bhö Biblö draanˈˈ)
-
-
5. ˗Bhö mɛn ˈˈwɛɛ ˗nu ˗bha ˈwɔn yö ˗kɔ ꞊bhlëë ˗ya?
꞊Ya kë ꞊shöŋ ˈwɔn ˗nu ˈö ˈkwa ˗an ˗kë ˈwɔn ˈbhaa ˗nu ˈgü waa˗ ˈdhɛ mɛn ˈˈwɛɛ ˗nu ˗wa ˗kë ˈwɔn do ˈö bhë ˗a ˈgü, ˈwaa kë do. ˈDhɛ ˈö ˈˈdhʋ̈, kwa ˗dho mɛn ˈˈwɛɛ ˗nu ˗bha ˈwɔn yö ˗kɔ ˗nu ꞊bhlëë ˗ya ˗kɔ ˗kë ꞊dhɛ? ˗Kwaa ˈwɔnzuan ꞊plɛ ˗ga:
ˈWɔnzuan 1: Kwa ꞊dhegblüdhe do ˈö dho ˈö ˗ya ˗zlanwokɔdhi do ˈbhaa ˈgü, ˗a ˗bha ˈklëë˗ ɛɛnˈˈ makiyaaʒö ˗kë ö ˈwɔɔdhö ˗kɔ ˗yö kwa ꞊dhegblü dhoŋ ˗nu ˈwo mü ˗an ˈˈtënŋ ˗sü.
˗Ka Wlɔmö 15:1 waa 1 Kodhɛngtö 10:23, 24 ˗wo pö, kö ˈka dhɛɛˈˈ ˗nu ˈwo yö ˗an ˗yɔ mɛɛnˈˈ:
Biblö ˈˈɲan ˗nu ˈwo bhë, ˗wo ꞊mɔɔn˗ ˗bha ˈwo kwa ꞊dhegblü ˈö bhë ˗a ˗takun kö ˗yö ˗mën kë? ꞊Ya kë ꞊dhɛ ü˗ ˈˈpiʋ̈ ˈü ˈwɔn ˈbhaa ˈö ü ˈgü ˗së ˗a kë, ˈˈkɛɛ kö mɛn ˈbha ˈö mü ˈyaa˗ ˗dhɛ ˗së, ü ˗dho ˗a kë ꞊dhɛ?
ˈWɔnzuan 2 ˗naan: ˈKö ˗kë ꞊dhɛ Biblö yö ˈti˗ pö kwa dua ˈyaa ˗mü kö ˈkwa yɔ mü toŋtoŋdhö, kwa ꞊dhegblü do ˗ya ˗sü ö ˗de ˈgü ˈö ˗kan yɔ suu ˈˈpɛpɛ ˈwo ꞊mɔɔn˗ ˗bha ˈwo mɛn kun ˗an ˗bha. ˈˈKɛɛ ˈdhɛ ˈwo˗ ˗dhɛ ˈwlaan˗ ˈdɛdɛ do ˈbhaa ˗ta, ˗yö kwa ꞊dhegblü ˈˈwɛɛ ˗nu ˗yö kö ˗wo we mü ˗ni ˈgü.
˗Ka Ecclésiaste 7:16 waa Wlɔmö 14:1, 10 ˗wo pö, kö ˈka dhɛɛˈˈ ˗nu ˈwo yö ˗an ˗yɔ mɛɛnˈˈ:
Biblö ˈˈɲan ˗nu ˈwo bhë, ˗wo ꞊mɔɔn˗ ˗bha ˈwo kwa ꞊dhegblü ˈö bhë ˗a ˗takun kö ˗yö ˗mën kë? Pë ˈö ˈyaa ü ˈgü ˗së, ˈbha mɛn ˈˈwɛɛ yö kö ˗yö ˗a kë ˗ni ˈgü, ü ˗dho ˗a kë ꞊dhɛ?
Ü ˗dho ˗a kë ꞊dhɛ kö ˈü ˗da ˈwɔn ˗së ˗ʒian ˗ta?
1. ˗Bhö ˗a pö Zoova ˗dhɛ ˗yö ˈˈdhiʋ̈sü ü ˈka.—Zakö 1:5.
