ˈPë ˗Zlan ˗zo ˈˈpiʋ̈ kwa ˗bhaa ˈka ˈyö ˈtɔ˗ ˗mën?

KÖ ˈÜ zunal ˗wo pö, ˈü tele ˗ga ɛɛnˈˈ ˈü ü ˈˈtʋ ˈto ladio ˗bha, mɛn zë ˗wɔn waa ˗gblü ˗nɔɔn ˗nu ˈnën ˈü ˗an man ɛɛnˈˈ ü ˈˈɲan ˗yö ˗da ˗an ˈgü. ˗A ˈbhaa ꞊ya kë kö bhii ꞊dede ˈˈyua ˈbha ü ˗wëë ˗kë wo ˗ni ˈgü ɛɛnˈˈ ˈzü kö ü dhɔɔbhaamɛn ˈbha ˈö go ü ˗bha, ˗a zuʋ̈ˈˈ ˈˈklʋʋbhɔdhe ˗yö ü ˗bha.

ˈKɔdhi do ˈgümɛn ˗nu ˈwo wo ˈˈtʋ ˈto nɔɔn˗ ˗nu ˗bha ladio ˈgü

Ü ꞊mɔɔn˗ ˗bha ˈü ü ˗de dhɛɛˈˈ ˈkpɔ ꞊dhɛ:

ˈPë ˗Zlan ˈdhö˗ ˈˈpiʋ̈ ˗yö kë n ˈka, ɛɛnˈˈ ˗yö kë n ˗man ˈkɔdhigümɛn ˗nu ˈka yö ˈpö yö ˗ee?
ˈDe ˗dho n ˗takun kö ˈwɔn ˈˈgbɩɩ˗ ˗nu ˈwo n ˗bha ˈa ˗an ˈˈɲan bhɔ?
ˈˈSɛ ˗bha ˈwaannusü ꞊dede ˗dho kë ˗ee?

Dhɛɛˈˈ ˗nu ˈwo bhë ˗an ˗yɔ ˗nu ˈwo mɛn ˗zo kun, Biblö ˗yö ˗an ˗bɔ.

BIBLÖ ˗YA ˗PÖ ˗ZLAN ˗DHO ˈˈMLÜÜ ˗WƆN ˗NU KË ˈˈSƐ ˗TA.

Pë ˈˈdhiʋ̈˗, ˗kë zii ˗sü waa ga ˗dho ˈgo mɛnbhɩɩdhe ˗nu ˗bha. —˗Dhɛkpaɔ dhiaˈˈ ˈsëëdhɛ 21:4.
“꞊Niɔɔnmɛn ˗dho ˗lö ꞊dhɛ ˗vë gɔn ˈdhö.”—Isaïe 35:6.
“ˈˈƝɛɛntiimɛn ˈˈɲan ˗dho ˈˈpʋ.”—Isaïe 35:5.
Mɛn ˗nu ˈö ꞊wa ga, ˗wo ˗dho ˈgo ga ˈgü. —Zan 5:28, 29.
ˈˈYua yö ˈti ˗dho mɛn gbɛ˗ kë. —Isaïe 33:24.
˗Bhöpë ꞊va ˗dho kë mɛn ꞊gban ˗gɔ ˈˈkpɔnŋ ꞊taa.—Psaume 72:16.

ˈPË BIBLÖ ˗YA PÖ ˗A ꞊TRƆƆN ꞊SLƆƆ

Zoova ˗bha ꞊Gbɛkiö do ˈö waa gɔndë do ˈwo Biblö draanˈˈ ˗ni ˈgü

Pë ˗nu ˈü ˗an ˗wo pö ˈsëëdhɛ ˈö yö ˗a züdɔdhɛ ˈgü bhë, ˗wo ꞊mɔɔn˗ ˗bha ˈwo ˗kë ü ˈgü ꞊dhɛ ˈˈɲɛɛnbhosü ˈˈkpaan ˈdhö. ˈˈKɛɛ ˗Zlan ˗ya ˈˈplüün ˗bho ꞊dhɛ ˗a ˈˈtʋ̈ŋ ꞊ya ˈto ꞊klöö˗ kö pë ˗nu ˈwo bhë ˈö ˗an kë. ˗Kɔ ˈö ˗dho ˗an kë˗ ˗bha ˈpö, Biblö ˗ya ˗blɛɛ ˈkpakpadhö.

˗A ˈdhɛ ˈö ˗ʒiö ˗a ˈdhɛ bhë˗ ˗ta, Biblö ˗ya ˗zɔn. ˈPë kwa ˗bhawɔn ˈdhö˗ dɔ ˗sü ˗bha ꞊dedewo kö ˈkwa kë zuʋ̈gblüdhi ˈgü, kö ˈkwa ˗tosɛta ˗sëdhɛ yö ꞊dɛɛ, ˗ya ˗zɔn kwa ˗dhɛ. ˗Bhö ü ˗zota pë ˗nu ˈwo ü zuʋ̈ˈˈ ˈˈdhiʋ̈ ˗tɛ ˗an ˈgü. ˗Wo ꞊mɔɔn˗ ˗bha ˈwo ˗kë ˈwëëga ˗wɔn, ˈkɔdhigüwɔn, ˈˈyua, ɛɛnˈˈ ü ˗bha mɛn ˗wɔngbɩɩsü ˈö go ü ˗bha ˗an ˈka. Biblö ꞊mɔɔn˗ ˗bha ˈö ü ˗takun ˗bɔ ˈwɔn ˗nu bhë ˗an ˈgü ˗sü ˗bha, ˈö ü ˗zo ˗gban dhɛɛˈˈ suu ˗nu ˈwo yö ˗an ˗yɔ bɔ ˗sü ˈka:

ˈMën ˗kë ˈkwa saanˈˈ ˗sü?
Kwa ˗dho ˈwɔn ˈgbɩɩ˗ ˗nu ˈkun ˗kɔ ˗kë ꞊dhɛ?
Kwa ˗bha ˈkɔdhi ꞊mɔɔn˗ ˗bha ˈö ˈwaannu ˗ee?
ˈKwa ga kwa ˗dho ˈˈmɛn?
Kwa ˗bha mɛn ˗nu ˈö ꞊wa ga, kwa ˗dho ˗kpan ˗an ˗bha yi ˈbhaa ˈka ˗ee?
ˈMën ˗kë ˈkwa ˗dho kwa ˗zo yö ꞊dhɛ pë ˈˈpɛpɛ ˈö ˗Zlan ˗yö ˗an ˈˈplüün bho, ˗yö ˗dho ˗an kë.

˗A kë ˗sü kö ˈsëëdhɛ ˗be ˈö yö ˈü˗ ˗wo pö bhë, ˗ya ˗zɔn ˗dhɛ ˈpë Biblö ˗ya pö, ü˗ ˈˈpiʋ̈ ˈü˗ dɔ. ˈSëëdhɛ ˗be ˈö yö, ˗yö ˗dho ü ˗takun. ˗Wo ˗bhüö kpö ˈdhɛ ˈö ˈdhö, ˗a ˗bha dhɛɛˈˈ ˗dhö. ˗Wo ˗dho ü ˗takun kö ˈü Biblö ˈgüman ˗së ˈka. Biblö ˈˈdoo dɔ ˗sü ˈö Zoova ˗bha ꞊Gbɛkiö ˗nu ˈˈpiʋ̈, ˗a ˈˈyi ˗yö ˗kan mɛn ˈˈmliɲɔn ꞊va ˈˈdhi. Yi˗ ˈwɔn ˗dɔ ꞊dhɛ ˗yö ˗dhö kë ü ˗dhɛ ˗së ˈpö. Pë ˈö Biblö ˗ya pö, ˗a draansü kö ˈü˗ dɔ, kö ˗Zlan ˗ya ˈdhuëë˗ ˈkpɔ ü ˗bha bhë ˈaa ˗yö kë!

Ü ˗BHA BIBLÖ BLÜÜˈˈ ˗KƆ DRAANˈˈ

ˈSëëdhɛ ˗be 66 ˈnën ˈwo Biblö ˈgü. ˗A ˈdhɛ ˈö ˈdhö, ˗yö ˈˈkan ˗sü ˈka ˈkoo ˗an ˈˈɲan ˈˈgblʋ̈gblʋ̈ waa˗ ˈˈɲan ˈsɛɛn˗ ˗nu ˈka. ꞊Ya kë ˈˈdhʋ̈ ˗a ˈˈɲan ˈsɛɛn˗ mɛɛnˈˈ ˗sü ˈyaa kë ˈˈgbɩɩ˗. Kö ˈsëëdhɛ ˈö yö ˗yö Biblö ˈˈɲan ˈbha ˗zɔn ü ˗dhɛ, ˗a ˈˈnimlɔn ˗blɛɛsü ˈö dɔ ˗a ˈsëëdhɛ ˗be ˈtɔ ˈˈpiʋ̈, ˈyö ˈtɔ˗ ˗a ˈˈɲan ˈˈgblʋ̈gblʋ̈. ˗A ˈˈnimlɔn ˈdhɛ dɔ˗ ˈˈpiʋ̈ ˈyö ˈtɔ˗ ˗a ˈˈɲan ˈsɛɛn˗. ˗A ˈwɔnzuan ꞊nɛn: ꞊Ya kë ꞊dhɛ ˈbha ˗kpan “2 Timote 3:16” ˗bha, ˗a ˗gɛn ˈtɔ˗ ˈsëëdhɛ ꞊plɛ ˗naan ˈwo˗ bɔ Timote ˗dhɛ, ˗a ˈˈɲan ˈˈgblʋ̈gblʋ̈ 3, ˗a ˈsɛɛn˗ 16.

Kö Biblö ˈˈɲan ˗nu ˈwo ˗an ˗zɔn ü ˗dhɛ ˈü ˗an mɛɛnˈˈ, ü ˗dho dɔ Biblö blüüˈˈ ˗dhɛ ˈka ˈˈvaandhö. Ü ꞊mɔɔn˗ ˗bha ˈpö ˈü Biblö ˗wo ˗pö ˗dhɛkpaɔyi ˈˈpɛpɛ ˈka ˗sü züdɔ. Kö ˈü Biblö ˈˈɲan ˈˈgblʋ̈gblʋ̈ ˗yaaga ˈö yö˗ ˈka ˈˈsoodhu ˗bha ˗an ˗wo pö ˗dhɛkpaɔyi ˈˈpɛpɛ ˈka, ü ˗dho ꞊mɔɔn˗ ˗bha ˈü Biblö ˗todhʋ̈sü ˗wo pö ˗kwɛ do ˈgü.