1925:—⁠˗A ˗kwɛ ˗ya kë këŋ do

PË ˈBHAA ˈKWA KUN KWA ˈˈƝAN ˈTO ˗NI ˈGÜ ˗A ˗GƆ, ˗YÖ ˈTI KË

Biblö ꞊klaŋ ˗nu ˗kun ˗a ˗ga ˗ni ˈgü ˗be ꞊dhɛ ˈˈkpɔnŋtaadhɛ ˗dho kë ꞊bhɔɔ ˈˈsɛ ˈka ˗kwɛ 1925 ˈgü. ˈMën kë? Kwa ꞊dhegblü Alübɛ Shuödëë ˈö ˗kë kwa ˈˈdhiʋʒiöwomɛn do ˈka ꞊taabha bhë, ˗ya ˗pö: «Kwa ˗kun ˗a pö ˗ni ˈgü ꞊dhɛ Klito ˗bha ˈˈɲɔn ˗a ꞊troo ˗nu ˈwo kun ˈˈsɛ ˗ta yö ˗wo ˗dho ˈdho ˗a ˗bha ˗Gblüdëdhɛ ˈgü dhaŋ˗ ˈgü. ˗Klu ˗Zlan ˗bha ˗mɛn ˗nu ˈwo kun ˗kwɛŋzü ꞊dhɛ Ablaamö, Davi waa˗ mɛn ˈˈwɛɛ ˈbhaa ˗nu ˈdhö bhë ˗wo ˗dho ˈgo ga ˈgü kö ˗wo kë ˗Gblüdë gbö ˗nu ˈka, ˗wo ˈˈdhiʋ̈sü mɛn ˗nu ˈka ˈˈsɛ ˗ta yö.» ˈˈKɛɛ ˈdhɛ ˈwɔn ˗nu ˈwo ˈˈdhʋ̈ ˗wo ˈti kë ˗kwɛ ˈö bhë ˗a ˈgü, kwa ꞊dhegblü ˈbhaa ˗nu ˈgü ˗yö ˗ga.—Prov. 13:12.

ˈKö ˗kë ˈˈdhʋ̈, ˗a mɛn ꞊vadhɛ ˗kun ˗zlanwopö ˗ni ˈgü ˗kplawo ˈwo dho ˈwo˗ yö ꞊dhɛ ˗a ˗dhɛ ˈö ˗wɔn ˈdhö ˈˈgbɩɩ˗ ꞊dedewo ˈnën ˗tɔ wo ˗bha ˗kë Zoova ˗bha ꞊Gbɛkiö ˈka ˗sü. ˗A ˈwɔnzuan ˈnën ˗tɔ ˗wo ˗bɔ ꞊ladio ˗ta ˈwo gagade ˗wɔn ꞊blɛɛ mɛn ꞊va ꞊dede ˗dhɛ.