2. ˗Bhö ˈwɔn ˗nu ˈˈpiʋ̈ ˈpɔn Biblö waa kwa ˗bha ˈsëëdhɛ ˗nu ˈgü kö ˈtɔŋ˗ ˗gɛngbandhɛ ˗nu ˈwo ˗gban ˈwɔn ˈü˗ ˈgü ˗an ˗bha ˈü ˗an dɔ. Ü ꞊mɔɔn˗ ˗bha ˈpö ˈü˗ pö kletiɛn ˗nu ˈö ˗wa ˗kian ˗an ˗dhɛ ˗wo ü ˗takun.
3. ˗Bhö ü ˗zota kö ˗ya kë ꞊dhɛ ü zuʋ̈ˈˈ yö ˈti ˗dho za dɔ ü ˗bha ꞊taabha ɛɛnˈˈ yö ˈti ˗dho kë mɛn ˈˈwɛɛ ˗nu ˗dhɛ ˈyaa˗, kö ˈü˗ ˈwɔn dɔ.
-
-
Kwa ˗dho ˗a kë ꞊dhɛ kö kwa ˗bha ˈkɔdhi ˗yö ˈwaannu (ˈˈPian 1)Zuʋ̈gblüdhi ꞊slɔɔ ˗toëpö ˈka! (˗Bhö Biblö draanˈˈ)
-
-
6. ˈWɔn ˗ya ˗da ka ꞊zinŋgü, ka ꞊mɔɔn˗ ˗bha ˈka˗ ˈˈɲanbhɔ.
Dhe waa ö ꞊gɔn ˈö ˈwɔn ˈyaa ˗da ˗an ꞊zinŋgü ˈwaa ˈdhö. ˈDhɛ ˈö ˈˈdhʋ̈, gɔɔn˗ waa ö ˗bha dhebɔ ˗an dua ˗mü kö ˗wo ˗da ˈˈkwɩɩ, kö ˗wo wo ˗bha ˈwɔn ˈˈgbɩɩ˗ ˗nu ˈˈɲanbhɔ. ˗Kaa VIDEO ˗ga, kö ˈka dhɛɛˈˈ ˗nu ˈwo ˈˈshia bhë ˗an ˗yɔ mɛɛnˈˈ.
˗Mën ˈö˗ ˗zɔn video ˈö bhë ˗a ˈgü ꞊dhɛ dhe waa ö ꞊gɔn ˈwo bhë ˗an ꞊zinŋgüdhɛ ˗yö ˗kun shiʋ̈ˈˈ ˗ni ˈgü?
˗Mën ˈwo˗ ˗kë kö ˗an ˗bha ˗mlɛɛn ˗gɛn ˗yö ˗gban ˈzü?
˗Ka 1 Kodhɛngtö 10:24 waa Kodhɔsö 3:13 ˗wo pö. ˈKa ka bo ˗a ˈˈɲan ˈdhɛ ˈö ˈdhö ˗a ˗wo pö ˗sü ˈka kö ˈka dhɛɛˈˈ ˈö yö ˗a ˗yɔ mɛɛnˈˈ:
˗Dhioo ˈö bhë ˗a ˗ya ꞊bhlëë ˈgü ˗sü ˗dho dhe waa ö ꞊gɔn ˗an ˗takun ˗kɔ ˗kë ꞊dhɛ?
Biblö ˗ya ˗pö kwa ˗dhɛ ˈkwa kwa ˈko ˗nu ꞊bhlëë ˗ya. Mɛn ꞊bhlëëyasü ˈnën ˈö ˗tɔ ˗a ˗sü ˗së ˗sü ˈö ˈwo ˈˈgblüsë ˗kë ˗a ˈka. ˗Ka Wlɔmö 12:10 ˗wo pö, kö ˈka dhɛɛˈˈ ˗nu ˈwo yö ˗an ˗yɔ mɛɛnˈˈ:
Mɛn ˈbha dua ˗mü kö ˗ya pö ö ˗bha dhebɔ ɛɛnˈˈ ö ꞊gɔn ˗yö ö ꞊bhlëë ˗ya ˗blɛɛsü kö yö ˗zë ˈö ꞊kun ˗a ꞊bhlëë ˗ya ˗ee? ˈMën ˗kë ˈü˗ pö ˈˈdhʋ̈?
