2 Tungkori

34 Gyozaaya da nyɛɛ yuomo anii saŋa na oŋ wa leɛ naa na, o da de la yuomo 31 di a naaloŋ Gyɛruzɛlɛm poɔŋ. 2 O da erɛɛ yɛlɛ naŋ soma Jehoova nimitɔɔreŋ a kyɛ kyɛnɛ o sããkoma Deevid soe na poɔŋ, o da ba leɛ tuli gaa duluŋ bee gɔɔ. 3 O naaloŋ diibu yuomo anii poɔŋ, saŋa na oŋ da naŋ e bibile na, o da piili boɔrɛɛ o sããkoma Deevid Naaŋmen na; o naaloŋ diibu yuomo pie ne ayi poɔŋ, o da piili iree a ziduoree ane a bag-daare, a bag-pɛnnee, ane baga ba naŋ de kuree maale yire Gyuuda ane Gyɛruzɛlɛm poɔŋ. 9 Beŋ la baŋ da wa a ŋmenpuore wedeɛrɛ Hilikaiya zie, a de Naaŋmen die libie na koo, ana ka a Liivai noba naŋ da tonɔ aŋa denɔkaareba naŋ da de yi a Manaase bale na noba, Eefiraim bale na noba, ane a Izerayɛl biiri zaa naŋ kyɛre na zie, ba da de aŋ yi a Gyuuda bale na, Bɛŋgyamen bale na ane noba na zaa naŋ kpeɛrɛ Gyɛruzɛlɛm teŋɛ na poɔŋ. 10 Ba da de aŋ ko noba na baŋ da kaa iri ka ba e zukaareba Jehoova die toma zu na. Noba naŋ da tonɔ toma Jehoova dieŋ na da de la a libie maale Jehoova die ziiri na naŋ da sãã na aŋ leɛ soma. 14 Saŋa na baŋ da derɛ a libie na noba naŋ de waneŋ Jehoova die na, ŋmenpuore wedeɛrɛ Hilikaiya da nyɛɛ Jehoova Bege gane na oŋ da tu Moosis zie kyɛ de tere na. 18 A gaŋsɛgrɛ Seefaŋ meŋ da yelko la a naa ka: “Ŋmenpuore wedeɛrɛ Hilikaiya de la gane kaŋa ko ma.” Ka Seefaŋ da piili kanna a gane a naa nimitɔɔreŋ. 19 Saŋa na a naa naŋ wa woŋ yelbie naŋ be a Bege gane poɔŋ na, o da kyeɛrɛɛ o bonsuurii. 20 Ka a naa yelko Hilikaiya, Ahaikam Seefaŋ bidɔɔ, Abidɔn Maika bidɔɔ, gaŋsɛgrɛ Seefaŋ, ane Asaaya a naa toŋtonɔ ka: 21 “Yɛ gaa, yɛ are N gbɛbɔgriŋ ane noba zaa naŋ kyɛre Izerayɛl paaloŋ ane Gyuuda poɔŋ gbɛbɔgriŋ kyɛ peɛre yɛlɛ yi Jehoova zie a kyaare yelbie naŋ be a gane na ba naŋ nyɛ na poɔŋ; bonso Jehoova sutuloŋ naŋ waana te zuŋ na eɛ kpoŋ, te sããkommine naŋ ba de Jehoova yelbiri toŋ neŋ toma a kyaare baŋ na tuuro yɛlɛ na zaa baŋ sɛge eŋ a gane poɔŋ na.”