KWA ꞊LADIO ꞊VA ˗YÖKË

˗Kwɛ 1924 ˈgü, mɛn ꞊vadhɛ ˗wo wo ˈˈtʋ ˗to ꞊ladio ˈö ˗kë WBBR ˈka bhë ˗a ˗bha. ˈˈKɛɛ ˈdhɛ kwa dɔ ˗kwɛ 1925 ˈgü, Biblö ꞊klaŋ ˗nu ˗wo ꞊ladio do ˗tiaandhö ˈbhaa ˗yökë Shikago ˗dhɛ ˈˈsuee, Ilinɔa ˈˈpian ˗ta. ꞊Ladio ˗dɛɛ ˈö ˈˈdhʋ̈ ˗wo ˗kun ˗a ˗dhɛ ˗ni ˈgü «WORD.» Rafö Leflɛɛ ˈö ˗kë ꞊ladio ˈö bhë ˗a ˗yökëmɛn do ˈka, ˗ya ˗pö: «ˈˈNɛɛnnɛn ˈˈtʋ̈ŋ ˈgü gbeŋ, mɛn ꞊va ꞊dede ˈwo kun mü ꞊gblɛɛn bhë ˗wo wo ˈˈtʋ ˗to ꞊ladio ˈö ˈˈdhʋ̈ ˗a ˗bha.» ˗A ˈwɔnzuan ˈnën ˗tɔ ˈkɔdhigümɛn do ˈwo kun ˗ya ˗sü ˈka ˈˈkidhʋŋ 5.000 ˗naan ꞊taa Alasüka, ˗wo wo ˈˈtʋ ˗to ꞊ladio ˗bha ˈˈwɩ ˗sü ˗blɛɛsü ˗bha. ˈDhɛ ˈwo wo bo wo ˈˈtʋ ˈto ˗sü ˈka, ˗wo ˈsëëdhɛ ˗bɔ mɛn ˗nu ˈwo kun ˗yökë ˗ni ˈgü ꞊ladio ˈgü ˗an ˗dhɛ ˈwo ˗an ˈˈnuɛ bho ˗an ˗bha wo ˗takun ˗sü ˗bha kö ˈwɔn ˈö ˗gban ˗Zlan waa Biblö ˗an ˗bha bhë ˈwo ˗an dɔ.

ˈˈGlaadhiʋ̈ ˗tɔn ˈö yö ˈˈkpɛnŋ ˗kwɛ 1925 Desanblö 1 ˈgü bhë ˗yö ˈpë kë ˈö mɛn ꞊va ꞊dede ˗wo wo ˈˈtʋ to ꞊ladio ˗bha mü ꞊gblɛɛn ˗a ˗blɛɛ, ˈö˗ pö: «꞊Ladio ˈö bhë ˗yö ꞊ladio ˗nu ˈwo Zeta zuni ˈö ꞊faan ˈdhö ˗an ˗bha, ˗a do ˈka. Mɛn ˗nu ꞊mɔɔn˗ ˗bha kö ˗wo wo ˈˈtʋ ˈto ˗a ˗bha ˈɲënŋ˗ ˗wo ˗ʒian waa˗ ˗pö ˗ʒian ˈka Zeta zuni, Kuba waa Alasüka ˈˈdhuŋ ˗ʒian ˈka. Mɛn vadhɛ ˈö ˗wo ˈti gagade man do bhë ˈdhɛ ˈwo˗ man, ˗yö ˗kë ˗an ˗dhɛ ˗së ꞊dedewo.»

ˈˈTʋ̈ŋ do ˈö bhë ˗a ˈgü, Biblö ꞊klaŋ ˗nu ˗wo wo ˈgü ˗dɔ ˈˈgbɩɩ˗ ˈpö kö ˈwo bɔ ꞊ladio ˗ta ˈwo nɔɔn˗ ˗së pö Kanada. ˗Kwɛ 1924 ˈgü, ꞊ladio ˈö˗ ˈtɔ ˗yö ˗kë CHUC ˈka bhë kwa˗ ˗yökë Sakatɔnö, Sakashewan ˗dhɛ ˈgü. ˗Yö ˗kun ˗zlanwo ˗nu ˗bha ꞊ladio ˗blɛɛsü ˈka. ˈDhɛ kwa dɔ ˗kwɛ 1925 ˈgü, ˗an ˗bhawɔn ˗kun ˗dhɛ ˈˈgbɛɛdhɛ do ˗bha kö ꞊ladio ˈö ˈˈdhʋ̈ ˗wa dɔ mü. ˗A ˗wɔn ˈgü, kwa ˗bha ˗kɔlokota ˗yö ˗dhɛ ˈkpii˗ do ˈwo kun teatrö kë ˗ni ˈgü mü Sakatɔnö bhë ˗a ˗dhɔ ˈö˗ ˗baa ˈwo ꞊ladio dɔ mü.

