-
˗Mën ˈö ˗tɔ ˗Zlan ˗bha ˗Gblüdëdhɛ?Zuʋ̈gblüdhi ꞊slɔɔ ˗toëpö ˈka! (˗Bhö Biblö draanˈˈ)
-
-
7. ˗Zlan ˗bha ˗Gblüdëdhɛ ˈtɔŋ˗ ˗nu ˗wo ˗së ꞊dedewo mɛnbhɩɩdhe ˗nu ˗bha ˈtɔŋ˗ ˗nu ˗bha.
ˈˈSɛkɔɔnmɛn ˗nu ˗wo ˈtɔŋ˗ ˗nu ˗dɔ kö ˈwo wo ˗zokë ˗wo ˗bha ˈˈsɛ ˈgümɛn ˗nu ˈˈpiʋ̈. ˗Zlan ˗bha ˗Gblüdëdhɛ ˗de ˈpö ˗a ˈtɔŋ˗ ˗nu ˗wo ˗dhö, kö ˗yö ˈwɔn ˗së kë mɛn ˗nu ˈö ˗dho ˗an ꞊kɔɔn˗ ˗an ˗dhɛ. ˗Ka 1 Kodhɛngtö 6:9˗11 ˗an ˗wo pö, kö ˈka dhɛɛˈˈ ˗nu ˈwo yö ˗an ˗yɔ mɛɛnˈˈ:
Ü ˗bha ˈgü, ˈˈkpɔnŋtaamɛn ˗nu ˈˈpɛpɛ ˗wa ˈto ˗Zlan ˗bha ˈtɔŋ˗ ˗nu ˈˈpiʋ̈, ˗tosɛta ˗dho kë ˗kɔ ˗kë ꞊dhɛ?a
Ü ˗bha ˈgü Zoova dua ˗mü kö ˗yö ˈtɔŋ˗ dɔ mɛn ˗nu ˈwo ˗dho kë ˗a ˗bha ˗Gblüdëdhɛ ˗kɔ ꞊löö ˗an ˗ta ˗ee? ˈMën ˗kë ˈü˗ pö ˈˈdhʋ̈?
˗Mën ˈö˗ ˗zɔn ꞊dhɛ mɛn ˗nu ˈö ˈwaa ˈtɔŋ˗ ˗nu ˈwo ˈˈdhʋ̈ ˗an ˈkun ˗ni ˈgü ꞊köŋ, ˗an ˈˈta ˗kɔ ꞊mɔɔn˗ ˗bha ˈö ˗kë ˗së? (˗Kaa ˈˈɲan ˈsɛɛn˗ 11 ˗ga.)
ˈˈSɛ ˗gɔdhiʋ̈mɛn ˗nu ˗wo ˈtɔŋ˗ ˗nu ˗dɔ, kö ˗wo wo ˗zoto wo ˗bha ˈˈsɛ ˈgümɛn ˗nu ˈˈpiʋ̈. ˗Zlan ˗bha ˗Gblüdëdhɛ ˈtɔŋ˗ ꞊bhlëësü ˗nu ˈwo bhë ˗wo kwa ˗bha ˈwɔn ˗së ˈka ˈpö
-
-
˗Mën ˈö Biblö ˗ya pö ˈö ˗gban dhe waa gɔɔn˗ ˗an ˗bha sɛɛˈˈ ˗bha ˗kë do ˗sü ˗bha?Zuʋ̈gblüdhi ꞊slɔɔ ˗toëpö ˈka! (˗Bhö Biblö draanˈˈ)
-
-
ˈWƆN -GƆ 41
˗Mën ˈö Biblö ˗ya pö ˈö ˗gban dhe waa gɔɔn˗ ˗an ˗bha sɛɛˈˈ ˗bha ˗kë do ˗sü ˗bha?
ˈWɔn ˈö ˗gban dhe waa gɔɔn˗ ˗an ˗bha sɛɛˈˈ ˗bha ˗kë do ˗sü ˗bha, ˗a blɛɛsü ˗yö mɛn ꞊vadhɛ ˈgü ˈlëësü. ˈˈKɛɛ Biblö ˗zë ˗ya ˗wɔn ˗blɛɛ klaŋklaŋdhö mɛn ˗nu ꞊bhlëë ˈgü. ˗An dɔ ˗sü ˗yö ˗së kwa ˗bha ˈka. Zoova ˗bha ˗kë kwa ˗Damɛn ˈka ˗sü ˗wɔn ˈgü, ˗yö ˈpë ˈö ˗së kwa ˗bha ˈka ˗a ˗dɔ. Pë ˈö ˈkwa dho ˗a kë kö ˈkwa kë ˗a ˗dhɛ ˗së, kö ˈkwa ˗tosɛta kë ˗toëpö ˈka, ˗ya ˗zɔn kwa ˗dhɛ.