-
-
Kwa ˗da ˗sɔ ˗nu waa kwa ˗bha kwibhadhɛ ˗an ˗wɔn ˗yö ˈˈgbɩɩ˗Zuʋ̈gblüdhi ꞊slɔɔ ˗toëpö ˈka! (˗Bhö Biblö draanˈˈ)
-
-
Mɛn ˈö ˈdhö, sɔ, wun ˈˈkan ˗kɔ ɛɛnˈˈ wun bɔ ˗kɔ ˈö˗ ˗dhɔ ˗ya ˗kë ˗yö ˗dhö. Kö ˈkwa Biblö ˗bha ˈtɔŋ˗ ˗gɛngbandhɛ ˈbhaa ˗nu ˗ya ꞊bhlëë ˈgü, kwa ꞊mɔɔn˗ ˗bha ˈkwa sɔ ˈö ˗dhi kwa ˗dhɛ ˗a ˗da ˈö ˈkwa Zoova zuʋ̈ˈˈ ꞊nii ˗da ˈpö. ˈTɔŋ˗ ˗gɛngbandhɛ ˗nu ˈwo ˈˈdhʋ̈, ˗kwa ˗an ˗ga.
1. ˈTɔŋ˗ ˗gɛngbandhɛ ˗nu ˗mɛɛn ˈwo ˗dho kwa ˗takun kö ˈkwa kwa ˗kɔ ˈˈyɛ sɔ ˗së ˗nu ˗bha?
Kwa dua ˗mü ‹ˈkwa sɔ ˗da ˗a ˗da ˗kɔ ˗ta, kö ˈkwa ˗dho mɛ ˈˈyan bɔ kwa ˗ta, kö˗ ˗da ˗kɔ ˗yö dhi.› ꞊Ya ˈgo ˗mü ˈzü, kwa dua ˗mü ˈkwa kwa kwibhadhɛ ˈkun ˗së kö ˗ya ˗zɔn ꞊dhɛ ‹˗Zlan ˗bha ˈnën ˗mü kwa ˈka.› (1 Timote 2:9, 10) ˈTɔŋ˗ ˗gɛngbandhɛ ˗yiishiö ˈwo go Biblö ˈˈɲan ˈö bhë ˗a ˈgü, ˗kwa ˗an ˗ga: (1) Kwa dua ˗mü kö ‹ˈkwa sɔ ˗da ˗a ˗da ˗kɔ ˗ta.› ˈBha kë ˗bhɔkwëë ˗ta ü˗ ˗yö ꞊dhɛ Zoova ˗bha ꞊Gbɛkiö ˗nu kwa sɔ suu ꞊va ˗da. ˈˈKɛɛ kwa sɔ ˗da ˗kɔ, kwa ˗bha wun yökë ˗kɔ ˗nu bhë, ˗wa ˗zɔn ꞊dhɛ ˗Zlan ˗dhɔkëmɛn ˗nu ˗mü kwa ˈka. (2) Kwa ˗da ˗sɔ dua ˈyaa ˗mü kö ˗yö kwa ˈkun kpʋ̈kpʋ̈dhö, kö ˗yö ˗zotadhe yaa ˗da mɛn ˗nu ˈgü ɛɛnˈˈ kö ˗yö mɛn ˗nu ‹ˈˈyan bɔ kwa ˗ta.› (3) Kwa dua ˗mü kö ˈkwa sɔ ˗da ˗së ˈka, kö ˈkwa ˗dho ˈto sɔ ˗da ˗kɔ suu ˈˈpɛpɛ ˈö nu ˗a ˈˈpiʋ̈. (4) Kwa sɔ ˗da ˗kɔ dua ˗mü kö ˗ya ˗zɔn ˗kplawo ꞊dhɛ ‹˗Zlan ˗bha ˈnën ˗mü kwa ˈka› ɛɛnˈˈ kö ˗ya ˗zɔn mɛn ˈˈwɛɛ ˗nu ˗dhɛ ꞊dhɛ ˗Zlan ꞊dede ˗dhɔkëmɛn ˗nu ˗mü kwa ˈka.—1 Kodhɛngtö 10:31.