Mɛn ꞊va ˈwo kun ˗pɛn ˗sü ˈka ˈˈkwipö ˈnën ˈsɛɛn˗ ˗nu waa ˈpödhɛ ˗nu ˈgü Sakashewan bhë, ˗wo ˗bɔ ˗a ꞊ladio ˗ta ˈwo nɔɔn˗ ˗së man. ˗A ˈwɔnzuan ˈnën ˗tɔ dhebɔ do ˈwo kun ˗a ˗dhɛ ˗ni ˈgü Madamö Glaamö ˈö kun ˗ya ˗sü ˈka Mekagö ˈˈkwipö do ˈö kun mü ꞊gblɛɛn ˗a ˈgü bhë, ˗ya ˗pö ꞊dhɛ ˗wo ˈsëëdhɛ ˈö Biblö ˈgü ˗pʋ ˗a ˈbhaa bɔ ö ˗dhɛ. Kwa ꞊dhegblü Ʒɔɔʒö Nashö ˗ya ˗pö: «Dhebɔnën ˈö bhë ˗a ˗bhawɔn ˗kun ˈsëëdhɛ ˗bha ꞊dedewo. ˗A ˗wɔn ˈgü, yi Études des Écritures ˗be ˗todhʋ̈sü ˗bɔ ˗a ˗dhɛ.» ˗A ˗dhɛ ˈti ˗gwëë ˈö Madamö Glaamö ˗yö ˗ya ˗Gblüdëdhɛ nɔɔn˗ pö ˗sü bha, ˈö dho˗ ˈka ˗ʒianwo mü ꞊gblɛɛn.

KWA GAGADE ˗WƆNGBƖƖSÜ DO ˗DRAAN

˗Kwɛ 1925, Masö 1 ˗bha ˈˈGlaadhiʋ̈ ˗tɔn ˈgü, ˈwɔn ˗gɔ do ˗së ˗kun mü ˈwo˗ ˗dhɛ «La Naissance de la nation.» ˈMën kë ˈö ˈwɔn ˗gɔ ˈö bhë ˗a ˗wɔn kun ˈˈgbɩɩ˗? Biblö ꞊klaŋ ˗nu ˗kun ˗a ˈwɔn dɔ ˗ni ˈgü ꞊dhɛ Sɔtraan ˈnën ˈˈdhiʋ̈sü ˗zuu yaa ˗nu, ꞊sua ˗zlanwo ˗nu, ˈˈsɛkɔɔnmɛn ˗nu, ꞊nɔɔn mɛɛnˈˈ ˗mɛn ˗nu ˈwo ˈˈsɛ ˗ta yö ˗an ˈka. ˈˈKɛɛ gwëëmi ˗towotasü ˈö ꞊kpɔɔsü ˗yö ˗bɔ ˈwɔn ˗gɔ ˈö bhë ˗a ˗ta kö ˈkwa˗ yö ꞊dhɛ Zoova ˗de ˈpö ˗a ˗bha ˗kɔlokota ˗yö ˗dhö, ˈö waa Sɔtraan ˗bha ˈwaa do toŋtoŋdhö. (Mat. 24:45) Gwëëmi ˗towotasü ˗yö ˗go mü ˈö˗ pö ˗Zlan ˗bha ˗Gblüdëdhɛ ˗yö ˗ya ˗kwɛ 1914 ˈgü. ˗Kwɛ ꞊dede ˈö bhë ˗a ˈgü ‹˗gblü ˈö ˗da dhang˗ ˈgü› bhë, ˗yö Sɔtraan waa ˗zuu yaa ˗nu ˗an ˗bho dhaŋ˗ ˈgü ˈö ˗an ˗zuö kwa ˈˈpiʋ̈ ˈˈsɛ ˗ta yö.—Dhɛ. 12:​7-9.