1. Zoova ˗yö dhe waa gɔɔn˗ ˗an ˗bha sɛɛˈˈ ˗bha ˗kë do ˗sü ˗yö ˗kɔ ˗kë ꞊dhɛ?
Dhe waa gɔɔn˗ ˗an ˗bha sɛɛˈˈ ˗bha ˗kë do ˗sü ˈö bhë, pë ˗së ˈö Zoova ˗ya gbɔɔ dhe waa gɔɔn˗ ˈö ˗wa wo ˈkosü ꞊dedewo ˗an ˗gɔ, yö ˗mü. ˗Ya ˗kë ˈö ˈwo ˈnën kpɔ, ˈö ˈwo ˗dhɔkaadhe ˗zɔn wo ˈko ˗nu ˗dhɛ, ˈö ˗an zuʋ̈ˈˈ ˈˈgblü ˗yö ˗dhi. Yö ˈnën ˈö˗ ˗wɔn ˈgü ˈö ˗Zlan ˗Wo ˗ya pö: «Ü zuʋ̈ˈˈ ꞊nii ˗yö ˗da ü ˗bha dhe ˈü˗ sü ü wlüünëndhɛ ˈgü bhë ˗a ˈˈpiʋ̈.» (Proverbes 5:18, 19) Zoova ˗ya ˈˈpiʋ̈ kö dhe waa ö ꞊gɔn ˗wo ˗klu wo ˈkwëë˗, kö ˈwa ˗dho wo ˈko ˈto ˈö ˈwo ꞊niënŋ.—Eblö 13:4 ˗wo pö.
2. ˈMën ˈö ˈtɔ˗ ˈˈɲangüyaa kë ˗sü?
Biblö ˗ya ˗pö ‹˗zuazëmɛ ɛɛnˈˈ ˈˈɲangüyaa këmɛn ˗nu [...] ˈwii ˈdho ˗da ˗Zlan ˗bha ˗gblüdëdhɛkëdhɛ ˈgü.› (1 Kodhɛngtö 6:9, 10) Glɛkö ˗wo kpö ˈö ˈwo˗ ꞊dhiëëta ˈö ˗kë ˈˈɲangüyaa kë ˗sü ˈka bhë, ˈyö ˗tɔ pɔɔneya. ˗Wo kpö ˈö bhë ˗a ˗gɛn ˈnën ˗tɔ (1) dhe waa gɔɔn˗ ˈö wo ˈti wo ˈkosü ˈˈkwi ˈˈdhiʋ̈ ˗an ˗bha sɛɛˈˈ ˗bha ˗kë do ˗süa, (2) gɔɔn˗ waa gɔɔn˗ ɛɛnˈˈ dhebɔ waa dhebɔ ˗an ˗bha sɛɛˈˈ ˗bha ˗kë do ˗sü, (3) mɛn waa wü ˗an ˗bha sɛɛˈˈ ˗bha ˗kë do ˗sü. ˈMɛn ˈö ‹ö ˗de kun ˈˈɲangüyaa› suu ꞊gban ˈˈpɛpɛ kë ˗sü ˗gɔ, ˗yö ˈwɔn ˗së ꞊slɔɔ ˗a ˈgü, ˈö waa Zoova ˗an ꞊zinŋgüdhɛ ˗yö ˗kë ˗së.—1 Tesadhonikö 4:3.
˗KAA ˈˈPIƲ̈ ˈPƆN
ˈWɔn ˈö ˗gban sɛɛˈˈ ˗bha ˗kë do ˗sü ˗bha bhë, ˗kɔ ˈö ˈkwa ˗dho ˈto ˗a ˈka ˈˈslʋ̈ʋ̈slʋ̈ ˗a ˈgü waa˗ ꞊trɔɔn ˗nu ˈö ˈkwa dho ˗an ꞊slɔɔ˗, ˗kwa ˗an ˗ga.
3. ˗Kwa ꞊duëë ˈˈɲangüyaa suu ˈˈpɛpɛ kë ˗sü ˗gɔ.
Zozɛfö ˈö kun ˗Zlan ˗dhɔkëmɛn ˈˈgbɩɩ˗ do ˈka, ˗yö pë ˈˈpɛpɛ ˗kë kö ˗a ˈˈtakɔ ˗yö ˈto ˈˈslʋ̈ʋ̈slʋ̈. ˗Ka ˈWunzüdɔdhɛ 39:1-12 ˗an ˗wo pö, kö ˈka dhɛɛˈˈ ˗nu ˈwo yö ˗an ˗yɔ mɛɛnˈˈ:
ˈMën ˗kë ˈö Zozɛfö ˗yö ꞊duëë?—˗Ka kpɔɔˈˈ ˗a ˈˈɲan ˈsɛɛn˗ 9 ˗bha.
Ü ˗bha ˈka ꞊duëë ˈö Zozɛfö ˗ya wo bhë ˗ya ˗kë ˗së ˗ee? ˈMën ˗kë ˈü˗ pö ˈˈdhʋ̈?
Wlüünën ˗nu ˗wo ˗dho ʒiö Zozɛfö ˗bha ˈwɔnzuan ˈˈpiʋ̈ ˗kɔ ˗kë ꞊dhɛ kö ˗wo ꞊duëë ˈˈɲangüyaa kë ˗sü ˗gɔ? ˗Kaa VIDEO ˗ga.
