Joob

2 A lɛ puoreŋ, bebiri na a yelmeŋɛ Naaŋmen bidɔba naŋ maŋ kpɛ te are Naaŋmen nimitɔɔreŋ na da taɛ la, baŋ da kpɛ Naaŋmen zie ka Setaana meŋ tu ba kpɛ be a te are Jehoova nimitɔɔreŋ. 2 Ka Jehoova yelko Setaana ka: “Yeŋ ka ho yi wa?” Ka Setaana yelko Jehoova ka: “N da yuoɔrɛɛ a tendaa zu, a kyɛnɛ o poɔŋ meŋ, beŋ la ka N yi wa.” 3 Ka Jehoova soore Setaana ka: “Ho nyɛɛ N toŋtonɔ Gyoob? Neɛzaa kye a teŋɛzuŋ a waa ŋa lɛ na oŋ waa na. O eɛ dɔɔ naŋ e yelmeŋɛ soba, a zoro Naaŋmen a kyɛ kyiire yelfaare meŋ. O naŋ nyɔgɛɛ o yelmennoŋ kpeɛŋaa, aneazaa ka ho boɔrɔŋ ka N iri zɔɔ ne o, a saamoo saŋa na oŋ ba e yelfaa zaa.” 4 Kyɛ ka Setaana iri a noɔre ko Jehoova ka: “Eŋgane na tɛgɛɛ eŋgane. Nensaalaa na de la bonzaa oŋ taa tere kyɛ na deɛ o nyɔvore. 5 Kyɛ, hooŋ leɛre yɛlɛ nyɛ, teɛ ho nu a seene o kɔɔree ane o eŋgane, a nyɛ ka o koŋ yel yelfaare kyaare bo ho niŋesogɔŋ bee.” 6 Beŋ la ka Jehoova yelko Setaana ka: “Nyɛ! O be la ho nuuriŋ! Kyɛ ta wa ire o nyɔvore yɛŋ!” 7 Beŋ la ka Setaana yi Jehoova nimitɔɔre a gaa te eŋ Gyoob natesɔglɔ naŋ beɛrɛ yaga zaa a yi o zu-sogɔ te ta o gbɛ-poɔ. 8 Beŋ la ka Gyoob da de duglee kaŋa naŋ ŋmare a koɔrɔ o eŋɛ, o da zeŋ la tampɛloŋ poɔŋ. 9 A baaraa zaa o pɔge da yelkooŋ ka: “Ho naŋ kyɛnɛ nyɔgɛɛ ho yelmennoŋ kpeɛŋaa? Yel yelfaare dɔgle Naaŋmen kyɛ kpi!” 10 Kyɛ ka Gyoob yelkoo ka: “Ho yelee yɛlɛ aŋa a pɔge daŋbolo na kaŋa. Ka lɛ bonsonne yoŋ teŋ na deɛ yi a yelmeŋɛ Naaŋmen zie a kyɛ zagre ka te deɛ bonfaare yɛŋ bee?” A yɛlɛ ŋa zaa poɔŋ, Gyoob da ba de o noɔre yel yelfaa zaa.