Biblö ꞊klaŋ ˈbhaa ˗nu ˈti ˈˈwɩ ˈwɔn ˈgüman ˗kɔ ˗dɛɛ ˈö ˈˈdhʋ̈ ˗a ˗bha. ˗A ˗wɔn ˈgü ˈwɔn ˗gɔ ˈö bhë ,˗ya ˗pö: «꞊Ya kë ꞊dhɛ mɛn ˈbhaa ˈö ˈka ˈˈGlaadhiʋ̈ ˗tɔn ˈö bhë ˗a ˗wo pö ˗yö ˈti ka ˗zokun, ˗ka ka zuʋ̈ˈˈ kë ˗saa ˈka ˈdhaŋ˗ bho Zoova ˈˈdhiʋ̈ kö ˈka˗ ˗dhɔ kë ˗kplawo.»

Tɔmö Ɛɛ ˈö kun ˈsëëdhɛ ˗glu ˗mɛn ˈka (꞊dɛɛ, kwa ˗an ˗dhɛ ˗yödhiʋ̈) ˈö go Bletaɲö bhë ˗yö ˗kɔ ˈö Biblö ꞊klaŋ ˗nu ˗wo ˈwɔn ˈgüman ˗kɔ ˗dɛɛ ˈö bhë ˗a yö˗ ˈka ˗a ˗blɛɛ ˈö˗ pö: «ˈWɔn ˈgüman ˗kɔ ˈö kun ˈˈDhɛbhowɔnta ˈsëëdhɛ ˈˈɲan ˈˈgblʋ̈gblʋ̈ 12 ˈgü bhë, ˗yö ˗kun kwa ꞊dhegblü ˗nu ˗dhɛ ˗së ꞊dedewo. ˈDhɛ ˈyi˗ yö ꞊dhɛ ˗Zlan ˗bha ˗Gblüdëdhɛ ˗ya ˗ya ˈsaadhö dhaŋ˗ ˈgü, nɔɔn˗ ˗së ˈö bhë ˗a ˗blɛɛ mɛn ˗nu ˗dhɛ ˗sü ˗lele ˗kun yi ˗ta ꞊dedewo. ˗Yö yi ˗blü ˗zlanwopö yi ꞊sɔbhɛɛ ˈka ˗sü ˗bha ˈyi mɛn ˗nu ˗takun, ˈö go mü ˈyi˗ yö ꞊dhɛ Zoova ˗dho ˈwɔn ˗së ꞊va kë ˗dhɛkpaɔ dhiʋ̈ˈˈ ˈgü.»

ZOOVA ˗WƆN ˗BLƐƐ MƐN ˗NU ˗DHƐ ˗SÜ

꞊Dɛɛ, Zoova ˗bha ꞊Gbɛkiö ˗nu ˗wo Isaïe 43:10 ˈö˗ pö ꞊dhɛ ‹ka ˈnën ˈka ˗tɔ n ˗man ꞊gbɛkiö ˗nu, ꞊ii n ˗dhɔkëmɛn ˈa n ˗kɔ ˗yɛ ˗a ˗bha› bhë, ˗a ˗wɔn ˗blɛɛ. ˈˈKɛɛ kö ˗kwɛ 1925 ˗yö ˈti ˗wo ꞊köŋ, Biblö ˈˈɲan ˈö bhë ˈkwaa kun ˗a ˗wɔn blɛɛˈˈ ˗ni ˈgü zoodhö zoodhö. ˗A yi ˗ya ˗wo kö ˈkwa kwa ˈˈtʋ̈ŋ kë ˗a ˈgü. ˗Kwɛ 1925 ˈgü, kwa ˗bha ˈˈGlaadhiʋ̈ ˗tɔn ˈˈnimlɔn 11 ˗bha ˗naan ˗yö Isaïe 43:10; 12 ˗wɔn ˗blɛɛ!