Zoova ˗ya ˈˈpiʋ̈ kö mɛn ꞊gban ˈˈpɛpɛ ˈkwa ˈˈkan ˈˈɲangüyaa ˗bha. ˗Ka 1 Kodhɛngtö 6:18 ˗wo pö, kö ˈka dhɛɛˈˈ ˗nu ˈwo yö ˗an ˗yɔ mɛɛnˈˈ:
˗Mën ˗nu ˈwo ꞊mɔɔn˗ ˗bha kö ˗wo mɛn ˗blü kö ˗wo ˈˈɲangüyaa kë?
Kwa dho ꞊duëë ˈˈɲangüyaa suu ˈˈpɛpɛ ˗gɔ ˗kɔ ˗kë ꞊dhɛ?
4. Kwa ꞊mɔɔn˗ ˗bha ˈkwa ˗gban ˈgüdandhe ˗nu ˗gɔ.
Ü dua ˗mü kö ˈü ü ˈgü dɔ ˈˈgbɩɩ˗ kö ˈü ˗gban ˈˈɲangüyaa kë ˗sü ˗gɔ. ˗Mën ˈö ꞊mɔɔn˗ ˗bha ˗ya kë kö ˗gban ˗a ˗gɔ ˗sü ˗yö kë ü ˗gɔ ˈˈgbɩɩ˗? ˗Kaa VIDEO ˗ga, kö dhɛɛˈˈ ˈö ˈˈshia bhë ˈka˗ ˗yɔ mɛɛnˈˈ.
ˈDhɛ ˈö kwa ꞊dhegblü ˈö bhë ˗ya yö ꞊dhɛ ö kë ˗kɔ ˗nu ꞊mɔɔn˗ ˗bha ˗wa kë kö ˈö ö ˗bha dhebɔ ˈto ˈö ʒiö dhebɔ ˈˈwɛɛ ꞊kee˗ bhë, ˈmën ˈö˗ ˗kë?
ˈKö ˗kë ꞊dhɛ ˈkwa ꞊gɔɔ ˗Zlan ˗dhɔkësü ˈgü, kwa dua ˗mü kö ˈkwa kwa ˈgü dɔ ˈˈgbɩɩ˗ ˗kplawo kö ˗zotadhe yaa ˈya ˗dho ö ˗yɛɛ ˈkun kwa ˈgü. Kwa ˗dho ˗a kë ꞊dhɛ kö ˈˈɲangüyaa ˗zotadhe ˈya ˗dho ö ˗yɛɛ ˈkun kwa ˈgü? ˗Ka Fidhipö 4:8 ˗wo pö, kö ˈka dhɛɛˈˈ ˗nu ˈwo yö ˗an ˗yɔ mɛɛnˈˈ:
Biblö ˈˈɲan ˈö bhë ˗ya ˗pö ˗mën ˗nu ˈö kwa dua ˈdhö ˗mü kö ˈkwa kwa ˗zota ˗an ˈgü?
˗Zlan ˗bha yö ˗kë ö ˗sɔbhɛɛ ka ˗sü waa Biblö ˗wopösü ˗wo ˗dho kwa ˗takun ˗kɔ ˗kë ꞊dhɛ kö ˈkwa ˗gban ˈgüdandhe ˗gɔ?
5. Zoova ˗bha ˈtɔŋ˗ ˗nu ˗wo ˈwɔn ˗së ˗kë kwa ˗dhɛ.
ˈPë ˈö ˗së kwa ˗bha ˈka Zoova ˗ya ˗dɔ ˈkpakpadhö. ˈPë ˈkwa ˗dho ˗a kë kö ˈkwa ˈto ˈˈslʋ̈ʋ̈slʋ̈ waa ꞊trɔɔn ˗nu ˈö ˈkwa ˗dho ˗an ꞊slɔɔ˗ ˗a ˈgü, Zoova ˗ya ˗zɔn kwa ˗dhɛ. ˗Ka Proverbes 7:7-27 ˗an ˗wo pö ɛɛnˈˈ ˗kaa VIDEO ˗ga, kö ˈka dhɛɛˈˈ ˗nu ˈwo ˈˈshia bhë ˗an ˗yɔ mɛɛnˈˈ.
˗Mën ˈö ˗kë ˈö ˈnëngɔɔnnën ˈö bhë ˗a ˗gɛn ˗yö ˗da ˈwɔn yaa ˈö bhë ˗a ˈgü?—˗Ka Kpɔɔˈˈ Proverbes 7:8, 9 ˗bha.
Proverbes 7:23, 26 ˗wa ˗zɔn ꞊dhɛ pë yaa ꞊dede ˗nu ˗wo ˈˈɲangüyaa kë ˗sü ˈgü. ˈˈKɛɛ kwa ˈˈtakɔ ˗ya kë ˈˈslʋ̈ʋ̈slʋ̈ ˗mën ˗wɔn ˗nu ˈö ˈkwa ˗dho dha ˗an ˗gɔ?
