ˈDhɛ Adan waa Ɛvö ˗wo go Edɛnö ˈˈdhüdhɛɛdhö, ˗wo ˈnën ꞊va ˗kpɔ. ˗An gbö ˗blɛɛsü Kaɛn ˗kun ˈkeekëmɛn ˈka, ˈyö ˗an gbö ꞊plɛ ˗naan Abɛlö ˗kë ˗tuë ˗maankëmɛn ˈka.

Yi do ˈka, Kaɛn waa Abɛlö ˗wo ˗nu gbɔɔ kë Zoova ˗dhɛ. Gbɔɔkësü ˈö bhë ˗mën ˗mü? Gbɔɔkësü ˈnën˗ ˗tɔ pë ˈwɔn ˈˈgbɩɩsü ˈwo˗ nu ˗Zlan ˗dhɛ ˈˈwɛɛwɛ. Abɛlö ˗bha gbɔɔpë ˗yö ˗dhi Zoova ˗dhɛ. ˈˈKɛɛ Kaɛn ˗bha ˗zë, yö ˈti kë ˗a ˗dhɛ ˗së. ˗A ˗wɔn ˈgü, ˈö Kaɛn ˗yö ˗da ˗naandhe ˗ziisü ˈgü. Zoova ˗ya ˗pö ˗a ˗dhɛ ꞊dhɛ ˗a ˗bha ˗naandhe ꞊mɔɔn˗ ˗bha ˈö˗ ˗blü ˈwɔn yaa kë ˗sü ˗bha. ˈˈKɛɛ Kaɛn yö ˈti ö ˈˈtʋ ˈto ˗a ˗wo ˗bha.

Kaɛn ˗ya ˗pö Abɛlö ˗dhɛ: ‹˗Ko ˈdho ˈbhlaa˗!› ˈDhɛ ˈwo ꞊loo mü ˈö ˗pö ö dheebhaŋ Abɛlö ˗ta ˈö˗ zë.› ˈDhɛ kë ˈˈdhʋ̈, ˈmën Zoova ˗ya ˗kë? ˗Yö ˈwɔn ˗bhö Kaɛn ˈgü, ˈyö dho ˗a ˈka ö ˗bha ˈkɔdhigümɛn ˗nu ˈka ꞊gblɛɛn. Kaɛn yö ˈti ö ꞊yɛɛkë ˈzü toŋtoŋdhö kö ˈö nu ö ˗de ꞊plöö.

˗Gleŋ ˗mɛɛn ˈö˗ ˗da kwa ˗bha? ˗A ˈbha ˗ya kë ꞊shiöŋ, ˗kɔ ˈö ˈkwa˗ ˈˈpiʋ̈ kö ˈwɔn ˗nu ˗wo kë ˗a ˈka ˈwaa kë ˗a ˗kɔ ˗bha. ˗A ˗kë ˈˈdhʋ̈ ˗sü ꞊mɔɔn˗ ˗bha ˈö ˗naandhe ˈö kwa ˈgü ˗a ˗dadhiʋ̈ ꞊dedewo. Ɛɛnˈˈ ˈzü mɛn ˈbha ꞊yaa˗ yö ꞊dhɛ kwa ˗naandhe ˈgü, ˗yö ꞊mɔɔn˗ ˗bha ˈö kwa ˗zokpɔɔ. ˗Ya kë ˈˈdhʋ̈, ˗kwa ˈgo ˗naandhe ˈgü ˈˈvaandhö. Kwa ˈti˗ kë ˈˈdhʋ̈ kwa ˗dho ˈwɔn yaa kë.

ˈDhɛ ˗kë ꞊dhɛ Zoova ˗dhɔ ˗kun Abɛlö kë ˗ni ˈgü ˈö ˗kun ˈwɔn ˗së ˗kë ˗ni ˈgü bhë, ˗a ˗zo ˈti dho bhɔ ˗a ˈka. ˗Ya ö bo ˈˈsɛtadhɛ kë ˗sü ˈka ꞊bhɔɔpö ˈka, ˗yö ˗dho ˗a bho ga ˈgü.

ˈDhɛ ˈˈtʋ̈ŋ ˈbha ˗yö ˗ʒiö, ˈyö mɛnbhɩɩdhe ˗nu ˗wo kë ꞊va ˈˈsɛ ˗ta. ˈˈKɛɛ ˗an ꞊vadhɛ ˗kun ˈwɔnyaakëmɛn ˗nu ˈka. ˗Zlan ˗bha ˈˈkië ˈbha ˗nu ˗de ˈpö ˗wo wo ˗kɔ ˗da ˈwɔnyaakësü ˈgü. ˗Wo ˗go wo ˗yɛɛbhaadhɛ ˈö ˗kë dhaŋgüdhɛ ˈka ˗a ˈgü ˈwo nu ˈˈsɛ ˗ta. ˈPë ˗kë ˈwo˗ ˗kë ˈˈdhʋ̈ ü˗ ˗dɔ ˗ee? ˗Wo ˗kun ˗a ˈˈpiʋ̈ ˈwo kë ꞊dhɛ mɛnbhɩɩdhe ˗nu ˈdhö ˈwo dhe ˗nu ˈsü.