˗Kwɛ 1925 ˈgü kö ˈUtö ˈˈsu ga ˗yi ˈyaa mü ꞊gblɛɛn ˈzü, Biblö ꞊klaŋ ˗nu ˗wo ˗dho wo ˈkwëëdhö ˗bhɔkwëë ˈkpii˗ do ˗ta Ɛndianapolisö, Ɛndiana ˗sɛ ˈgü. Kwa ꞊dhegblü Zozɛfö Lutɛɛfɔdö ˗yö dhiaŋ zü ˗dɔ ˗a ˗ta ˗wo ˈö kun ˗bɛnzë ˗sü ˈka kwa ˗bha ploglamö ˗ta ˗a ˗wo ˗pö. ˗Yö ˗kun pö ˗sü ˈka: «Kwa ˗nu ˗bhɔkwëë ˈkpii˗ ˈö yö ˗a ˗ta kö ˈkwa ꞊faanmëndhe ꞊slɔɔ kwa Dëmɛn ˈˈpiʋ̈, kë ˈˈdhʋ̈ kö ˈkwa kwa ꞊yɛɛ˗ kë ˈkwa ꞊gbɛkiödhɛ kë kwa ꞊sɔbhɛɛ ꞊dede ˈka.» ˗Dhɛkpaɔyi ˈˈsaaga ˈˈpiʋ̈, ˗wo ˈˈtʋtomɛn ˗nu ꞊faanmën kö ˗wo Zoova ˗wɔn blɛɛˈˈ ˈˈtʋ̈ŋ waa ˗dhɛ ˈˈpɛpɛ ˈgü.

ˈDhɛ ˈkwa dɔ ˈUtö 29 ˈˈSiyi ˈka, kwa ꞊dhegblü Lutɛɛfɔdö ˗yö ˈˈdhɛɛtadhiaŋ˗ do ˈö˗ ˗gɔ ˗kë «Appel à l’action» ˈka bhë, ˗a ˗zë. ˗Ya ˗zɔn ˗a ˈgü ꞊dhɛ ˗zlanwopösü ˗wɔn ˗yö ˈˈgbɩɩ˗ ꞊dedewo, ˈö˗ pö: «Zoova ˗ya ˗pö ö ˗bha ˈˈsɛgümɛn ˗nu ˗dhɛ: ‹Ka ˈnën ˈka ˗tɔ n ˗man ꞊gbɛkiö ˗nu. [ . . . ] Man ˈnën ˗a ˗tɔ ˗Zlan.› Kwa ꞊dhegblü ˗yö ˗go mü ˈö˗ pö: ‹˗Ka ˈˈsɛgümɛn ˗nu ˗bha ˗ʒian ˗pëkë.› ˈˈSɛgümɛn ˗nu ˈwo ˈˈkpɔnŋ ꞊taa yö ˈwo ꞊mɔɔn˗ ˗bha kö ˗wo ꞊gbɛkiödhɛ kë Zoova ˗bha ˈka ˈnën ˈwo ˗tɔ ˗a ˗dhɔkëmɛn ˗nu ˈö˗ ˗bha ˗zuu ˈˈslʋ̈ʋ̈slʋ̈ ˈdhö ˗an ˗ta.»—Is. 43:12; 62:10.

ˈDhɛ kwa ꞊dhegblü Lutɛɛfɔdö ˗yö ö bo ˈˈdhɛɛtadhiaŋ˗ zë ˗sü ˈka, ˗yö ˈsëëdhɛ do ˈbhaa ˈö ˗kë «Le message d’espoir» ˈka bhë ˗a ˗wo ˗pö. ˗Yö ˗kun ˗a pö ˗ni ˈgü: «˗Zlan ˗bha ˗Gblüdëdhɛ dosɛnŋ ˈnën dho nu ˗yadeflëëgüsü ꞊dede, ꞊bhɔɔ, ˗kë ö ˈflëëgü ˗sü, ˗tosɛta, ˗potaadhe waa zuʋ̈gblüdhi ˈö˗ ˈˈdhiʋ̈todhɛ ˈyaa ˈdhö ˗an ˈka.» ˈWɔn ˈö bhë ˗wa ꞊dhiëëta ˗wo ꞊va ˈgü, ˈwo˗ ˈsëëdhɛ ˈˈpɛn ˗nu ˗yökë, ˈwo˗ ˈdhɛ ˗mɔn ˈˈmliɲɔn 40 ˗bha ˗a ˗glu.