Kwa ˈˈtakɔ ˗bha ˗kë ˈˈslʋ̈ʋ̈slʋ̈ ˗sü ˗yö kwa ˗takun ˗kɔ ˗kë ꞊dhɛ kö ˗tosɛta kë ˗sü ˈö ˗toëpö ˈka bhë, ˈkwa˗ ꞊slɔɔ?
Pë ˈö Biblö ˗ya pö ˈö ˗gban gɔɔn˗ waa gɔɔn˗ ɛɛnˈˈ dhebɔ waa dhebɔ ˗an ˗bha wo ˈko ˗nu ˗kun ˈˈnɔnbɔ ˈka ˗sü bha bhë, mɛn ꞊vadhɛ ˗wa ˗yö ˈya˗. ˈˈKɛɛ Zoova ˈö mɛnbhɩɩdhe ˗dhɔ ˗ya ˗kë bhë, ˗ya ˈˈpiʋ̈ kö mɛn ꞊gban ˈˈpɛpɛ ˗wo ˗tosɛta kë ˗toëpö ˈka. ˈKwa˗ pö ˗tosɛta ˈö ˈyaa ɲën ˈkwa˗ ꞊slɔɔ, kwa dua ˗mü kö ˈkwa˗ ˗bha ˈtɔŋ˗ ˗nu ˈkun. ˗Ka 1 Kodhɛngtö 6:9-11 ˗wo pö, kö ˈka dhɛɛˈˈ ˈö yö ˗a ˗yɔ mɛɛnˈˈ:
Biblö ˈˈɲan ˈö bhë ˗a ˈgü, dhe waa dhe ɛɛnˈˈ gɔɔn˗ waa gɔɔn˗ ˗an ˗bha wo ˈko ˗nu ˗kun ˈˈnɔnbɔ ˈka ˗sü yö dosɛnŋ ˈnën ˈö Zoova ˗dhɛ ˈya˗ ˗ee?
ˈKwa˗ pö ˈkwa kë ˗Zlan ˗dhɛ ˗së, kwa dua ˗mü ˈkwa kwa ˈˈtakɔ ˈbhaa ˗nu bho ˈˈgblʋʋ. ˈMën ˗kë ˈö ˗së kö ˈkwa˗ kë ˈˈdhʋ̈? ˗Ka Psaume 19:8, 11 ˗wo pö, kö ˈka dhɛɛˈˈ ˗nu ˈwo yö ˗an ˗yɔ mɛɛnˈˈ:
Ü ˗bha ˈka Zoova ˗bha ˈtɔŋ˗ ˗nu ˈwo ˗gban kwa ˈˈtakɔ ˗nu ˗bha bhë, ˗wo kpɛnŋdhö ˗ee? ˈMën ˗kë ˈü˗ pö ˈˈdhʋ̈?
Zoova ˗ya mɛn ꞊vadhɛ ˗takun kö ˗wo wo ˈˈtakɔ ˗nu ˗bɛ ˗a ˗bha ˈtɔŋ˗ ˗nu ˗bha. ˗Yö ꞊mɔɔn˗ ˗bha kö ˗yö ü ˗takun ˈpö.
MƐN ˈBHAA ˗NU ˗WA ˗PÖ: «Mɛn ꞊plɛ ˈö ˗an ˗dhɔ ˗yö wo ˈko ˗kë, ˈˈgbɩɩdhɛ ˈyaa ˗mü kö ˗wo ˈdho ˈˈkwi ˈˈdhiʋ̈ kö ˗an ˗bha sɛɛˈˈ ˗yö ꞊kun kë do.»
Mɛn ˈö˗ pö ˈˈdhʋ̈ ü ˗dho ˗a pö ˗a ˗dhɛ ꞊dhɛ?
˗A ˈDHƐ TO KWA ˈˈƝAAN
Dhe waa gɔɔn˗ ˈwo wo ˈkosü ˈˈkwi ˈˈdhiʋ̈, ˗an ˗bha sɛɛˈˈ ˗bha ˗kë do ˗sü ˈö bhë ˗Zlan ˗bha gbɔɔdhe ˗mü.
˗Zobuödhe
˗Mën ˗nu ˈö Biblö ˗yö ˗an ˗dhɛ ˈˈɲangüyaa kë ˗sü?
˗Mën ˈö ꞊mɔɔn˗ ˗bha ˗yö kwa ˗takun kö ˈkwa kwa ˗kɔ bho ˈˈɲangüyaa suu ˈˈpɛpɛ ˈgü?
Zoova ˗bha ˈtɔŋ˗ ˗nu ˈwo ˗gban ˈˈtakɔ ˗së ˗bha ˈkwa ˗an ˗ya ꞊bhlëë ˈgü, ˗a ꞊trɔɔn ˗mɛɛn ˈö ˈkwa dho ˗a ꞊slɔɔ˗?
˗AN ˗GA ˈPÖ
ˈPë ˗kë ˈö ˗Zlan ˈdhö˗ ˈˈpiʋ̈ kö dhe waa gɔɔn˗ ˈwo wo ˈko ˈˈpiʋ̈ ˗wo wo ˈkosü ˈˈkwi ˈˈdhiʋ̈, ˗a ˗gɛn ˗ga.