2. Kwa kwa ˗kɔ ˈˈyɛ ˗ni ˈgü sɔ ˈö ˈkwa ˗dho ˗a ˗da ˗a ˗bha, ˈmën ˗kë ˈö ˗së kö ˈkwa kwa ˗zota kwa ꞊dhegblü ˗nu ˗wɔn ˈgü?
Sɔ ˈö ˗dhi kwa ˗dhɛ kwa ꞊mɔɔn˗ ˗bha ˈkwa˗ ˗da. ˈˈKɛɛ pë ˈö kwa sɔ ˗da ˗kɔ ꞊mɔɔn˗ ˗bha ˈö˗ ˗kë mɛn ˈˈwɛɛ ˗nu ˈka ˗kwa kwa ˗zota ˗a ˈgü. Kwa kwa ˈgü ˗dɔ ˈˈgbɩɩ˗ ˈö ˈkwaa mɛn ˈˈwɛɛ ˗nu ˗gɛn ˈˈdhiʋ̈ ˗zuö, ˈˈkɛɛ «ˈwɔn ˈö dho kwa këyɔɔ ˗zʋ ˈkun, ˈö dho kë˗ ˗bha ˈwɔn ˗së ˈka , kö ˗a faan˗ ˗yö dɔ ˈˈta ˗sü ˗Zlan ˗bha zian ˗ta ˗sü ˗bha» ˈyö ˈkwa˗ ˗kë.—Wlɔmö 15:1, 2 ˗wo pö.
3. Kwa ˗bha sɔ ˗da ˗kɔ ˗dho mɛn ˈˈwɛɛ ˗nu ˈˈgan Zoova ˗dhɔkësü ˗bha ˗kɔ ˗kë ꞊dhɛ?
Kwa kwa ˈgü ˗dɔ ˈˈgbɩɩ˗ ˈö kwa ˗da ˗sɔ ˗nu ˗wo ˗kë ˗së ˈtʋ̈ŋ ꞊gban ˈka. ˈˈKɛɛ ˗a ˈdhɛ ˈö˗ ˗wɔn ˈdhö kwa ˗gɔ ˈˈgbɩɩ˗ ꞊dedewo ˈyö ˈtɔ˗ ˗a ˗dhɛ ˗nu ˈö ˈkwa ˗an ˗da ˈö ˈkwa dho ˗an ˈka ˗bhɔkwëë ˗nu ˗ta ɛɛnˈˈ ˗zlanwopö. Kwa ˗da ˗sɔ dua ˈyaa ˗mü kö ˗yö mɛn ˗nu wɔ bho nɔɔn˗ ˗së ˈö go Biblö ˈgü ˗a ˈˈpiʋ̈. ˈˈKɛɛ ˗a dua ˗mü kö ˗yö gagade draansü ˗dhɔ ˗da mɛn ˗nü ˈgü, ‹kö ˗wo mɛ draan ˗wʋ ˈö go kwa Dhamɛ, kwa ˗bha ˗Zlan ˈˈpiʋ̈ bha˗ ˗dhiang ˗së zë.›—Titö 2:10.
˗KAA ˈˈPIƲ̈ ˈPƆN
ˈPë ˈö ˈkwa ˗dho ˗a kë kö kwa sɔ ˗da ˗kɔ waa kwa kwibhadhɛ ˗wo mɛn ˈˈwɛɛ ˗nu ˗takun kö ˗wa yö ꞊dhɛ kletiɛn ˗nu ˗mü kwa ˈka, ˗kwaa ˗ga.
˗Kɔ ˈö ˈkwa ˗gɔmɛn ˗nu sü ˗a ˈka, kwa sɔ ˗da ˗kɔ ˗ya ˗zɔn. ˈKö ˗kë ꞊dhɛ Zoova ˗yö ˗dhɛ ˗yö kwa ˗zo ˈˈpiʋ̈, kwa kwibhadhɛ dua ˗mü kö ˗ya ˗zɔn ꞊dhɛ kwa˗ ꞊bhlëë ˗ya.