Biblö ꞊klaŋ ˗nu ˗wo ˈti ˈto mü kö ˈtɔ ˈö ˗kë Zoova ˗bha ꞊Gbɛkiö ˈka bhë ˈwa ˗ya wo ˗bha, ˗wo ˗kwɛ ꞊va ˈbhaa ˈˈdhiʋ̈ ˗gan. ˈˈKɛɛ ˗wo ˗kun ˗a yö ˗ni ˈgü ꞊dedewo ꞊dhɛ Zoova ˗wɔn ˗blɛɛ mɛn ˗nu ˗dhɛ ˗sü ˗yö pë ˗wɔngbɩɩsü ꞊dede ˈka wo ˗bha ˈka.

BIBLÖ ꞊KLAŊ ˗NU ˗WO ˗WOMƐNDHƐSÜ ZÜ ˗BHO

ˈDhɛ kë ꞊dhɛ mɛn ꞊va ꞊dede ˗kë Biblö ꞊klaŋnën ˗nu ˈka bhë, kwa ˗bha ˗kɔlokota ˗yö kwa ꞊faanmën kö ˈkwa ˈsëëdhɛ ˗glu mɛn ˗nu ˗ta. ˈˈKɛɛ kö mɛn ˗nu ˈwo ˗we nɔɔn˗ ˗së ˗bha bhë, ˈkwa ˗wo ˗an ˗dhɛ. ˈDhɛ ˈkwa kwa bo ˈsëëdhɛ ˈˈpɛn Le message d’espoir ˗glu ˗sü ˈka mɛn ˗nu ˗ta, kwa ˗bha Bulletina ˗ya ˗pö: «Mɛn ˗nu ˈö ˈka ˈsëëdhɛ ˈˈpɛn «Le message d’espoir» to ˗an ˗gɔ bhë, ka ˗wo ˗an ˗dhɛ ˈzü.»

Kwa ˗bha Bulletin ˈö yö ˈˈkpɛnŋ ˗kwɛ 1925 Zanvie ˈˈsu ˈgü bhë, ˗yö ˈwɔn ˈö ˗gban Biblö ꞊klaŋnën ˗nu ˈwo kun Plano, Tɛsasö ˈˈpian ˗ta bhë ˗an ˗bha ˗a ˗blɛɛ ˈö˗ pö: «ˈKwa kwa ꞊yɛɛ kë ˈdhɛ ˈkwa ˗zlanwopö ˗a ˗bha ˈˈdhiʋ̈ ˗be ˗a ˈgü, mɛn ˗nu ˗wo wo ˈˈtʋ ˈto kwa ˗bha ˗së ˈka ˈö ˗ʒiö ˗a ˈka ˈdhɛ ˈkwa ˗zlanwopö ˗a ˗bha ˗dɛɛ ˈgü bhë ˗a ˗ta. ˈˈKwipö ˈnën ˈˈtɩtɩ do ˈbhaa ˈö yi ˗bha ˈˈyasa ˈgü bhë, yi ˗zlanwopö mü ˗gɛnɲan ˈka ꞊va ˗kwɛ ˗kɔŋ do ˈwo ˗ʒiö yö ˗an ˈˈpiʋ̈. ˗A yi ˈti ꞊gwëë ꞊köŋ ˈö kwa ꞊dhegblüdhe Ɛndrisö waa n dhe ˗wo dho mü ˈwo ˗zlanwopö, ˈwo kwa ˗bha ˈsëëdhɛ ˗be ꞊va ꞊dede ˈto mɛn ˗nu ˗gɔ.»