Biblö ˗ya ˗pö gɔɔn˗ waa gɔɔn˗ ɛɛnˈˈ dhe waa dhe ˈö ˗an ˗bha sɛɛˈˈ ˈdhö do ˈwaa ˈnën ˗an ˗san ˗yö Zoova ˗kë, ˈˈkɛɛ ˗an ˗bha sɛɛˈˈ ˗bha ˗kë do ˗sü ˈnën ˗san ˗ya ˗kë. ˗Kɔ ˈö ˈkwa˗ ˈwɔn dɔ ˗a ˈka, ˗a ˗ga.
ˈPë ˗kë ˈö ˗Zlan ˗bha ˈtɔŋ˗ ˗nu ˈwo ˗gban gɔɔn˗ waa dhe ˗an ˗bha sɛɛˈˈ ˗bha ˗kë do ˗sü ˗bha ˗an ˗ya ꞊bhlëë ˈgü ˗sü ˈdhö ˗së kwa ˗bha ˈka, ˗a ˗ga.
˗Kwɛzlan ˈö˗ ˗gɔ ˗kë «˗Wo n ˗sü ˗së» ˈka bhë, ˗a ˗wo pö kö pë ˈö gɔndë do ˈö waa gɔɔn˗ ˈˈwɛɛ ˗nu ˗an ˗bha sɛɛˈˈ ˗yö ˗kë do ˈˈdhiʋ̈ ˗be ˗a ˗takun ˈö ö ˗bha ˗tosɛta kë ˗kɔ bho ˈˈgblʋʋ, ˈö ˗kë ˗Zlan ˗dhɛ ˗së, kö ˈü˗ dɔ.
«Biblö ˗yö mɛn ˗bha ˗tosɛta ˗bho ˈˈgblʋʋ» (˗Kwɛ 2011 Avlidhö 1 ˗bha ˈˈGlaadhiʋ̈ ˗tɔn)
a Mɛn ˗nu ˗bha sɛɛˈˈ ˈbha ˗kë do ˗kɔ ˈbhaa ˈnën ˈtɔ˗ mɛn gɔɔndhɛ ɛɛnˈˈ mɛn dhebɔdhɛ ˗da ö ˈˈdhii ˗sü, ö gɔɔndhɛ ˗da ö ˈˈtɛɛdo zü ˈˈpiʋ̈ ˗sü waa trʋʋˈˈ ˗kë mɛn ˈˈwɛɛ gɔɔndhɛ ɛɛnˈˈ ˗a dhebɔdhɛ ˗ka ˗sü.
-
-
ˈBha ˈwɔn yaa ꞊gbɔɔnsü kë, ü ˗dho ˗a kë ꞊dhɛ?Zuʋ̈gblüdhi ꞊slɔɔ ˗toëpö ˈka! (˗Bhö Biblö draanˈˈ)
-
-
ˈKö ˗kë ꞊dhɛ Zoova ˗dhɔ ˗yö kwa ˗kë ꞊dedewo ˈö ˈkwa kwa ˈgü dɔ ˗ni ˈgü ˈˈgbɩɩ˗ kö kwa ˈdho˗ ˗a ˗shiödhɛwɔn kë, ˈwɔn ꞊mɔɔn˗ ˗bha ˈö zë kwa ˗gɔ ˈˈtʋ̈ŋ ˈbhaa ˗nu ˈka. ˈˈKɛɛ ˈwɔn yaa ˈbhaa ˗nu ˗wo ꞊gbɔɔnsü ꞊dedewo ˈö ˈwo ˗ʒiö ˗a ˈka ˗a ˈbhaa ˗nu ˗ta. (1 Kodhɛngtö 6:9, 10) Kö ˈü ˈwɔn yaa ꞊gbɔɔnsü kë, ˈya ˗dho kë ü ˈgü ꞊dhɛ ü ˗dhɔ yö ˈti ˗dho Zoova kë ˈzüdho. Ü ˗bhawɔn ˈto ˗sü waa ü ˗takun ˗dhɔ ˗ya ˈgü ˈˈtʋ̈ŋ ꞊gban ˈka.
1. ˈBha ˈwɔn yaa kë, ü ˗dho ˗a kë ꞊dhɛ kö Zoova ˗yö ü ˗bhawɔn ˈto?