4. Kwa sɔ ˗da ˗kɔ waa kwa kwibhadhɛ ꞊wa kë ˗së, ˗yö Zoova ˈtɔ ˗bhɔ.
ˈMën ˈö ˗wɔn ˈgü ꞊dedewo ˈö ˈkwa kwa ˗zoto kwa sɔ ˗da ˗kɔ waa kwa kwibhadhɛ ˗an ˈˈpiʋ̈? ˗Ka Psaume 47:2 ˗wo pö, kö ˈka dhɛɛˈˈ ˗nu ˈwo yö ˗an ˗yɔ mɛɛnˈˈ:
Mɛn ˈˈwɛɛ ˗nu ꞊mɔɔn˗ ˗bha ˈwo Zoova ˈtɔ bhɔ ɛɛnˈˈ ˈwo˗ ˈtɔ ꞊shiʋ̈ kwa sɔ ˗da ˗kɔ ˗wɔn ˈgü. ˗A ˗wɔn ˈgü kwa dua ˗mü kö ˈkwa sɔ ˗da ˗kɔ ˗kë ꞊dhɛ?
Ü ˗bha ˈgü, ˈkwa kë ˗bhɔkwëë ˗ta ɛɛnˈˈ ˗zlanwopödhɛ ˈgü kwa dua ˗mü kö ˈkwa kwa ˗zoto kwa kwibhadhɛ waa kwa sɔ ˗da ˗kɔ ˗an ˈˈpiʋ̈ ˗ee? ˈMën ˗kë ˈü˗ pö ˈˈdhʋ̈?
5. ˈTɔŋ˗ ˗gɛngbandhɛ ˗nu ˈwo kwa ˗takun kö kwa sɔ ˗da ˗kɔ waa kwa kwibhadhɛ ˗wo kë ˗së
Kwa ˗bha sɔ ꞊sɔnŋ ˗yö ˗kë ˈˈgbɩɩ˗ ɛɛnˈˈ ˗yö ˗kë ˗së, ˗a dua ˗mü kö ˗yö kë ˈˈpuu ˈˈslʋ̈ʋ̈slʋ̈, kö ˗yö ˗bɛ pë ˈö ˈkwa˗ kë ˗ni ˈgü ˗a ˗bha. ˗Ka 1 Kodhɛngtö 10:24 waa 1 Timote 2:9, 10 ˗an ˗wo pö. ˈKa ka bo, kö ˈka ˈpë ˗kë ˈö kwa dua ˈyaa ˗mü kö ˈkwa sɔ suu ˗nu ˈwo yö ˗an ˗da, ˗a ˗wɔn blɛɛˈˈ:
Sɔ ˈˈvlaanvlan ɛɛnˈˈ sɔ ˈö kwa ˈti baaˈˈ ˗a ˗bha.
Sɔ ˈö mɛn kun kpʋ̈kpʋ̈dhö ɛɛnˈˈ ˈö mɛn kwi ˈˈpian ˈö˗ dua ˈdhö ˗mü kö ˗yö kë sɔ ˈgü ˗a ˗zɔn zaŋ ˗ta.
ˈKö ˗kë ꞊dhɛ kletiɛn ˗nu dua ˈyaa ˗mü kö ˗wo ˗Zlan ˗bha ˈtɔŋ˗ ˈö Moizö ˗ya ˗bɛn zë ˗a ˗ya ꞊bhlëë ˈgü, ˗wo ꞊mɔɔn˗ ˗bha ˈwo bɔ ˗a ˗ta ˈö ˈwo Zoova dhɔɔbhaawɔn dɔ. ˗Ka Deutéronome 22:5 ˗wo pö, kö ˈka dhɛɛˈˈ ˈö yö ˗a ˗yɔ mɛɛnˈˈ:
ˈMën ˗kë ˈö gɔɔn˗ dua ˈyaa ˗mü kö ˗yö ö baaˈˈ ꞊dhɛ dhebɔ ˈdhö ɛɛnˈˈ kö dhebɔ ˗yö ö baaˈˈ ꞊dhɛ gɔɔn˗ ˈdhö?