ˈˈKië ˗nu ˈwo bhë ˗wo dhe ˗nu ˗sü ˈwo ˈnën ˗nu kpɔ. ˗An ˗bha ˈnën ˗nu ˈwo ˈˈdhʋ̈, ˗wo ˗kë ˈˈgbɩɩ˗ ꞊faansü, ˈwo ˗kë ˈˈkɛkɛsü. ˗Wo pë ˈˈdhiʋ̈˗ ˗kë mɛn ˗nu ˈka. Zoova ˈyaa kun ˗a ˈˈpiʋ̈ kö ˈwɔn ˗nu ˗wo ˈto ꞊dhɛ ˗kɔ bhë ˗a ˈdhö. ˈYö˗ pö ꞊dhɛ ö ˗dho ˗an ˈgü shiʋ̈ˈˈ dha ˈˈyi ˈkpii˗ ˈka.

ˈˈKɛɛ gɔndë do ˈbha ˗kun ˗dhö, ˈö˗ kë ˗ni ˈgü ˈwɔn kë ˗kɔ ˗nu ˈwaa kun ꞊dhɛ ˗an ˗bha ˈdhö. Zoova ˗dhɔ ꞊dede ˗kun ˗a ˗bha. ˗A gɔndë ˈö ˈˈdhʋ̈, ˗wa ˗dhɛ Noe. Dhebɔ do ˗kun ˗a ˗gɔ ˈyö ˈnëngɔɔn˗ ˗yaaga ˈö kun ˗a ˗gɔ ˈpö. ˗A ˈnëngɔɔn˗ ˗nu ˈwo ˈˈdhʋ̈, ˗wo ˈnën ˈwo ˗tɔ Sɛmö, Kamö waa Ʒafe. Dhe ˗kun ˗a mɛn ˈö ˈdhö ˗a ˗gɔ ˈpö. ˈYö Zoova ˗ya pö Noe ˗dhɛ ꞊dhɛ ˗yö ˈˈyitagɔ ˈkpii˗ ˈö ˗kë ꞊dhɛ ꞊gbëë ˈdhö bhë ˗a ˗pëkë waa ö ˗bha ˈkɔdhigümɛn ˗nu wo ˗bha ˈka kö ˗wo dha. ꞊Waa˗ pö ˈˈyitagɔ, kö ˗wo ˗we ꞊gbëë ˈkpii˗ do ˈö ꞊mɔɔn˗ ˗bha ˈö duŋ ˈˈyi ˗ta ˗a ˈka. ˈYö Zoova ˗ya pö ˈzü Noe ˗dhɛ ˗yö wü ꞊va ꞊dede ˗da ꞊gbëë ˈö bhë ˗a ˈgü kö ˗wo dha ˈpö.

˗Dhɛ ˈö ˗kë ˈˈdhʋ̈, ˈyö Noe waa ö ˗bha ˈkɔɔmɛn ˗nu ˈwo ˗ya ˈˈyitagɔ ˈö ˈˈdhʋ̈ ˗a ˗pëkë ˗sü ˗bha ˈzozodhö. ˗Kwɛ 50 ˈnën ˈwo˗ sü kö ˗wa ˗pëkë. Noe waa ö ˗bha ˈkɔɔmɛn ˗nu ˗wo ˈˈyitagɔ ˈö bhë ˗a ˗pëkë ꞊dhɛ ˗kɔ ˈö Zoova ˗ya pö ˗a ˈka bhë ˗a ˈdhö. ˗A ˈˈtʋ̈ŋ do ˈö bhë ˗a ˈka, Noe ˗yö ö ˗bha ˈˈtʋ̈ŋ ˈgü mɛn ˗nu ˗zokpɔɔ ꞊dhɛ dha ˈkpii˗ ˗dho ban. ˈˈKɛɛ mɛn ˈbha yö ˈti ö ˈˈtʋ ˈto ˗a ˗wo ˗bha.

ˈDhɛ ˗kë ˈˈdhʋ̈, ˈyö ˗da ˈˈyitagɔ bhë˗ ˈgü ˗sü ˈˈtʋ̈ŋ ˗yö ˗wo. ˈPë ˗kë ꞊taabha, kwa ˗dho ˗a ˈbha yö ˗kwɛzlan ˈö dɔ ˗a ˗dhɛ ˈö yö ˗a ˈˈpiʋ̈ ˗a ˈgü.