Mɛn ˗nu ˈö Zoova ˗dhɔ ˗yö ˗an ˗kë, ꞊waa˗ yö ꞊dhɛ ˈwa ˈwɔn yaa ꞊gbɔɔnsü kë, ˗wëë ˗yö ˗bɔ ˗an ˗ta. ˈˈKɛɛ pë ˈö Zoova ˗ya ˈˈplüün bho ö ˗dhɔkëmɛn ˗nu ˗dhɛ, ꞊waa˗ man ˗yö ˗an ˗zogban. ˗Ya ˗pö: « ˈKö ˗kë ꞊dhɛ ka ˗bha ˈwɔn yaa ˗nu ˗wo ꞊dhɛ pë ˈˈɲan ˗zaɔndhö ˈdhö, ˗wo ˗dho kë ˈˈpuu ꞊dhɛ mënŋga ˈdhö.» (Isaïe 1:18) ꞊Wa ˈgo wo ˗bha ꞊sɔŋ yaa ˈgü, Zoova ˗yö ˗an ˗bhawɔn ˗to ˈpapadhö. ˈˈKɛɛ ˈmën ˈwo˗ ˗dhɛ ˗go ö ˗bha ꞊sɔŋ yaa ˈgü ˗sü? ˗Go ö ˗bha ꞊sɔŋ yaa ˈgü ˗sü ˈnën ˗tɔ ˈwɔn yaa ˈü˗ ˗kë ˗a ˗bha ˗mën ü ˈka ˗sü ˈö ˈü ˗kan ˗a ˗bha, ˈö ˈü ꞊bhɛɛ Zoova ˗dhɛ kö ˗yö ü ˗bhawɔn ˈto. ꞊Ya ˈgo mü ˈzü ˗a ˗mɛn ˗yö ö ˈgü ˗dɔ ˈˈgbɩɩ˗ ˈö ˗kan ö ˗bha ˗zotadhe waa ö ˈˈtakɔ ˗nu ˈwo dho ˗a ˈka ʒiaan yaa ˗ta bhë ˗an ˗bha, ˈö pë ꞊gban ˈˈpɛpɛ ˗kë kö ˈö Zoova ˗bha ˈtɔŋ˗ ˈˈslʋ̈ʋ̈slʋ̈ ˗nu bhë ˗an ˗ya ꞊bhlëë ˈgü.—Isaïe 55:6, 7 ˗wo pö.
2. Kö ˈkwa ˈwɔn yaa kë, Zoova ˗yö ˗bɔ mɛn zii ˗nu ˗ta ˈö kwa ˗takun ˗kɔ ˗kë ꞊dhɛ?
Mɛn ˈö ˈwɔn yaa ꞊gbɔɔnsü ˗kë, Zoova ˗ya ˗pö ‹˗a ˗mɛ ˗yö ˈˈdhiʋ̈ ˗sü ˗Zlan ˗bha ˈkɔdhigümɛ ˗nu ˈka ˗mɛ ˗nu [ɛɛnˈˈ mɛn zii ˗nu] ˗dhɛ.› (Zakö 5:14, 15 ˗wo pö.) Zoova waa˗ gbamɛn ˗nu ˗dhɔ ˗yö mɛn zii ˗nu ˈwo ˈˈdhʋ̈ ˗an ˗kë. ˗Kɔ ˈwo ˗dho kwa ˗takun ˗a ˈka kö ˗mlɛɛn ˈö kwaa Zoova kwa ꞊zinŋgü ˗yö kë ˗së ˈzü, ˗a ˈˈslö ˗yö ˗an ˗gɔ.—Gadhatö 6:1.
Mɛn ˈö ˈwɔn yaa ꞊gbɔɔnsü ˗kë, mɛn zii ˗nu ˗wa ˗takun ˗kɔ ˗kë ꞊dhɛ? Mɛn zii do ɛɛnˈˈ ꞊plɛ ˗wo ˗bɔ Biblö ˗ta ˈö ˈwo˗ ˗zɔn ˗a ˗dhɛ ꞊dhɛ pë ˈö˗ ˗kë bhë ˗yö ˈyaa˗. ˗Gleŋ ˗nu ˈwo ˗dho ˗a ˗takun kö ˈya ˗dho ˈwɔn yaa suu ˈö ˈˈdhʋ̈ ˗a kë ˈzü, ˗wa ˗zɔn ˗a ˗dhɛ. ˈˈKɛɛ ˗a ˗mɛn yö ˈti ˈˈwɩ ˗a ˗bha kö ˈö ˈˈkan ö ˈˈtakɔ yaa ˈö bhë ˗a ˗bha, ˗wo ˗dho ˗a bho kwa ˈˈpiʋ̈, ˗yö kë ˈˈdhʋ̈ kö ˗a ˈˈtakɔ yaa ˈö bhë ˈya ˗dho ˗zlanwokɔdhi ˈgüdhɛ shiʋ̈ˈˈ.
˗KAA ˈˈPIƲ̈ ˈPƆN
Kö ˈkwa ˈwɔn yaa ꞊gbɔɔnsü kë, pë ˈö ˈkwa ˗dho ˗a kë kö ˗kɔ ˈö Zoova kwa ˗takun ˗a ˈka ˗yö kë kwa ˗dhɛ ˗së, ˗kwaa ˗ga.