Panama ˗sɛ ˈgü, kwa ˗bha ˈsëëdhɛ ˗glu ˗mɛn do ˗ya ˗pö: «Mɛn ꞊vadhɛ ˈö ˈwaa kun wo ˈˈtʋ ˈto ˗ni ˈgü n ˗bha ˈˈdhiʋ̈ ˗be bhë, ˈman n ꞊yɛɛ kë ꞊plɛ ɛɛnˈˈ ˗yaaga ˗bha ˗naan wo ˗an ˈˈpiʋ̈ ˗wo wo ˈˈtʋ to n ˗bha. ˗Kwɛ ˈö yö ˗a ˈgü, a ˈˈtʋ̈ŋ ꞊va ˗kë ˗wo mɛn ˗nu ˈa ˗zlanwopö ˗an ˗dhɛ ˈˈdhiʋ̈ ˗be bhë ˗an ˗dhɛ ˗sü ˈgü, ˈa ˈwɔn ˗së ꞊va ꞊dede ꞊slɔɔ ˗a ˈgü.»

KWA ˈˈƝAN ˗YÖ ˗DHƐKPAƆ DHIƲ̈ˈˈ ˗GƆ

˗Kwɛ 1925 ˈˈdhiʋ̈tadhɛ ˈgü, kwa ꞊dhegblü Lutɛɛfɔdö ˗yö ˈsëëdhɛ ˗bɔ ˗yödhiʋ̈ ˗nu ˗dhɛ. ˗Yö ˗zlanwopö ˗yö ˈwo˗ ˗kë ˗kwɛ ˈö bhë ˗a ˈgü waa˗ ˗dhɛ ˈwo dho ˗a kë ˗kwɛ ˈö dɔ ˗a ˈˈpiʋ̈ ˗a ˈgü ˗a ˗wɔn ˗blɛɛ ˗an ˗dhɛ ˈö˗ pö: «˗Kwɛ ˈö ˗ʒiö yö ˗a ˈgü, mɛn ꞊vadhɛ ˈö ˗wëë kun bɔ ˗ni ˈgü ˗an ˗ta bhë ka ˗an ˗zogban ˈö ka ꞊dede ka zuʋ̈ˈˈ ˈˈgblü ˗yö dhi. ˈˈKɛɛ ˗kwɛ ˗dɛɛ ˈkwa dho ˗da ˗a ˈgü yö ˗a ˈka, ka ˗dho ˗Zlan waa ö ˗bha ˗Gblüdëdhɛ ˗an ꞊gbɛkiödhɛ kë mɛn ꞊va ꞊dede ˗dhɛ kö mɛn ˈwo˗ ˗dhɔkëmɛn ˗nu ˈka bhë ˈka˗ ˗zɔn ˗an ˗dhɛ. Mɛn ˈˈpɛpɛ ˗kwa kpa kwa ˈkwëë˗ kö ˈkwa ˗Zlan waa kwa ˗bha ˗Gblüdë ˗an ˈtɔ bhɔ ˗tan bho kwa ˗wo ˗ta.»

˗Kwɛ 1925 ˈˈdhiʋ̈tadhɛ ˈgü, kwa ꞊dhegblü ˗nu ˗wa ˗ya wo ˗zo ˈˈpiʋ̈ ꞊dhɛ wo ˗dho kwa ˗bha Betɛdhö ˈö Bluklinö bhë ˗a ˗dhɛ kë ˈˈgbɛɛ. ˗Kwɛ 1926 ˈgü, ˗wo ˗ya kwa ˗bha ˗kɔlokota ˗bha yö ˈˈgblʋ̈gblʋ̈ ˗nu ˈö ˗an ꞊suu ˈti kë do bhë ˗an ˗bha.