˗Ka 1 Kodhɛngtö 10:32, 33 waa 1 Zan 2:15, 16 ˗an ˗wo pö, kö ˈka dhɛɛˈˈ ˗nu ˈwo yö ˗an ˗yɔ mɛɛnˈˈ:
ˈMën ˗kë ˈö kwa baaˈˈ ˗kɔ dua ˈyaa ˗mü kö ˗yö kë mɛn ˗nu ˈwo kwa ˗züzü waa kwa ꞊dhegblü ˗nu ˈwo ˗zlanwokɔɔdhö ˗an ˗dhɛ ˈya˗?
Sɔ ˗da ˗kɔ waa ö baaˈˈ ˗kɔ suu ˗mɛɛn ˈö ˗dhɛ ˈü˗ ˗bha ˗a ˈgü?
Ü ˗bha ˈka, sɔ ˗da ˗kɔ suu ˗nu ˈwo bhë ˗an ˈbhaa ˗nu ˗wo ˈya˗ kletiɛn ˗bha ˈka ˗ee? ˈMën ˗kë ˈü˗ pö ˈˈdhʋ̈?
Sɔ ˗da ˗kɔ suu ꞊va ˗wo Zoova ˗dhɛ ˗së.
MƐN ˈBHAA ˗NU ˗WA ˗PÖ: «Sɔ ˈö ˗dhi n ˗dhɛ ˈyö ˈa˗ ˗da.»
Ü ü ˗bha ˗pö ˗a ˈgü ꞊dhɛ?
˗A ˈDHƐ TO KWA ˈˈƝAAN
Kö ˈkwa baaˈˈ kwa kwibhadhɛ waa kwa ˗da ˗sɔ ˗an ˗bha, kwa Zoova ˈtɔ ˗bhɔ ˈö ˈkwa˗ ˗zɔn ꞊dhɛ kwa mɛn ˈˈwɛɛ ˗nu ꞊bhlëë ˗ya.
˗Zobuödhe
ˈMën ˗kë ˈö kwa sɔ ˗da ˗kɔ waa kwa kwibhadhɛ ˗todhösü ˗wɔn ˈdhö ˈˈgbɩɩ˗ Zoova ˗gɔ?
Biblö ˗bha ˈtɔŋ˗ ˗gɛngbandhɛ ˗nu ˗mɛɛn ˈö ˈwo ꞊mɔɔn˗ ˗bha ˈwo kwa ˗takun kö kwa sɔ ˗da ˗kɔ waa kwa baaˈˈ ˗kɔ ˗nu ˗wo kë ˗së?
Kwa sɔ ˗da ˗kɔ ˗ya ˗kë ˈö mɛn ˈˈwɛɛ ˗nu ˗wo Zoova ˗dhɔkësü yö ˗kɔ ˗kë ꞊dhɛ?
˗AN ˗GA ˈPÖ
Pe ˈö kwa ˗da ˗sɔ ˗nu ˗wa ˗zɔn mɛn ˈˈwɛɛ ˗nu ˗dhɛ ˗a ˗ga.
ˈPë ˗kë ˈö mɛn ˈö˗ ˈˈpiʋ̈ ˈö bhuöö zë ö kwi ˗bha ɛɛnˈˈ ˈö tatuaʒö ˗ya ö ˗bha ˈö˗ dua ˈdhö ˗mü kö ˗yö ö ˗zota ˗a ˈgü ˗së ˈka, ˗a ˗ga.
Biblö ˗bha ˈtɔŋ˗ ˗gɛngbandhɛ ˈˈwɛɛ ˈbhaa ˗nu ˈö ˈwo ꞊mɔɔn˗ ˗bha ˈwo kwa ˗takun kö ˈkwa sɔ ˗së ˗nu ˗da, ˗an ˗ga.
«Ü sɔ ˗da ˗kɔ ˗yö Zoova ˈtɔ ˗bhɔ ˗ee?» (˗Kwɛ 2016 Sɛtanblö ˗bha ˈˈGlaadhiʋ̈ ˗tɔn)
Dhebɔnën do ˈö˗ yö ꞊taabha ꞊dhɛ mɛn ˈö ˈdhö ˗a ˗bha sɔ ˈö ˗dhi ˗a ˗dhɛ ˗yö ꞊mɔɔn˗ ˗bha ˈö˗ ˗da, ˗a ˗bha ˗kwɛzlan ˗ga.
-