3. Kö ˈkwa ˈˈdhe bho kwa ˗bha ꞊sɔŋ yaa ˗nu ˗ta, kwaa ˗Zlan kwa ꞊zinŋgüdhɛ ˗yö ˗kë ˗së ˈzü.
Kö ˈkwa ˈwɔn yaa kë, ˗yö ˗mën Zoova ˈka ꞊dedewo. ˈDhɛ ˈö ˈˈdhʋ̈ kwa dua ˗mü kö ˈkwa˗ blɛɛˈˈ ˗a ˗dhɛ. ˗Ka Psaume 32:1-5 ˗an ˗wo pö, kö ˈka dhɛɛˈˈ ˈö yö ˗a ˗yɔ mɛɛnˈˈ:
ˈMën ˗kë ˈö ˗së kö ˈkwa ˈˈdhe bho ˈwɔn yaa ˈö ˈkwa˗ ˗kë ˗a ˗ta Zoova ˗dhɛ kö ˈkwa ˗dho ˗a ˗bin?
ˈKwa˗ pö ˈkwa kë kwa ˗de ˈˈpiʋ̈ ˗së, kwa dua ˗mü kö ˈkwa kwa ˗bha ꞊sɔŋ yaa ˈö ˈkwa˗ ˗kë ˗a blɛɛˈˈ Zoova ˗dhɛ, kö ˈkwa ˗takundhe ˗dhɛ ˈpö ˗a ˗gɔ. ˗Kaa VIDEO ˗ga, kö dhɛɛˈˈ ˈö ˈˈshia bhë ˈka˗ ˗yɔ mɛɛnˈˈ.
Video ˈö bhë ˗a ˈgü, mɛn zii ˗nu ˗wo Kanɔn ˗takun ˗kɔ ˗kë ꞊dhɛ kö ˗yö ö ꞊yɛɛ kë ˗yö nu Zoova ˈˈpiʋ̈ ˈzü?
Kwa dua ˗mü kö ˈkwa gagade pö mɛn zii ˗nu ˗dhɛ, kwa ˗takunmɛn ˗nu ˗mü ˗an ˈka. ˗Ka Zakö 5:16 ˗wo pö, kö ˈka dhɛɛˈˈ ˈö yö ˗a ˗yɔ mɛɛnˈˈ:
ˈMën ˗kë ˈö kwa gagade pö mɛn zii ˗nu ˗dhɛ ˈö kwa ˗takun ˗sü ˈyaa kë ˗an ˗gɔ ˈˈgbɩɩ˗?
ˈWɔn yaa ˈü˗ ˗kë ˗a blɛɛˈˈ, ˈü gagade pö mɛn zii ˗nu ˗dhɛ, ˈü ˈˈwɩ Zoova ˗bha ˗takundhe ˈö ˗dhɔkaa ˈgü bhë ˗a ˗bha.
4. Zoova ˗yö ˈwɔnyaakëmɛn ˗nu ˗wëë ˗zë.
Mɛn ˈö ˈwɔn yaa ꞊gbɔɔnsü ˗kë ˈö ˈyaa ˈˈwɩ ˗dhioo ˗nu ˈwo ˗gban Zoova ˗bha ˈtɔŋ˗ ˗nu ˗ta ˗an ˗ya ꞊bhlëë ˈgü ˗sü ˗bha, ˗wa ˗bho kwa ˈˈpiʋ̈, ˈö ˈkwaa ꞊nënŋ ˗a ˗bha ˗ʒiaanwo. ˗Ka 1 Kodhɛngtö 5:6, 11 ˗wo pö, kö ˈka dhɛɛˈˈ ˈö yö ˗a ˗yɔ mɛɛnˈˈ:
Kö ˗wo ˈˈsɛkɛ ˈnën ˈdɛdɛ ˗da ˈbluu˗ ˗böö ˈˈpiʋ̈, ˗a ˈbluu˗ ˗böö ˗yö ˗kë ꞊dhɛ? Mɛn ˈö ˈwɔn yaa ˗kë ˈö ˈyaa ˈˈwɩ ˗a ˗bha ˈö ˈgo ö ˗bha ꞊sɔŋ yaa ˈgü, ˈkwa ꞊nënŋ ˗a ˗bha, ˗mën ˈö˗ ˈˈtakɔ dho ˗a kë ˗zlanwokɔdhi ˈka?
Mɛn zii ˗nu ˗wo ˗to Zoova ˗bha ˈwɔnyaakëmɛn ˗nu ˗wëëzësü ˈwɔnzuan ˈˈpiʋ̈, ˈö ˈwo wo ˈgü dɔ ˈˈgbɩɩ˗ ˈwo mɛn ˗nu ˈö ˈwo ˗an bho ˗zlanwokɔdhigümɛn ˗nu ˈˈpiʋ̈ ˗an ˗takun. Mɛn ꞊vadhɛ ˗wo wo ꞊yɛɛ ˗kë ꞊taabha ˈö ˈwo nu ˗zlanwokɔdhi ˈgü. ˈKö ˗kë ꞊dhɛ ˗an ˈˈklʋʋbho ˗kɔ ˗yö ˗mën ˗an ˈka, ˗yö ˗an ˗takun ˈö ˈwo˗ yö ꞊dhɛ pë ˈwo˗ ˗kë bhë ˗yö ˈyaa˗.—Psaume 141:5
˗Kɔ ˈö Zoova ˗yö ˈwɔn ˗nu ˗kë ˗a ˈka ˈwɔnyaakëmɛn ˗nu ˈˈpiʋ̈ bhë ˗ya ˗zɔn ˗kɔ ˗kë ꞊dhɛ ꞊dhɛ ˗yö dhɔŋsü, ˈö mɛn ˗nu ˗wëë zë, ˈgo mü ˈzü ˈö ˗dhɔkaa ˗Zlan ˈka?
