De ˗nu ˈwo ˗tɔ Zoova ˗bha ꞊Gbɛkiö ˗nu?

Zoova ˗bha ꞊Gbɛkiö ˗dhɛ ˈü˗ dɔ? ˗An mɛn ˈbhaa ˗nu ˗wo ü yayɔɔ ˗nu, ü ˈˈtɛɛbɔ ˗nu ˈö ˈka ˗yö ˗kë ˈka ˈˈkwëë, ɛɛnˈˈ ˈö ˈka ꞊klaŋkɔ do ˈgü, ˗an ˈka. ˗A ˈbha ꞊ya ˗kë kö ˗wa ˗zlanwopö ü ˗dhɛ ˈsaadhö. De ˗nu ˗mü yi ˈka ꞊dedewo? ˈMën ˗kë ˈö pë ˗nu ˈyi yi ˗zoyö ˗an ˗dhɛ, ˈyi ˗an ˗wɔn ꞊blɛɛ mɛn ˈˈwɛɛ ˗nu ˗dhɛ?

Yi ꞊dhɛ mɛn ꞊gban ˈdhö. Yi go ˈˈsɛ ˗nu ˈö ˗an wɔkɔ ˈyaa do ˗an ˈgü. Yi kpö ˈgü, mɛn ˈbhaa ˗nu ˗kun ˗zlanwo ˈˈwɛɛ ˈgü, ˈö mɛn ˈbhaa ˗nu ˈwaa kun ˈwo ˗zoyö ˗ni ˈgü ˗Zlan ˗dhɛ. ˈˈSanni yi kë Zoova ˗bha ꞊Gbɛkiö ˗nu ˈka, yi ˈˈtʋ̈ŋ ꞊dede ˗sü ˈö ˈyi Biblö ꞊draan ˗së ˈka. (Këwɔn ˗nu 17:11) Pë ˗nu ˈyi ˗an ꞊draan bhë, ˗wo yi ˗zokun. ˗Yö ˈnën˗ ˗wɔn ˈgü ˈö yi ˗we Zoova ˗dhɔkë ˗sü ˗bha.

Biblö draansü ˗yö ˈwɔn ˗së ꞊va ˗kë yi ˗dhɛ. Yi ˗de ˈpö yi ˈtëëtë. Yi bɔ ˈwɔn ˈˈgbɩɩ˗ ˗nu ˈgü ꞊dhɛ mɛn ꞊gban ˈdhö. ˗To Biblö ˗bha ˈtɔŋ˗ ˗nu ˈˈpiʋ̈ ˗sü ˈnën yi ˗bha ˗tosɛta ˗kë ˗së. (Psaume 128:1, 2) ˈWɔn ˈö˗ ˗wɔn ˈgü ˈö pë ˗sɛŋbɔ ˗nu ˈö ˈyi ˗an ꞊draan Biblö ˈgü, ˈyi ˗an ˗wɔn ꞊blɛɛ mɛn ˗nu ˗dhɛ, ˈyö bhë.

˗Zlan ˈnën ˗gleŋ ˗da yi ˗bha. ˈWɔn ꞊bhlëësü ˗nu ˈwo Biblö ˈgü ˗wo ˗potaadhe ˗nu yi ˗dhɛ. ˗Wa ˗kë ˈö ˈyi mɛn ˈˈwɛɛ ˗nu ꞊bhlëë ˗ya, ˈyi ˗kë kpɛnŋdhö, ˈö yi ˈˈgblü ˗yö ˗kë ˗së. ˈTɔŋ˗ ˗nu ˈwo Biblö ˈgü ˗wo mɛn ˗kë mɛn ˗tiaandhö, ˈö ˈwɔn ˗nu ˗kë ö ˗naan ˈka, ˗a ˈka. ˗Wo mɛn ˗bha ˈkɔdhi ˈwaannu, ˈö ˈwo mɛn ˈˈta ˗kɔ ˗kë ˗së. ˗Dhɛ ˈö ˗kë ꞊dhɛ ˈyi˗ ˈwɔn dɔ kpakpadhö ꞊dhɛ “˗Zlan ˈyaa mɛ ˗zë ˈgü kë” bhë, yi yi ˈˈkwëë ꞊dhɛ ˈkɔdhi do ˈgümɛn ˗nu ˈwo ˈˈsɛ ˗todhʋ̈sü ˈgü, ˗an ˈdhö. Yi yi ˗zoyö pë do ˗dhɛ. Yi ˗kɔ ˈyaa ˈˈsɛ kɔɔˈˈ ˈwɔn ˗nu ˈgü. ˈYaa mɛn ˗nu ˗zë ˈgü kë. ˗Yö ˈˈdhʋ̈ ꞊dhɛ yi ꞊dhɛ mɛn ꞊gban ˈdhö, ˈˈkɛɛ yi ˈˈsɛgümɛn ˗nu do ˈwo wo ˗de ˗ta, ˗an ˈka.—Këwɔn ˗nu 4:13; 10:34, 35.

• ˗Mën ˈö ˗kë ˈö ˈkwa˗ pö ꞊dhɛ Zoova ˗bha ꞊Gbɛkiö ˗nu ˗wo ꞊dhɛ mɛn ꞊gban ˈdhö?

• ˈWɔn ꞊bhlëësü ˗mɛɛn ˈö Zoova ˗bha ꞊Gbɛkiö ˗nu ˈwo˗ ꞊draan Biblö ˈgü?