5. Kö ˈkwa ˈgo kwa ˗bha ꞊sɔŋ yaa ˈgü, Zoova ˗yö kwa ˗bhawɔn ˗to.
ˈWɔnyaakëmɛn ˗ya ˈgo ö ˗bha ꞊sɔŋ yaa ˈgü, ˗kɔ ˈö Zoova zuʋ̈ˈˈ ꞊nii ˗yö ˗da ˗a ˈka, Yesu ˗ya ˗blɛɛ. ˗Ka Dhukö 15:1-7 ˗an ˗wo pö, kö ˈka dhɛɛˈˈ ˈö yö ˗a ˗yɔ mɛɛnˈˈ:
ˈWɔnzuan ˈö bhë, ˗mën ˈö˗ ˗zɔn ü ˗dhɛ ˈö ˗gban Zoova ˗bha?
˗Ka Ézéchiel 33:11 ˗wo pö, kö ˈka dhɛɛˈˈ ˈö yö ˗a ˗yɔ mɛɛnˈˈ:
˗Mën ˈö˗ ˗zɔn ꞊dhɛ mɛn ˈbha ˗ya ˈgo ö ˗bha ꞊sɔŋ yaa ˈgü ꞊dedewo?
Zoova ˗yö ö ˗zokë ö ˗dhɔkëmɛn ˗nu ˈˈpiʋ̈ ꞊dhɛ ˗kɔ ˈö ˈˈbhlaa ˗maankëmɛn ˗yö ö ˗zokë ˗a ˈka ö ˗bha ˈˈbhlaanën ˈˈpiʋ̈ bhë ˗a ˈdhö?
MƐN ˈBHAA ˗NU ˗WA ˗PÖ: «Pë ˈa˗ ˗kë ˈman˗ blɛɛˈˈ mɛn zii ˗nu ˗dhɛ, ˗wo ˗dho n bho ˗zlanwokɔdhigümɛn ˗nu ˈˈpiʋ̈.»
Mɛn ˈö˗ pö ˈˈdhʋ̈ ü ˗dho ˗a pö ˗a ˗dhɛ ꞊dhɛ?
˗A ˈDHƐ TO KWA ˈˈƝAAN
Kö ˈkwa ˈwɔn yaa ꞊gbɔɔnsü kë, kö ˗yö kë kwa ˗dhɛ ˈyaa˗ ꞊dedewo kö ˈkwa ˈˈkan ˗a ˗bha, Zoova ˗dho kwa ˗bhawɔn ˈto.
˗Zobuödhe
ˈKwa ˈwɔn yaa kë ˈmën ˗kë ˈö ˗së kö ˈkwa˗ blɛɛˈˈ Zoova ˗dhɛ?
˗Mën ˈö ˈkwa ˗dho ˗a kë kö Zoova ˗yö kwa ˗bhawɔn ˈto?
Kö ˈkwa ˈwɔn yaa ꞊gbɔɔnsü kë, ˈmën ˗kë ˈö kwa dua ˈdhö ˗mü kö ˈkwa ˗takundhe ˗dhɛ mɛn zii ˗nu ˗gɔ?
˗AN ˗GA ˈPÖ
Gɔndë do ˈö Zoova ˗ya ˗bhawɔn to ꞊dhɛ ˗kɔ ˈö˗ pö ˗a ˈka Isaïe 1:18 ˈgü bhë ˗a ˈdhö, ˗a ˗bha ˗kwɛzlan ˗ga.
Mɛn zii ˗nu ˗wo mɛn ˗nu ˈwo ˈwɔn yaa ꞊gbɔɔnsü kë bhë, ˗an ˗takun ˗kɔ ˗kë ꞊dhɛ?
˗Kɔ ˈö ˈwo ˗dhɔ ˗zɔn ˗ni ˈgü ˗a ˈka wɔnyaakëmɛn ˈbha ˈö yo ˈti ˈgo ö ˗bha ꞊sɔŋ yaa ˈgü ˗a ˗dhɛ, ˗bhö ˗a ˗ga.
Gɔndënën do ˈö ˗kan gagade ˗bha, ˗kɔ ˈö Zoova ˗ya ˗gan ö ˗bha ˗a ˈka ˈzü, ˗a ˗ga ˗a ˗bha ˗kwɛzlan ˈö˗ ˗gɔ ˗kë «N ˗bhawɔn ˗yö ˗kun ꞊yɛɛkë Zoova ˈˈpiʋ̈ ˗sü ˗bha ˈzü» ˈka bhë ˗a ˈgü.
«Biblö ˗yö mɛn ˗bha ˗tosɛta ˗bho ˈˈgblʋʋ» (˗Kwɛ 2012 Avlidhö 1 ˗bha ˈˈGlaadhiʋ̈ ˗tɔn)
-